Itre Huliwa 5:1-42
5 Nge hnene la ketre atr, Anania la ëjen me Safaira föi angeic, hna salemëne la ketre hlapa.
2 Ngo hnei angeice hna xome juetrëne la sine la thupene lai hlapa, nge atre hi föi angeic. Thupene lai, angeic a tro fë pi la mani kowe la itre aposetolo.
3 Öni Peteru jë hi koi angeic ka hape: “Anania, hnauë eö a nue Satana troa axetine la hni eö matre thoi kowe la uati hmitrötr, me xome juetrëne la sine la thupene la hlapa?
4 Qëmekene troa salemëne lai hlapa, hapeu, tha ewekë i eö kö? Nge thupene la hna salemën, hapeu, tha ewekë i eö kö lai mani? Nga hnauëne la eö a eköthe la ngazo ka tru celë e kuhu hni eö? Tha eö kö lai a thoi koi atr, ngo koi Akötresie.”
5 Ame ju hi la Anania a drenge la itre trengewekë celë, kei pi hi angeic a mec. Ame hna traqa pi la xou kowe la itre ka drenge lai.
6 Haawe, mejë jë hi la itre nekö trahmanyi troa hakuthi angeic, me xututhi angeic, me tro sai angeic e trön, me kelemi angeic.
7 Nge thupene la köni hawa, traqa pi fe hi la föi Anania, ngo thatre kö angeice lo ewekë ka traqa.
8 Öni Peteru jë hi koi angeic ka hape: “Pane qaja jë eö koi ni, kolo hi lo thupene hlapa hnei epone hna salemën?” Sa jë hi angeice ka hape: “Öö, thupene hi lai?”
9 Öni Peteru jë hi: “Hnauëne la eö a ce xöle troa tupathe la ua i Iehova?* Ke hanawang! E celë hë qëhnelö la itre ka keleme la föi eö, nge tro fe angatr a hane xomi eö.”
10 Thupene ju hi lai, kei pi fe hi angeic qëmekene la lue ca i Peteru me mec. Ame hna traqa pi la itre nekö trahmanyi a öhnyi angeic a meci hë. Matre angatr a xomi angeice jë a tro trön, me ce keleme me föi angeic.
11 Qa ngöne lai, traqa pi hi la xou kowe la ekalesia asë, me kowe mina fe la itre atr ka drei mejene la ewekë cili.
12 Nge itre aposetolo pala hi a kuca la itre iamamanyikeu ka tru, me itre ewekë nyine hain nyipine la itre atr. Nge angatre pala hi a majemine icasikeu fene lo itre Ikapa i Solomona.
13 Matre kola qaja atrunyi angatr hnene la itre atr. Ngo ame pe, pëkö atre mele thoi ka mekune troa hane icasikeu me angatr.
14 Nge ketre, kolo pala hi a nyixane la etrune la itretre lapaune koi Joxu hnene la ka ala nyim, itre trahmanyi me föe.
15 Angatr a tro fë la itre ka wezipo e cahu gojeny, me amë hune ili, matre e traqa ha Peteru, tro la iahnue i angeic a tro hune la itre xan e angatr.
16 Nge ketre, kolo fe a traqa itronyi la itre atr qa ngöne la itre nöje xötreith me itre wezipo i angatr, me itre hna adremonin, ame hna aloinyi angatr asë ju.
17 Ame hna cile hnene la atre huuje ka sisitria me itre ka ce me angeic, ene lo itre ka sine la lapa* ne la itre Sadukaio, ke zalu catre angatr.
18 Angatr a xolouthe* ju la itre aposetolo, me kuiën hnine kalabus.
19 Ngo e heji hë, hnene la angela i Iehova* hna fe la kalabus, me xomi angatre qaa lai, me hape:
20 “Tro jë kowe la uma ne hmi, nge cile ju e cili, nge the mano kö nyipunie cainöjëne kowe la itre atr la pengöne la mele celë.”
21 Thupene lai, angatr a lö jë hnine la uma ne hmi e kaqa ne lai, me nyiqaane hamë ini.
Nge ngöne la ijine cili, hnene la atre huuje ka sisitria me itre ka ce me angeic, hna hëne la iatrene la Hnakootre Ka Tru i Angetre Iudra, me itre qatre ne la nöje Isaraela troa icasikeu. Matre angatr a iupi jë troa thenge la ange aposetolo hnine la kalabus, me traqa sai angatr.
22 Ngo ame ju hi la kola traqa hnine la kalabus hnene la itretre thup, patre hë lo ange aposetolo, matre angatr a bëeke jë me qaja
23 ka hape: “Traqa ha eahuni a öhne la kalabus a hna kiin, nge hna thupëne hnyawa, nge kola cile la itretre thup e cili, ngo ame la eahuni a fe la kalabus, pëkö ca atr hne huni hna öhn.”
24 Haawe, ame ju hi la kola drenge lai hnene la tane la itretre thupëne la uma ne hmi, memine la itre tane i angetre huuj, isa goe catre ju hi angatr, ke tha trotrohnine kö angatre la ewekë ka traqa.
25 Ngo hnene la ketre atr hna traqa koi angatr me hape: “Höö, ame lo itre atr hnei epuni hna akalabusin, angatr a cil hnine la uma ne hmi me hamë ini kowe la itre atr.”
26 Ame hnene la itretre thupëne la uma ne hmi me tane i angatr, hna thei ange aposetolo me tro sai nyudreni hnyawa, ke xou i angatr e tranyi angatr pi hnei etë hnene la ka ala nyim.
27 Hnene pë hë la itretre thup hna tro sai ange aposetolo qëmekene la Hnakootre Ka Tru i Angetre Iudra. Ame hnene la atre huuje ka sisitria hna nyiqaane hnying koi angatr
28 me hape: “Hne huni lo hna wathebo epuni troa hamë ini ngöne la ëje cili, ngo hanawang! Ase hë epuni haöthe la Ierusalema asë hnene la ini i epun, nge epuni fe a thele troa nyizö huni la madra ne la atre ce.”
29 Ame hnei Peteru me ange aposetolo hna qaja ka hape: “Hnëqa huni la troa drengethenge Akötresie hune la atr.
30 Nge hnene la Akötresi ne lo itre qaaqaa huni hna amele Iesu hmaca, lo hnei nyipunieti hna jei faon me humuth hune la sinöe.*
31 Hnei Akötresieti fe hna atrunyi Iesu, me acili Iesu ngöne la götrane maca i nyidrë troa Atre Itrosai me Atre Iamele, matre ijije troa ietra hnene la angetre Isaraela, me köletrije la itre ngazo i angatr.
32 Nge hne huni hna sipu öhne la itre ewekë cili, me öhne la uati hmitrötr hnei Akötresieti hna hamën thatraqane la itretre sajuëne la musi cile i nyidrë.”
33 Matre ame ju hi la kola drenge lai hnene la hnakootr, elëhni* jë hi angatr, nge angatr a thele jë troa humuthe la ange aposetolo.
34 Nge e cili fe la ketre Faresaio, Gamaliela la ëjen, ketre atre inine la Wathebo, nge hna wangatrun ngöne la nöj. Angeic a cile ju nyipine la Hnakootr, me amekötine troa pane lö sai ange aposetolo qaa lai.
35 Thupene lai, öni angeic: “Itre trahmanyi ne Isaraela fe, wange pala kö la hnei nyipunieti hna troa kuca kowe la itre atre ce.
36 Ke qëmekene la ijine celë, hna cile hnei Theuda ketre atre sipu selën, nge ala 400 lao sinexöle i angeic. Ngo ame ju hi la kola humuthi angeic, patre pi fe hi lo itre sinexöle i angeic, matre pë ju hi trene meje angatr.
37 Nge thupei angeic, mejë jë hi Iudra atre Galilaia, hmekune lo kola numerane la nöj, nge hetre sinexöle i angeice fe. Ngo ame ju hi la kola meci hnei angeic, isa ije pi hi la itretre drei angeic.
38 Qa ngöne lai, eni a qaja koi nyipunie, the kucahmëne kö la itre atre cili, ngo nue angatre pi, ke maine qaathei atr la huliwa i angatr, tro kö lai a patr;
39 ngo maine qaathei Akötresie, thatreine jë kö tro nyipunieti a cile koi angatr. Nge wange kö ke isi jë nyipunieti me Akötresie.”
40 Haawe, angatr a kapa ju la hna qaja, me hëne la ange aposetolo, me thaucë* angatr, me wathebo angatre troa ithanata ngöne la ëje i Iesu, me nue angatr.
41 Ame hnene la ange aposetolo hna tro pi qa lai me madrin atraqatr, ke ame koi angatr, ahnahna la troa ahmahmanyi angatr pine la ëje i nyidrë.
42 Nge e nöjei drai, angatre pala hi a catre cainöjëne la maca ka loi göi Keriso Iesu hnine la uma ne hmi, me ngöne la itre hnalapa trootro.
Itre mekun ecahu fen
^ Wange ju la HQP.
^ Maine, “ka trongëne la itre ini i atr.” Wange ju la HQP.
^ Maine, “oth”.
^ Wange ju la HQP.
^ Maine, “isinöe”.
^ Maine, “drengakötrën.”
^ Maine, “lep.”
