Itre Huliwa 6:1-15
6 Ame ngöne la itre drai ne kola elë trootro la etrune la itretre dreng, hnene la angetre Iudra ka qene Geres hna eetre pine la angetre Iudra ka qene Heberu, ke o drai, hna wangacone la itre sine föe i angatr ngöne la kola thewe xen.
2 Ame hnene la ala Truelof hna hëne la itretre dreng asë me hape: “Tha meköti* kö e tro huni a nue la Trengewekë i Akötresie kowe la huliwa ne thewe xen.
3 Haawe ange trejin, iëne jë nyipi nyipunie la sevene lao trejin trahmanyi ka hlemu loi, itre ka tiqa hnei uati hmitrötr nge ka inamacan, matre tro sa acili angatr kowe la huliwa celë ka nyipiewekë;
4 nge tro pë hë huni a catre thith me tro fë trongëne la trengewekë i Akötresie.”
5 Ame hna kapa madrine hnene la ka ala nyim, matre angatr a ië Setefano jë, ketre atre lapaun me ka tiqa hnei uati hmitrötr, me Filipo, me Prokoro, me Nikanora, me Timona, me Paramena, me Nikolao atre* Anetioka.
6 Thupene lai, angatr a tro fë pi la ala seven kowe la itre aposetolo, nge ase jë hi la ange aposetolo thith, angatr a ati ime ju hune lai ala seven.
7 Qa ngöne lai, kola ha kökötre trootro la maca* i Akötresie, nge kolo fe a elë catre la etrune la itretre dreng e Ierusalema; nge ala nyimu fe la itretre huuj ka hane lapaun.
8 Nge ame Setefano, tre ketre atre hna kapa hnei Akötresie nge ka tiqa hnei men. Angeice pala hi a kuca la itre ewekë nyine hain me itre hatrene ka tru nyipine la itre atr.
9 Ngo hnene la itre xa ka hmine lo hmi hna hëne ka hape, Sunago i Ange Hlue Hna Nuamacan, me itre xa angetre Kurene, me Alesanedria, me Kilikia, me Asia, hna ce ut troa iwesitrë me Setefano.
10 Ngo thatreine kö angatre cile koi angeic, ke tru kö la inamacane i angeic qaathene la ixatua ne la uati hmitrötr.
11 Ame hnei angatre hna tro juetrë kowe la itre xa atr, me upi angatr troa qaja ka hape: “Hne huni hna drei angeic e silitrengathoi Mose me Akötresie.”
12 Qa ngöne lai, angatr a agomegomëne jë la nöj, me itre qatre ne la nöj, me itretre cinyihan. Matre angatr a ce uti pi koi angeic, me xolouthe catrë angeic, me tro sai angeic kowe la Hnakootre Ka Tru i Angetre Iudra.
13 Nge ketre, angatr a hëne jë la itretre anyipicine thoi troa hape: “Tha mano kö la atre ce qaja angazone la götrane gaa hmitrötre celë, me Trenge Wathebo.
14 Nge hne huni fe hna drei angeic e qaja ka hape, tro Iesu lo atre Nazareta a thëtrije la uma ne hmi, me saze la itre hne huni hna majemine kuca qaathei Mose.”
15 Nge hnene asë la itre atrene la Hnakootr Ka Tru hna goeë angeic, nge ame la qëmeke i angeic, tre, kola ceitu me iqëmeke ne angela.
