Itre Huliwa 7:1-60
7 Matre önine jë hi la atre huuje ka sisitria ka hape: “Nyipici lai?”
2 Öni Setefano jë hi: “Itre trahmany, nyipunie itre trejin me itre kem, drenge ju. Hnene la Akötresie ka lolo hna mama koi Aberahama, qaaqaa së, lo nyidrëti pala kö e Mesopotamia, nge tha nyidrëti pala kö a lapa e Karan.
3 Matre öni Akötresie koi Aberahama ka hape: ‘Tro jë qa ngöne la nöje i eö, me itre sinee i eö, nge tro jë kowe la nöj hnenge hna troa amamai eö.’
4 Ame hnei angeic hna feke pi qa ngöne la nöj ne la itretre Kanana, me lapa e Karan. Nge thupene la hna meci hnei keme i angeic, hnei Akötresieti hna aijijë Aberahama troa tro nyipine la nöj hnei nyipunieti hna lapan.
5 Ngo eje hi laka, tha hnei Akötresieti kö hna hamë hnepadro koi Aberahama, ngo hnei nyidrëti hna sisinyi pe troa hamë angeice la nöj asë, nge tro pë hë lai a zi angeic, me zi ne la itre matra* i angeic. Ngo ame pe, pë petre kö nekö i Aberahama lo Akötresieti a thingehnaeane la itre ewekë celë.
6 Nge hnei Akötresieti fe hna qaja amamane koi angeic ka hape, tro la itre matra* i angeic a mele trenyiwa ngöne la ketre nöj, nge tro la itre atr e cili a thahluë angatr, me axösisi* angatr koi 400 lao macatre.
7 Nge öni Akötresieti lo: ‘Nge tro hë ni a nyithupene kowe la nöje ka thahluë angatr, nge thupene lai, tro angatr a tro qaa lai, nge ngöne la götrane celë, tro angatr a huujëne koi ni la itre huuje ka hmitrötr.’
8 “Hnei nyidrëti fe hna hamë angeic la isisinyikeu ne ixötrehatreny, matre angeice la keme i Isaaka, nge atre xötrehatrenyi nyën ngöne la hnaeitrene drai. Thupene lai, Isaaka la keme i* Iakobo, nge Iakobo la keme ne lo 12 lao he ne hnepe lapa.
9 Nge hnene pë hë la itre he ne hnepe lapa cili hna zalu koi Iosefa, me salemë angeic a tro Aigupito. Nge ce Akötresieti pala hi me angeic,
10 matre hnei nyidrëti pala hi hna thepe angeic qa ngöne la itre jole i angeic, me ainamacanë angeic, me kuca matre kepe angeice jë hnei Farao, Joxu ne Aigupito. Ame hnei Farao hna acili angeic troa mus e Aigupito, me kowe la lapa i angeic asë.
11 Ngo hna traqa la jiin atraqatr ngöne la nöje Aigupito me Kanana asë. Nyipici, ketre akötr atraqatre lai, ke thatreine kö öhnyi xen hnene lo itre qaaqaa së.
12 Nge drenge ju hi Iakobo laka, hetre xeni* e Aigupito, matre hnei angeic hna upe pi lo itre qaaqaa së.
13 Nge ame ngöne la hnaaluene tronge i angatr, hnei Iosefa hna qaja ka hape, drei angeic kowe la itre mama i angeic. Haawe, atre jë hi Farao la hnepe lapa i Iosefa.
14 Matre Iosefa a upe pi la ketre ka tro fë maca troa thei Iakobo keme i angeic, me hë nyidrë qaa lai memine lo ala 75 lao atrene* la lapa i nyidrë.
15 Haawe, Iakobo a uti pi Aigupito eë me meci e cili, nge tui itre qaaqaa së fe.
16 Ame hna xomi angatre jë a tro Sekema, me ami angatr hnine lo hua hnei Aberahama hna itön, ene lo hna nyithupen hnei manie sileva kowe lo itre nekö i Hamora e Sekema.
17 “Nge ame hë la ijine kola troa eatre la itre hna thingehnaeane hnei Akötresie koi Aberahama, hnene la nöje Isaraela hna ala nyimu catr e Aigupito
18 uti hë la drai ne mejë la ketre joxu e Aigupito ka thatre Iosefa.
19 Hnei angeic hna huliwa iaö kowe la nöje së, me musinëne la itre keme troa nuaxöje la itre nekö i angatr, matre meci pi nyudren.
20 Ngo ngöne la ijine cili, hna hnaho Mose, nekönatre ka mingöminge catre qëmeke i Akötresie. Matre hna iji thi* nyën koi köni treu hnine la hnalapa ne la keme i nyën.
21 Ngo ame ju hi la kola nue* nyën, hnene la nekö i Farao jajiny hna xomi nyën troa nyi kukun.
22 Qa ngöne lai, hna hetru Mose thenge la inamacan i angetre Aigupito. Celë hi matre, ka maca la itre trengewekë i angeic, nge nyine haine la itre huliwa i angeic.
23 “Nge ame hë la angeic a traqa koi 40 lao macatre, cia jë hi la mekun e kuhu hni* angeic troa wange* la itre trejine me angeic, lo itre nekö i Isaraela.
24 Ngo ame ju hi la angeic a öhne la ketre e angatr a hna qanangazon, angeic a nyixölë nyëne ju, me të la ngazo me humuthe la atre Aigupito.
25 Matre angeice pe kö a mekune ka hape, tro la itre trejine me angeic a trotrohnin laka, Akötresieti a amele angatr jëne angeic, ngo tha eje kö.
26 Ame la drai thupen, traqa ju hi angeic a öhnyi angatr e isi, matre angeic a thele jë troa sewe angatr me ialoinekeu angatr, me hape: ‘Hö, lue trejine hi epone lai, hnauëne la epone a ijei?’
27 Ngo hnene lai atre lepe la sinee i angeic hna uku nyën, me hape koi Mose: ‘Drei la atre acili eö troa joxu me atre iameköti koi hun?
28 Hapeu, eö a troa humuthi ni tune lo aqane kuca eö kowe lo atre Aigupito eidr?’
29 Ame hë la Mose a drenge lai, angeice hi lai a kötre pi a tro Midiana me mele trenyiwa e cili, ame hnei angeic hna hetrenyi la lue kuku trahmany.
30 “Haawe thupene la 40 lao macatre, mama pi hi koi angeic ngöne la hnapapa ne la Wetre Sinai la ketre angela. Nge kola mama lai angela nyipine la eë ka mel ngöne la neköi isinöe ka ithiny.
31 Matre ame la Mose a öhne lai, angeic a haine la iamamanyikeu, me easenyine matre troa waipengöne hnyawa, ngo e cili, mexeme pi hi la nine ithanata i Iehova,* kola hape:
32 ‘Eni hi la Akötresi ne la itre qaaqaa i eö, Akötresi Aberahama, me Isaaka, me Iakobo.’ Ame hnei Mose hna nyiqaane hmengöhmengön, matre xou ju hi angeice troa waipengöne hnyawa la ewekë cili.
33 Öni Iehova* jë hi koi angeic ka hape: ‘Una pi la lue ibutre i eö, ke nyipi hmitrötre la götran hnei eö hna cile ngön.
34 Tha sihngödri kö koi ni la itre akötre ne la nöjeng e Aigupito, me itre treije i angatr, nge tro kö ni a tro troa amele angatr. Haawe enehila, trohemi, nge tro ni a upi eö Aigupito eë.’
35 Nyipici, angeice hi, ene lo Mose hnei angatre hna xelene me hape kow: ‘Drei la atre acili eö troa joxu me atre iameköti?’ Angeice hi lo hnei Akötresieti hna acile troa joxu, me atre iamele, jëne lo angela ka mama koi angeic ngöne la neköi isinöe ka ithiny.
36 Matre hnene la atre cili hna lö sai angatre pi jëne la itre iamamanyikeu, me itre hatrene nyine hain hna kuca e Aigupito, me ngöne la Hnagejë Ka Palulu, me ngöne lo 40 lao macatre ngöne la hnapapa.
37 “Nge hnene pala hi lai Mose cili hna qaja kowe la itre nekö i Isaraela ka hape: ‘Tro Akötresieti a acile nyipine la itre trejin me nyipunie la ketre perofeta ka tung.’
38 Nge Mose fe la atre ce tro memine la ekalesia ngöne la hnapapa, nge ce angeic memine lo angela ka ithanata koi angeic hune la Wetre Sinai, me itre qaaqaa së. Matre hnei angeice hna kapa la itre trengewekë ka hmitrötr thatraqai nyipunie.
39 Ngo xele kö lo itre qaaqaa së troa drengethenge angeic, matre angatr a thipetriji angeice pi, me treije pin e Aigupito e kuhu hni angatr.
40 Celë hi matre öni angatre koi Arona ka hape: ‘Kuca jë koi huni la ketre haze matre tro ej a tro qëmeke hun, ke thatre kö huni la ka traqa koi Mose, lo atre lö sai huni qaa Aigupito.’
41 Matre ngöne la ijine cili, hnei angatre hna kuca la ketre neköi kau, me huuje kowe lai idrola, me nyiqaane madrine fë la huliwa ne la lue ime i angatr.
42 Ame hnei Akötresieti hna thingetrö* angatr, me nue angatr troa huuj kowe la jö, me treu, me wëtresij, tune lo hna qaja hnene lo itre perofeta ka hape: ‘Angetre Isaraela fe, tha eni kö lo Akötresie nyine tro nyipunie a tro fë ahnahna kow me huuj ngöne lo 40 lao macatre ne lapa hnapapa?’
43 Ngo hnei nyipunieti pe hna wangatrune la itre itate i Moloka, memine lo wëtresij ne la haze Refana, itre hatrene lai hnei nyipunieti hna xome nyine nyihlue kow. Celë hi matre tro ni a nue nyipunie e trön e Babulona.
44 “Nge thene la itre qaaqaa së lo itat ne anyipicin* hnei Akötresieti hna upi Mose troa kuca, thenge la tulu hnei angeic hna goeën.
45 Nge hnei itre qaaqaa së pë hë hna kepe edröne lai itat, matre hnei angatr me Iosua hna xome trongëne ej kowe lo nöj hna lapan hnene la itre trenyiwa, ene lo itre hnei Akötresie hna helën qëmekene la itre qaaqaa së. Nge thei angatre pala hi la itate cili uti hë la hneijine i Dravita.
46 Hnei Akötresieti hna hnimi Dravita, matre angeic a sipone jë troa kuca la huliwa ka hmitrötr, ene la troa xupe la uma ka mingöming thatraqane la Akötresi Iakobo.
47 Ame pe, Solomona la ka xupe la uma thatraqai Akötresie.
48 Ngo eje hi laka, tha tro kö la Ka Draië Catr a lapane la itre uma hna xupe hnei wanakoim ke önine la ketre perofeta:
49 Öni Iehova,* ‘Theronenge la hnengödrai, nge ihnadro la tane la lue cang. Matre nemene uma la hnei nyipunie hna troa xupe thatraqai ni? Maine ekaa la hnë manong?
50 Nge hapeu, tha huliwa ne la lue imenge kö la nöjei ewekë hna xup?’
51 “Nyipunie itretre catre që, me itre tha hna xöje hni me hnangenyë, nyipunieti pala hi a icilekeu memine la uati hmitrötr; matre nyipunieti hmaca kö a tune lo aqane ujë ne lo itre qaaqaa i nyipunieti ekö.
52 Drei pe kö la perofeta hna tha axösisin hnene la itre qaaqaa i nyipunie? Nyipici, hnei angatre hna humuthe la itre ka canga ithuemacanyine la ijine traqa ne la atre ka meköt, ene lo hnei nyipunie hna salemëne me humuth,
53 ngacama nyipunieti hi la itretre kapa la Wathebo qaathene la itre angela, ngo tha thupëne kö nyipunie.”
54 Drenge jë hi angatre lai, elëhni* jë hi angatr, matre angatr a thele jë troa lepi angeic.
55 Nge pine laka, tiqa ha angeic hnei uati hmitrötr, angeic a gala jë draië me öhne la lolo i Akötresie, nge Iesu a cil ngöne la götrane maca i Akötresie.
56 Öni angeice jë hi ka hape: “Hanawang! Öhne hë ni la kola fe la hnengödrai, memine la Nekö i Atr a kola cil ngöne la götrane maca i Akötresie.”
57 Haawe, angatr a sue catre jë me thinge la itre hnangenyë i angatr, me ce uti koi angeic.
58 Thupene la hnei angatr hna huli angeic tröne la traon, angatr a nyiqaane tranyi angeice ju hnei etë. Nge itretre anyipicin a amë ju la itre iheetre ka qea i angatr qëmekene la lue ca ne la ketre nekö trahmany, Saulo la ëjen.
59 Matre ame la angatr a tranyi Setefano hnei etë, angeic a hë draië jë me hape: “Iesu Joxu, eni ha nue la melenge* koi nyipë.”
60 Thupene lai, angeic a sa iwatingöne ca ju me sue ka hape: “Iehova* fe, the e kö la ngazo celë koi angatr.” Ase jë hi angeice qaja lai, meci pi hi angeic.
Itre mekun ecahu fen
^ Ger., “itin.”
^ Ger., “itin.”
^ Maine, “qanangazon.”
^ Maine jë, “hna tune fe koi.”
^ Maine, “hetre wen.”
^ Maine, “u.” Ger., psy·kheʹ. Wange ju la HQP.
^ Maine, “hetrun.”
^ Maine, “nuaxöj.”
^ Maine, “xecie hë.”
^ Maine, “waipengön.”
^ Wange ju la HQP.
^ Wange ju la HQP.
^ Maine, “hutrö.”
^ Maine, “tate ka anyipicine laka, ce Akötresieti me angatr.”
^ Wange ju la HQP.
^ Maine, “drengakötrën.”
^ Maine, “ecatrene la mel.” Ger., pneuʹma. Wange ju la HQP.
^ Wange ju la HQP.
