Itre Huliwa 8:1-40
8 Hnei Saulo hna kapa lo kola humuthi Setefano.
Nge ngöne la ijine cili, hna mejë la icilekeu ka tru kowe la ekalesia ne Ierusalema; matre hnene la nöjei keresiano, ngo tha itre aposetolo fe kö, hna kötre kowe la itre nöj ne Iudra me Samaria.
2 Ngo hnene la itretre xoue Akötresie hna xomi Setefano me kelemi angeic, nge tru la hleuhleu i angatr pi angeic.
3 Nge qaane ju hi lai, hnei Saulo hna nyiqaane axösisine la itre ekalesia. Hnei angeice hna lö kowe la itre hnalapa trootro, me hule la itre trahmanyi me föe, me akalabusi angatr.
4 Ngo ame lo itre ka kötre mel, hnei angatr hna trongëne la itre nöj me tro fë trongëne la trengewekë i Akötresie.
5 Ame hnei Filipo hna traqa kowe la traon* e Samaria, me nyiqaane cainöjë Keriso kowe la itre atr e cili.
6 Matre hnene pë hë la ka ala nyimu hna cas me drenge hnyawa la itre hna qaja hnei Filipo, nge angatr a dreng me goeëne la itre hatren hnei angeic hna kuca.
7 Ke ala nyimu e cili la itre hna löth hnei dremoni, nge itre dremoni a kuca matre hokötre jë la itre atr, nge thupene lai, angatr a lötriji nyudreni ju. Nge ketre, ala nyimu fe la itre ka genyi ca me ka peje ca hna aloin.
8 Qa ngöne lai, kola madrin atraqatre la traon.
9 Nge e cili fe la ketre atr, Simona la ëjen nge ka kuci haze angeic, matre itre atrene Samaria a hai angeic ke angeic a sipu selë angeic me hape, atre ka tru angeic.
10 Nge itre atr asë, qaane ju hi la ka co uti hë la ka tru a isa drei angeic hnyawa me hape: “Eje hi thei angeice la men atraqatr i Akötresie.”
11 Qa ngöne lai, kola drei angeice hnene la itre atr ke ekö hë angeice kuca la itre huliwa hna hain.
12 Matre ame ju hi la angatr a mejiune koi Filipo, atre cainöjëne la maca ka loi ne la Baselaia i Akötresie me ëje i Iesu Keriso, hnene la itre trahmanyi me föe hna xomi bapataiso.
13 Ame hna hane fe mejiune hnei Simona, matre thupene la hna bapataiso angeic, hnei angeic hna xötrethenge Filipo, me haine la itre hatren me itre iamamanyikeu hna kuca hnei Filipo.
14 Matre ame la kola dreng hnei ange aposetolo e Ierusalema laka, hna kapa la trengewekë i Akötresie hnei angetre Samaria, angatr a upi Peteru jë me Ioane.
15 Nge ame hë la nyidroti a traqa e cili, hnei nyidroti hna thithi sai angetre Samaria matre tro fe angatr a kapa la uati hmitrötr.
16 Ke uti hë enehila, tha kapa pala kö angatr la uati hmitrötr, ngo hna bapataiso angatre hi ngöne la ëje i Iesu Joxu.
17 Ame hnei nyidroti hna ati ime hui angatr, matre angatr a kapa ju fe la uati hmitrötr.
18 Nge ame la Simona a öhne laka, hna nue la uati hmitrötr jëne la hna ati ime hnene la lue aposetolo, angeic a li mani ju koi nyidro,
19 me hape: “Pi tro fe hi ni a hane kapa la atreine cili, matre tro fe la nöjei atr hnenge hna troa ati ime kow a hane kapa la uati hmitrötr.”
20 Ngo öni Peteru jë hi ka hape: “Troa ce apatrenyi eö memine la mani eö, ke hnei eö hna thele troa itöne la ahnahna hna hamëne gufan hnei Akötresie.
21 Matre gufa kö la ewekë cili thei eö, ke tha meköti kö la hni eö qëmeke i Akötresie.
22 Haawe, ietrane jë pe la ngazo i eö, nge sipone catrëne jë koi Iehova* maine ijij e tro nyidrë a nue la ngazo ne la hni eö;
23 ke öhne hi ni laka, poizin eö, nge hlue ne la ngazo.”
24 Öni Simona jë hi koi nyidro ka hape: “Xëwe sai ni jë koi Iehova,* matre trianyi ni la itre ewekë hnei epon hna qaja.”
25 Ame hë la nyidroti a ase cainöje trootro me tro fë trongëne la trengewekë i Iehova, bëeke hmaca jë hi nyidro a tro Ierusalema, nge e cili, nyimutre la itre neköi hunahmi ne Samaria hnei nyidroti hna qeje maca ka loi kow.
26 Hnene la angela i Iehova* hna qaja koi Filipo ka hape: “Mejë jë nge trojë kowe la gojenyi e kolojë, lo gojenyi ka uti qaa Ierusalema a tro Gaza.” (Ene lo gojenyi ka thupa la hnapapa.)
27 Haawe, mejë jë hi Filipo me tro, nge hanawang! E cili la ketre eunuka* qaa Aithiope, nge atre ka draië fei Kanadaki, isola ne Aithiope, ke angeic a thupëne la itre mo i eahlo. Nge hnene la atre cili hna tro troa hmi e Ierusalema,
28 nge angeic a bëek hmaca jë me lapa hune la ikatr i angeic, me e catrëne la hna cinyihan hnei Isaia perofeta.
29 Ame hnene la ua hna upi Filipo ka hape: “Tro jë nge easenyine jë la ikatr.”
30 Filipo a nyinyape pi me drei angeic a e catrëne la hna cinyihan hnei Isaia perofeta, matre öni Filipo: “Trotrohnine kö eö la hnei eö hna e?”
31 Sa jë hi lai atr ka hape: “A tro ni a trotrohnine tune kaa nge pë pe atre qejepengöne koi ni?” Ame hnei angeic hna iele Filipo troa elë, me pane lapa ezi angeic.
32 Nge ame la hnepe hnei angeic hna e hnine la hna cinyihan, tre: “Tune la mamoe, hna tro sai angeic kowe la atre ihumuth, nge tune la neköi mamoe ka pë mejen qëmekene la atre xötre ipen, ketre tha ase kö angeic fe la që i angeic.
33 Nge ngöne la ijine thaipië angeic, hna xome la meköt qaathei angeic. Nge pine laka, tro angeic a patr qaa la fen, drei pë hë la ka troa qejepengöne la itre xötrapane i angeic?”
34 Önine jë hi la eunuka koi Filipo ka hape: “Eni a sipo, pane qaja jë koi ni ka hape, drei lai hna qaja hnene la perofeta? Angeic a qeje angeic, maine ketre atr kö?”
35 Ame hnei Filipo hna cainöje koi angeic me nyiqaane qejepengöne la itre xötre celë, me qeje maca ka loi göi Iesu.
36 Nge nyidroti pala kö ngöne la gojeny, ame hnei nyidroti hna öhne ju la tim, matre önine la eunuka ka hape: “Hanawange la tim! Nemene pe kö la ka ajolë ni troa xomi bapataiso?”
37 ——
38 Qa ngöne lai, angeic a upe pi troa acilëne la ikatr, nge nyidroti a ce uti pi, ene Filipo memine la eunuka kowe la tim göi troa bapataiso.
39 Ame ju hi la nyidroti a elë qa ngöne la tim, kolo fe hi a aca troxomi Filipo kowe la ketre götran hnene la uati hmitrötre i Iehova,* matre tha öhnyi Filipo ju hi hnei angeic, ngo angeice pë hë a trongëne jë la tronge i angeic cememine la madrin atraqatr.
40 Nge ame Filipo, angeice ngöne la nöje Azota, kola cainöjëne la maca ka loi ngöne la nöjei hunahmi trootro, uti hë la angeic a traqa hmaca e Kaisaria.
Itre mekun ecahu fen
^ Maine jë, “ketre traon.”
^ Wange ju la HQP.
^ Wange ju la HQP.
^ Wange ju la HQP.
^ Maine, “atre huliwa hnine la hnalapa i Joxu.”
^ Wange ju la HQP.
