Iudra 1:1-25
1 Eni Iudra, hlue i Iesu Keriso, nge trejine me Iakobo, kowe la itre hna hën, itre hna hnime hnei Akötresie la Kem, nge hna thupën thatraqai Iesu Keriso.
2 Epi tro la utipin, me tingeting, me ihnim a kökötre thei nyipunie.
3 Ange hnimina, ngöne la tusing koi nyipunie, eni hë lo a isine troa qaja la iamele së, ngo nyipiewekë ju hi koi ni troa cinyiany matre upi nyipunie troa catre isi thatraqane la lapaun, lo hna aca hamën paluane kowe la ange ka hmitrötr.
4 Eni a kuca lai, ke hetre itre atre ka löthe la lapa i nyipunie, lo itre hna köjan hnene la hna Cinyihan thatraqane la iameköti cili, itre atre ka ngazo nge ka ujëne la ihnimi gufa ne la Akötresi së, matre nyi kepin troa kuca la itre huliwa nyine hmahman,* nge itre ka saenetrije la Maseta së me Joxu së, Iesu Keriso.
5 Ngacama atre hnyawa ha nyipunie la nöjei ewekë celë, ngo eni pe a pi amekunë nyipunie laka, hnei Iehova* hna amelene la itre atr qa ngöne la nöje Aigupito, thupene lai, hnei nyidrëti hna apatrene la itre ka tha lapaun.
6 Nge ame kowe lo itre angela ka tha thupëne lo hnëqa* i angatr, nge ka trotrije lo sipu göhnë i angatr, hnei nyidrëti hna othi angatr hnene la itre eno ka epine palua, nge angatre hë hnine la gaa jidr atraqatr, treqene la iameköti ngöne la drai atraqatr.
7 Ketre tun, hnei Sodroma me Gomora, me itre traone xötreith hna nyinyape thele la kuci ngazo,* me itre aqane ce meköl hna wathebon; hna ami angatr qëmeke së nyine hmekë së, ke ase hë nyithupene palua angatr hnei eë.
8 Ngazo pe, itre ka löthe la lapa i nyipunie a mekune pala hi la itre ewekë ka ngazo, me adrone la ngönetrei, me xelene la mus, me xöjetrije la itre hna atrune hnei Akötresie.
9 Ngo ame lo kola iwesitrë hnei Mikaela, tane la itre angela, me Diabolo pine lo ngönetrei i Mose, tha hnei Mikaela kö hna mekune ka hape, ijiji nyidrë troa ameköti Diabolo me ithanata akökötreny, ngo öni nyidrëti pe: “Loi e tro kö Iehova* a ameköti eö.”
10 Ngo itre atre cili a qaja menune la nöjei ewekë hnei angatr hna tha trotrohnin. Nge ame pena la itre ewekë hnei angatr hna trotrohnin xanën, tune la itre öni ka pë mekun, celë hi itre ewekë hnei angatr hna kuca catrën nge ka adronyi angatr.
11 Luzi hë angatre lai, ke hnei angatre hna xötrethenge la jë i Kaina, me saqe nyitipune la aqane menu i Balaama göi thupen; nge meci hë angatr ngöne la itre trengewekë ne icilekeu i Kora!
12 Nge ngöne la itre ijine nyipunie me itre trejin a ce xeni ne ihnim, angatr a tune la itre iwanaca hna juetrën hnei hnagejë, nge angatr la itretre thup ka pë xoun nge ka sipu thue a i angatre kö, ceitu i angatr me itre iawe ka pë timin, nge hna uf agöne hnei eny; angatre la itre sinöe ka tha wa wen ngöne la ijin, nge ka meci hnyawa, nge hna feje më iwa.
13 Angatre la itre hoke ne gejë ka kaca fë haiwen, ene la itre hmahma i angatr; ceitu i angatr me itre wëtresij ka pë gojenyin, itre hna hnëkëne paluan kowe la jidr atraqatr.
14 Eje hi hnei Enoka, lo hnaasevenene xötr atr qaane Adramu, hna perofetane fe göi angatr, öni angeice lo: “Hanawang! Traqa ha Iehova* me itre miriad* lao angela ka hmitrötre i nyidrë,
15 matre amekötine la nöjei atr asë, me amamane la itre tria ne la itre ka kuca la ngazo, itre ka tha metrötrë Akötresie. Hnei nyidrë hna ujë tun, ke hnei angatr hna kuca la nöjei pengöne ngazo, nge pine angatr xöjetriji nyidrë.”
16 Angatre la itre ka iqej me eetre pine la mele i angatr, nge itre ka trongëne la itre sipu aja i angatr, nge itre që i angatr a selëne la itre ewekë ka tru, nge angatre fe a qaja atrunyi* itre xan göi troa kepe loi.
17 Ngo ame nyipunie itre trejine hnimina, mekune kö lo hna qaja* hnene la itre aposetolo i Iesu Keriso Joxu së,
18 lo hnei angatr hna majemine qaja koi nyipunie ka hape: “Ame ngöne la itre drai ne la pun, tro ha hetre ka ihnyimasai, itretre tro thenge la itre sipu aja i angatr, matre kuca la ka tha meköti kö.”
19 Angatre la itre ka thi lapa, itre* ka qene öni, nge patre kö thei angatr la ua i Akötresie.
20 Ngo ame nyipunie itre hnimina, xup adraiëne jë la lapaune i nyipunie, nge thithi jë thenge la hna amekötin hnene la ua i Akötresie,
21 matre tro pala hi nyipunieti a lapa fene la ihnim i nyidrë, ngöne la ijine nyipunieti a treqene la utipin qaathene la Joxu së Iesu Keriso, utipin ka itroxom kowe la mele ka pë pun.
22 Ketre, the mano kö utipine la itre ka luelu,
23 nge thepe angatre pi qa hnine la eë. Utipi itre xane ju, ngo kuca jë cememine la xou. Ase hë angatr adrone la iheetre ka he hnin hnene la itre huliwa ne ngönetrei, matre, ame la nyipunie a utipi angatr, thupëne kö troa iananyi memine la itre iheetre i angatr ka dro.
24 Enehila, ijiji Akötresie troa thupë nyipunie matre tha tro kö nyipunie a kei, nge tro pala hi nyipunieti a cil pë ethan qëmekene la lolo i nyidrë, me kapa la madrin atraqatr.
25 Haawe, epi eje thene la Akötresi së ka cas me Atre amele së, la lolo jëne Iesu Keriso Joxu së, me edraiën, me men, me mus qaane ekö palua, me enehila, nge uti hë epine palua. Amen.
Itre mekun ecahu fen
^ Ger., a·selʹgei·a. Wange ju la HQP.
^ Wange ju la HQP.
^ Ene la göhnë i angatr, maine hnëqa i angatr e hnengödrai.
^ Wange ju la HQP.
^ Wange ju la HQP.
^ Wange ju la HQP.
^ Kola hape, “itre thauzan.”
^ Maine, “haine la pengö i ketre.”
^ Maine, “hna perofetan.”
^ Maine, “ka qene ngönetrei.”
