Luka 10:1-42
10 Thupene la itre ewekë cili, hnene la Joxu hna iëne hmaca la ala 70, me upi angatr isa ala lu, troa tro pa kowe la itre traon me götran hnei nyidrëti hna tro kow.
2 Matre, öni nyidrëti jë hi koi angatr ka hape: “Eje hi, tru catre la nyine menuën, ngo xalaithe hi la itretre menu. Matre, sipone jë kowe la Maseta troa pane upe la itre xa atr kowe la huliwa cili.
3 Tro jë nge hanawang! Eni a upi nyipunie ceitu me itre mamoe nyipine la itre luko.*
4 The xome trongë mani kö, me kemej, me ibutr, nge the ibozu* kö me itre hnei nyipunie hna troa ixelë memin.
5 Nge e traqa jë nyipunie lö kowe la ketre uma, pane qaja ju ka hape: ‘Epi troa tingetinge la hnalapa celë.’
6 Nge maine hetrenyi e cili la ketre atre aja tingeting, tro la tingetinge i nyipunie a lapa hui angeic. Ngo maine pëkö, tro hë ej a bëeke hmaca koi nyipunie.
7 Haawe, lapa ju e cili nge xeni jë me iji la hna hamë nyipunie, ke tro kö la atre huliwa a kapa la thupe i angeic. Ngo the thele kö troa tro koi ketre hnalapa.
8 “Ketre, maine tro nyipunieti a lö kowe la ketre traon, nge kola kepe nyipunie e cili, xeni ju la hna amë qëmeke i nyipunie,
9 nge aloine jë la itre trene mec, nge qaja ju koi angatre ka hape: ‘Easenyi hë la Baselaia i Akötresie.’
10 Ngo maine tro nyipunieti a lö kowe la ketre traon, nge tha kepe nyipunieti kö e cili, tro jë kowe la itre gojenyi ka tru, nge qaja jë koi angatre ka hape:
11 ‘Eahuni a jumejume la dro ne la traone i nyipunie ka fedre ngöne la lue hnatrapaca hun, nyine hatrene koi nyipunie. Ngo lapa atre ju laka, calemi catre hë la Baselaia i Akötresie.’
12 Eni a qaja hnyawa koi nyipunie laka, loi ju kö la nöje Sodroma ngöne la Drai Ne Iameköti hune la traone celë.
13 “Ekölö hi ni eö Korazin! nge ekölö eö Bethesaida! Ke maine traqa ju la itre huliwa ka men hna kuca koi eö e Turo me Sidona, tro hë angatre lai a ietra, me heetrë ibëek ka tru thenyin,* me lapa hune la hnatresij.
14 Celë hi matre, loi ju kö Turo me Sidona hui nyipunie elany, ngöne la Drai Ne Iameköti.
15 Nge ame eö Kaperenauma, eö lo a hane pi draië kowe la hnengödrai? Tro ha thaipië eö kowe la Hua!*
16 “Ame la atre drei nyipunie, tre, kolo fe hi a drei ni. Nge ame la atre xele nyipunie, kolo fe hi lai a xele ni. Ngo eje hi laka, ame la atre xele ni, tre, kolo fe hi lai a xelene la Atre upi ni.”
17 Ame hna bëeke hmaca ju hnene lo ala 70 cememine la madrin, nge öni angatr: “Joxu, goi drei huni fe hnene la itre dremoni la eahuni a ameköti angatr ngöne la ëje i nyipë.”
18 Qa ngöne lai, öni nyidrë: “Öhnyi Satana ha ni a mala qaa hnengödrai, tune la samek.
19 Hanawang! Ase hë ni aijijë nyipunie troa waja fica la itre un me sekopio, me itre ithupëjia ka trene men, matre pëkö ketre ewekë ka troa akötrë nyipunie.
20 Ame pe, the madrine kö pine la hna drei nyipunie hnei itre dremoni, ngo madrine jë pe laka, hetre ëje i nyipunieti fe hë e hnengödrai.”
21 Nge ame ju hi la hawa celë, hnene la uati hmitrötr hna amadrinë nyidrëti catr, matre öni nyidrë: “Eni a ujë koi nyipë nyipine la ka ala nyimu, Kakati fe, Atre Xupe la hnengödrai memine la fen, ke hnei nyipëti hna juetrëne la itre ewekë cili kowe la itre ka inamacan, ngo hna amamane pe kowe la itre nekönatr. Nge eje kö lai Kaka, ke aja i nyipëti kö lai.
22 Ketre, ase hë Kaka nue koi ni la nöjei ewekë asë. Nge Kem hmekuje hi la ka atre la Nekön, ke pëkö atr ka atrepengöne hnyawa la Kem, ngo Neköne hi, me itre atr hna inin hnene la Nekön.”
23 Nyidrëti a ujë jë kowe la itretre dreng, me qaja acone koi angatr ka hape: “Manathithi la itre lue mek ka öhne la itre ewekë hnei nyipunieti hna goeën.
24 Eni a qaja koi nyipunie, ala nyimu la itre perofeta me itre joxu ka hane pi goeëne la itre ewekë hnei nyipunieti hna goeën, ngo tha öhne kö angatr, me hane pi drenge la itre ewekë hnei nyipunieti hna dreng, ngo tha drenge ju kö angatr.”
25 Ngo hanawang! Mejë jë hi la ketre thupëtresij ka atrepengöne hnyawa la itre Wathebo troa tupathi Iesu, me hape: “Atre Ini fe, nemene la nyine tro ni a kuca matre hetrenyi ni la mele ka pë pun?”
26 Sa jë hi nyidrë ka hape: “Nemene la hna cinyihan ngöne la Trenge Wathebo? Nemene la hnei eö hna trotrohnin?”
27 Öni angeic: “ ‘Qa i eö troa hnimi Iehova* Akötresi eö hnene la hni eö ka pexej, me mele* i eö ka pexej, me trengecatre i eö ka pexej, me mekuna i eö ka pexej,’ me ‘hnime la atre lapa easenyi eö tui eö hi.’ ”
28 Öni nyidrëti hmaca jë hi: “Ka meköti la hnei eö hna qaja; haawe, catre jë eö trongëne lai, nge tro hë eö a mel.”
29 Ngo hnene pala kö lai thupëtresij hna pi nyi ka meköt, matre öni angeice jë hi koi Iesu ka hape: “Drei la atre lapa easenyi ni?”
30 Sa jë hi Iesu ka hape: “Kola uti la ketre trahmanyi qaa Ierusalema a tro Ieriko, ame hna xolouthi angeic hnene la itre atrekënö, matre angatr a thapa pi la itre iheetre i angeic, me itre ewekë i angeic, me lepe angazo angeic, me nue angeic a ka tro ha mec.
31 Ame hna cili thenge fe hnene la ketre atre huuj, ngo ame ju hi la angeic a öhne lai trahmany, saze pala gojenyi pi hi angeic.
32 Ketre tun, ame la kola traqa hnene la ketre atre Levi kowe la götrane cili me öhne lai trahmany, saze pala gojenyi pi fe angeic.
33 Nge traqa pi hi la atre Samaria, matre ame ju hi la kola öhne lai trahmany, angeic a utipi nyëne ju,
34 me easenyi nyën, me nei oel me waina hun la itre eatre i nyën, me peleth. Thupene lai, angeic a ati nyëne ju hune la si angeic, me tro sai nyëne kowe la ketre neköi otel, me kuca hnyawa nyën.
35 Nge ame la drai thupen, angeic a xome pi la lue drenari,* me hamëne kowe la atre ikep, me hape: ‘Wai nyëne hnyawa kö, nge ame la nöjei ewekë hnei eö hna troa nyi thupen göi nyën, tro pë hë ni lai a të koi eö e bëeke jë ni.’
36 Haawe, ame koi eö, drei thene lo ala kön, la atre amamane ka hape, angeice hi la atre lapa easenyine lo trahmanyi hna lep hnene la itre atrekënö?”
37 Sa jë hi lai atr ka hape: “Kolo atre trene utipin.” Öni Iesu jë hi koi angeic ka hape: “Haawe, nga tro jë me hane kuca tun.”
38 Nge angatre pala kö a tro, ame hnei nyidrëti hna lö kowe la ketre traon. E cili, hnene la ketre föe, Maretha la ëjen, hna kepe nyidrë ngöne la hnalapa i angeic.
39 Nge e cili fe la jini angeic, Maria la ëjen, kola lapa ngöne la lue ca ne la Joxu, me drenge hnyawa la itre hnei nyidrëti hna qaja.*
40 Ngo ame pena Maretha, kola ajolë angeic hnene la nöjei pengöne huliwa, matre angeic a tro ju koi nyidrë me hape: “Joxu, tha ngazo kö koi nyipë tro la jining a nuaxöji ni fë la itre jol? Upi angeice jë troa hane xatua ni.”
41 Haawe, önine jë hi la Joxu koi angeice ka hape: “Maretha, Maretha, eö a xou me hnehengazone la nöjei pengöne ewekë,
42 ngo xalaithe hi la itre ka nyipi ewekë, nge casi hi la ka sisitria. Nge ame Maria, hnei angeice hna iëne la götrane ka loi,* matre tha tro pi kö a thapa lai qaathei angeic.”
Itre mekun ecahu fen
^ Kösë kuli wael, ngo ka pi öni.
^ Maine, “idrem ne ibozu.”
^ Wange ju la HQP.
^ Ger., “Hedris.” Wange ju la HQP.
^ Wange ju la HQP.
^ Ger., psy·kheʹ. Wange ju la HQP.
^ Wange ju la HQP.
^ Ger., “trengewekë i nyidrë.”
^ Maine, “götrane ka sisitria.”
