Luka 11:1-54
11 Nyidrëti hë ngöne la ketre götrane troa pane thith, matre ame ju hi la nyidrëti a ase thith, önine jë hi la ketre atre dreng ka hape: “Joxu, pane ini huni jë la aqane troa thith, tune la aqane kuca Ioane kowe la itretre drei angeic.”
2 Öni nyidrëti jë hi: “Ame la nyipunieti a thith, hape jë: ‘Kakati fe, epi hmitrötre la ëje i nyipë. Epi traqa pi la Baselaia i nyipë.
3 Epi hamë huni ju o drai la falawa ka ijije kowe la drai.
4 Nge epi nue pi la itre ngazo hun, ke hne huni fe hna hane nue la ngazo ne la itre ka gufa koi hun; nge the troxomi huni kö kowe la itupath.’ ”
5 Thupene lai, öni nyidrëti jë hi koi angatr ka hape: “Pane mekune jë laka, tro la ketre e nyipunie a tro kowe la hnalapa ne la sinee i angeic e hnenyipa jidr, me hape: ‘Sineeng, sipo köni falawa
6 ke traqa ha la ketre sineeng qaa gaa nany, nge pëkö nyine tro ni a hamë angeic.’
7 Ngo önine jë lai atr e hnine la uma ka hape: ‘The ikucahmë kö. Ase hë ni kine la qëhnelö, nge eni fe hë la me ha nekönge a meköl. Jole koi ni troa mejë me hamë eö la ketre ewekë.’
8 Ngo eni a qaja hnyawa koi nyipunie laka, maine tha tro kö la atre cili a mejë pine laka, sinee i angeic la ka sipo, ngo tro hë angeic a mejë pine la aqane ielene lai atre sipo, matre hamë nyën la nöjei ewekë hnei nyëne hna ajan.
9 Haawe, eni a qaja koi nyipunie, sipo jë the mano kö, nge tro ha hamëne koi nyipunie; thele jë the mano kö, nge tro hë nyipunieti a öhn; fenafena jë the mano kö, nge tro ha thawa koi nyipunie.
10 Ke tro ha kapa hnei atre sipo, nge tro ha öhne hnei atre thel, nge ame koi atre fenafena, tro ha thawa koi angeic.
11 Nge drei keme la ka troa hamë une kowe la nekö i angeic nge kolo pe a sipo ie?
12 Maine pena, e tro nyën a sipo wakuja tro pena a hamë sekopio?
13 Haawe, maine nyipunie, itre atr ka ngazo, a atreine hamë ahnahna ka lolo kowe la itre nekö i nyipunie, nga the qaja pala ha la Keme i nyipunie e koho hnengödrai, atre hamë uati hmitrötr kowe la angetre sipo nyidrë!”
14 Thupene lai, hnei nyidrëti hna helëne la ketre dremoni qaathene la ketre hum. Nge ame hë la kola trotrije la atr hnene lai dremoni, angeic a ithanata hmaca jë, ame hna hai hnene la ka ala nyim.
15 Ngo öni itre xane ka hape: “Angeice lai a helëne la itre dremoni jëne la tan ne la itre dremoni, Belezebuba.”*
16 Nge hnei itre xane hna thele troa tupathi nyidrë, me sipone la ketre hatrene qaa hnengödrai.
17 Ngo atre hnyawa hi nyidrëti la mekuna i angatr, matre öni nyidrë: “Maine tro la itre baselaia a aisa angatre kö, tro hë itre eje lai a patr, ketre tune mina fe kowe la ketre hnalapa ka aisa angeice kö, tro hë la itre atren a isa ije.
18 Nge maine tro Satana a helë angeice kö, angeice hi lai a sipu cil koi angeice kö; nga troa cile tune kaa la musi angeic? Ngo eni hi a ithanata tun, ke öni nyipunieti lo, eni a helëne la itre dremoni hnei Belezebuba.
19 Ngo maine eni a helëne la itre dremoni jëne Belezebuba, hnei drei kö matre atreine jë la itre atre i nyipunie helëne la itre dremoni? Angatre hi la itre ka troa ameköti nyipunie.
20 Ngo maine eni a helëne la itre dremoni hnene la mene i Akötresie,* kolo hi lai a hape, ase hë sasaithi nyipunie hnene la Baselaia i Akötresie.
21 Maine tro la ketre atr ka catr a cile fë jia ne isi, me thupëne la hnalapa i angeic, tro ha mele la itre ewekë i angeic.
22 Ngo maine tro la ketre atr ka catre kö hui angeic a icilekeu me angeic, me ngaa angeic, tro hë la atre cili a thapa la itre jia ne isi hnei angeice hna mejiune kow, me thawa trongëne la itre ewekë i angeic.
23 Haawe, ame la atr ka tha ce xöle me eni, tre ka icilekeu me eni, nge ame la atre ka tha ce xawane me eni, tre atre ijen angeic.
24 “Thupene la kola trotrije la ketre atr hnene la ketre dremoni, angeic a nyinyape thele ju ngöne la hnapapa la ketre hnë mano koi angeic, ngo tha öhne kö. Matre, öni angeice ju, ‘Ma tro hmaca ni a bëeke kowe la hnalapang, lo hnenge hna trotrij.’
25 Haawe, traqa ju hi angeic a öhne la hnalapa hna nyidrawane hnyawa me thaipin.
26 Matre hnei angeic hna hëne hmaca la sevene lao dremoni ka iaxösisi catre kö hui angeic, ame hnei angatr hna ce lapa e cili. Matre, ame kowe lo atr hna löth, loi ju kö lo tro hnapan.”
27 Nge nyidrëti pala kö a ithanatane la itre ewekë celë, ame hna sue la ketre föe nyipine la ka ala nyim, me hape: “Madrine la föe ka hnaho nyipë me iji thi nyipë.”
28 Ngo öni nyidrëti pe: “Waea, ngo madrine pe la atre drenge la itre trengewekë i Akötresie, me catre trongëne ej!”
29 Ame hë la kola icacaxenyi la ka ala nyim, nyidrëti a nyiqaane qaja jë koi angatre ka hape: “Xötre ka ngazo la xötre celë; angatr a treqene la ketre hatren, ngo casi hi la hatrene koi angatr a kolo hatrene i Iona.
30 Iona lo ketre hatrene kowe la angetre Nineve, ketre tun, tro fe la Nekö i atr a ketre hatrene kowe la xötre atr celë.
31 Tro fe a ce amelene hmaca la itre atr ne la xötre celë memine la joxu föe ne kolojë, ngöne la Drai Ne Iameköti. Nge tro eahlo a amamane la engazone la xötre celë, ke hnei eahlo hna traqa qa gaa nanyi troa drenge la inamacane i Solomona. Ngo hanawang! Hetre atr ka tru catre kö hui Solomona e celë.
32 Nge tro fe a amelene hmaca la xötre celë memine la angetre Nineve ngöne la Drai Ne Iameköti. Nge tro hë la angetre Nineve a amamane la engazone la xötre celë, ke hnei angatre hna ietra pine la maca hna tro fë hnei Iona. Ngo hanawang! hetre atr ka tru catre kö hui Iona e celë.
33 Ketre, maine kola amelene la laame cil, tha tro kö la atr a amë ej ngöne la götrane gaa tha mama, maine fene itrengen,* ngo tro pe a atë ej hune la ketre ita ne laam, matre lualai kowe la atre lö.
34 Haawe, laame ne la ngönetrei la alameke i eö. Matre, e ka maca* la alameke i eö, tro ha hudrum asë la ngönetrei eö. Ngo maine ka ngazo la alameke i eö, tro ha miti asë la ngönetrei eö.
35 Ngo wange pala kö, ke miti hnine pi la lai thei eö.
36 Ngo maine troa lai asë la ngönetrei eö, nge pëkö hnepe gaa mit, tro hë ej a hudrum tune la aqane hudrume la laam ka thina eö.”
37 Thupene la hnei nyidrëti hna qaja la itre ewekë cili, hnene la ketre Faresaio hna sipo nyidrë troa ce xeni me angeic. Ame hnei nyidrëti hna lö jë kowe la hnalapa i angeic, me elë troa ce xen.
38 Ame hna goe catre jë hnene la Faresaio, ke tha hnei nyidrëti kö hna pane wasi* wanakoim qëmekene troa xen.
39 Matre önine jë hi la Joxu ka hape: “Nyipunie itre Faresaio, nyipunieti a wasine la tröne kap me pala, ngo tiqa ha nyipunie hnei pi hetrenyi me thiina ka ngazo.
40 Ume hmo! Tha hnene kö la atre xupe la trön hna hane xupe fe la hnin?
41 Haawe, maine nyipunieti a pi hamë ahnahna ne utipin,* hamëne jë qa kuhu hni, ke hanawang! Ame asë hi la itre ewekë hnei nyipunieti hna troa hamën, tre tro ha wië loi.
42 Hnëjine hë nyipunie itre Faresaio, ke nyipunie a hamëne la hnaatrenen la minet,* me itre xa dröne sil, ngo tha nyipiewekëne kö nyipunie la meköt, me ihnimi Akötresie! Maine eje hi laka, hnëqa i nyipunieti lai troa hamëne la hnaatrenene la itre ewekë cili, ngo tha tro kö a patr la meköt, me ihnimi Akötresie.
43 Hnëjine hë nyipunie itre Faresaio, ke aja i nyipunie troa lapane la itre pane* göhnë ngöne la itre sunago, nge aja i nyipunieti fe tro la itre atr a ibozu me metrötrë nyipunie ngöne la itre hna maketr!
44 Hnëjine hë nyipunie, ke ceitu i nyipunie me itre hua* ka tha mama kö, matre itre atr a waja trongën, ngo thatre pe angatr.”
45 Ame hnene la ketre ka inine la Wathebo hna qaja ka hape: “Atre Ini fe, ame la nyipëti a qaja la itre ewekë cili, nyipëti fe lai a hane akötrë hun.”
46 Sa jë hi nyidrë ka hape: “Hnëjine fe hë nyipunie itretre inine la Wathebo, ke nyipunieti a ahacene la itre atr, me nyi ehnefe i angatr, ngo tha hane fe kö nyipunieti ketr la itre ehnefe cili hnene la hene wanakoime i nyipunie!
47 “Hnëjine hë nyipunie, ke hnei nyipunieti hna xupe la hua ne la itre perofeta, ngo hnei itre qaaqaa i nyipunie hna humuthi angatr!
48 Atre hnyawa hi nyipunie la itre hna kuca hnei itre qaaqaa i nyipunie, ene laka, hnei angatr hna humuthe la itre perofeta, nge nyipunieti a nyixöle i angatr, ke nyipunieti a xupe la hua ne la itre perofeta.
49 Ka inamacane Akötresie matre öni nyidrë: ‘Tro ni a upe la itre perofeta me itre aposetolo koi angatr, nge tro angatr a humuthi nyudren, me axösisine la itre xan,
50 celë hi matre, tro ha upezöne* la xötre celë la madra ne la itre perofeta asë qaane lo kola ami trepene la fene hnengödrai.
51 Qaane lo madra i Abela, uti hë la madra i Zakaria, lo atre hna humuth nyipine la ita ne huuj me uma.’* Nyipici, eni a qaja hnyawa koi nyipunie, tro ha upezöne la xötre atr celë.
52 “Hnëjine hë nyipunie itretre inine la Wathebo, ke nyipunieti a thingi jëne la itre atr troa hetre inamacan göi Akötresie, ngo ketre patre kö thei nyipunie la inamacane cili, nge goi sawa fe nyipunie la itre atr ka ajane troa lö kow!”*
53 Nge ame ju hi la nyidrëti a tro qaa lai, hnene la itretre Cinyihan me itre Faresaio hna hnyingëne la wenge hnying menu, me
54 treqene troa tra thethi nyidrë hnene la itre trenge ithanata i nyidrë.
Itre mekun ecahu fen
^ Ketre aqane hë Satana.
^ Ger., “itre he ne wanakoime i Akötresie.”
^ Maine, “treng ne tulu.”
^ Maine, “lualai.” Ger., “ka goeëne hi la ca ewekë.”
^ Kola qaja la ketre hna majemine kuca göi troa porop.
^ Maine , “hamë ahnahna kowe la ka pë ewekë.” Wange ju la HQP.
^ Maine, “ka sisitria.”
^ Maine, “hua nyine amekunën.”
^ Maine, “hnyingën.”
^ Maine, “uma ne hmi.”
