Luka 12:1-59
-
Leven ne la itre Faresaio (1-3)
-
Xoue Akötresie, tha atre kö (4-7)
-
Aqane amamane la casi së me Keriso (8-12)
-
Ceitun ne la trenamo ka hmo (13-21)
-
Loi ju hë hna hnehengazo (22-34)
-
Mamoe ka xalaith (32)
-
-
Aqane hmek (35-40)
-
Hlu ka nyipici, hlu ka tha nyipici (41-48)
-
Tha tingeting, ngo iwesitrë (49-53)
-
Eloine troa wangatrehmekune la itre hneijin (54-56)
-
Ti gufa (57-59)
12 Ame ngöne la ijine kola traqa itronyi la itre thauzane lao atr, angatr a ipepetreny, matre Iesu a pane ithanata jë kowe la itretre dreng me hape: “Wange pala kö nyipunie la levene ne la itre Faresaio, ene la thoi.
2 Ketre, pëkö ewekë ka sihngödr ka tha tro kö a hane mama, nge pëkö ewekë hna juetrën, hna tha troa atre.
3 Nge ame asë hi la itre ewekë hnei nyipunieti hna qaja ngöne la gaa mit, tro ha drenge lai ngöne la gaa lai, nge ame asë hi la itre ewekë hnei nyipunieti hna qaja acon ngöne la gaa co, tro ha cainöjëne lai qa ngöne la itre hune uma.
4 Ketre, eni a qaja hnyawa koi nyipunie, itre sineeng, the xouene kö la ka humuthe la ngönetrei, nge pë hmaca kö hna atreine kuca.
5 Ngo eni pe a qaja koi nyipunie la Atr nyine xouen: Xouene jë la Atre atreine humuthe la ngönetrei, me kuiëne kowe la Gena.* Nyipici, eni a qaja hmaca koi nyipunie, xouene jë la Atre cili.
6 Hapeu, tha hna salemëne kö la faifi lao neköi sisi koi lue neköi manie* ka co catr? Ngo ame pe, tha thëthëhmine kö Akötresieti la ala casi thei nyudren.
7 Ngo ame nyipunie, goi hna e fe la itre pene he i nyipunie. Matre the xou kö; ke nyipiewekë catre kö nyipunie hune la itre sisi ka nyimutre.
8 “Eni a qaja hnyawa koi nyipunie, ame la atre nyixölë ni qëmekene la nöjei atr, ketre tro fe la Nekö i Atr a nyixölë angeic qëmekene la itre angela i Akötresie.
9 Ngo ame la atre xele ni qëmekene la nöjei atr, ketre tro fe a xele angeic qëmekene la itre angela i Akötresie.
10 Nge ame la atre qaja angazone la Nekö i Atr, tro ha nue la ngazo i angeic, ngo ame la atre qaja angazone la uati hmitrötr, tha nyine tro kö a köletrije la ngazo i angeic.
11 Nge, e traqa ju uti sai nyipunie kowe la itre hna icasikeu ka tru,* me qëmekene la itre he ne nöj, me itre mus, the hnehengazone kö la aqane tro nyipunieti a sa koi angatr, memine la nyine tro nyipunieti a qaja,
12 ke tro kö la uati hmitötr a ini nyipunie la nyine troa qaja e cili.”
13 Thupene lai, önine la ketre atr nyipine la ka ala nyimu ka hape: “Atre Ini fe, upe jë la mamang troa ce thawa me eni la edrö.”
14 Sa jë hi nyidrë ka hape: “Ke drei la atre acili ni troa nyi atre amekötin me atre thewe edrö koi epon?”
15 Öni nyidrëti hmaca jë hi kowe la ka ala nyimu ka hape: “Hmeke jë, nge wange pala kö la nöjei pengöne meciun,* ke ngacama hetrenyi ju hë la ketre atr la nöjei pengöne ewekë, ngo tha mele kö angeic hnene la itre ewekë cili.”
16 Qa ngöne lai, nyidrëti a hamëne pi la ketre ceitun koi angatr, öni nyidrë: “Ka mele hnyawa la itre hlapa ne la ketre trenamo.
17 Ame hnei angeic hna nyiqaane mekun e kuhu hni angeic ka hape, ‘A tro jë ni la a tune kaa, ke pëhë göhnene la itre hnenge hna menuën?’
18 Thupene lai, öni angeic, ‘Eni a mekun: Tro ni a thë la itre uma tëng,* me xupe hmaca la itre ka tru catre kö, nge e cili, tro pë hë ni a amë hnyawa la hnënge qitreng, me nöjei ewekënge ka lolo.
19 Nge öning: ‘Haawe, hetre ewekë i eö hë koi nyimu macatre; matre mele jë, xeni jë, iji jë, nge madrine jë.” ’
20 Ngo öni Akötresieti jë hi koi angeic ka hape, ‘Hmo, kola sipone la mele* i eö ngöne la jidri celë. Matre itre ewekë i drei pë hë lo itre hnei eö hna amë acon?’
21 Haawe, celë hi ka troa traqa kowe la atre thele ewekë koi angeice kö, ngo ka pë ewekë koi Akötresie.”
22 Thupene lai, öni nyidrëti jë hi kowe la itretre dreng ka hape: “Celë hi matre eni a qaja hnyawa koi nyipunie, ea loi ju hë hna hnehengazone la mele i nyipunie, göi nyine xen, me ngönetrei nyipunie, me nyine tro nyipunieti a heetrën.
23 Ke sisitria kö la mel hune la xen, me ngönetrei hune la iheetr.
24 Pane mekune jë la itre halo: Tha ka jumi feja kö me menu, nge pë fe kö uma të i nyudren, ngo Akötresieti a thue a i nyudren. Matre, hapeu, tha sisitria kö nyipunie hune la itre waco?
25 Nge drei la atre hnehengazo thei nyipunie ka atreine nyixane la mele i angeic hnei ca menetre hi?
26 Nge maine thatreine kö nyipunieti kuca la ca ewekë hi, nga nyine ue la troa hnehengazone la nyimu ewekë?
27 Nge pane mekune jë la aqane cia la itre lili: Tha nyudreni kö a huliwa, me ca iheetr, ngo eni a qaja hnyawa koi nyipunie laka, trenamo catre ju hë Solomona ekö, ngo tha hane kö angeice heetre tui nyudren.
28 Haawe, maine celë hi aqane heetrëne Akötresie la itre hnitr ka cia enehila, nge hna troa trije elany ngöne la hnasaany, nga tha nyine qaja kö la aqane troa heetrë nyipunie, itretre lapaune acon!
29 Haawe, the thele hmaca kö la nyine tro nyipunieti a xeni me ij, nge loi ju hë hna hnehengazo menu.
30 Ke celë hi itre ewekë hna thele catrëne hnene la itre atre ne fen, ngo atre kö la Keme i nyipunie laka, itre ewekë lai ka nyipiewekë koi nyipunie.
31 Ngo, catre jë pe thele panëne la Baselaia i nyidrë, nge tro ha hamë nyipunie la nöjei ewekë asë cili.
32 “The xou kö, itre mamoe ka xalaith, ke aja i Keme i nyipunie troa hamë nyipunie la Baselaia.
33 Matre salemëne pi la itre mo i nyipunie, nge hamëne jë la itre ahnahna ne utipin.* Hnëkëne jë thatraqai nyipunie la itre trengene mani ka tha ae kö, ene la itre trengamo ka tha tro kö a hane patr e hnengödrai, götrane tha hna easenyine hnei itre atrekënö, nge gaa pë xojene fao.
34 Ke ame la göhne ne la trengamo i nyipunie, tre, göhne ne fe hi la hni nyipunie.
35 “Haawe, heetre jë, hnëkë jë,* nge loi e mele la itre laame cile i nyipunie,
36 nge tro nyipunieti a ceitu me itre hlue ka lapa treqe maseta e bëeke qa hna faipoipo, matre e traqa pi nyidrë me fenafena, ijiji angatre hi troa thawa koi nyidrë.
37 Haawe, manathithi la itre hlue hna öhne hnei maseta a kola hmek! Eni a qaja hnyawa koi nyipunie laka, tro nyidrëti a heetrëne* la iheetre ne hlu me hnëkë, me upi angatr troa elë matre ce xen, nge tro nyidrëti a nyi hlu koi angatr.
38 Nge maine traqa ju nyidrë ngöne la hnaaluene hawa,* maine hnaakönine pena, me öhnyi angatr a ka hmek, haawe, manathithi hë angatre lai!
39 Ngo trotrohnine jë laka, maine tro la trene hnalapa a atre la hawa ne traqa la atrekënö, tha tro kö angeice lai a nue la atrekënö troa lö hnine la uma i angeic.
40 Ngo nyipunieti mina fe, loi e ka hnëkë pala hi nyipunie, ke tro ha traqa la Nekö i Atr ngöne la hawa hnei nyipunieti hna tha mekun.”
41 Matre öni Peteru jë hi: “Joxu, nyipëti a hamëne la ceitune celë koi huni hmekuj, maine koi nöjei atr asë?”
42 Sa jë hi la Joxu ka hape: “Matre drei lo atre thupë hnalapa ka nyipici, lo atre inamacan, ene lo hnei maseta hna troa acil hune la lapa ne la itre hlu, matre thewe xeni koi angatr thenge la hna ajan, ngöne la nyipi ijin?
43 Haawe, manathithi la hlue cili, e traqa la maseta a öhnyi angeic e kuca lai!
44 Eni a qaja hnyawa koi nyipunie, tro hë nyidrëti lai a acili angeice hune la nöjei ewekë i nyidrë asë.
45 Ngo e traqa ju la hlue mekune e kuhu hni angeic ka hape, ‘Hmitre pala kö la masetang,’ matre angeic a nyiqaane lepe la itre hlu, trahmanyi me föe, me xeni me ij, me hmo hnei ka haitr,
46 nge tro la maseta ne la hlu cili a traqa ngöne la drai hnei angeic hna tha mekune kö, me hawa hnei angeice hna thatre, tro ha catre la aqane nyithupene maseta la ngazo i angeic, me ce ami angeic me itre ka tha idrei.
47 Thupene lai, tro ha anyimua thaucëne la hlue cili, ke trotrohnine hi angeice la aja i maseta, ngo tha hnëkë kö angeic, nge tha eatrëne kö la hna iup.*
48 Ngo ame la atre kuca thatre la itre ewekë ka ngazo, nge itre ewekë hna ithaucë pin, tha tro kö a anyimua thaucë angeic. Ketre tun, maine troa hamën atrune koi ketre, tro fe a hën atrune koi angeic, nge maine troa acilëne la ketre ngöne la hnëqa ka tru, tro ha sipon atrune hmaca kö koi angeic.
49 Eni a traqa troa amele eë ngöne la fene hnengödrai, nge maine mele hë, nemene hmaca pe kö la hnenge hna ajan?
50 Hetre ketre bapataiso pala kö nyine tro ni a tro kow, nge tha tro kö a lapa hnyawa la hning, e tha pane eatre kö!
51 Hapeu, ame la mekuna i nyipunie, tre, tingeting la hnenge hna traqa fë e celë fen? Waea, ngo eni a qaja koi nyipunie, iwesitrë pe.
52 Matre, qaane enehila, maine ala faifi ngöne la ketre hnalapa, tro hë angatr a iwesitrë, tro la ala kön a cile kowe la ala lu, nge ala lu koi ala kön.
53 Nge tro hë a iwesitrë la keme memine la nekö trahmany, nge nekö trahmanyi me kem, me thine me nekö jajiny, nge nekö jajinyi me thin, me ifëtresi hmunë me tresi hmunë, nge tresi hmunë me ifëtresi hmunë.”
54 Thupene lai, öni nyidrëti jë hi kowe la ka ala nyimu ka hape: “Ame la nyipunieti a öhne la iaw e kuë, canga öni nyipunieti jë hi, ‘Calemi hë la enyi ka catr.’ Ame hna traqa pi.
55 Nge ame hë la nyipunieti a drenge la enyi a hnahna qaa kolojë, öni nyipunie, ‘Tro ha hedredrei catr.’ Ame hna traqa pi.
56 Itretre thoi! Atreine hi nyipunie waipengöne la ihnadro me hnengödrai, ngo hnauëne kö laka, thatreine kö nyipunie waipengöne la hneijine ka ketre pengöne celë?
57 Nge hnauëne kö laka, tha ketre trotrohnine kö nyipunieti la nyine tro nyipunieti a kuca?
58 Hanawange la ketre ceitun, ame la eö a ce tro memine la atre uti sai eö kowe la trene mus, thele jë troa canga iloi me angeic e epone pala kö ngöne la gojeny, wanga nue eö pi hnene la atre iuti sai kowe la atre amekötin; nge tro la atre amekötin a nue eö kowe la atre thup, nge tro pë hë angeice lai a kuië eö koi kalabus.
59 Nyipici, eni a qaja hnyawa koi eö, tha tro kö eö a tro qaa lai, e tha pane të asë kö eö lo mani* hna athipe koi eö.”
Itre mekun ecahu fen
^ Wange ju la HQP.
^ Maine, “qëmekene la itre sunago.”
^ Maine, “piin.”
^ Maine, “hnë ami xen.”
^ Maine, “u.” Ger., psy·kheʹ. Wange ju la HQP.
^ Maine, “ahnahna thatraqane la itre ka pë ewekë.” Wange ju la HQP.
^ Ger., “sa ahopatrëne la iheetr kowe la gö, me sil.”
^ Maine, “sil.”
^ Qaane 9:00 e hej koi 12:00 e hej. Nge qaane 12:00 e hej koi 03:00 e hmahmakany.
^ Maine, “thenge la aja i maseta.”
