Luka 13:1-35
13 Ngöne la ijine cili, hetrenyi fe la itre atr ka thuemacanyi Iesu ka hape, hnei Pilato hna humuthe la itre xa angetre Galilaia, lo angatr a tro fë huuj.
2 Öni nyidrëti jë hi koi angatre ka hape: “Tune kaa la mekuna i nyipunie, tru kö la ngazo ne la angetre Galilaia cili hune la itre xa atre Galilaia matre akötrë angatre jë tune lai?
3 Pëkö, ngo maine tha ketre ietra kö nyipunie, tro fe a hane apatrenyi nyipunie tune lai.
4 Nge tune kaa fe lo ala 18 ka mec hna trotro tran hnene lo ita ka draië e Siloama, ame la mekuna i nyipunie, tre ka tru catre kö la ngazo i angatr hune la itre xa atre Ierusalema?
5 Pëkö, ngo maine tha ietra kö nyipunie, tro fe a hane apatrenyi nyipunie tui angatr.”
6 Thupene lai, nyidrëti a hamëne jë la ketre ceitun, me hape: “Hetre ketre iwacua* hna traane ngöne la vine ne la ketre trahmany, matre traqa pi hi angeice troa huji wen, ngo pë kö hna öhn.
7 Öni angeice jë hi kowe la atre eënyi vin ka hape, ‘Köni macatre hë ne traqa ni troa hu wene wacua, ngo pëkö ca hnenge hna öhn. Matre, sa pi pe! Ke kola troa angazone fë nemene la dro?’
8 Önine jë hi la atre eëny ka hape, ‘Maseta, pane nue pi eje koi ca macatre, nge tro ni a sine xötreith me ami a i feja.
9 Matre, e traqa ju wa, haawe ka loi, ngo e pëkö, sa trije pi hë.’ ”
10 Nge Iesu a nyiqaane hamë ini ngöne la sunago la drai Sabath.
11 Nge hanawang! E cili fe la ketre föe hna agenyine la ngönetrei hnei dremoni a traqa koi 18 lao macatre; nge eahlo a lapa sihnyo, nge goi thatreine fe eahlo mejë.
12 Matre ame hë la Iesu a öhnyi eahlo, öni nyidrë koi eahlo: “Föe fe, mele hë nyipoti qa ngöne la meci nyipo.”
13 Ame hnei nyidrëti hna ati ime hui eahlo, matre canga egöcatre ju hi eahlo, nge eahlo a nyiqaane atrunyi Akötresieti jë.
14 Ngo hnene la tane la sunago hna wesitr pine Iesu aloine la trene mec la drai Sabath, matre öni angeice kowe la ka ala nyimu ka hape: “Sikisi lao drai hna nue troa isa kuci huliwan; haawe, traqa pi ngöne la itre drai cili troa nyinyine la itre mec, ngo tha e Sabathi kö.”
15 Ngo sa jë hi la Joxu ka hape: “Itretre thoi, drei e nyipunie la ka tha feja kau me boliko la drai Sabath me eatrongëne la si nyën troa ij?
16 Nga ka ue pe kö la föe celë matre tha tro kö a nuamele angeic la drai Sabath nge ketre nekö i Aberahama hi, nge hna othe hnei Satana koi 18 lao macatre?”
17 Nyidrëti pala kö a qaja la itre ewekë cili, ame hna hmahma la itre ka icilekeu me nyidrë, nge kolo pe a madrin la ka ala nyimu pine la itre huliwa ka lolo i nyidrë.
18 Nyidrëti a qaja ju ka hape: “Tro ni a aceitunëne me nemene la Baselaia i Akötresie, maine nemene la ceitun hna troa xom nyine qejepengön ej?
19 Ceitun ej memine la ketre itine sinapi* hna traane hnene la ketre trahmanyi ngöne la hlapa i angeic, nge e cia ha, eje a ketre isinöe, ame hna traqa pi la itre waco ne hnengödrai troa lapan la itre wapicin.”
20 Nge öni nyidrëti hmaca jë hi: “Tro ni a aceitunëne me nemene la Baselaia i Akötresie?
21 Ceitun ej memine la ketre föe ka ce lepe la leven memine la farin ka köni tulu,* ame hna ce ngöne cipa pi la falawa.”
22 Ame ngöne lo nyidrëti pala kö a trongëne la gojenyi ne tro Ierusalema, nyidrëti fe a xötrëne la itre hunahmi me itre traon matre troa inine la itre atren.
23 Ame hna hnyinge hnene la ketre trahmanyi ka hape: “Joxu, xalaithe hi la itre hna troa amelen?” Sa jë hi nyidrë ka hape:
24 “Isine jë troa lö qa ngöne la qëhnelö ka ilitr,* ke nyipici, ala nyimu la itre ka ajane troa cili thenge, ngo tha ijiji angatre kö.
25 Nge tro hë la atrekë hnalapan a mejë, me kiine la qëhnelö, nge tro pë hë nyipunie a lapa qëhnelö, me fenafena, me hape, ‘Joxu, thawa pi koi hun.’ Ngo tro nyidrëti a sa ka hape: ‘Thatre kö ni ka hape, angetre kaa nyipunie.’
26 Nge tro pë hë nyipunieti a nyiqaane qaja ka hape: ‘Hne huni lo hna ce xeni me iji me nyipë, nge hnei nyipëti fe lo hna hane ini hun ngöne la itre gojenyi ka tru.’
27 Ngo tro hmaca nyidrëti a qaja koi nyipunie ka hape, ‘Thatre kö ni ka hape, angetre kaa nyipunie. Ananyi ni pi nyipunieti asë, itretre huliwa qene atrekënö!’
28 Nge e cili, tro nyipunie a treije me latresi, ke tro nyipunieti a öhnyi Aberahama, me Isaaka, me Iakobo, memine la nöjei perofeta asë ngöne la Baselaia i Akötresie, ngo tro pë hë a kuië nyipunie e kuhu qëhnelö.
29 Nge ketre, tro la itre atr ka traqa qa koië me kuë, me kolopi me kolojë, a elë matre ce xeni ngöne la Baselaia i Akötresie.
30 Nge hanawang! Tro hë la itre ka traqa pi a tro pa, nge tro la itre ka traqa pa, a tro pi.”
31 Nge ngöne la hawa cili, hnene la itre xa Faresaio hna tro koi nyidrë me hape: “Kötre pi qaa la, ke Herodra a thele troa humuthi nyipë.”
32 Sa jë hi Iesu ka hape: “Qaja ju kowe lai kuli waele* cili ka hape, ‘Dreng! Eni a helëne la itre dremoni, me aloine la itre trene mec enehila me elany, nge tro ni a afenesine la huliwang ngöne la hnaakönine drai.’
33 Ngo nyipiewekë tro ni a sisedrëne la trongeng enehila, me elany, me euj, ke tha hna aijijëne kö* troa humuthe la ketre perofeta tröne Ierusalema.
34 Ierusalema, Ierusalema fe, atre humuthe lo itre perofeta, me trane lo itre hna upe koi eö! Anyimua thele ni troa icasinekeune la itre nekö i eö, tune la ithine ne gutu a hajuhajum la ha nekön fene la lue hnaiape ne ej, ngo xele kö nyipunie.
35 Hanawang! Ase hë nuetrije la uma i nyipunie. Eni a qaja hnyawa koi nyipunie, tha tro hmaca kö nyipunie a öhnyi ni, uti hë la tro nyipunie a qaja ka hape: ‘Manathithi la atre traqa ngöne la ëje i Iehova!’ ”*
Itre mekun ecahu fen
^ Maine, “hmejieng.”
^ Ger., siʹna·pi, maine moutarde qene wiwi, ketre feja.
^ Ame la ‘köni tulu,’ tre kola nango easenyi koi 10 kilo.
^ Maine, “ka tha isaisa kö.”
^ Ger., “alope.”
^ Maine, “tha mekune kö.”
^ Wange ju la HQP.
