Luka 15:1-32
15 Nge kolo pala hi a icilenyi xötreithi nyidrë hnei itretre hle mani me itre ka kuca la ngazo, nge angatr a drei nyidrë.
2 Ngo kolo fe a qeje nyidrë hnei itre Faresaio me itretre cinyihan. Öni angatr: “Kola kapa madrine la itretre kuca la ngazo hnene la atr celë, me ce xeni fe me angatr.”
3 Ame hnei nyidrëti hna hamë angatre la ketre ceitun. Öni nyidrë:
4 “Pane mekune jë la ketre atr ka 100 lao mamoe. Maine troa patre la cas, hapeu, tha tro kö angeice lai a pane nue lai ala 99 ngöne la hnapapa, me thel agöne la ka patr uti hë la troa öhne hmaca?
5 Nge e öhne hë, angeic a ami nyëne ju hune la ihnaiape i angeic me madrin.
6 Ame hë la angeic a bëeke koi hnalapa, angeic a hëne jë la itre sinee i angeic, me itre ka lapa easenyi angeic, me hape koi angatr, ‘Ce madrine jë me eni, ke öhne hmaca ha ni lo mamoenge ka patr.’
7 Eni a qaja hnyawa koi nyipunie, ketre tune mina fe, atraqatre kö la trenge madrin e hnengödrai kowe la ala casi ka ietrane la ngazo i angeic, hune lo ala 99 ka meköt nge ka pëkö nyine troa ietran.
8 “Nge pane mekune jë la ketre föe ka treene lao pies sileva.* Maine tro angeic a apatrene la ketre, hapeu, tha tro kö angeice lai a pane amelene la laame cil, me nyidrawane asë la uma i angeic, me thel agön uti hë la troa öhne hmaca?”
9 Nge e öhne hë, angeice a hëne jë la itre sinee* i angeic, me itre ka lapa easenyi angeic, me hape, ‘Ce madrine jë me eni, ke öhne hmaca ha ni lo manienge ka patr.’
10 Ketre tune mina fe, eni a qaja hnyawa koi nyipunie laka, hetre madrin thene la itre angela i Akötresie e hna ietra hnene la ala casi ka kuca la ngazo.
11 Thupene lai öni nyidrë: “Hanawange la keme ka lue kuku trahmany.
12 Önine jë hi la cipa koi nyidrë ka hape, ‘Kaka, hamë ni pi la edrö hna hnëkëne thatraqai ni.’ Ame hnei nyidrëti hna isa thawa pi la itre ewekë i nyidrë kowe la lue nekö i nyidrë.
13 Itre drai thupene lai, hnene la cipa hna xawan asë la itre ewekë i angeic me tro gaa nany. Nge e cili, hnei angeic hna aluzine la edrö i angeic hnene la hna mele menu.*
14 Nge ase jë hi angeic aluzin asë la edrö i angeic, traqa pi hi la jiin atraqatr ngöne la nöje cili, ame hnei angeic hna nyiqaane drei mecijiin.
15 Angeic a thele huliwa jë thene la ketre atre ne la nöj. Matre upi angeice jë hi troa ithue a i puaka.
16 Nge goi pi xeni fe angeice la a i puaka, ngo pëkö ka pi thue a i angeic.
17 “Nge ame hë la angeic a öhne la aqane menu i angeic, öni angeic, ‘Ala nyimu la itre hlue i kaka, nge mana la xeni thei angatr, ngo eni pe hi la a mecijiin!
18 Tro ni a mejë me bëeke hmaca koi kaka me hape: “Kaka, ase hë ni menu qëmekene la hnengödrai, me qëmeke i nyipë.
19 Nge tha ijijinge hmaca kö troa ketre nekö i nyipë. Matre xomi ni jë pe hi nyine hlue i nyipë.” ’
20 Ame hnei angeice hna mejë, me bëeke kowe la keme i angeic. Angeice pala kö e gaa nany, nge öhnyi angeice ju hi hnei kem. Ame hnei nyidrëti hna utipi angeic, me nyinyap, me haluthi angeic,* me dremi angeic.
21 Thupene lai, önine la neköne kowe la keme ka hape, ‘Kaka, ase hë ni menu qëmekene la hnengödrai, me qëmeke i nyipë. Nge tha ijijinge hmaca kö troa ketre nekö i nyipë.’
22 Ngo önine la keme kowe la itre hlue i nyidrë ka hape, ‘Lolojë! Tro jë a xome la ketre iheetr ka qea, ene la ka mingöminge catr, nge heetrë nyëne ju, nge line jë la ketre otrene wanakoime koi nyën, nge otrë butr i nyëne ju.
23 Nge, traqa fë pi la ketre neköi kau ka giris, nge humuthe pi, matre ce xeni jë së me madrin,
24 ke meci hë lo la nekönge celë, ngo mele hmaca ha; nge patre hë nyëne lo, ngo bëeke hmaca ha.’ Haawe, angatr a ce madrine ju.
25 “Ame hna bëeke ju la neköne haetra qa ngöne la itre hlapa, nge ame ju hi la angeic a easenyine la hnalapa, drenge ju hi angeic la mejene miuzik me fiafia.
26 Nge angeic a hëne jë la ketre hlu, me hnyingë pengön.
27 Sa jë hi lai hlue ka hape, ‘Bëeke hmaca ha lo jini nyipë, matre hnene la keme i nyipë hna iupe troa humuthe la ketre neköi kau ka giris, ke bëeke hmaca ha lo jini nyipë, nge egöcatr* angeic.’
28 Haawe, elëhni jë hi angeic e cili, matre xele ju hi angeic ma hane lö. Ame hna tro ju hnei kem troa wai angeic me iele angeic.
29 Sa jë hi angeic koi keme ka hape, ‘Hanawang! Hnenge pala hi hna nyi hlu koi nyipë ngöne la itre macatre, nge goi tha ase fe ni ena la ketre ewekë hna amekötine hnei nyipë, ngo ame pe, tha hane fe kö nyipëti nue koi ni la ca neköi mamoe, matre tro ni a ce madrin me itre sineeng.
30 Nge xulu pi hi la nekö i nyipë celë, atre aluzine* la edrö i angeic me itre föe ne gojeny, nge nyipëti a humu kau ka girisi koi angeic.’
31 Önine jë hi la keme koi angeice ka hape, ‘Neköng, ce eö pala hi me eni, nge ame asë hi la itre ewekëng, ke itre ewekë i hmunë fe.
32 Ngo qa i nyiso pe troa ce feete madrin, ke meci hë lo jini hmunë, ngo mele hmaca ha nyën; nge patre hë nyëne lo, ngo bëeke hmaca ha.’ ”
Itre mekun ecahu fen
^ Ger., “drakeri.” Ame la ca drakeri tre, thupene la atr ka huliwa koi könitre maine foa lao drai.
^ Maine, “itre xa föe.”
^ Maine, “ka tritriji mani.”
^ Ger., “thipine la nyinawa i angeic.”
^ Maine, “mel.”
^ Ger., “aca tro ulum.”
