Luka 16:1-31
16 Thupene lai, öni nyidrëti hmaca jë hi kowe la itretre dreng: “Hna qajaqaja kowe la ketre trenamo ka hape, hnene la ketre hlue i nyidrë, ene la ka thupëne la hnalapa i nyidrë, hna aluzine la itre ewekë ka lolo i nyidrë.
2 Öni nyidrëti jë hi kowe lai hlue ka hape, ‘Hö, nemene la itre mejen hnenge hna drenge göi eö? Tro jë, nge fejane jë la itre aqane huliwan eö la manieng, ke tha ijiji eö hë troa thupëne la hnalapang.’
3 E cili, mekune jë hi lai hlue ka hape: ‘Ka tro pë hë ni a ue la, ke ase hë ami ni hnei maseta qa ngöne la huliwa ne thupë hnalapa? Ketre, tha ijijinge kö troa trohneny, nge hmahma fe ni ma hane sipo.
4 Öö! Atre hi ni la nyine tro ni a kuca, matre, e upi ni jë qa la, tro pë hë la itre xan a hane kepe ni ngöne itre hnalapa i angatr.’
5 Angeic a hën asë jë la itre ka trene gufa koi maseta i angeic. Matre öni angeice jë hi kowe la hnaapan ka hape: ‘Ijetre la gufa i eö kowe la masetang?’
6 Sa jë hi lai atr ka hape: ‘Ca hadredre lao tulu* ne oel ne oliv.’ Önine hmaca jë hi lai hlu ka hape, ‘Xome hmaca jë la tusi ne gufa i eö, nge lapa ju, nge canga cinyianyine ju ka hape, 50.’
7 Thupene lai, öni angeice jë hi kowe la ketre ka hape, ‘Nge ame eö ke, ijetre la gufa i eö?’ Önine lai atr ka hape, ‘Ca hadredre lao tulu* ne qitr.’ Önine jë hi la hlu ka hape, ‘Xome hmaca jë la tusi ne gufa i eö, nge cinyianyine ju la, 80.’
8 Ame hna qaja aloinyi angeic hnene la maseta, ke ngacama ka ngazo angeic, ngo hnei angeic hna huliwa inamacan;* nge eni a qaja hnyawa koi nyipunie laka, ame la itre atr ne la fene celë,* tre itre ka huliwa inamacane kö angatre göi mani, hune la itre nekö ne la lai.
9 “Eni fe a qaja koi nyipunie ka hape: Thele sinee i nyipunieti jë jëne la itre trengamo ne fen,* ke e traqa ju itre eje patr, tro pë hë la itre sinee cili a hane kepe nyipunie ngöne la itre hnë mel ka epine palua.
10 Nge ame la atre ka nyipici kowe la ewekë ka co, tro fe angeice lai a hane nyipici kowe la ewekë ka tru, nge ame la atre tha meköti kö göne la itre ewekë ka co, tro fe angeice lai a hane tha meköt göne la itre ewekë ka tru.
11 Ketre tune mina fe, maine tha hnei nyipunieti kö hna hane nyipici göi aqane huliwane la itre trengamo ne fen, nga tro drei a mejiune koi nyipunie, me nue koi nyipunie la itre nyipi mo?
12 Nge maine tha hnei nyipunieti kö hna hane nyipici göi aqane huliwane la itre mo i ketre, nga tro drei a hamë ewekë koi nyipunie?
13 Haawe, pëkö hlue ka atreine troa nyihluene la lue maseta, ke tro angeice lai a xelene la ketre, me hnime la ketre, maine fedre koi ketre, me methinëne la ketre. Thatreine kö nyipunie troa ce nyihlue i Akötresie me Mani.”
14 Nge kola drenge la nöjei ewekë cili hnene la itre Faresaio, ene lo itretre hni koi mani, matre angatr a nyiqaane hnyimasai nyidrëti jë.
15 Ame hnei nyidrëti hna sa koi angatr ka hape: “Nyipunie la itre ka sipu jele meköti nyipunie qëmekei atr, ngo atre kö Akötresieti la aliene hni nyipunie. Nge ame la itre ka tru kowe la itre atr, tre celë hi hna sisin hnei Akötresie.
16 “Qaane lo Trenge Wathebo me itre perofeta uti hë Ioane, hna cainöjëne la maca ka loi ne la Baselaia i Akötresie, nge nöjei pengön atr a isine troa hane lö kow.
17 Nge nyipici, ijije hi troa patr la hnengödrai memine la fen, ngo ame göi Trenge Wathebo, tha tro pi kö a hane patre la ketre neköi mataitus, e tha hna pane eatr asë kö.
18 “Ame la atre sei hna cil me föe hmunë, me faipoipo me ketre, angeice hi lai a nyixetë, nge ame la atre faipoipo me ketre föe ka sei hna cil, tre kola nyixetë.
19 “Hanawange la ketre trenamo ka majemine heetrë iheetr ka maea ngön, me lino. Nge o drai pala hi, angeic a mele nyipine la itre mo, me itre nyine iamadrinë.
20 Nge hetre atre sipo nge ka si ixelek, Lazaro la ëjen, nge hna tro sai angeice lapa kowe la qëhnelö ne lai trenamo.
21 Nge pi tro fe angeic a hane xeni la itre wanane xen ka malamala qa ngöne la laulau ne la trenamo. Nge itre kuli fe a traqa troa hadrume la itre ixeleke i angeic.
22 Nge itre hnepe ijine thupen, meci ju hi lo atre sipo, ame hna xomi angeic hnene la itre angela koi Aberahama.*
“Nge meci ju fe hi lo trenamo, ame hna kelemi angeice ju.
23 Nge e hnine la hua,* angeic a gala jë draië ke jole hë angeic, ame hnei angeice hna öhnyi Aberahama qa gaa nany, nge Lazaro ezi nyidrë.
24 Angeic a hë jë me hape, ‘Kakati Aberahama fe, utipi ni ju, nge upi Lazaro jë troa hnea la he ne wanakoime i angeic ngöne tim, matre troa amenyikene la thinemeng, ke jole hë ni la nyipine la eë ka catrehnin.’
25 Ngo öni Aberahama jë hi, ‘Neköng, mekune jë lo itre ewekë ka lolo hnei hmunë hna hetrenyi ngöne lo mele hmunë, ngo ame Lazaro, angeice pe hi lo a kapa la itre ewekë ka ngazo. Haawe, enehila, kola aupunyi angeic e celë, nge hmunë pena ha a hleuhleu.
26 Nge ketre, hetre hnathup atraqatr hna amë nyipi së, matre tha ijiji kö tro la itre atr the huni a tro koi nyipunie, nge ketre tha ijiji fe kö kowe la itre atr thei nyipunie troa tro koi hun.’
27 Thupene lai, önine jë hi la trenamo ka hape, ‘Maine eje hi lai, eni a pane sipo nyipë kaka, troa upi Lazaro kowe la hnalapa ne la kemeng,
28 ke hetre itre trejin me eni, ala faifi nyudren, nge tro Lazaro a thuemacanyi nyudren, matre tha tro kö nyudreni a hane traqa kowe la hnë akötre celë.’
29 Ngo öni Aberahama jë hi, ‘Mose me itre Perofeta ha thei nyudren; matre tro hi nyudreni a drei angatr.’
30 Öni angeic hmaca jë hi, ‘Waea kakati Aberahama; ngo maine troa upe la ketre ka mele qaa hna mec, tro hë nyudreni lai a ietra.’
31 Ngo öni nyidrëti hmaca jë, ‘Maine tha drei Mose kö me itre Perofeta hnei nyudren, ketre tha tro jë kö nyudreni lai a hane drenge la ketre atr hna amelene hmaca.’ ”
Itre mekun ecahu fen
^ Ger., “baʹtos.” Ame la ca tulu tre, 22 lit.
^ Ger., “koʹros.” Ame la ca tulu, tre, 170 kilo ne qitr.”
^ Maine, “ka maca mek.”
^ Maine, “hneijine celë.” Wange ju la HQP.
^ Ger., “ka tha meköti kö.”
^ Ger., “hune la imano i Aberahama.”
^ Maine, “Hedris.” Wange ju la HQP.
