Luka 17:1-37
17 Thupene lai, öni nyidrëti kowe la itretre dreng: “Tro pala hi a hetre ewekë ka troa akeinyi nyipunie kowe la ngazo. Ngo ekölö pe la atre axulune la itre ewekë cili!
2 Ka loi hmaca ju kö e troa athipe ngöne la nyinawa i angeic la ketre ietë ka tru nyine amudron, me kuië angeic e kuhu hnagejë, hune la tro angeic a akeine la ketre ka co celë.
3 Haawe, wai nyipunieti kö. Maine tro la ketre trejin me nyipunie a tria, wenë ameköti angeice jë, nge e traqa ju angeice ietra, nue pi hë la ngazo i angeic.
4 Nge e tro angeic a asevene kuca la ngazo koi nyipunie ngöne la ca drai, nge e tro angeic a asevene qaja ka hape, ‘Menu hë ni,’ qa i nyipunie troa nue la ngazo i angeic.”
5 Nge önine la itre aposetolo kowe la Joxu ka hape: “Nyixane jë la lapaune hun.”
6 Önine jë hi la Joxu: “Maine tro la lapaune i nyipunie a tune la itine sinapi,* tro hë nyipunieti a qaja kowe la Mopel* celë ka hape, ‘Feke pi qa la, nge cia ju e kuhu hnagejë!’ Nge tro hë eje lai a drei nyipunie.
7 “Maine hetre hluene la ketre e nyipunie ka trohneny maine ka axö öni pena, tro angeic a kepe nyën tune kaa la nyën a bëeke qaa helep? Tro kö angeic a qaja koi nyën ka hape, ‘Trohemi ma xen’?”
8 Waea. Ngo tro pe angeic a qaja ka hape: ‘Hnëkë xeni jë koi ni, nge heetrëne jë la iheetre ne hlu, nge awe jë la itre hnenge hna ajan, nge e ase hë ni xeni me ij, eö pena ha a hane xeni me ij.’
9 Nge hapeu, tro kö angeic a olene la hlue i angeic pine idrei? Waea.
10 Ketre tune mina fe, e ase hë nyipunieti kuca la nöjei huliwa hna ahnithe koi nyipunie, qaja ju ka hape: ‘Eahuni la itre hlue ka pë hnënyöngön, ke ame la hne huni hna kuca, tre, hnëqa huni kö lai.’ ”
11 Ame la nyidrëti a tro Ierusalema, hnei nyidrëti hna pane Samaria me Galilaia thenge.
12 Nge ame hë la nyidrëti a lö kowe la ketre hunahmi, hnene la treene lao lepera hna öhnyi nyidrë, me nango cil ananyi nyidrë.
13 Ame hnei angatr hna sue me hape: “Iesu, Atre Ini fe, epi utipi huni ju!”
14 Matre ame hë la nyidrëti a öhnyi angatr, öni nyidrë: “Tro jë kowe la itretre huuj.” Nge angatre pala kö e cahu gojeny, ame hna loi ju la meci angatr.
15 Nge ame hë la kola öhne hnene la ketre e angatr ka hape, loi hë la meci angeic, angeic a bëeke hmaca ju, me sue me atrunyi Akötresie.
16 Ame hnei angeice hna thili ju kowe la lue ca i Iesu, me olene koi nyidrë. Ngo atre Samaria angeic.
17 Sa jë hi Iesu ka hape: “Ala treene lo itre hna aloin? Nga ekaa pë hë lo ala naen?
18 Hnauëne laka, tha bëeke kö lo ala naene troa atrunyi Akötresie, ngo nyëne hmekuje hi, nge atrene la ketre nöj pena?”
19 Öni nyidrëti jë hi koi angeice ka hape: “Cile jë, nge tro jë hë; ka mele hë hmunë hnene la lapaune i hmunë.”
20 Hnene la itre Faresaio hna hnyingë Iesu ka hape: “Eu la troa traqa la Baselaia i Akötresie?” Sa jë hi nyidrë ka hape: “Tro la Baselaia i Akötresie a traqa, ngo tha tro kö la itre atr a wangatrehmekune ej.
21 Nge tha tro kö la itre atr a qaja ka hape: ‘Wange ju e celë!’ maine: ‘E cili!’ Ke hanawang! Nyipi nyipunieti hi la Baselaia i Akötresie.”
22 Thupene lai, öni nyidrë kowe la itretre dreng: “Tro ha traqa la ijine tro nyipunieti a ajane catrëne tro la Nekö i Atr a ce me nyipunie, ngo tha tro kö nyipunieti a hane öhne lai.
23 Nge tro la itre atr a qaja koi nyipunie ka hape, ‘Goeëne ju e celë!’ maine, ‘E cili!’ The tro kö, nge the xötrethenge angatre kö!
24 Ke tro la drai ne mama la Nekö i Atr a tune la kola samek qaa koië, me hudrum e kuë.
25 Ngo eje hi laka, tro angeic a pane melëne la itre akötre ka nyimutre, nge tro ha thipe triji angeic hnene la xötre celë.
26 Nge tune la itre ewekë ka traqa ngöne lo hneijine i Noa, tro fe a hane tune ngöne la itre drai ne la Nekö i Atr.
27 Angatre lo a xen, nge angatr a ij, nge itre trahmanyi a faipoipo, nge kola ihamë föeë, uti hë la drai ne Noa a lö hnine la aka, ame hna traqa pi la Iwë Atraqatr, me apatrenyi angatr asë.
28 Nge tro fe lai a tune lo hneijine i Lota: angatr a xen, nge angatr a ij, nge angatr a itö, nge angatr a salemë ewekë, nge angatr a tra feja, nge angatr a xupi uma.
29 Ngo ame ngöne la drai ne Lota a tro qaa Sodroma, mala pi hi la eë me itre wene etë ka mel qaa hnengödrai kösë mani, me apatrenyi angatr asë.
30 Haawe, tro fe a hane tun ngöne la drai ne mama la Nekö i Atr.
31 “Nge ngöne la drai cili, tha tro kö la atr ka cil hune uma a uti me lö troa xome la itre mo i angeic. Nge tune mina fe, the tro kö la atr ngöne la hlapa a bëeke kowe la itre ewekë hutrö i angeic.
32 Mekune kö lo föi Lota.
33 Ke ame la atre isine kowe la sipu mele* i angeice kö, tro ha luz, ngo ame la atre nue la mele i angeic, tro ha amelen.
34 Eni a qaja hnyawa koi nyipunie laka, ame ngöne la heji cili, hetrenyi la lue atr ka troa meköl hune la ca ili; matre troa xomi ketre, me nue pë hë la ketre.
35 Nge hetrenyi fe la lue föe ka ce amudromudro qitr, matre troa xomi ketre me nue pë hë la ketre.
36 ——
37 Hnyinge jë hi angatre ka hape: “Ekaa la hnë troa eatrëne la itre ewekë cili Joxu?” Öni nyidrëti jë hi: “Ame la gaa hetre ngönetrei ka mec, tre celë fe hi hna itronyi hnei itre aeto.”*
Itre mekun ecahu fen
^ Ger., siʹna·pi, maine moutarde qene wiwi, ketre feja.
^ Maine, “Mabole.”
^ Maine, “u.” Ger., psy·kheʹ. Wange ju la HQP.
