Luka 18:1-43
18 Ame hnei nyidrëti hna hamë angatr la ketre ceitun nyine amamane la enyipiewekëne troa thithi lapa, nge tha tro kö a hmaca.
2 Öni nyidrë: “Hetrenyi ngöne la ketre traon, la ketre atre iameköti ka tha xoue Akötresie, nge ka tha metrötrë atr.
3 Nge hetrenyi fe e cili la ketre sine föe ka majemine tro lapa kowe la atre iameköti, me hape: ‘Isenyine jë matre meköti pi ni qëmekene la ithupëjiang.’
4 Ame lo xötrei, xele kö lo atre iameköti, ngo e thupen öni angeic, ‘Ngacama tha ka xoue Akötresieti kö ni, nge pëkö atr hnenge hna metrötrën,
5 ngo pine laka, kolo pala hi a ikucahmë hnene la sine föe celë, tro hë ni a kapa la sipo* i eahlo, wanga tro ni a kucakuca hnei eahlo.’ ”
6 Matre önine jë hi la Joxu ka hape: “Drenge fe hi nyipunie la hna qaja hnene la atre amekötin, ngacama tha ka meköti kö angeic?
7 Matre hapeu, tha tro kö Akötresieti lai a hane isenyine thatraqane la itre hnei nyidrëti hna iën, itretre treije koi nyidrë e lai me jidr? Nge goi tro fe nyidrëti lai a hane xomihnin aqeanyi angatr.
8 Eni a qaja hnyawa koi nyipunie, tro nyidrëti lai a canga isine troa jele meköti angatr. Ngo hapeu e traqa pi elanyi la Nekö i Atr, tro kö nyidrëti a öhne la ketre atr ka hane lapaune tun* e celë fen?”
9 Nge hnei nyidrëti mina fe hna hamëne la ketre ceitun thatraqane la itre ka mejiune kowe la sipu inamacane i angatr, me wangesixa itre xan:
10 “Hnene la lue atr hna lö hnine la uma ne hmi troa thith, Faresaio la ketre, nge atre hle mani la ketre.
11 Ame hnene la Faresaio hna cil me nyiqaane thithi thaup ka hape, ‘Akötresieti fe, oleti laka, tha ceitunge kö me itre xa atr—itre ka atrekënö, me ka tha meköti kö, me ka nyixetë—maine tune pena la atre hle mani celë.
12 Ke ka alua tha xeni ni ngöne la wiik, me hamëne la hnaatrenene* la nöjei ewekë hnenge hna kapa.’
13 Ngo ame la atre hle mani, angeice hi a nango cile iananyi, nge goi tha gala draië fe angeic, ngo angeice pe a lepelepe la imano i angeic, me hape: ‘Akötresieti fe, epi utipi ni, ke atr ka ngazo ni.’
14 Eni a qaja hnyawa koi nyipunie laka, meköti kö la atre cili ngöne la angeic a bëeke koi hnalapa, hune lo Faresaio. Ke ame la atre sipu selë angeice kö, tre tro ha thaipiën, ngo ame la atre ipië, tro ha adraiën.”
15 Ame hnene la itre atr hna tro fë koi nyidrë la itre nekönatr matre tro nyidrëti a ketri nyudren. Ngo ame ju hi la kola öhne lai hnene la itretre dreng, angatr a nyiqaane wesitrëne la itre atr.
16 Ngo hnei Iesu hna hëne la itre nekönatre koi nyidrë me hape: “Nue nyudreni pi troa tro koi ni, nge the sewe nyudreni kö, ke thatraqane la itre ka tui nyudreni la Baselaia i Akötresie.
17 Nyipici, eni a qaja hnyawa koi nyipunie, ame la atre tha kapa la Baselaia i Akötresie tune la ketre nekönatr, tha tro jë kö angeice lai a hane lö kow.”
18 Matre hnene pë hë la ketre atr ka trene hnëqa hna hnyinge koi nyidrë ka hape: “Atre Ini fe ka nyipi lolo, nemene la nyine tro ni a kuca matre hetrenyi ni la mele ka pë pun?”
19 Sa jë hi Iesu ka hape: “Hnauëne la eö a hë ni atre ka nyipi lolo? Casi hi la ka lolo, a Akötresie hmekuje hi.
20 Atre hë eö lo itre wathebo: ‘The nyixetë kö, the ihumuthi kö, the atrekënö kö, the silitrengathoi ketre kö, nge metrötrëne ju la keme me thine i eö.’ ”
21 Sa jë hi angeice ka hape: “Ka trongëne hë ni la nöjei ewekë cili qaane lo eni a co.”
22 Drenge jë hi Iesu lai, matre öni nyidrëti koi angeic: “Ca ewekë pe hi ka patre thei eö, salemëne pi la itre ewekë i eö, nge hamëne pi la mani kowe la itre ka pë ewekë. Tro hë eö lai a hetre mo e hnengödrai. Nge jë fe, xötrethenge ni jë.”
23 Ngo ame hë la angeic a drenge lai, hace pi hi la hni angeic, ke tru catr hnei mo i angeic.
24 Iesu a goeë angeice ju me hape: “Ka jole catre kowe la trenamo troa lö kowe la Baselaia i Akötresie!
25 Ke eje hi, hmaloi kö kowe la kamela troa lö qa ngöne la gaa xulu ne nilan, hune la trenamo troa lö kowe la Baselaia i Akötresie.”
26 Hnene pë hë la itre ka drenge lai hna qaja ka hape: “Nga drei hö la hna troa amelen?”
27 Öni nyidrëti hmaca jë: “Hetre itre ewekë hna thatreine kuca hnei atr, ngo ame Akötresie, pëkö hnei nyidrëti hna thatrein.”
28 Ngo sa jë hi Peteru ka hape: “Hanawang! Ase hë huni nue la nöjei ewekë hun troa xötrethenge nyipë.”
29 Öni nyidrëti jë hi koi angatr ka hape: “Eni a qaja hnyawa koi nyipunie, pëkö atre nue uma, me ifëkuku, me trejin, me kem, me thin, me ha nekönatr pine la Baselaia i Akötresie,
30 ka tha tro kö a hane kapa atrune hmaca kö ngöne la hneijine celë, nge ngöne la fene ka troa traqa,* la mele ka pë pun.”
31 Thupene lai, nyidrëti a pane hën acone jë la ala Truelof, me hape: “Hanawang! Easë hë la a tro Ierusalema, nge tro ha eatre* la nöjei ewekë hna cinyihan hnei itre perofeta göne la Nekö i Atr.
32 Ngo troa pane nue angeic kowe la itre atre ne fen, nge tro angatr a hnyimasai angeic, me qaqa angeic, me hnyijuë angeic.
33 Nge thupene la hna troa thaucë angeic, tro angatr a humuthi angeic. Ngo tro ha amele angeice hmaca ngöne la hnaakönine drai.”
34 Ngo tha trotrohnine kö angatr la aliene la itre ewekë celë, ke hna juetrëne lai koi angatr, matre tha tro kö angatr a trotrohnine la hna qaja.
35 Ame hnei Iesu hna easenyin e Ieriko, nge e cili la ketre timek ka lapa ezine gojenyi me sipo mani.
36 Nge pine laka, angeic a drei mejene la ka ala nyimu, angeic a hnyingë pengöne ju.
37 Ame hna qaja koi angeic ka hape: “Iesu atre Nazareta a celë thenge!”
38 Matre angeic a sue jë ka hape: “Iesu, nekö i Dravita, epi utipi ni!”
39 Ame hna wesitrë angeic hnene la itre ka weje mekene la tro, me qaja koi angeic troa lapa thaup, ngo kolo jë petre hi ka hape, sue catre jë angeic me hape: “Nekö i Dravita, utipi ni ju!”
40 Ame hnei Iesu hna pane cile ju, me iupe troa traqa fë lai trahmany, matre ame hë la angeic a traqa, Iesu a hnyinge jë koi angeic ka hape:
41 “Nemene la nyine tro ni a kuca koi hmunë?” Sa jë hi angeice ka hape: “Joxu, kuca jë matre goe pi ni.”
42 Öni nyidrëti jë hi koi angeice ka hape: “Goe pi, ke mele hë hmunë hnene la lapaune i hmunë.”
43 Ame hna goe pi angeic, me nyiqaane xötrethenge nyidrë, me atrunyi Akötresie. Nge ame hë la kola öhne lai hnene la itre xa atr, angatr a atrunyi Akötresieti ju fe.
Itre mekun ecahu fen
^ Maine, “iele ni uti hë la troa pë hnyawa la trengecatreng.”
^ Ger., “lapaun.”
^ Wange ju la HQP.
^ Maine, “hneijin.” Wange ju la HQP.
^ Maine, “pexej.”
