Luka 19:1-48
19 Nyidrëti a lö jë e Ieriko me tro nyipine la traon.
2 Nge e cili fe la tane la itretre hle mani, Zakaio la ëjen, nge trenamo angeic.
3 Hnei angeice hna thel troa goeëne ka hape, drei lae Iesu, ngazo pe, pine laka ka hohopatr angeic nge nyimu atre pena, haawe tha ijiji angeice kö troa öhnyi nyidrë.
4 Angeic a nyinyape ju me elë hune la ketre iwacua ne hnitr, göi troa öhnyi Iesu, ke nyidrëti a cili thenge.
5 Ame hë la Iesu a traqa e cili, nyidrëti a gala jë draië me qaja koi angeic ka hape: “Zakaio, canga uti pi, ke tro ni a lapa thei eö.”
6 Ame hnei angeic hna canga ut, me madrin atraqatre troa hane kepe nyidrë.
7 Ame hë la kola öhne lai hnene la ka ala nyim, angatr a iqajakeune jë ka hape: “Nyidrëti a lapa thene la ketre atre ka kuca la ngazo.”
8 Ngo Zakaio a cile jë me hape kowe la Joxu: “Hanawang Joxu! Eni a hamëne la sin ne la itre mong kowe la itre ka pë ewekë, nge ame lo itre hnenge hna atrekënö,* eni a afoa lao të hmaca koi angatr.”
9 Öni Iesu jë hi koi angeic ka hape: “Enehila, kola lö la iamele hnine la hnalapa celë, ke ketre nekö i Aberahama fe angeic.
10 Nge kola traqa la Nekö i Atr troa thele la itre ka patr me amele angatr.”
11 Nge itretre dreng pala kö a drenge la itre ewekë cili, ame hnei nyidrëti hna hamëne la ketre ceitun. Nyidrëti a qaja lai, ke tha nanyi kö e Ierusalema, nge itretre dreng a mekun ka hape, ame hë la nyidrëti a traqa e cili, canga tro hi a mama la Baselaia i Akötresie.
12 Öni nyidrëti jë hi: “Hnene la ketre nekö i joxu hna tro gaa nanyi matre troa acili joxu angeic, me bëeke hmaca.
13 Ngo hnei angeic hna pane hëne la treene lao hlue i angeic, me hamë angatr la treene lao manie sileva,* me qaja koi angatre ka hape, ‘Huliwane jë uti hë la tro ni a bëeke hmaca.’
14 Ngo itre atrene la nöj a methinë angeic, matre angatr a upe jë la itre qeneqaja koi angeic, troa qaja ka hape: ‘Xele huni ma tro eö a joxu hun.’
15 “Ame hë la angeic a bëeke hmaca thupene la hna acili joxu* angeic, angeic a hëne jë lo itre hlue hna ahni mani kow, me hnyingë angatr la aqane huliwan angatr la mani.*
16 Ame hna traqa pi la hnaapan, me hape, ‘Joxu qa ngöne lo 1 mina i nyipë, hetrenyi hmaca kö ni la 10.’
17 Önine la Maseta koi angeic: ‘Ka lolo catr, eö hi la ketre hlue ka lolo! Ke ame ngöne la itre hnëqa ka co, hnei eö hna amamane la aqane mele nyipici i eö, nga tro hë eö a musi kowe la treene lao traon.’
18 Ame hna traqa pi la hnaaluen, me hape, ‘Joxu qa ngöne lo 1 mina i nyipë, hetrenyi hmaca kö ni la 5.’
19 Önine jë hi la Maseta koi angeic ka hape, ‘Eö fe, tro eö a hane musi kowe la faifi lao traon.’
20 Ngo traqa pi hi la ketre, me hape, ‘Joxu hane hi lo la mina i nyipë, hnenge hna juetrën hnine la sine imaano.
21 Ke öhne hi nyipë, xounge nyipë, ke ka ngazo thiina nyipë, nge nyipëti a kapa la mani ngo tha hnei nyipëti kö hna amë ngöne baak. Nge ketre, nyipëti a menuëne la itre götrane tha hnei nyipëti kö hna tran.’
22 Önine jë hi lai Maseta ka hape, ‘Tro kö ni a ameköti eö thenge la trengewekë i eö, hlue ka ngazo! Atre hnyawa hi eö lo ka hape, ka ngazo catre la thiinang, nge eni a kapa la mani tha hnenge kö hna amë ngöne baak, me menuëne la itre götrane tha hnenge kö hna tran?
23 Nga hnauëne hö laka, tha amë kö eö la manieng ngöne baak? Matre e traqa pi ni, tro ni a kapa atrune hmaca kö.’
24 “Qa ngöne lai, önine jë hi la Maseta kowe la itre ka cil ezin ka hape, ‘Xome jë la mani qaathei angeic, nge hamëne pi kowe lo ka hetrenyi la treen.’
25 Ngo öni angatre jë hi, ‘Joxu, hetrenyi hë angeice la treene lao mani sileva!’
26 Haawe, sa jë hi la Maseta ka hape: ‘Ke eni a qaja hnyawa koi nyipunie laka, ame la ka trene ewekë, tro hmaca kö a nyixane koi angeic, ngo ame la atre pë ewekë, tro fe a xome qaathei angeic la hnepe hnei angeic hna hetreny.
27 Ketre, traqa fë pi lo itre ithupëjia me eni, itre ka xelene la musing, nge humuthi angatr asë pi qëmekeng.’ ”
28 Ase jë hi nyidrëti qaja la itre ewekë cili, nyidrëti a tro ju Ierusalema eë.
29 Nge ame hë la nyidrëti a easenyin e Bethefage me Bethania, hmekune lo wetr hna hëne ka hape, Wetr Elaio,* nyidrëti a upe ju la lue atre dreng,
30 me hape: “Tro jë kowe la traon qëmeke i epon, nge e traqa ha epon, tro epon a öhn e cili la ketre neköi boliko hna hnöth, nge tha hna hane tithi petre kö hnei atr. Sei nyëne pi, nge traqa sai nyëne pi.
31 Nge e hetre ka qaja koi epon, ka hape: ‘Hnauëne la epon a senge la neköi boliko?’ Hape jë: ‘Joxu a aja nyën.’ ”
32 Ame hna tro pi hnene lo lue atre dreng, me öhn asë tune lo hna qaja hnei nyidrë.
33 Ngo ame hë la nyidroti a nyiqaane senge lai boliko, hnene la atrekë sin hna hnyingë nyidro ka hape: “Hnauëne la epon a senge la neköi boliko?”
34 Sa jë hi nyidro ka hape: “Joxu a aja nyën.”
35 Nyidroti a traqa fë pi la neköi boliko koi Iesu, me atë la itre iheetre i nyidro hui nyën, ame hnei Iesu hna të jë.
36 Nge angatr pala kö ngöne la gojeny, ame hnene la itre atr hna seluthe pi la itre iheetre i angatr e kuhu gojeny.
37 Nge ame ju hi la nyidrëti a easenyine la gojenyi ka uti qa hune la Wetr Elaio, hnene la itretre drei nyidrë ka ala nyimu hna nyiqaane madrin atraqatr, me sue draië troa atrunyi Akötresie, pine la itre huliwa ka men hnei angatre hna goeën.
38 Öni angatr: “Manathithi la Joxu ka traqa ngöne la ëje i Iehova!* Manathithi la hnengödrai, nge atrunyi Akötresieti jë së e koho hnengödrai!”
39 Ngo önine jë hi la itre xa Faresaio nyipine la ka ala nyimu ka hape: “Atre Ini fe, wesitrëne ju la itretre drei nyipë.”
40 Sa jë hi nyidrë ka hape: “Eni a qaja hnyawa koi nyipunie, maine lapa thaupu ju angatre la, tro ha sue la itre etë.”
41 Nge ame ju hi la nyidrëti a easenyin e Ierusalema, nyidrëti a pane goeëne ju la traon, me treije pin,
42 me hape: “Maine trotrohnine ju eö la itre ewekë ka hamë tingeting—ngo enehila, ase hë juetrëne koi eö.
43 Ke tro ha traqa koi eö la drai ne tro la itre ithupëjia me eö a acile xötreithi eö la itre jo atraqatr, me thingi jë* i eö.
44 Nge tro angatr a lepe apatrenyi eö, me itre nekö i eö. Tha tro pi kö angatr a nue la ketre etë troa të hune la ketre, ke hnei Akötresieti hna traqa troa waipengö i eö, ngo tha wangatrehmekune kö eö.”
45 Ame hnei Iesu hna lö jë hnine la uma ne hmi, me nyiqaane helëne la itretre salem,
46 me hape koi angatr: “Hna cinyihane lo ka hape, ‘Ame la umang, tre, uma ne hmi,’ ngo nyipunieti pena a xome ej nyine uma i itre atrekënö.”
47 Nge o drai pala hi, nyidrëti a hamë ini hnine la uma ne hmi. Ngo hnene la itre tane i angetre huuje me itretre cinyihan, me itre atre ka draië ne la nöj, hna thele troa humuthi nyidrë.
48 Ngo thatre pe angatre la aqane troa eatrëne la mekune cili, ke ame la itre atr asë, pi tro pala hi angatr a xötrethenge nyidrë me drei nyidrë.
Itre mekun ecahu fen
^ Maine, “sili trengathoi ketre göi troa kepe mani.”
^ Ger., “mina.” Ame la ca mina, tre thupene la atre eënyi ka huliwa koi köni treu.
^ Maine, “baselaia.”
^ Ger.,“sileva.”
^ Maine, “Oliv.”
^ Wange ju la HQP.
^ Maine, “axoun.”
