Luka 2:1-52
2 Ame ngöne la itre drai cili, hnei Kaisara Auguso hna amekötin troa e la etrune* la nöjei atr asë e cailo fen.
2 (Hna pane numerane la itre atr ngöne lo ijine kola Gavena hnei Kurenio e Suria.)
3 Ame hnene la itre atr asë hna isa tro troa cinyihane la itre ëje i angatr ngöne la isa traone i angatr.
4 Ame hna mejë hnei Iosefa qaa Nazareta e Galilaia a tro Iudra, traone i Dravita, ene Bethelema, ke angeice la ketre atrene la hnalapa i Dravita.
5 Ce angeice me Maria, lo hna hamën nyine föi angeic tune lo hna axeciën; nge easenyi hë matre hnaho pi Maria.
6 Matre ame hë la nyidroti a traqa e cili, ijine hë koi Maria troa hnaho.
7 Ame hnei angeic hna hnahone la nekönatr trahmany haetra. Maria a hakuthi nyëne ju hnene la itre iheetr, me ameköle nyën ngöne la trepene a i öni, ke pë hnyawa ha hnahage koi nyidro göi troa meköl e jidr.
8 Nge ngöne la nöje cili, hetrenyi fe la itretre thupë öni ka mel e kuhu trön, angatr a hlë jidr troa thupëne la itre öni i angatr.
9 E cili, mama pi hi koi angatr la ketre angela i Iehova,* nge kola hudrume la lolo i Iehova* xötreithi angatr, ame hnei angatr hna nyiqaane xou atraqatr.
10 Ngo canga önine jë hi la angela ka hape: “The xou kö, ke hanawang! Eni a traqa fë koi nyipunie la ketre maca ka lolo, nge nyine amadrinëne la nöjei atr asë.
11 Enehila, ase hë hnahon ngöne la traone i Dravita la atre iamele, ene Keriso, Joxu.
12 Nge hane hi la hatrene koi nyipunie: Tro nyipunieti a öhne la medreng hna hakuth hnei imaano lino, nge hna amekölene ngöne la trepene a i öni.”
13 Ame hna ce mama pi memine la angela la trongene isi e hnengödrai, kola ce atrunyi Akötresie me hape:
14 “Atrunyi Akötresieti jë e hnengödrai, nge ame e celë fen, tingetinge hë la itre atr hna kapa hnei nyidrë.”
15 Matre ame ju hi la kola elë hnengödrai eë hnene la itre angela, kolo pë hë a iqajakeune hnene la itretre thup ka hape: “Tro easë Bethelema eë troa wange la ewekë ka traqa, ene lo ewekë hnei Iehova* hna qaja koi së.”
16 Nge traqa ju hi angatr a öhnyi Maria, me Iosefa memine la medreng hna amekölene ngöne la trepene a i öni.
17 Nge ame hë la angatr a öhne lai, angatr a qaja ju la maca hna tro fë koi angatr göne la medreng.
18 Nge ame la itre ka drenge lai, angatr a haine la hna qaja hnene la itretre thupë öni,
19 nge Maria a amë hutine ju e kuhu hni angeic la itre trengewekë celë, me mekune la alien.
20 Thupene lai, hnene la itretre thup hna bëeke hmaca, me olene me atrunyi Akötresie pine la nöjei ewekë hnei angatre hna drenge me öhn, thenge lo hnei nyidrëti hna qaja koi angatr.
21 Ame ngöne la hnaaeitrene drai, ijine tro ha xöj la medreng, nge Iesu la ëje i nyën, kolo ëje lai hna atë hnene lo angela qëmekene troa upune hnei Maria.
22 Ketre, ame hë la kola traqa la ijine ahmitrötrë nyidro, thenge lo hna amekötin ngöne la Trenge Wathebo i Mose, hnei Maria me Iosefa hna tro sai Iesu Ierusalema eë troa fetra sai nyën koi Iehova,*
23 tune lo hna cinyihane ngöne la itre Wathebo i Iehova,* lo kola hape: “Ame la nöjei haetra trahmany,* troa hëne ka hape, hmitrötre koi Iehova.”*
24 Nge nyidroti a tro fë jë la huuj thenge lo hna amekötine hnene la Wathebo i Iehova,* ene la: “lue meketrë me lue neköi piny.”
25 Nge hanawang! E cili e Ierusalema la ketre atr, Simeona la ëjen, ka meköti angeic nge ka catre nyihlue i Akötresie. Angeic a lapa treqene la ijine tro Akötresieti a akeukawanyi Isaraela, nge ka tiqa fe angeic hnei uati hmitrötr.
26 Ketre, hnei uati hmitrötre hë hna amamane koi angeice laka, tha tro pi kö angeic a öhne la mec, e tha hna pane öhne la Keriso i Iehova.*
27 Nge hnene la uati hmitrötr matre angeic a tro ju kowe la uma ne hmi, hmekune la ijine kola traqa hnei keme me thin troa fetra fë la medreng, ene Iesu, tune lo hna majemine kuca fene la wathebo.
28 Angeic a xepe jë la medreng, me atrunyi Akötresie me hape:
29 “Enehila Joxu ka Sisitria, nyipëti a aijijëne la hlue i nyipë troa tro cememine la tingeting, thenge lo aqane qaja i nyipë,
30 ke ase hë öhne hnei lue mekenge la jëne iamele i nyipë,
31 ene la hnei nyipëti hna hnëkën qëmekene la nöjei atr asë,
32 ene la lai ka troa huletrije la sine imaano ka thung la luemekene la itre atre ne fen, nge lolo ne la nöje i nyipë, Isaraela.”
33 Ame hnei kem me thin i nyën hna haine la itre ewekë hna qaja göi nyën.
34 Nge Simeona a amanathithi angatre jë, me qaja koi Maria, thine ne la nekönatr ka hape: “Hanawang! Nyën la kepin matre kei jë, nge mejë jë la ka ala nyimu e Isaraela, nge nyëne fe la hatren hna troa methinën.
35 (nge eje hi, tro ha thin axulune la hni nyipoti* hnei taua), matre isa mama pi la aliene hni ne la ka ala nyim.
36 Nge, e cili fe la ketre perofeta föe, Ana la ëjen, nekö i Fanuela, atrene la tribu i Asera. Qatre föe hë eahlo, nge hnei eahlo ekö hna ce mele memine la föi eahlo koi sevene lao macatre thupene lo nyidro a faipoipo.*
37 Ngo sine föe hë eahlo enehila, nge 84 hë lao macatre i eahlo. Ame pe, tha patre pi kö eahlo ngöne la uma ne hmi, a kola nyihlu e lai me jidr, me tha xen, me xëwe.
38 Matre ame ngöne la hawa celë, hnei eahlo hna easenyi catr me ole koi Akötresie, me ithanatane la medreng kowe la nöjei atr ka lapa treqene la iamele koi Ierusalema.
39 Haawe, ame hë la kola ase kuca la hna amekötine hnene la Trenge Wathebo i Iehova* hnei Maria me Iosefa, nyidroti a bëeke hmaca jë kowe la sipu traone i nyidro e Nazareta ne Galilaia.
40 Nge kolo pala hi a tru trootro la nekönatr me trengecatre i nyën, me inamacan, nge Akötresieti pala hi a kepe nyën.
41 Nge e nöjei macatre, hnene la keme me thine i nyën hna majemine tro Ierusalema troa feetëne la Paseka.
42 Nge ame hë la kola 12 lao macatre i nyën, hnei angatr hna tro Ierusalema tune lo hna majemine göne la feete cili.
43 Matre thupene la itre drai ne feet, hnei angatr hna bëeke hmaca, ngo lapa ju pe hi Iesu e Ierusalema, nge thatre kö keme me thin.
44 Nyidroti a mekune ka hape, ce Iesu memine la itre ka ce tro me angatr, ame hnei nyidro hna tro ngöne la drai ka pexej. Ngo thupene hë, nyidroti a nyiqaane thele Iesu jë thene lo itre sinee i nyidro, me itre ka ce tro me angatr.
45 Ngo pine laka, tha öhnyi nyëne pala kö hnei nyidro, nyidroti a bëeke hmaca jë Ierusalema eë, me thele agö Iesu.
46 Haawe, thupene la köni drai, hnei nyidroti hna öhnyi nyën hnine la uma ne hmi, a kola nango lapa nyipine la itre ka hamë ini, me drei angatre hnyawa, me hnying.
47 Nge ame la itre ka drei nyën, angatr a isa haine la inamacane i nyën, me aqane sa i nyën.
48 Nge ame hë la keme me thin a öhnyi nyën, nyidroti a sesëkötre ju, matre öni Maria jë hi: “Neköng, hnauëne la hmunë a kuca tune lai koi nyio? Meci hë ni me kaka hna thel agö hmunë.”
49 Sa jë hi nyëne ka hape: “Hnauëne la epon a thel agö ni? Thatre kö epon laka, tro ni a lapa ngöne la uma ne la Kemeng?”
50 Ngo tha trotrohnine pi kö nyidroti la hnei nyën hna qaja.
51 Thupene lai, nyën a tro hmaca pi me nyidro, me bëeke hmaca Nazareta eë, nge nyëne pala hi a catre drengethenge nyidro. Nge ame thin, hnei eahlo pala hi hna amë hutin e kuhu hni eahlo la itre hnei nyën hna qaja.
52 Nge Iesu pala hi a tru trootro me inamacan, nge nyëne pala hi a amadri Akötresie me itre atr.
Itre mekun ecahu fen
^ Maine, “cinyihane la itre ëje i angatr.”
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Ger., “itre nekönatre trahmanyi ka pane fe la trengene hnaho.”
^ Wange ju la HQP.
^ Wange ju la HQP.
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Ger., “qaane lo tha iatre petre kö me trahmany.”
^ Wange ju la HQP.
