Luka 20:1-47
20 Ame ngöne la ketre drai ne nyidrëti a hamë ini kowe la ka ala nyimu e hnine la uma ne hmi, me cainöjëne la maca ka loi, hnene la itre tane i angetre huuj me itretre cinyihan, me itre qatre ne la nöj, hna traqa koi nyidrë.
2 Nge öni angatr: “Qa kaa la atreine i eö troa kuca la itre ewekë celë? Nge drei la atre upi eö troa kuca lai?”
3 Sa jë hi nyidrë ka hape: “Tro fe ni a hane hnyinge koi nyipunie, nge tro nyipunieti a pane sa:
4 Ame la bapataiso i Ioane, tre ka qa hnengödrai, maine qaathei atr?”
5 Angatr a nyiqaane iqajakeune ju ka hape: “Maine tro sa hape, ‘Qa hnengödrai,’ tro hë angeice lai a sa ka hape, ‘Nga hnauëne laka, tha lapaune kö nyipunie koi Ioane?’
6 Ngo e tro sa qaja ka hape: ‘Qaathei atr,’ wai së kö ke tranyi së pi hnei etë hnene la ka ala nyim, ke ame koi angatr, Ioane la ketre perofeta.”
7 Celë hi matre, öni angatr, thatre kö angatr ka hape, ka qa kaa la bapataiso i angeic.
8 Ketre öni nyidrëti jë hi: “Nga tha tro kö ni a hane qaja koi nyipunie ka hape, ka qa kaa la atreineng.”
9 Ame hnei nyidrëti hna hamëne pi kowe la itre atr la ketre ceitun me hape: “Hnene la ketre trene uma hna eënyi vin me nue kowe la itre xa atre eënyi troa thupën, thupene lai, angeic a tro pi me lapa aqeanyi ngöne la ketre nöje gaa nany.
10 Nge ame hë ngöne la ijine menu, hnei angeice hna upe la ketre hlue kowe la itretre eëny, matre tro angatr a hamë angeice la itre wene vin. Ngo hnene pena la itretre eënyi hna pane lepe lai hlu, me upi nyëne hmaca, matre pë ju kö hna bëeke fë.
11 Matre hnei angeice hmaca hna upe la ketre hlu. Ngo hnei angatre fe hna hane lepi nyën me ahmahmanyi* nyën, me upi nyën hmaca, nge pë pala hi hna bëeke fë.
12 Hnei angeice hna upe hmaca kö la hnaakönine hlu, ngo tune pala hi, hnei angatre hna jei nyën me helë nyën.
13 Qa ngöne lai, önine la trene vin ka hape: ‘Nemene jë la nyine tro ni a kuca? Tro ni a upe la nekönge hniminang. Nge tro hë angatre lai a metrötrë nyën.’
14 Matre, ame hë la kola öhnyi nyën hnene la itretre eëny, angatr a iqajakeune ju ka hape, ‘Hane hi la nekön. Jë fe tro sa humuthi nyën, matre ewekë i easë pë hë la edrö i nyën.’
15 Haawe, angatr a huli nyëne jë tröne la hlapa, me humuthi nyën. Nga nemene kö la hna troa kuca hnene la trene vin koi angatr?
16 Tro hë angeice lai a traqa me humuthe la itre ka eëny, me ahnithe pë hë la hlapa koi itre xan.”
Ame hë la kola drenge lai hnene la itre atr, öni angatr: “Tha tro kö a hane traqa la ewekë celë!”
17 Matre Iesu a goeëne huti angatre ju me hape: “Nemene la aliene la hna cinyihane ka hape: ‘Ame lo etë hna nuetrije hnene lo itre ka xupi uma, tre eje hi lo etë ka sisitria catr’?*
18 Haawe, ame la atre kei hune la etë cili, troa hutri angeic, nge ame la atr hna tran hnene lai etë, tro hë angeic a nyilanyila.”
19 Hnene la itretre cinyihan me itre tane i angetre huuj hna thele troa xolouthi nyidrë ngöne la hawa cili, ke trotrohnine hi angatr laka, nyidrëti a qeje angatr ngöne lai ceitun, ngo xou i angatre pe la ka ala nyim.
20 Matre thupene la hna pane goeë nyidrëti hnyawa, hnei angatr hna upe juetrëne la itre trahmanyi hna nyithupen. Nge tro la itre atre cili a nyi ka meköt, me thele troa nyizö nyidrë hnene la ketre trengewekë i nyidrë. Nge tro ha uti sai nyidrë koi mus me koi gavena.
21 Matre angatr a nyiqaane hnyinge jë koi nyidrë me hape: “Atre Ini fe, atre hi huni laka, ka nyipici nyipë, nge tha nyipëti kö a goeëne la pengö i atr, ngo nyipëti pe a inine la itre mekuna i Akötresie ka ihmeku memine la nyipici:
22 Matre tune kaa, meköti kö tro huni a kuiëne la mani hna athip hnei Kaisara, maine waea?”
23 Ngo atre hnyawa hi nyidrë laka, angatr a thele troa ami thethi nyidrë, matre öni nyidrë:
24 “Awe jë koi ni la ca drenari.* Iqëmeke i drei la? Nge ëje i drei la?” Öni angatre jë hi: “Kaisara.”
25 Matre öni Iesu jë hi: “Haawe, nga hamëne pi koi Kaisara la ewekë i Kaisara, nge koi Akötresie la ewekë i Akötresie.”
26 Matre, thatreine ju kö angatre xome la itre trenge ithanata i nyidrë troa nyizö nyidrë qëmekene la itre atr. Ngo hnei angatre pe hna lapa thaup, ke kola haine la aqane sa i nyidrë.
27 Ame hna traqa pi koi nyidrë la itre Sadukaio, ene lo itre ka tha mejiune kowe la mele hmaca, me hnyinge koi nyidrë ka hape:
28 “Atre Ini fe, hnei Mose hna cinyihane koi së ka hape, ‘Maine tro la ketre atr a mec, ngo mele pala kö la föe hmunë nge pëkö nekö i nyidro, tro hë la trejin me angeic a xome la föe, me nyi matrane lai ka mec.’
29 Matre, the huni la sevene lao trejin. Hnene la haetra hna xomi föe, ngo meci pi hi angeic, nge pëkö kuku.
30 Ame hnene la hnaaluen
31 me hnaakönin hna faipoipo me eahlo; nge hna tune fe hnene lo ala seven asë. Meci asë ju kö angatr nge pëkö trene kuku.
32 Nge thupene lai, ketre meci ju hi lai föe.
33 Haawe, nga ame hë ngöne la mele hmaca, tro pë hë eahlo a föi drei? Ke hnei angatr asë hi hna faipoipo me eahlo.”
34 Iesu a sa jë koi angatre ka hape: “Ame la itre nekö ne la fene celë,* tre itre ka faipoipo, me ka ihamë föeë,
35 ngo ame la itre hna troa jele mekötin troa mele ngöne la fene ka hnyipixe, nge nyine troa amelene hmaca, tre, tha tro kö angatr a faipoipo maine ihamë föeë.
36 Ke eje hi, tha tro hmaca kö angatre lai a hane mec, ke ceitu i angatr me itre angela, nge itre nekö i Akötresie angatr, ke angatre hi la itre nekö ne la mele hmaca.
37 Nge hnei Mose fe lo hna hane qeje mele hmaca kowe la itre ka mec, ngöne lo angeic a hë Iehova* qëmekene la sinöe ka ithinyi ka hape, ‘Akötresi Aberahama, me Akötresi Isaaka, me Akötresi Iakobo.’
38 Haawe, tha nyidrëti kö la Akötresi ne la itre ka mec, ngo itre ka mele pe. Ke ame koi nyidrë,* itre ka mel asë hi angatr.”
39 Ame hna sa jë hnene la itre xa atre cinyihan ka hape: “Atre Ini fe, meköti hi la aqane sa i nyipë.”
40 Matre pë ju hi ka hane pi hnyinge koi nyidrë.
41 Thupene lai, nyidrëti hmaca pena ha hnyinge koi angatr, me hape: “Hnauëne laka, itretre cinyihan a hë Keriso ka hape, nekö i Dravita?
42 Ke hnei Dravita lo hna sipu qaja ngöne la tusi Salamo ka hape: ‘Iehova* a qaja kowe la Joxung: “Lapa ju ngöne la götrane macang,
43 uti hë la tro ni a amë la itre ithupëjia me hmunë fene la lue ca i hmunë.” ’
44 Haawe, maine Dravita a hë Keriso ka hape, Joxu, nga tro nyidrëti a nekö i Dravita tune kaa?”
45 Nge ame la kola drenge hnyawa hnene la itre atr, hnei nyidrëti hna qaja kowe la itretre dreng ka hape:
46 “Wange pala kö la itretre cinyihan, ke aja i angatr troa tro fë iheetre ka qea, nge tro la itre atr a ibozu me metrötrë angatr ngöne la itre hna maketr, me lapane la itre pane* göhnë ngöne la itre sunago, me itre mekene ta ngöne la kola ce xeni hej.
47 Ngo angatre hi la itre ka ulume la itre mo ne la itre sine föe, me thithi aqeanyi göi troa mama.* Ngo troa atraqatre* la hnëjine i angatr.”
Itre mekun ecahu fen
^ Maine, “thaipiën.”
^ Ger., “he ne kona.” Wange ju la HQP.
^ Wange ju la HQP.
^ Maine, “hneijin.” Wange ju la HQP.
^ Wange ju la HQP.
^ Maine, “thenge la aqane waiewekë i nyidrë.”
^ Wange ju la HQP.
^ Maine, “ka tru.”
^ Maine, “nyi drön.”
^ Maine, “tru.”
