Luka 21:1-38
21 Ame hë la nyidrëti a gala draië, öhne ju hi nyidrëti la itre trenamo a kola kuië ahnahna ngöne la hnë* kuië mani.
2 Thupene lai, öhne ju hi nyidrë la ketre sine föe ka pë ewekë, a kola kuiëne la lue neköi pies ka co catr.*
3 Ame hnei nyidrëti hna qaja ka hape: “Eni a qaja hnyawa koi nyipunie laka, tru catre kö la hna kuiën hnene la sine föe celë ka pë ewekë, hune la hna kuca hnei angatr asë.
4 Ke hnei angatr asë hi hna kuiën qa ngöne la trengamo i angatr, ngo hnei eahlo pe hna hamëne la hnepe hnei eahlo hna hetreny,* nge nyine mele i eahlo.”
5 Nge e thupen, hnei itre xan hna ithanatane la elolone la uma ne hmi qa ngöne la itre etë, me itre ahnahna hna hamëne koi Akötresie.
6 Matre qaja jë hi nyidrë ka hape: “Ame la itre ewekë cili hnei nyipunieti hna goeën, tro ha traqa la drai laka, tha tro hmaca kö a të la ketre etë hune la ketre etë, ke tro ha thëtrij asë.”
7 Ame hnei angatr hna hnyinge koi nyidrë ka hape: “Atre Ini fe, eu la troa traqa la itre ewekë cili, nge nemene fe la hatren laka, easenyi hë troa traqa la itre ewekë cili?”
8 Sa jë hi nyidrë ka hape: “Wange pala kö, wanga amenu nyipunieti jë. Ke nyimutre la itre ka troa traqa ngöne la ëjeng, me hape, ‘Eni hi la Keriso’, nge ‘Easenyi hë la ijine hna sa.’ Ngo the xötrethenge angatre pi kö.
9 Nge e traqa jë nyipunieti dreng la itre isi, me gomegom,* the xou pi kö, ke tro kö a pane traqa la itre ewekë cili, ngo tha pune pala kö lai.”
10 Thupene lai, öni nyidrëti hmaca jë hi: “Tro ha isi la ketre nöj me ketre nöj, me ketre baselaia me ketre baselaia.
11 Nge troa hetre sa atraqatr, nge ngöne la ketre götran me ketre götran, tro ha jiinë xen me hetre itre meci ka ixötrekeu; nge tro hë la itre atr a goeëne la itre ewekë ka iaxouenyi qaa hnengödrai.
12 “Ngo qëmekene troa eatr la itre ewekë cili, tro la itre atr a pane othi nyipunie me axösisi nyipunie, me uti sai nyipunie kowe la itre sunago, me akalabusi nyipunie. Nge tro ha xomi nyipunie kowe la itre joxu, me itre gavena pine la ëjeng.
13 Ame la thangane lai, tre tro hë nyipunieti a anyipici ni.
14 Celë hi matre, loi e xeci e kuhu hni nyipunie ka hape, tha tro kö a hnëkëne la aqane tro nyipunieti a sa koi angatr,
15 ke tro kö ni a hamëne koi nyipunie la itre trengewekë, me inamacan, matre tha tro kö la itre ithupëjia me nyipunie a atreine sa.
16 Ketre, tro ha uti sai* nyipunie hnei itre keme me thine i nyipunie, me itre trejine me nyipunie, me itre sinee i nyipunie, nge tro itre xan a nue nyipunie kowe la mec,
17 nge tro ha methinë nyipunie hnene la nöjei atr asë pine la ëjeng.
18 Ngo tha tro pi kö a hane patre la ketre ipene he i nyipunie.
19 Nge pine la hnei nyipunieti hna cile hut, tro hë nyipunieti a mel.*
20 “Haawe, e öhne hë nyipunie la itre trongene isi a lapa xötreithe la traon ne Ierusalema, atre hnyawa ju laka, easenyi catre hë matre lep apatrenyi angeice jë.
21 Loi e tro la itre ka lapa e Iudra a kötre kowe la itre wetr, nge loi e tro la itre ka lapa e Ierusalema a kötre qaa lai, nge tha tro pi kö la itre ka lapa e trön a hane lö kow.
22 Ke tro la itre drai cili a itre drai ne ati thupen hnei Akötresie, nge tro ha eatrëne la nöjei ewekë hna cinyihan.
23 Ekölö hi ni la itre ka upune, me itre ka iji thi nekönatr ngöne la ijine cili! Ke ijine akötre lai ngöne la nöj asë, nge ijine iameköti koi angatr.
24 Nge tro ha humuthi angatr hnei taua, nge tro ha xomi angatr kowe la itre xa nöj; nge tro la itre nöj a wajatriji Ierusalema, uti hë pexeje pi la hneijine ne la itre nöj.*
25 “Nge tro fe a hetre hatren ngöne la jö, me treu, me wëtresij. Nge e celë fen, tro ha xou la itre atr, ke thatre kö angatre la nyine troa kuca pine la aqane ulil me enije catre la hnagejë.
26 Tro hë la itre atr a menumenu hnei xou ngöne la angatr a troa öhne la itre ewekë ka troa traqa e celë fen, ke tro ha jumejume la itre ewekë ka men e hnengödrai.
27 Nge tro hë angatr a öhne la Nekö i Atr a traqa hune la ketre iaw, cememine la men me lolo atraqatr.
28 Ngo ame hë la kola nyiqaane eatre la itre ewekë cili, mejë jë, nge gala jë draië, ke calemi hë la iamele koi nyipunie.”
29 Qa ngöne lai, nyidrëti a hamëne pi la ketre ceitune koi angatr. Öni nyidrë: “Pane mekune jë la iwacua me itre xa isinöe.
30 Ame la nyudreni a nyiqaane sajem,* atre hë nyipunie laka, easenyi hë la ijine hedredrei.
31 Ketre tune mina fe, ame hë la nyipunieti a öhne la kola eatre la itre ewekë cili, lapa atre ju ka hape, easenyi hë la Baselaia i Akötresie.
32 Nge eni a qaja hnyawa koi nyipunie laka, tha tro kö a patre la xötre celë, nge tha pane traqa kö la nöjei ewekë.
33 Nge maine troa patre la hnengödrai memine la fen, ngo tha tro kö a gufa la itre trengewekëng.
34 “Ngo wange pala kö nyipunie ke hace jë la itre hni nyipunie hnene la hna xeni atruny, me iji atruny, me hnehengazone la itre ewekë thatraqane la mel, ke wanga asesëkötrë nyipunieti jë hnene la drai cili
35 tune la ketre itheth. Nge tro lai a traqa kowe la nöjei atr asë e celë fen.
36 Haawe, catre jë hmek, nge the mano kö xëwe koi Akötresie, matre mele pi nyipunie qa ngöne la itre ewekë cili, me cile qëmekene la Nekö i Atr.”
37 Nge e lai, Iesu a hamë ini hnine la uma ne hmi, nge e jidr, nyidrëti a tro troa lapa ngöne la ketre wetr, lo hna hëne ka hape, Wetr Elaio.*
38 Nge e hmahmakany, itre atr a traqa koi nyidrë troa drei nyidrë hnine la uma ne hmi.
Itre mekun ecahu fen
^ Maine, “trengen.”
^ Maine, “lue lepton.” Wange ju la HQP.
^ Maine, “puafala.”
^ Maine, “icilekeu.”
^ Maine, “nue.”
^ Maine, “amele nyipunieti kö.”
^ Maine, “itre atr ne fen,” ene la itre atr tha atre Iudra kö.
^ Maine, “xöle hmaca la itre drön.”
^ Maine, “Oliv.”
