Luka 22:1-71
-
Itre atre huuj a thele troa humuthi Iesu (1-6)
-
Paseka tixenuë hna hnëkën (7-13)
-
Xötrei acile la Xeni Heji Ne La Joxu (14-20)
-
“Ngöne la laulau la atre salemë ni” (21-23)
-
Isi pi ka tru (24-27)
-
Isisinyikeu i Iesu göi baselaia (28-30)
-
Tria i Peteru hna canga qaja (31-34)
-
Nyipiewekë troa hnëkë; lue taua (35-38)
-
Thith i Iesu hune la Wetr Elaio (39-46)
-
Kola xolouthi Iesu (47-53)
-
Peteru a hape, thatre Iesu kö (54-62)
-
Hnyimasai Iesu (63-65)
-
Ikootrë hnine la Hnakootr Ka Tru i Angetre Iudra (66-71)
22 Easenyi hë matre traqa pi la ijine troa feetëne lo itre Falawa Ka Pë Levenen, ene lo feet hna hëne ka hape, Paseka.
2 Nge pine laka itre tane i angetre huuj me itretre cinyihan a xouene la ka ala nyim, angatr a thele jëne jë troa xolouthi nyidrë.
3 Ame hnei Satana hna löthe [“maine, ukune”] la hni i Iudra, lo hna hëne ka hape, Isakariota, ketre ne lo ala Truelof.
4 Matre, angeic a tro pi troa ithanata memine la itre tane i angetre huuj, me itretre thup göi aqane tro angeic a nue Iesu koi angatr.
5 Ame hnei angatre hna madrin, me ce axeciëne troa hamë angeic la itre manie sileva.
6 Angeic a kapa ju me nyiqaane thupëne la ijine patre la ka ala nyimu matre nue nyidrë koi angatr.
7 Ame hna traqa pi la drai ne la itre Falawa Ka Pë Levenen, ene lo drai ne humuthe la öni göi Paseka;
8 matre Iesu a upi Peteru me Ioane ju, me hape: “Tro jë, nge hnëkëne jë la Paseka matre tro së a xen.”
9 Öni nyidro: “Nyipëti a ajane tro nyio a hnëkën ekaa?”
10 Sa jë hi nyidrë ka hape: “Hanawang! Ame la epon a lö kowe la traon, tro epon a ixelë memine la ketre trahmanyi ka ajö trengene tim, xötrethenge angeice jë kowe la uma hnei angeic hna troa lö kow.
11 Nge qaja ju kowe lai atrekë uman ka hape: ‘Önine la Atre Ini: “Ekaa la hnahag hnë tro ni me itretre dreng a xeni la Paseka?” ’
12 Tro hë angeice lai a amamai epon la ketre hnahag ka tru e koho hun, ka hetre alien nge hna hnëkëne hë. Haawe, hnëkëne jë hë e cili.”
13 Ame hnei nyidroti hna tro ju, me öhne asë thenge lo hna qaja hnei nyidrë. Matre nyidroti a hnëkëne ju la Paseka.
14 Haawe, ame hë la kola traqa kowe la hawa hna sa, nyidrëti a elë jë troa ce xeni me itretre dreng.
15 Öni nyidrëti jë hi koi angatre ka hape: “Atraqatre la trenge ajange troa ce xeni me nyipunie la Paseka celë, qëmekene tro ni a melëne la akötr;
16 ke eni a qaja hnyawa koi nyipunie, tha tro hmaca kö ni a xeni lai, uti hë la troa eatr ngöne la Baselaia i Akötresie la nöjei ewekë asë hna nyihatrene hnene la Paseka.”
17 Nge ase jë hi nyidrëti kapa la ver, nyidrëti a thithi jë me hape: “Xome jë la, nge ihamënekeune pi nyipunie.
18 Nge eni a qaja hnyawa koi nyipunie laka, qaane enehila, tha tro hmaca kö ni a iji la waina celë, uti hë la troa traqa la Baselaia i Akötresie.”
19 Ketre, nyidrëti a xome ju la falawa me thith, me thupathupa, me hamë angatr, me hape: “Celë hi hatrene la ngönetreing hna troa hamën thatraqai nyipunie. Tro pala pë hë nyipunie a kuca la, nyine mekune koi ni.”
20 Thupene la hna xeni hej, nyidrëti a kuca tune ju fe kowe la ver. Öni nyidrë: “Ame la vere celë, ej a nyihatrene la isisinyikeu ka hnyipixe, hna troa aejëne ngöne la eni a nenge la madrang thatraqai nyipunie.
21 “Ngo hanawang! E celë hi ngöne la laulau la atre salemë ni.
22 Ke eje hi laka, kola ha tro la Nekö i Atr thenge lo hna qaja amë hë; ngo ekölö hi ni pe lai atre salemë angeic!”
23 Ame hnene la itretre dreng hna nyiqaane ihnyingënekeune ka hape, drei e angatr la ka troa kuca lai.
24 Ase jë hi, angatre a nyiqaane iwesitrë ju göi troa atre ka hape, drei la ka tru e angatr.
25 Matre öni nyidrëti jë hi: “Itre joxu ne la itre nöj a musinëne la itre atren, nge kola hëne la itre ka musi cili ka hape, Atre Kuci Loi.
26 Ngo tha tro pi kö a hane tune lai thei nyipunie; ngo loi e tro la ka draië thei nyipunie a co, nge tro la atre weje meken a hlu.
27 Ke drei la ka draië, ene la atre xen,* maine la atre nyi hlu? Hapeu, tha ene kö la atre xen? Ngo eni pe la a tune la hlu nyipi nyipunie.
28 “Ngo ame pe, hnei nyipunieti pala hi hna ce me eni ngöne la itre akötreng.
29 Nge eni hë a isisinyikeu me nyipunie göne la ketre Baselaia, tune la aqane isisinyikeu Kakati me eni göne la Baselaia,
30 matre ijiji nyipunie troa hane xeni me iji hune la laulaung ngöne la Baselaiang, me lapa hune la itre theron, me amekötine la 12 lao tribu ne Isaraela.
31 “Simona, Simona, hanawang! Satana a ajane troa kuca koi eö la hna kuca hnene la atre aisane la wene qitr me ikupein.
32 Ngo hnenge hna xëwe sai eö, matre tha tro kö a patre la lapaune i eö. Ngo e bëeke hmaca ha eö, acatrene jë la lapaune ne la itre trejine me eö.”
33 Thupene lai, öni angeic koi nyidrë: “Joxu, tro ni a xötrethenge nyipë, ngacama tro ju hë nyipë koi kalabusi maine mec.”
34 Ngo sa jë hi nyidrë ka hape: “Eni a qaja hnyawa koi eö Peteru, tha kukahleke pala kö la trotro, nge akönia qaja ha eö ka hape, thatre ni kö hnei eö.”
35 Öni nyidrëti hmaca jë hi: “Ame lo eni a upi nyipunie nge pëkö trengene mani i nyipunie, me kemej, me ibutr, hapeu, hna pë la itre ewekë cili thei nyipunie?” Sa jë hi angatre ka hape: “Waea!”
36 Matre öni nyidrë: “Ngo enehila, loi e tro la atre hetre trengene mani a xom, nge tune mina fe koi kemej, ketre, loi e tro la ka pë taua a salemëne la iheetre ka qea i angeic, matre itö taua.
37 Ke eni a qaja hnyawa koi nyipunie laka, kola eatre koi ni la itre hna cinyihan, ene lo hna hape, ‘Hna ijelekeu angeic me itre atr ka kuca la ngazo.’ Ke itre trengewekë lai ka troa eatre koi ni.”
38 Thupene lai, öni angatr: “Joxu, goeën! Hane hi la lue taua.” Sa jë hi nyidrë ka hape: “Loi ju hë.”
39 Ame hë la nyidrëti a tro qaa lai, nyidrëti a tro pi tune lo hna majemin kowe la Wetr Elaio,* nge itretre dreng a ixötrethenge.
40 Nge traqa pi hi nyidrëti e cili, öni nyidrëti koi angatre ka hape: “Catre jë thith, matre tha tro kö a tupathi nyipunie.”
41 Ame hnei nyidrëti hna nango ananyi angatr,* me sa iwatingöne ca, me thith,
42 me hape: “Kakati fe, maine aja i nyipë, epi ananyine qaatheng la vere celë. Ngo tha thenge kö la ajang, ngo aja i nyipëti pe.”
43 Nge traqa pi hi koi nyidrë la ketre angela qaa hnengödrai troa thuecatre i nyidrë.
44 Ngo pine laka, thatreine hë nyidrëti xomihnine la itre mekun ka ajolëne la hni nyidrë, nyidrëti a catre thithi hmaca ju, ene pe, xöla pi hi la zihnu i nyidrë kösë wene madra ka mala hune ihnadro.
45 Ase jë hi nyidrëti thithi me tro kowe la itretre dreng, traqa ju hi nyidrëti a öhnyi angatr e meköl, ke kucakuca catre angatr hnei hleuhleu.
46 Öni nyidrëti jë hi: “Hnauëne la nyipunieti a meköl? Mejë jë, nge catre jë thith, matre tha tro kö a hane tupathi nyipunie.”
47 Nyidrëti pala kö a ithanata nge hanawang! xulu pi hi la ka ala nyim, nge ketre atr, Iudra la ëjen, ketre ne lo ala Truelof, la ka weje mekene la tronge i angatr, angeic a easenyi Iesu troa dremi nyidrë.
48 Ngo öni Iesu jë hi: “Iudra, eö a troa nue la Nekö i Atr koi angatr jëne idrem?”
49 Ame hë la kola trotrohnin hnene la itre atr ka ce me nyidrë la itre ewekë ka troa traqa, öni angatr: “Joxu, tro huni a xomi taua?”
50 Nge hnene la ketre e angatr hna lepe la hlue ne la atre huuje ka sisitria, me thupa la hnangenyë maca i angeic.
51 Ngo öni Iesu jë hi: “Loi ju hë.” Ame hnei nyidrëti hna ketr la hnangenyë ne la hlu, me aloinyi angeic.
52 Iesu a qaja jë fe kowe la itre tane i angetre huuj, me itretre thupëne la uma ne hmi, me itre qatre ne la nöj ka traqa koi nyidrë, ka hape: “Atrekënö ni matre nyipunieti a traqa fë taua me jia troa xolouthi ni?
53 E nöjei drai, ce eni me nyipunie hnine la uma ne hmi, ngo tha xolouthi ni hi hnei nyipunie. Ngo hawa i nyipunieti hë la, nge ijine tro hë la jidri a mus.”
54 Angatr a xolouthi nyidrëti jë, me othi nyidrë, me tro sai nyidrë kowe la hnalapa ne la atre huuje ka sisitria; nge Peteru a ixötrethenge qa gaa nany.
55 Nge e cili, itre atr a nyiqaane athi eë, me ilapanyi nyipine la götrane gaa pë ihakun ne la hnalapa ne lai atre huuj, ame hnei Peteru hna lapa nyipi angatr.
56 Ngo ame hë la kola thina angeic hnene la ehudrumen la eë, hnene la nekö jajiny, ketre hlu, hna goeë tili angeic me hape: “Ce angeice hi lo me nyidrë.”
57 Ngo thoi ju hi angeic, me hape: “Hö föe, thatre fe kö ni lai atre cili.”
58 Thupene lai, hnene la ketre atr hna öhnyi angeic me hape: “Eö fe hi la ketre e angatr.” Ngo sa jë hi Peteru ka hape: “Waea, tha eni fe kö.”
59 Nge thupene la ca hawa, hnene la ketre atr hna nyiqaane catre fë ka hape: “Nyipici, ce angeice lo me nyidrë, ke mama hi laka, ketre atre Galilaia angeic!”
60 Ngo öni Peteru: “Thatre kö ni la hnei eö hna qaja!” Nge ame ju hi la angeic a ithanata, kukahleke jë hi la trotro.
61 Ame hna xei ju hnei Iesu me goeëne meköti Peteru, nge mekune hmaca jë hi Peteru lo hnei Iesu hna qaja ka hape: “Qëmekene troa kukahleke enehila la trotro, tro eö a akönia qaja ka hape, thatre ni kö hnei eö.”
62 Ame hnei angeice hna tro e kuhu qëhnelö me treije latresi.
63 Nge hnene la itre ka thupë Iesu hna nyiqaane hnyimasai nyidrë, me lepi nyidrë.
64 Nge ase jë hi angatre thunge la alameke i nyidrë, angatr a hnyinge ju ka hape: “Öi, perofetane jë! Drei la ka xe eö?”
65 Nge angatre a silitrengathoi nyidrëti hmaca ju.
66 Nge e lai hë, hnene la lapa ne la itre qatre ne la nöj, me itre tane i angetre huuj, me itretre cinyihan hna itrony, me troxomi nyidrë kowe la Hnakootre Ka Tru i Angetre Iudra, me hape:
67 “Maine eö hi la Keriso, qaja jë koi hun.” Ngo sa jë hi nyidrë ka hape: “Maine qaja ju hë ni, ngo tha tro pi kö nyipunieti lai a jelenyipicin.
68 Nge ketre, maine tro ni a hnyinge koi nyipunie, tha tro jë kö nyipunieti lai a sa.
69 Ngo qaane enehila, tro hë la Nekö i Atr a lapa ngöne la götrane maca ne la Akötresie ka men.”
70 Qa ngöne lai, öni angatr: “Nga eö hi la Nekö i Akötresie?” Öni nyidrë: “Nyipunieti kö la ka qaja.”
71 Öni angatre jë hi: “Nyine ue hmaca la troa hetre atr anyipicin? Ke easë hi la a drenge qa ngöne la sipu që i angeic.”
Itre mekun ecahu fen
^ Maine, “saathi aqeany.”
^ Maine, “Oliv.”
^ Ger., “ma troa tune la enanyine la kola kuiëne la ketre etë.”
