Luka 23:1-56
23 Ame hnei angatr asë hna isa mejë, me uti sai nyidrë koi Pilato.
2 Nge angatr a nyiqaane upe zö nyidrëti jë me hape: “Hnene la atre celë hna thele troa amejëne la nöj troa icilekeu me mus, me wathebone troa kuiëne la mani hna athipe hnei Kaisara, me hape, angeice hi la Keriso, ketre joxu.”
3 Ame hnei Pilato hna hnyinge koi nyidrë ka hape: “Eö la Joxu i angetre Iudra?” Sa jë hi nyidrë ka hape: “Nyipëti lai ka qaja.”
4 Matre Pilato a qaja ju kowe la itre tane i angetre huuj, me kowe la ka ala nyimu ka hape: “Pëkö hnepe ngazo hnenge hna öhne thene la atre celë.”
5 Ngo angatr a catre fë mekun me hape: “Angeic la atre agomegomëne la nöje Iudra asë, hna nyiqaan e Galilaia uti hë la.”
6 Ame hë la kola drenge lai, hnyinge jë hi Pilato ka hape: ‘Atre Galilaia kö la atre cili?’
7 Haawe, thupene la kola xecie hnyawa koi Pilato laka, Iesu e fene la musi Herodra, hnei Pilato hna upi nyidrëti koi Herodra, ke Herodra fe e Ierusalema ngöne la ijine cili.
8 Ame hë la Herodra a öhnyi Iesu, madrine catre jë hi angeic, ke ekö hë angeic pi iöhnyi me Iesu pine la itre ewekë hnei angeic hna drei mejen göi nyidrë. Nge ketre, aja i angeice fe troa hane öhne la itre xa iamamanyikeu.
9 Ame hnei angeic hna anyimua hnyinge koi nyidrë, ngo tha sa pi kö nyidrë.
10 Nge kolo pala hi a elëhni me cil hnene la itre tane i angetre huuj, me itretre cinyihan göi troa upe zö nyidrë.
11 Ame hnei Herodra me itre sooce i angeic hna nyiqaane qenahmo nyidrë, me hnyimasai nyidrë, me heetrë nyidrëti la ketre iheetr ka mingöming, göi troa upi nyidrëti hmaca koi Pilato.
12 Nge ame ngöne la drai cili, lue treme sineene hë Herodra me Pilato, ngacama lue ka imethinë nyidro ekö.
13 Ame hnei Pilato hna icasinekeune la itre tane i angetre huuj, me itre he ne nöj, me itre xa atr
14 me hape: “Hnei nyipunieti hna traqa fë la atre ce koi ni, tune la atre agomegomëne la nöj. Ngo hanawang! Hnenge hna waipengö i angeic qëmeke i nyipunieti asë, ngo tha öhne kö ni la hnei nyipunieti hna nyizö angeic.
15 Nge tui Herodra fe, ke hnei angeic hna upe hmaca la atre celë koi së, nge hanawang! Pëkö ngazo hnei angeice hna kuca matre troa humuthi angeic.
16 Ngo tro hi ni a pane thaucë angeic, me nue angeice hmaca.”
17 ——
18 Ngo hnene la ka ala nyimu hna sue me hape: “Humuthe* pi la atre cili nge nue Barabasa pi!”
19 (Hna akalabusine la atre cili pine amejëne la icilekeu ngöne la traon, nge pine ihumuth.)
20 Ame hnei Pilato hmaca hna ithanata me angatr, ke aja i angeic troa nue Iesu.
21 Ngo angatr a sue jë me hape: “Athipi angeice ju hune la sinöe! Athipi angeice ju hune la sinöe!”
22 Matre Pilato a qaja hmaca jë ka hape: “Ke hnauën? Nemene la ngazo hna kuca hnene la atre ce? Tha öhne kö ni la ketre hnepe ngazo thene la atre ce matre troa humuthi angeic. Ngo tro pe ni a thaucë angeic, me nue angeice hmaca.” Kola ha hnaakönine qaja hnei angeic koi angatr.
23 Ame hnei angatre hna nyiqaane pi hun me suene troa humuthi* nyidrë, matre hune ju kö angatr.
24 Ame hnei Pilato hna amekötine jë troa drenge la sipo i angatr.
25 Angeic a nue pi la atre hnei angatre hna ajan, ene lo hna akalabusin pine icilekeu me ihumuth, me nuaxöji Iesu kowe la aja i angatr.
26 Haawe, ame hë la angatr a troxomi nyidrë, angatr a acilëne jë la ketre atr ka traqa qa ngöne la itre hlapa, Simona la ëjen, atre Kurene, me atë la sinöe ne iaxösisi* hui angeic matre ajöne trongën hutrö i Iesu.
27 Nge kola xötrethenge Iesu hnene la itre atr ka ala nyim, me itre föe fe, itre ka xexe imano hnei hleuhleu, me treije pi nyidrë.
28 Iesu a xei jë kowe la itre föe me hape: “Nekö jajinyi ne Ierusalema, the treije pi ni kö. Ngo treije pi nyipunieti jë pe, me itre nekö i nyipunie;
29 ke hanawang! Tro ha traqa la itre drai ne tro la itre atr a qaja ka hape, ‘Madrine la itre föe ka thatreine hnaho, me ka tha hnaho petre kö, me itre ka tha iji thi nekönatr!’
30 Nge tro hë angatr a qaja kowe la itre wetr ka hape: ‘Mala pi koi hun!’ nge koi itre sasala, ‘Juetrë huni ju!’
31 Maine angatr a ujë tune nge ka ija petre kö la isinöe, nga ue ju hë elanyi e meci pi?”
32 Nge hna xome fe la lue atrekënö troa ce humuthe me Iesu.
33 Nge ame hë la angatr a traqa ngöne la götrane hna hape, Götrane Ne La Itre Inenatr, hna jei faonyi nyidrë hune la sinöe nge nyipine lo lue atrekënö, casi ngöne la götrane maca, nge ketre ngöne la götrane mi.
34 Matre öni Iesu jë hi: “Kaka, nue pi la ngazo i nyudren, ke thatre kö nyudreni la hnei nyudreni hna kuca.” Ngo itre sooc pe kö a uthi trikitre troa thawa la itre iheetre i nyidrë,
35 nge itre atr a goeë tili nyidrë. Ame hnene la itre hene ne nöj hna hnyimasai nyidrë me hape: “Hnei angeic hna amele itre xan, nga nue angeice pi troa ketre sipu amele angeice kö maine angeice hi la Keriso i Akötresie, lo atre hna iën!”
36 Nge hnene mina fe la itre sooc hna hnyimasai nyidrë, me tro koi nyidrë troa thue ime i nyidrë waina hna nyi nyikön.
37 Öni angatre jë hi: “Maine eö hi la Joxu i angetre Iudra, ketre amele eö jë.”
38 Nge hetre ewekë hna cinyihan hune la he i nyidrë, kola hape: “Joxu i angetre Iudra hi la.”
39 Ame hnene la ketre atrekënö hna nyiqaane qaja angazo nyidrë, me hape: “Eö la Keriso, eje hi? Amele eö jë me nyio fe!”
40 Nge hnene la ketre hna wesitrë angeic me hape: “Tha xou i eö kö e Akötresie? Ke casi hi lai hna amekötine koi eö me nyidrë.
41 Ngo ame nyiso, ka meköti lai, ke nyiso a xeni pune la ngazo i nyiso, ngo ame la atre celë, pëkö ngazo i angeic.”
42 Thupene lai, öni angeice hmaca jë: “Iesu, the thëthëhmi ni kö e lö jë nyipë kowe la Baselaia i nyipë.”
43 Matre, sa jë hi Iesu ka hape: “Nyipici, eni a qaja hnyawa koi eö enehila, tro hë eö a ce me eni ngöne la Paradraiso.”
44 Nge ngacama hnaasikisine* hawa ha, ngo jidri ju hi la nöj asë, uti hë la hnanaenene hawa,*
45 ke patre hë la lai, nge kuie zezene pi hi qa kuhu nyipine la imaano ne thewe hnahage ne la uma ne hmi.
46 Ame hnei Iesu hna sue catre ka hape: “Kakati fe, eni hë a nue la melenge koi nyipë.” Thupene lai, aca simano jë hi nyidrë me mec.
47 Hnene pë hë la tane la itre sooc hna qaja atrunyi Akötresie pine la itre ewekë ka traqa. Öni angeic: “Nyipici, ka meköti la atre celë.”
48 Nge ame la kola öhne la itre ewekë ka traqa hnene la itre atr, hnei angatr hna bëeke hmaca kowe la itre hnalapa i angatr, me xexe imano.
49 Nge kolo pe hi a nango cile iananyi hnene la itre atr ka atre nyidrë. Nge hnene fe la itre föe ka xötrethenge nyidrë qaa Galilaia hna hane öhne la itre ewekë cili.
50 Nge hanawang! E cili fe la ketre trahmany, Iosefa la ëjen, ketre atrene la Hnakootre Ka Tru i Angetre Iudra. Ketre atr ka meköt, nge ka lolo thiina.
51 (Tha hnei angeice kö hna ce xöle me kapa la aja i angatr, memine la mekun hnei angatre hna axeciën.) Ketre atre Arimathea angeic, ketre traon ne Iudra, nge ka treqene fe angeic la Baselaia i Akötresie.
52 Matre, hnei angeice hna tro koi Pilato, me sipone la ngönetrei i Iesu.
53 Ame hnei angeic hna autine la ngönetrei i Iesu, me atuth hnei maano lino, me amë hnine la ketre hua* hna kuj hnine git, nge tha hna ami wezipon petre kö.
54 Nge ame la drai cili, tre drai ne Hnëkë, nge easenyi hë matre xejë jë la Drai Sabath.
55 Hnene fe la itre föe ka ce traqa me nyidrë qa Galilaia hna ixötrethenge, me wange la hua, me öhne la aqane amë la ngönetrei Iesu.
56 Ame hnei angatr hna tro hmaca pi troa hnëkëne la itre dröne hnitre me oele ka pui lolo. Ngo eje hi laka, tune lo hna amekötin, angatr a pane mano ju la Drai Sabath.
Itre mekun ecahu fen
^ Ger., “Xomi angeice pi qa lai.”
^ Maine, “jei faonyi nyidrë hune la sinöe.”
^ Wange ju la HQP.
^ Kola easenyi koi midi.
^ Kola easenyi koi 3:00 e hnaipajö.
^ Maine, “hua nyine amekunën.”
