Luka 24:1-53
24 Ame hë ngöne la pane drai ne la wiik, hnei angatr hna canga tro e hmahmakany kowe la hua* memine la itre dröne hnitre ka pui lolo hnei angatre hna hnëkën.
2 Ngo traqa ju hi angatr a öhne lo etë ka thinge la hnë lö a hna ukune hë.
3 Nge ame hë la angatr a lö, tha öhne hë angatre la ngönetrei Iesu Joxu.
4 Matre tha trotrohnine kö angatr, nge hanawang! Mama pi hi qëmeke i angatr la lue atr ka heetrë iheetre ka wië kaca.
5 Ame hnene la itre föe hna xou atraqatr me goe hnadro eë. Matre önine jë hi la lue atr koi angatr ka hape: “Hnauëne la nyipunieti a thele la atr ka mel nyipine la itre ka mec?
6 Tha nyidrëti hmaca kö e celë, ngo ase hë amele nyidrëti hmaca. Mekune ju lo hnei nyidrëti hna qaja koi nyipunie lo nyidrëti pala kö e Galilaia.
7 Öni nyidrëti lo ka hape, tro ha nue la Nekö i Atr kowe la itre atr ka ngazo, nge troa jei faonyi nyidrë ngöne la sinöe, me amele nyidrëti hmaca ngöne la hnaakönine drai.”
8 Nge e cili, mekune hmaca jë hi angatr lo itre trengewekë i nyidrë.
9 Ame hnei angatre hna bëeke jë qa ngöne la itre hua, me qaja asë la itre ewekë cili kowe lo ala Levin, me koi itre xane fe.
10 Nge ame la itre ka thuemacane la itre aposetolo tre, Maria Magadalena, me Ioana, me Maria thine i Iakobo, me itre xa föe sinetronge i angatr.
11 Ngazo pe, tha mejiune kö la itre aposetolo me itre xa atre dreng kowe la hna qaja hnene la itre föe, ke ame koi angatr, tre, kola ithanata menu.
12 Ngo hnei Peteru hna mejë jë me nyinyape kowe la hua, me cil me goeën, ngo maano lino pe hi la hnei angeic hna öhn. Ame hnei angeic hna bëeke hmaca, me thele ka hape, nemene jë la ewekë ka traqa.
13 Nge ketre, ame ju fe kö lai drai cili, hnene la ala lue thei angatr hna tro kowe la hunahmi hna hëne ka hape, Emao, a traqa koi 11 kilomet la enanyine qaa Ierusalema.
14 Nge nyidroti a ce ithanatane la itre ewekë ka traqa.
15 Nge nyidroti pala kö a ithanatane la itre ewekë cili, ame hnei Iesu hna pane easenyi nyidro, me ce tro me nyidro.
16 Ngo tha wangatrehmekunyi nyidrëti kö hnei nyidro.
17 Öni nyidrëti jë hi koi nyidro: “Nemene la hnei epon hna ce ithanatane qaane ekula?” Ame hnei nyidroti hna pane cil, nge hace la lue hni nyidro.
18 Sa jë hi la ketre, Kaleopa la ëjen, ka hape: “Ke trenyiwa eö, nge ka lapa casi eö e Ierusalema, matre thatre kö* eö la itre ewekë ka traqa eue hi lo?”
19 Nyidrëti a hnyinge jë koi nyidro ka hape: “Nemene ewekë lai?” Sa jë hi nyidro ka hape: “Kolo itre ewekë ka traqa koi Iesu, lo atre Nazareta. Ke ka mama koi Akötresie me koi nöjei atr asë ka hape, ketre perofeta ka mene nyidrë hnene la itre huliwa hna kuca, me itre trengewekë hna qaja.
20 Nge ketre, hnene la itre tane i angetre huuje the së me itre he ne nöj hna kuca matre amekötine jë tro nyidrëti a mec, me troa jei faonyi nyidrë.
21 Ngo ame hun, eahuni a mejiun laka, tro la atre cili a amele Isaraela. Nge ketre, hnaakönine drai hë la thupene la hna traqa la itre ewekë cili.
22 Nge hnene mina fe la itre xa föe the huni hna asesëkötrë hun, ke hnei angatr hna tro e sine hmakanyi kowe la itre hua,
23 ngo patre hë la ngönetrei nyidrë, ame hnei angatr hna traqa troa qaja koi huni ka hape, hna mama koi angatr la lue angela, nge öni nyidro, mele hmaca ha nyidrë.
24 Nge ame hë la kola tro troa wang hnene la itre xan e eahun, traqa ju hi angatr kowe la hua a öhne la itre ewekë hna qaja hnene la itre föe, ngo tha öhnyi nyidrëti kö.”
25 Matre öni nyidrëti jë hi koi nyidro ka hape: “Ekölö hi ni nyipunie itretre hmitre troa trotrohnin, me itre hni ka hmitre troa mejiun! Hnauëne laka, tha mejiune kö nyipunie kowe la itre ewekë hna qaja ha hnene la itre perofeta?
26 Hapeu, tha ka nyipiewekë kö tro la Keriso a pane melëne la itre akötre cili matre kapa jë la lolo hna hnëkën thatraqai angeic?”
27 Ame hnei nyidrëti hna nyiqaane qejepengöne koi nyidro la nöjei ewekë hna Cinyihan thatraqai nyidrë, qaane Mose uti hë itre perofeta.
28 Haawe, easenyi hë angatr kowe la hunahmi hnei nyidro hna tro kow, ame hnei nyidrëti hna nango tro thoi ju kösë kola tro gaa nany.
29 Ngo hnei nyidroti pe hna sipone iele nyidrë troa lapa, me hape: “Pane lapa ju me nyio, ke hejiheji hë la nge easenyi hë matre ase pi la drai.” Ame hnei nyidrëti hna lapa ju me nyidro.
30 Nge ame la nyidrëti a ce xeni* me nyidro, nyidrëti a xome pi la sine falawa me thith, me thupathupa, me isa hamë nyidro.
31 Ame hna fe pi la lue meke i nyidro, nge nyidroti a wangatrehmekunyi nyidrëti jë; ngo e cili, patre ju hi nyidrë.
32 Matre, nyidroti a nyiqaane iqajakeune ju ka hape: “Hapeu, tha hna ketre kö la lue hni so lo nyidrëti a ithanata koi nyiso e kuhu gojeny, lo nyidrëti a qejepengöne hnyawa koi nyiso la itre hna Cinyihan?”
33 Matre ame ju fe kö ngöne la hawa cili, cile jë hi nyidro troa bëeke hmaca Ierusalema eë, nge öhne ju hi nyidro lo ala Levin me itre xan me angatr.
34 Öni nyidroti jë hi: “Nyipici, mele hmaca ha la Joxu, ke hnei nyidrëti hna mama koi Simona!”
35 Ame hnei nyidroti hna qaja koi angatr la itre ewekë ka traqa ngöne la gojeny, memine la aqane wangatrehmekunyi nyidrë qa ngöne la aqane thupathupa la sine falawa.
36 Nge angatre pala kö a ithanatane la itre ewekë cili, ame hna mama pi Iesu nyipi angatr me hape: “Epi tingetinge nyipunie.”
37 Ngo angatr a xou ju me hmengöhmengön, ke öni angatre pena kö ka hape, ma iamamanyikeu lai.
38 Matre, öni nyidrëti jë hi koi angatre ka hape: “Hnauëne la nyipunieti a xou, nge hnauëne laka, luelue la itre hni nyipunie?
39 Goeëne ju la lue imeng me lue cang, eni hi; ketri ni jë nge trotrohnine ju, ke pëkö u ka trene ijöne me ijun, tune la hnei nyipunieti hna öhne theng.”
40 Nge thupene lai, nyidrëti a amamane pi la lue im me lue ca i nyidrë.
41 Ngo hnene laka, tru pala ha la trenge madrine i angatr, haawe, tha mejiune petre kö angatr. Matre, öni nyidrëti ka hape: “Hetre a i nyipunieti kö?”
42 Ame hnei angatre hna traqa fë koi nyidrë la ketre neköi ie hna dreuth.
43 Nyidrëti a xome ju, me öni qëmeke i angatr asë.
44 Nyidrëti a qaja hmaca jë koi angatr ka hape: “Ame lo eni petre kö me nyipunie, hnenge lo hna qaja la itre trengewekë celë koi nyipunie, ene laka, ‘Ame asë hi la itre ewekë hna cinyihan ngöne la Trenge Wathebo i Mose, me itre perofeta, me itre Salamo göi ni, tre itre ewekë lai ka troa eatr.’ ”
45 Ame hnei nyidrëti hna xatua angatre troa trotrohnine hnyawa la aliene la itre hna Cinyihan.
46 Nge öni nyidrë: “Hane hi la hna cinyihan: tro la Keriso a pane akötr, nge tro ha amele nyidrëti hmaca qa hna mec ngöne la hnaakönine drai.
47 Nge ngöne la ëje i nyidrë, tro ha cainöjëne kowe la itre atr qaane Ierusalema uti hë la nöjei nöj asë ka hape, ijije tro angatr a ietra nge troa hane nue la ngazo i angatr.
48 Nge nyipunieti hi la itre ka troa hane sine lai.
49 Nge hanawang! Eni ha upe koi nyipunie la hnei Kakati hna thingehnaean koi nyipunie. Matre, pane lapa ju ngöne la traone celë, uti hë la tro nyipunieti a kapa la men qaa koho.”
50 Nge thupene lai, nyidrëti a troxomi angatre jë tröne la traon a tro Bethania. Nge e cili, nyidrëti a xejë jë la lue ime i nyidrë me amanathithi angatr.
51 Nyidrëti pala kö a amanathithi angatr, ame hna xomi nyidrëti jë qaathei angatr hnengödrai eë.
52 Angatr a sa iwatingöne ca ju qëmeke i nyidrë, me bëeke hmaca Ierusalema eë fë la madrin atraqatr.
53 Nge angatre pala hi hnine la uma ne hmi göi troa atrunyi* Akötresie.
Itre mekun ecahu fen
^ Maine, “hua nyine amekunën.”
^ Maine jë, “eö hi la trehnyiwa e Ierusalema ka thatre?”
^ Maine, “saath aqeany.”
^ Maine, “thil.”
