Luka 3:1-38
3 Ame ngöne la hna 15 macatre ne mus i Tiberio Kaisara, hmekune lo Ponetio Pilato a gavena e Iudra, me musi hnei Herodra ngöne la nöje Galilaia, me musi hnei Filipo, trejin me angeic e Ituraia, me Terekoniti, me Lusanio, me Abilen,
2 me ngöne lo ijine kola nyi atre huuj hnei Ana me Kaiafa, hna traqa pi koi Ioane, nekö i Zakaria, la trengewekë i Akötresie ngöne la hnapapa.
3 Ioane a tro jë ngöne la nöjei götran ne Ioridrano me cainöjëne la bapataiso, hatrene ietra ne la itre ngazo nyine troa seng,
4 tune la hna cinyihane ngöne la tusi Isaia perofeta, hna hape: “Aqane ewekë ne la atre hë ngöne la hnapapa, kola hape: ‘Hnëkëne jë nyipunie la jë i Iehova!* Amekötine jë la jë i nyidrë.
5 Tro ha nyialiene hnei dro la nöjei hnathup, nge tro ha apatrene la nöjei wetr me sasala; nge tro ha amekötine la itre hmene gojeny, nge tro fe la itre gojenyi gaa hnënge etë a paapa.
6 Nge tro la nöjei atr asë a öhne la iamele qaathei Akötresie.’ ”
7 Matre, angeic a nyiqaane qaja ju kowe la ka ala nyim, ene la itre hnei angeic hna troa bapataison ka hape: “Itre une hna mecin,* drei la ka upi nyipunie troa kötrene la elëhni ka troa traqa?
8 Wa wene jë pe matre amamane la ietra i nyipunie. Nge the qaja kö e kuhu itre hni i nyipunie ka hape: ‘Aberahama la keme hun.’ Ke eni a qaja koi nyipunie ka hape, atreine hi Akötresie nyi matra i Aberahama qa ngöne la itre etë celë.
9 Nge eje hi laka, të hë la ze hune la iwaan ne la itre sinöe, matre ame la nöjei sinöe ka tha wa loi, tre, tro ha satrij, me kuiëne kowe la eë.”
10 Ame hna hnyinge hnene la ka ala nyimu koi angeic ka hape: “Nga nemene hö la nyine tro huni a kuca?”
11 Sa jë hi Ioane ka hape: “Ame la atre hetrenyi la lue iheetr,* ke tro angeice lai a thawa kowe la atre ka pë. Nge ame la atre ka trene xen, hane jë fe angeice kuca tun.”
12 Nge hna traqa fe la itre ka hle mani troa hane bapataiso me qaja ka hape, “Atre Ini fe, nemene jë la nyine tro huni a kuca?”
13 Angeic a sa jë koi angatr ka hape: “The nyixane* kö la hna athipe hë.”
14 Nge hane jë fe hi hnying hnene la itre sooc me hape: “Nemene fe la nyine tro huni a kuca?” Matre, sa jë hi angeice ka hape: “The thapa kö la mani i ketre, nge the inyizö kö, ngo mejihnine ju hi la hnei nyipunie hna hetreny.”*
15 Nge itre atr pala hi a itreqe, me isa mainëne göi Ioane ka hape: “Ma angeice hi lo la Keriso?”
16 Sa jë hi Ioane koi angatr ka hape: “Eni a bapataiso nyipunie hnei tim, ngo ame la atre traqa thupeng, tre, ka draië kö hung. Nge tha ijijinge kö troa senge la lue ibutre i nyidrë. Nyidrëti la atre troa bapataiso nyipunie hnei uati hmitrötr, me eë.
17 Nge eje ngöne la iwanakoime i nyidrë la pel ne nyihnyawa wene qitr, nge tro nyidrëti a nyihnyawane asë la hnë lepe qitr, me xawan me umëne la itre wene qitr. Ngo tro nyidrëti a dreuthetrije la itre kupeine qitre ngöne la eë ka tha pi kö.”
18 Nge nyimutre la itre ithuecatr hnei Ioane hna hamën, nge angeice pala hi a catre cainöjëne la maca ka loi kowe la itre atr.
19 Nge hnei Ioane hna wesitrë Herodra joxu pi Herodia, ifënekö ne la trejine me Herodra, nge pine la nöjei ngazo hnei angeice hna kuca.
20 Ame hnei Herodra hna nyixane la ngazo i angeic: Hna akalabusi Ioane.
21 Ame la kola bapataisone la nöjei atr hnei Ioane, hna hane fe bapataiso Iesu e cili. Nge ame ju hi la Iesu a thith, fe pi hi la hnengödrai,
22 nge uti pi hi koi nyidrë la uati hmitrötr kösë piny, ame hna mexeme pi la aqane ewekë qaa hnengödrai, a kola hape: “Hmunë la Nekönge hniminang, eni a madri hmunë.”
23 Matre ame hë la Iesu a nyiqaane xejë la huliwa i nyidrë, tre kola 30 lao macatre i nyidrë, nge kola mekune laka, nyidrëti lanekö i Iosefa,nekö i Heli,
24 nekö i Mathat,nekö i Levi,nekö i Meleki,nekö i Iana,nekö i Iosefa,
25 nekö i Matathia,nekö i Amosa,nekö i Naumo,nekö i Eseli,nekö i Nangai,
26 nekö i Maatha,nekö i Matathia,nekö i Semei,nekö i Ioseka,nekö i Ioda,
27 nekö i Ioana,nekö i Resa,nekö i Zerubabela,nekö i Salathiela,nekö i Neri,
28 nekö i Meleki,nekö i Adi,nekö i Kosamo,nekö i Elemodamo,nekö i Era,
29 nekö i Iesu,*nekö i Eliezera,nekö i Ioreimo,nekö i Mathat,nekö i Levi,
30 nekö i Simeona,nekö i Iudra,nekö i Iosefa,nekö i Ionam,nekö i Eliakima,
31 nekö i Melea,nekö i Mena,nekö i Matatha,nekö i Nathana,nekö i Dravita,
32 nekö i Iese,nekö i Obeda,nekö i Boaza,nekö i Salamona,nekö i Naasona,
33 nekö i Aminadaba,nekö i Aram,nekö i Eseroma,nekö i Farez,nekö i Iudra,
34 nekö i Iakobo,nekö i Isaaka,nekö i Aberahama,nekö i Tera,nekö i Nahora,
35 nekö i Serugo,nekö i Reu,nekö i Pelege,nekö i Heberu,nekö i Sala,
36 nekö i Kanana,nekö i Afasada,nekö i Sema,nekö i Noa,nekö i Lameka,
37 nekö i Methusela,nekö i Enoka,nekö i Iareda,nekö i Mahaleleel,nekö i Kanana,
38 nekö i Enosa,nekö i Setha,nekö i Adramu,nekö i Akötresie.
Itre mekun ecahu fen
^ Wange ju la HQP.
^ Maine, “vaipa.”
^ Maine, “itre xa iheetr.”
^ Maine, “hën atrun.”
^ Maine, “thupene hna kapa.”
^ Maine, “Iose,” ngöne la itre xa tusi hna ewath ekö.
