Luka 4:1-44
4 Thupene lai, tiqa pi Iesu hnei uati hmitrötr, nge nyidrëti a ananyine jë la hneopegejë Ioridrano, ame hna tro sai nyidrëti ju hnene la uati hmitrötr kowe la hnapapa
2 koi 40 lao drai, ame hna tupathi nyidrë hnei Diabolo. Ngöne la itre drai cili, pëkö hnei nyidrëti hna xen, matre ame hë la pun, mecijiine catre hë nyidrë.
3 Matre, öni Diabolo jë hi: “Maine nekö i Akötresieti nyipë, qaja ju kowe la itre etë celë troa nyi falawa.”
4 Ngo sa jë hi Iesu ka hape: “Ase hë cinyihan: ‘Tha tro kö la atr a mel hnei falawa hmekuj.’ ”
5 Nge Diabolo a tro sai nyidrëti jë kowe la ketre wetr ka draië catr, me amamane la nöjei baselaia ne la fen.
6 Öni Diabolo koi nyidrë: “Tro ni a hamëne koi nyipë la nöjei baselaia celë me itre lolo ne ej, ke ewekëng asë la nöjei baselaia, nge eni a hamëne kowe la hnenge hna ajan.
7 Maine tro nyipëti a kei qe ipië me thili koi ni, itre ewekë i nyipëti hë itre ej.”
8 Sa jë hi Iesu koi angeic ka hape: “Ase hë cinyihan ka hape: ‘Iehova* Akötresi eö la nyine tro eö a thili kow, nge nyidrëti hmekuje hi la nyine troa nyihluen.’ ”
9 Ame hna tro sai nyidrë Ierusalema eë hnei Diabolo, me ami nyidrë hune la götrane gaa draië ne la uma ne hmi, me hape koi nyidrë: “Maine nyipëti la nekö i Akötresie, sesë pi qa lai,
10 ke ase hë cinyihan ka hape: ‘Tro nyidrëti a upe la itre angela i nyidrë koi nyipë matre thupë nyipë,’
11 ‘nge tro angatr a xepi nyipë, wanga thë jë la iwaca i nyipë hnei etë.’ ”
12 Öni Iesu koi angeic: “Ketre ase hë cinyihan: ‘The tro kö eö a tupathi Iehova* Akötresi eö.’ ”
13 Thupene la hna tupathi Iesu hnei Diabolo, angeice pë hë a tro ananyi Iesu pi me thele ijine troa tupathi nyidrëti hmaca.
14 Ame hë la Iesu a bëeke hmaca Galilaia eë, tiqa ha nyidrëti hnei uati hmitrötr. Nge kola qaja aloinyi nyidrë ngöne la itre traon asë.
15 Nyidrëti fe a hamë ini ngöne la itre sunago, nge kolo fe a atrunyi nyidrëti hnei nöjei atr.
16 Nyidrëti a tro pi e Nazareta, götrane hna hetru nyidrëti ngön, nge nyidrëti a lö jë hnine la sunago tune lo hnei nyidrëti hna majemine e drai Sabath, me cile troa e la itre hna cinyihan.
17 Matre, hna hamë nyidrëti la tusi hna ewath i Isaia perofeta, nge nyidrëti a seluthe pi la tusi me öhne la hna cinyihane ka hape:
18 “Eje hung la uati hmitrötr i Iehova,* ke hna ië ni troa cainöjëne la maca ka loi koi itre ka pë ewekë. Nge hna upi ni fe troa qaja kowe la itre hna akalabusin ka hape, troa nue angatre hmaca, nge tro ha goe la itre timek, me mele la itre ka akötr,
19 nge hna upi ni fe troa cainöjëne la macatre ne troa amanathithi angatre hmaca hnei Iehova.”*
20 Nge nyidrëti a ewathe hmaca ju la tusi me hamëne kowe la hlu, me lapa. Ame hnene la itre atrene la sunago hna goeë nyidrë.
21 Matre, öni nyidrëti jë koi angatr ka hape: “Eatre hë enehila la hna cinyihane celë hnei nyipunie hna dreng.”
22 Nge angatr asë a nyiqaane qaja aloinyi nyidrë me haine la aqane ithanata i nyidrë ka menyik, nge angatr a isa qaja ka hape: “Tha kolo kö lo nekö i Iosefa la?”
23 Matre, öni Iesu jë hi: “Eje hi laka, tro hi nyipunieti lai a qeje ni me hape: ‘Droketre, ketre sipu aloinyi nyipëti jë. Ase hë huni dreng la itre ewekë hnei nyipëti hna kuca e Kaperenauma, nga hane jë kuca tune ngöne la nöje i nyipë.’ ”
24 Öni nyidrëti hmaca jë hi: “Eni a qaja hnyawa koi nyipunie, pëkö perofeta hna kapa ngöne la sipu nöje i angeic.
25 Ngo eni a qaja hnyawa koi nyipunie, ame ngöne lo hneijine i Elia, nyimutre la itre sine föe e Isaraela lo kola thinge la hnengödrai koi köni macatre nge sikisi lao treu, ame hna traqa pi la ketre jiin ka tru ngöne la nöj asë.
26 Ngo, tha hna upi Elia kö kowe la itre sine föe cili, ngo kowe pe la sine föe e Sarepeta ngöne la nöje Sidona.
27 Ketre, hetre lepera fe e Isaraela ngöne lo hneijine i Elisaia perofeta. Ngo pëkö ketre e angatr hna aloin,* ngo Naamana hmekuje hi, lo atre Suria.”
28 Ame la angatr a drenge la itre trengewekë cili hnine la sunago, elëhni jë hi angatr.
29 Angatr a mejë jë me huli nyidrë tröne la traon, me xomi nyidrë kowe la hune wetr, lo hna acile la traon i angatre ngön. Nge e cili, angatr a thele jë troa ukapië nyidrë matre troa tro pane la he i nyidrë.
30 Ngo hnei nyidrëti hna tro nyipi angatr, me trongëne la jë i nyidrë.
31 Matre nyidrëti a tro pi Kaperenauma eë, ketre traon ne Galilaia. E cili, nyidrëti a hamë ini kowe la itre atr ngöne la drai Sabath.
32 Ame hnei angatr hna haine la aqane hamë ini i nyidrë, ke qaathei Akötresie la itre ini hna hamën.
33 Nge ame hnine la sunago, hetrenyi mina fe la ketre atr hna löthe hnei dremoni. Angeic a sue catre ka hape:
34 “Nyipëti a troa uë hun, Iesu atre Nazareta? Nyipëti a traqa troa apatrenyi hun? Atre hnyawa hi ni laka drei nyipë, nyipëti hi la atr Ka Hmitrötr hna upe hnei Akötresie.”
35 Ngo Iesu a wesitrëne jë lai dremoni me hape: “The ilu kö, nge nue angeice pi lai!” Ame hnene la dremoni hna kuië angeic hnadro eë e nyipi angatr, me lö qaathei angeic, ngo pë ju kö eatre i angeic.
36 Ame hnene la itre atr hna hai, me iqajakeune ka hape: “Hane petre hi la ketre aqane ithanata! Nyidrëti hi a qaja, nge itre dremoni a drenge me tro!”
37 Ame hna hlemu la itre ewekë hnei nyidrëti hna kuca ngöne la nöjei götrane ne la nöj.
38 Thupene la hnei nyidrëti hna lö pi qa hnine la sunago, nyidrëti a lö jë hnine la hnalapa i Simona. Nge hanawange la thine ne la föi Simona a meköl, ke eahlo a idreuth, matre angatr a sipo nyidrëti jë troa aloinyi eahlo.
39 Matre nyidrëti a easenyi eahlo ju me catrëne la idreuth, ame hna patre pi ej. Haawe, canga mejë jë hi eahlo troa huliwa koi angatr.
40 Thupene la kola lö la jö, hnene la itre ka trene wezipo, hna traqa fë koi Iesu la itre hna tith hnei nöjei pengöne mec. Ame hnei nyidrëti hna ati ime hui angatr, me aloinyi angatr asë.
41 Nge e cili, hna lö pi la itre dremoni qa hnine la itre atr me sue ka hape: “Nyipëti hi la Nekö i Akötresie!” Ngo nyidrëti a wathebo angatre ju me sewe angatre troa hane ithanata, ke atre hi angatre laka, nyidrëti hi la Keriso.
42 Nge e kaqa ne lai hë, nyidrëti a tro pi kowe la ketre götrane gaa pë atr. Ame hna nyiqaane thele* nyidrë hnene la ka ala nyim, nge angatr a tro ju koi nyidrë, me thele troa alapa nyidrë matre tha tro kö nyidrëti a tro ananyi angatr.
43 Öni Iesu koi angatr ka hape: “Tro fe ni a cainöjëne la itre maca ka lolo ne la Baselaia i Akötresie kowe la itre xa traon, ke celë hi kepin matre upi ni jë.”
44 Ame hnei nyidrëti hna tro ju troa cainöj e hnine la itre sunago ne Iudra.
Itre mekun ecahu fen
^ Wange ju la HQP.
^ Wange ju la HQP.
^ Wange ju la HQP.
^ Wange ju la HQP.
^ Maine, “nyinyin.”
^ Maine, “thel agön.”
