Luka 5:1-39
5 Nge ame ngöne la ketre ijin, hnene la ka ala nyimu hna easenyi catre koi nyidrë, me drei nyidrëti a qaja la trengewekë i Akötresie ezine la hneopegejë ne Genesareta.*
2 E cili, öhne ju hi Iesu la lue neköi he ezine la hneopegejë, ngo uti hë itretre nyi ie troa nyihnyawane la itre ifile.
3 Nge nyidrëti a elë jë ngöne la ketre neköi he, ene lo he i Simona, me sipo angeic troa nango ananyine la ngönegejë. Ame hnei nyidrëti hna lapa ju, me nyiqaane hamë ini kowe la ka ala nyimu qa hune la neköi he.
4 Ase jë hi Iesu ithanata, öni nyidrëti pena jë hi koi Simona: “Tro jë kowe la gaa jui, nge nue pi la itre ifile i nyipunie.”
5 Nge öni Simona jë hi: “Atre Ini fe, hne huni hna huliwa ngöne la jidri ka pexej, nge pëkö ca tha hun. Ngo pine laka nyipëti a upi hun, tro huni a nue la itre ifile.”
6 Ame ju hi la angatr a nue la itre ifile, ea* ju hi angatr la hnënge ie ka nyimutre, uti hë la kola thöne zezene la itre ifile i angatr.
7 Matre, angatr a hëne jë la itre ka ce huliwa me angatr ngöne la ketre neköi he göi troa ixatua. Ame hë la kola traqa, angatr a atiqane jë la lue sine he, matre kösë lue ej hë a troa lö.
8 Nge ame la kola öhne lai hnei Simona Peteru, angeic a sa iwatingöne ca ju qëmeke i Iesu me hape: “Joxu, ananyi ni pi hnei nyipë, ke atre ka ngazo ni.”
9 Ke angeice me itre sine huliwa i angeic a sesëkötr me isa hai, ke tiqa hnyawa ha hnei tha i angatr.
10 Nge kolo fe a hai hnei Iakobo me Ioane, lue nekö i Zebedaio; itre ka ce huliwa me Simona. Matre, öni Iesu jë hi koi Simona: “The xou kö. Qaane enehila, tro pena ha eö a ea la itre atr.”
11 E cili, angatr a bëeke ju memine la lue neköi he i angatr ezine la hneopegejë, me nue asë la itre ewekë i angatr troa xötrethenge Iesu.
12 Ame ngöne la ketre ijin, traqa ju hi Iesu ngöne la ketre traon, nge hanawang! fetra pi hi la ketre trahmany ka si lepera! Ame ju hi la angeic a öhnyi Iesu, angeic a sa iwatingöne ca ju, me sipone ielene nyidrë ka hape: “Joxu, maine ajane nyipë, atreine hi nyipë aloinyi ni.”
13 Ame hnei nyidrëti hna li im me ketri angeic, me hape: “Ajange hi lai! Mele hë hmunë.” Ame hna patre ju la lepera thei angeic.
14 E cili, Iesu a wathebo angeice ju troa qaja koi ketre, matre öni nyidrë: “Tro jë pe troa amamai eö kowe la atre huuj, nge tro fë jë lo huuj hna amekötine hnei Mose, matre ahmitrötrë eö me anyipicine koi angatr.”
15 Ngo ame pe, kola hlemu trootro la itre ewekë hnei nyidrëti hna kuca, matre hnene la ka ala nyimu hna traqa itrony troa hane dreng me thele nyine la itre meci angatr.
16 Nge hnei nyidrëti hna majemine tro kowe la itre götrane gaa pë atr troa thith.
17 Ame ngöne la ketre drai, ngöne la nyidrëti a hamë ini, kola ilapanyi la itre Faresaio me itre ka inine la Wathebo, angatr a traqa qa ngöne la itre götran ne Galilaia, me Iudra, me Ierusalema. Nge, Iehova* a hamëne pi la mene i nyidrë koi Iesu troa aloine la itre trene mec.
18 E cili, traqa pi la itre atr, angatr a kapa trongëne la ketre ka genyi ca hune ili, nge angatr a tupathe ju troa lö sai angeic, me ami angeic qëmeke i Iesu.
19 Ngo pine laka, tha ijiji angatre kö troa lö sai angeic meköti koi Iesu, ke tru hnei atr, angatr a fe pi la hune uma hmeku i Iesu, me autinyi angeic hune ili.
20 Matre ame hë la Iesu a öhne la lapaun i angatr, öni nyidrëti jë hi: “Neköng, ase hë nue la itre ngazo i hmunë.”
21 Ame hnene la itretre cinyihane me itre Faresaio hna nyiqaane ce ithanatan ka hape: “Drei angeice la matre silitrengathoi Akötresie? Drei la ka atreine senge la itre ngazo nga Akötresie hmekuje hi?”
22 Ngo atre hnyawa hi Iesu la mekuna i angatr, matre öni nyidrëti jë hi: “A hnauëne laka, ngazo la itre mekuna i nyipunie?
23 Nemene la ka hmaloi troa qaja, ‘Ase hë nue la itre ngazo i eö,’ maine ‘Cile jë nge tro jë’?
24 Ngo matre tro nyipunieti a atre laka, hna aijijëne la Nekö i Atr troa senge la itre ngazo e celë fen—” Nyidrëti a qaja jë kowe la ka genyi ca ka hape: “Eni a qaja koi hmunë, cile jë, xome jë la ili hmunë, nge tro jë hë kowe la hnalapa i hmunë.”
25 Ame hnei angeice hna canga mejë jë qëmeke i angatr, me xome la ili angeic, me tro kowe la hnalapa i angeic, me atrunyi Akötresie.
26 Nge angatr asë hi a isa hai me nyiqaane atrunyi Akötresie, me xou atraqatr, me hape: “Hane petre hi la ketre ewekë hne huni hna hane öhn enehila!”
27 Thupene lai, hnei Iesu hna tro qaa lai, me öhne la ketre atre hle mani, Levi la ëjen, kola lapa ngöne la uma ne hle mani. Nge öni Iesu jë hi koi angeic: “Xötrethenge ni jë.”
28 Ame hnei angeic hna nu asë, me xötrethenge nyidrë.
29 Thupene lai, Levi a hnëkëne jë la ketre feet ka tru koi Iesu ngöne la hnalapa i angeic, nge kola traqa fe la itretre hle mani me itre xane ju kö, troa ce xeni* me angatr.
30 Ngo hnene la itre Faresaio me itretre cinyihan hna nyiqaane qaja angazone la itretre dreng, me hape: “A hnauëne laka, nyipunieti a ce xen me iji me itretre hle mani me itre ka kuca la ngazo?”
31 Sa jë hi Iesu ka hape: “Tha nyipiewekë kö la droketre kowe la itre ka egöcatr, ngo koi itre wezipo.
32 Nge celë hi matre, tha eni kö a hëne la itre ka meköt, ngo itre ka ngazo pe, matre troa ietra.”
33 Öni angatre jë hi: “Itretre drei Ioane me itretre drei angetre Faresaio mina a tha xen, me thithi iel, ngo itretre drei nyipëti pe kö a xen me ij.”
34 Sa jë hi Iesu ka hape: “Hapeu, tro kö nyipunie a sawa la itre sinee ne la atre faipoipo troa xen, nge ce angatr pala kö memine la atre faipoipo?
35 Ngo tro kö a traqa la drai ne troa xomi angeic qaathei angatr, nge e cili hi la ijine tro angatr a tha xen.”
36 Hnei nyidrëti hmaca hna hamëne la ketre ceitun koi angatr me hape: “Pëkö atr ka troa thupa la ketre sine imaano ka hnyipixe, me cane hune la iheetre hnapan. Nge e traqa ju kuca tun, haawe, tro hë la sine imaano ka hnyipixe a azezenyine la hnapan, ke tha ihmeku kö lue ej.
37 Ketre tune mina fe kowe la waina ka hnyipixe, pëkö atr ka troa amë ej hnine la trengene hnapan, ke e troa tun, tro la waina ka hnyipixe a akaqane la trengen, nge tro ha neni la waina, me luzi lai trengen.
38 Ngo tro pe a amë la waina ka hnyipixe hnine la itre trengene ka hnyipixe.
39 Matre, pëkö atre iji la waina hnapan ka ajane la ka hnyipixe, ke ame koi angeic, ‘Ka loi kö la waina hnapan.’ ”
Itre mekun ecahu fen
^ Kolo hna hape, Hnagejë Ne Galilaia.
^ Ger., “thing.”
^ Wange ju la HQP.
^ Maine, “saathi aqeany.”
