Luka 6:1-49
-
Iesu, “Joxu ne la Sabath” (1-5)
-
Trahmanyi ka fitre im hna aloin (6-11)
-
Truelof lao aposetolo (12-16)
-
Iesu a hamë ini me aloinyi mec (17-19)
-
Manathith me hnëjin (20-26)
-
Hnimi ithupëjia (27-36)
-
Loi ju hë hna iwaigelen (37-42)
-
Wangatrehmekun hnei wen (43-45)
-
Uma hna xupe hnyawan; uma ka pë trepene ka catr (46-49)
6 Ame ngöne la drai sabath, hnei Iesu hna tro nyipine la ketre hlapa, nge hnene la itretre drei nyidrë hna nyiqaane ukekëthe la itre wene qitr me xen.
2 Önine jë hi la itre xa Faresaio ka hape: “Hnauëne la nyipunieti a kuca la ewekë hna wathebone e Sabath?”
3 Ngo sa jë hi Iesu koi angatr ka hape: “Hapeu, tha hane kö nyipunieti e lo hna kuca hnei Dravita, ngöne lo angeic me itre sinetronge i angeic a mecijiin?
4 Lo angeic a lö hnine la uma i Akötresie me kapa la itre areto nyine amamane koi Akötresie, me xeni me hamëne kowe la itre sinetronge i angeic, ngo ewekë hna wathebone koi angatr, ke thatraqai itretre huuje hmekuj?”
5 Thupene lai, nyidrëti a qaja jë koi angatr ka hape: “Nekö i Atr la Joxu ne la Sabath.”
6 Ame ngöne la ketre Sabath, hnei nyidrëti hna lö hnine la sunago, me nyiqaane hamë ini. Nge e cili fe la ketre atr ka fitre ime maca.
7 Ame hnene la itretre cinyihan me itre Faresaio hna goeë tili Iesu me thupëne ka hape, tro jë kö nyidrë a aloine la atr ngöne la drai Sabath, matre nyizö nyidrë.
8 Ngo ame pe, atre hnyawa hi Iesu la mekuna i angatr, matre öni nyidrëti jë hi kowe la ka fitre im ka hape: “Mejë jë, nge cile ju e cahu nyipin.” Ame hnei angeic hna mejë me cil e cili.
9 Thupene lai, öni Iesu koi angatr: “Eni a hnyingë nyipunie itre trahmany, hapeu, meköti kö troa kuca la loi maine ngazo ngöne la drai Sabath, nge meköti kö troa amelen* maine apatrene pena?”
10 Ase jë hi Iesu pane goeëne xötreithi angatr, öni nyidrëti jë hi kowe la ka fitre ime ka hape: “Sathe pi la ime i hmunë.” Angeic a sathe pi, ame hna loi pi.
11 E cili, palulu pi hi la elëhni i angatr, matre angatr a nyiqaane iqajakeune la nyine tro angatr a kuca koi Iesu.
12 Ame ngöne la ketre drai ne elë nyidrë hune la wetr troa thith, hnei nyidrëti hna thithi koi Akötresie jidri ka pexej.
13 Nge e lai hë, hnei nyidrëti hna hëne la itretre drei nyidrë, me iën thei angatr la ala 12, me hë angatr itre aposetolo, ene,
14 Simona lo hna hape, Peteru, me Anederea trejine me angeic, me Iakobo, me Ioane, me Filipo, me Batolomaio,
15 me Mataio, me Toma, me Iakobo nekö i Alefaio, me Simona lo hna hëne ka hape, “atre catre huliwa,”
16 me Iudra lo nekö i Iakobo, me Iudra Isakariota, lo atre troa salemë Iesu.
17 Nyidrëti a ce uti pi me angatr kowe la ketre götrane gaa meköt, nge hetrenyi e cili la itretre drei nyidrë ka ala nyim, itre ka traqa qaa Iudra me Ierusalema, me qa ngöne la itre götrane ne ngönegejë e Turo me Sidona. Angatr a traqa troa drei nyidrë, me thele nyin la itre meci angatr.
18 Nge goi amelene fe la itre hna axösisin hnei dremoni.
19 Matre hnene la ka ala nyimu hna thele jëne troa ketri nyidrë, ke kola lö pi qaathei nyidrëti la men, me aloinyi angatr.
20 Ame hnei Iesu hna goeëne la itretre drei nyidrë me hape:
“Madrine nyipunie itre ka pë ewekë, ke thatraqai nyipunie la Baselaia i Akötresie.
21 Madrine nyipunie itre ka mecijiin enehila, ke tro ha thue a i nyipunie.
Madrine nyipunie itre ka treij enehila, ke tro ha madrine la hni nyipunie.
22 “Madrine nyipunie la kola methinë nyipunie, me xele ma wai nyipunie, me qaqa nyipunie, me qejegele nyipunie pine la Nekö i Atr.
23 Madrine jë ngöne la drai celë, nge madrin atraqatre jë, ke hanawang! tru la thupe i nyipunie e hnengödrai, ke celë hi lo itre ewekë hna kuca hnene lo itre qaaqaa i angatr ekö kowe la itre perofeta.
24 Ngo hnëjine hë nyipunie itre trenamo, ke hetrenyi hë nyipunie la itre nyine iamadrinë nyine tro nyipunieti a kapa.
25 Hnëjine hë nyipunie itre ka xeni mej enehila, ke tro hë nyipunieti a mecijiin.
Hnëjine hë nyipunie itre ka hnyima madrin, ke tro hë nyipunieti a treije me latresi.
26 Hnëjine hë nyipunie e tro la nöjei atr a qaja aloinyi nyipunie, ke celë hi hna kuca hnene lo itre qaaqaa i angatr ekö kowe la itre perofeta thoi.
27 “Ngo eni pe a qaja hnyawa koi nyipunie itre ka dreng: The mano kö hnime la itre ithupëjia me nyipunie, me kuca la loi koi angetre methinë nyipunie,
28 me amanathithine la itre ka qejegele nyipunie, me thithi sai angetre qaqa nyipunie.
29 Nge e hetre ka xe la itrasitre i eö, amamane pi fe la ketre; nge e hetre ka xome la iheetr ka qea i eö, hamëne pi fe la iheetr ka he hnin.
30 Hamëne pi kowe la atre sipon, nge maine tro ketre a xome la ewekë i eö, the sipone hmaca kö.
31 “Ketre, ame la hnei nyipunieti hna ajane tro la itre atr a kuca koi nyipunie, ketre kuca tune jë fe koi angatr.
32 “Maine nyipunie a hnime la itre ka hnimi nyipunie, nemene la loi koi nyipunie? Ke itre atr ka ngazo fe a hane hnime la itre ka hnimi angatr.
33 Nge maine tro hi nyipunieti a kuca la loi koi itre ka loi thiina koi nyipunie, nga nemene la loi koi nyipunie? Ke itre atr ka ngazo mina fe a hane ujë tun.
34 Ketre, maine tro hi nyipunieti a hamëne* kowe la itre ka atreine të hmaca koi nyipunie, nemene la loi koi nyipunie? Ke itre atr ka ngazo mina fe a hamën kowe la itre xa atr ka ngazo, matre troa të hmaca koi angatr.
35 Ame pe, catre jë nyipunie hnime la itre ithupëjia me nyipunie, me kuca la loi, nge hamëne gufane pi; haawe, tro ha atraqatre la thupe i nyipunie, nge tro nyipunieti a itre nekö ne la Atre Ka Draië Catr, ke ka menyike nyidrë kowe la itre atr ka pë hni ne ole, me ka ngazo.
36 Nge catre jë nyipunieti utipin, tune la Keme i nyipunie, ke ka utipine nyidrë.
37 “Ketre, ea loi ju hë hna iwaigele, matre tha tro kö a hane waigele nyipunie; nge ea loi ju hë hna ijelengazo, matre tha tro kö a hane jelengazo nyipunie. Catre jë pe iloi,* nge tro ha nue la ngazo i nyipunie.
38 Majemine jë ham, nge tro la itre xan a hane hame koi nyipunie. Nge tro ha nyialiene atrune la itre pos* i nyipunie, me atiqane hnyawa, matre neni gala pi. Nge ame la aqane ujë i nyipunie kowe la itre atr, tre tro pena angatr a ujë tune koi nyipunie.”
39 Ketre, Iesu hmaca a hamëne pi la ketre ceitun: “Hapeu, ijije kö tro la ka timek a amamai gojenyi kowe la ketre timek? Tha tro kö nyidroti lai a ce kei kowe la hnaop?
40 Nge tha ka sisitria kö la hna inin* hune la atre hamë ini, ngo ame la hna inine hnyawa, tre, tro ha tune la atre hamë ini.
41 Matre, hnauëne laka, eö a goeëne la wanamamik hnine la alameke ne la trejine me eö, ngo tha öhne pe eö la agö hnine la alameke i eö?
42 Maine pena, tro eö a qaja tune kaa kowe la trejin me eö ka hape: ‘Trejin, nue pi tro ni a xometrije la wanamamik qa ngöne la alameke i eö, nge tha öhne pe eö la agö hnine la alameke i eö?’ Atre thoi! Pane xometrije pi la agö qa hnine la alameke i eö, matre mama hnyawa pi la aqane tro eö a xometrije la wanamamik qa hnine la alamekene la trejine me eö.
43 “Nge thatreine kö la sinöe ka loi troa wa ngazo, ketre tune mina fe, thatreine kö la sinöe ka si mec troa wa lolo.
44 Haawe, tro hi a canga mama la itre sinöe hnene la itre wenen ej. Ke thatreine kö la atr huji wene wacua ngöne la itre sinöe ka ithiny, nge tha tro kö a huji wene vin ngöne la itre ka ithiny.
45 Matre, ame la atre ka loi, tro angeic a axulune la loi, qa ngöne la trengamo i angeice ka loi, ngo ame la atre ka ngazo, tro angeic a axulune la ngazo, qa ngöne la trengamo i angeic ka ngazo. Eje hi, kola ewekë la që qa kuhu hni.
46 “Nge hnauëne laka, nyipunieti a hë ni ka hape: ‘Joxu! Joxu!’ ngo tha kuca pe la itre hnenge hna qaja?
47 Ame la atre tro koi ni, me dreng la trengewekëng me trongën, tro hë ni a qaja koi nyipunie ka hape, ka tui drei angeic;
48 Ceitu i angeic memine la ketre atr ka xupi uma. Hnei angeic hna sine ajuine la dro, me amë la trepene ka catre hune etë. Matre, ame hë la kola di atraqatr, me kaca trane la uma hnene la itre hoke ne gejë, tha kei pi kö ej, ke hna xupe hnyawa.
49 Nge ame la atre drenge la itre trengewekëng, ngo tha trongëne pe, ceitu i angeic memine la ketre atre xupi uma hune la dro, ngo pë pe trepene ka catr. Matre kaca trane pi hi la uma hnene la itre hoke ne gejë, ame hnene ej hna kei, me ngazo hnyawa.
Itre mekun ecahu fen
^ Maine, “u.” Ger., psy·kheʹ. Wange ju la HQP.
^ Kola hape, pëkö troa hë nekön la gufa.
^ Maine, “nue la ngazo i ketre.”
^ Hna kuca la posi celë hnene la aqane sa la iheetr, matre nyi trengene ewekë.
^ Maine, “atre dreng.”
