Luka 7:1-50
7 Thupene la Iesu a ase qaja la itre ewekë cili kowe la itre atr, nyidrëti a lö jë e Kaperenauma.
2 Nge ngöne la ijine cili, hna tithe hnei meci la ketre hlu, hnimina ne la tane isi, nge easenyi hë matre meci pi nyën.
3 Matre, ame hë la kola drei meje i Iesu hnene la tane isi, angeic a upe pi la itre qatre ne Iudra troa hë nyidrë, göi troa aloine la hlue i angeic.
4 Angatr a tro pi koi Iesu me xëwe sai angeic, me hape: “Meköti tro angeic a kepe ixatua qaathei nyipë,
5 ke, ka tru la nöje së koi angeic, nge goi xupe fe angeic la sunago së.”
6 Matre, Iesu a tro ju me angatr. Ngo ame hë la angatr a easenyine la hnalapa, hnene la tane isi hna canga upe la itre sinee i angeic troa qaja koi Iesu ka hape: “Joxu, the ajolë nyipëti kö, ke nemene ni matre troa kepe nyipë ngöne la hnalapang.
7 Celë hi matre tha tro kö ni koi nyipë ke tha ijijinge kö. Ngo qaja ju hi la ketre ewekë, nge tro la hlueng a egöcatre hmaca.
8 Ke ketre atr trene musi fe hi ni, eni a musi kowe la ketre trongene isi. Matre, e qaja ha ni koi ketre ka hape, ‘Tro jë!’ angeic a tro, nge koi ketre, ‘Trohemi!’ angeic a traqa pi, nge kowe la hlueng, ‘Kuca jë!’ ame hna kuca ju.”
9 Haawe, ame hë la Iesu a drenge la itre trengewekë celë, nyidrëti a hai me qaja kowe la itre ka xötrethenge nyidrë ka hape: “Eni a qaja hnyawa koi nyipunie, tha hane kö ni öhne la ketre atr ka lapaune tun e Isaraela.”
10 Matre, ame hë la kola bëeke hmaca kowe la hnalapa hnene lo itre hna up, traqa ju hi angatr a öhne la hlu a egöcatre hmaca ha.
11 Nge tha qea kö e thupen, nyidrëti a tro ju kowe la ketre traone ka tru, Naina la ëjen. Nge ce nyidrëti me itretre dreng, memine la ka ala nyim.
12 Nge nyidrëti hë a easenyine la qëhnelö ne la traon, nge hanawang! Kola xututhe trongëne la ngönetrei ne la ketre nekö trahmanyi ka mec, nge angeice la neköne ka casi ne la thine i angeic. Nge ketre, sine föe hë eahlo. Nge ce eahlo memine la ka ala nyimu qa ngöne la traon.
13 Matre ame hë la kola öhnyi eahlo hnene la Joxu, nyidrëti a utipi eahlo ju, matre nyidrëti a qaja ju koi eahlo ka hape: “The treije kö.”
14 E cili, nyidrëti a ketre ju la ili,* nge cile ju hi la itre ka xututhe trongëne la wezipo. Öni nyidrëti jë hi: “Nekö trahmanyi fe, eni a qaja koi hmunë, mejë jë!”
15 Ame hna mejë jë la ka mec me nyiqaane ithanata, matre Iesu a hamë nyëne pi kowe la thine i nyën.
16 E cili, traqa pi hi la xou koi angatr asë, ame hnei angatr hna nyiqaane atrunyi Akötresie me hape: “Mele hmaca ha la ketre perofeta nyipi së,” nge, “Akötresieti a wangatrune la nöje i nyidrë.”
17 Ame hna iqajakeune la maca cili göi nyidrë ngöne la Iudra asë, me itre nöje xötreith.
18 Matre hnene la itretre drei Ioane hna thuemacanyi angeic la itre ewekë cili.
19 Ame hnei Ioane hna hëne koi angeic la lue atre drei angeic, me upi nyidro kowe la Joxu troa hnyinge ka hape: “Nyipëti hi lo Atr Ka Traqa, maine tro pala kö huni a treqene la ketre?”
20 Matre ame hë la nyidroti a traqa koi nyidrë, öni ketre jë hi: “Ioane Bapataiso a upi nyio troa pane hnyingë nyipëti ka hape, nyipëti hi lo Atr Ka Traqa, maine tro pala kö huni a treqene la ketre?”
21 Matre, ame ngöne la hawa cili, hnei nyidrëti hna aloine la itre atr hna tith hnene la nöjei pengöne mec, me itre meci ka ngazo catr, me helëne la itre dremoni, me aijijëne la itre timek troa goe hmaca.
22 Ame hnei Iesu hna qaja ju koi nyidro ka hape: “Bëeke jë koi Ioane, nge qaja ju koi angeic la itre ewekë hnei epon hna öhne me dreng: Goe hë itre timek, nge tro hë itre ka genyi ca, nge loi hmaca ha itre lepera, nge drenge hë itre ka sim, nge mele hmaca ha itre ka mec, nge itre ka pë ewekë fe a hane kapa la maca ka loi.
23 Manathithi la atre ka tha nue kö la lapaune i angeice pi ni.”
24 Nge ame hë la kola nanyi hnene la lue atre tro fë maca i Ioane, hnei Iesu hna nyiqaane qeje Ioane kowe la ka ala nyimu me hape: “Nyipunie a tro troa goeë nemene ngöne la hnapapa? Ketre hainy hna enienijëne hnei eny?
25 Nemene la hnei nyipunie hna goeën? Ketre thupëtresij ka heetrë iheetre ka tru thupene catr?* Waea, ke ame la itre ka heetre tune lai, me mele nyipine la itre mo, tre, kolo itre ka lapane la itre uma i joxu.
26 Matre hnauëne kö laka, nyipunie a tro kowe lai? Hetre perofeta hnei nyipunieti hna thel? Eje hi, eni a qaja hnyawa koi nyipunie, ka sisitria kö angeic hune la perofeta.
27 Angeice hi lo hna qaja ngöne la hna cinyihane ka hape: ‘Hanawang! Eni a upe la macang qëmeke i eö; troa hnëkëne la gojenyi qëmeke i eö.’
28 Eni a qaja hnyawa koi nyipunie ka hape, ame thene la itre atr hna hnahon hnei föe, pëkö ka draië hui Ioane, ngo ame la ka co ne la Baselaia i Akötresie, tre, ka sisitria kö hui angeic.
29 (Matre, ame hë la kola drenge lai hnene la itre atr me itre ka hle mani, angatr a jele meköti Akötresieti jë, ke hna hane fe bapataiso angatr hnei Ioane.
30 Ngo hnene pe la itre Faresaio, me itretre inine la Wathebo hna xelene la eamo* i Akötresie, ke tha hna hane fe kö bapataiso angatr hnei Ioane.)
31 Tro ni a aceitunëne me drei la xötre atr celë, nge drei la ka ceitu me angatr?
32 Ceitu i angatr me itre nekönatr ka lapa ngöne la hna maketr, nge angatr a sue kowe la itre xan ka hape: ‘Hne huni hna elo miuzik* koi epun, ngo tha fia kö; hne huni hna treij, ngo tha treije kö epun.’
33 Ketre tun, tha hnei Ioane bapataiso kö hna xeni falawa me iji waina, ngo öni nyipunie: ‘Ka trene dremoni angeic.’
34 Nge traqa pi hi la Nekö i Atr a xeni me ij, ngo öni nyipunie: ‘Hanawang! Kolo tru hna xen, me tru hna iji waina, me sinee ne la itre ka hle mani, me itre ka kuca la ngazo!’
35 Haawe, kola mama* la inamacan qa ngöne la thangan.”
36 Ame hnene la ketre Faresaio hna könë Iesu troa ce xeni me angeic. Lö jë hi nyidrë kowe la hnalapa i angeic, ame hnei angatr hna elë troa ce xen.
37 Nge hanawang! Hnene la ketre föe ka hlemu ngazo ngöne la traon hna atre laka, Iesu a xeni* ngöne la hnalapa ne lai Faresaio, matre hnei eahlo hna traqa fë pi la ketre neköi butei oel ka tru thupene catr, nge ka pui lolo.
38 Ame hnei eahlo hna sa iwatingöne ca hutrö i Iesu, me treij, me köle la lue waca i nyidrë hnene la itre trenge timidra i eahlo, me ipene he i eahlo. Nge eahlo pë hë a dreme* ju la lue ca i Iesu me köle oelen.
39 Ame hë la kola öhne lai hnene lo Faresaio ka hë nyidrë, mekune jë hi angeic ka hape: “Maine ketre perofeta ju la atre celë, tro nyidrëti lai a atre la pengöne la föe ka ketri nyidrë, laka, föe ka kuca la ngazo.”
40 Ngo sa jë hi Iesu koi angeice ka hape: “Simona, hetre ewekë nyine tro ni a qaja koi eö.” Öni angeic: “Öi Joxu, qaja jë!”
41 “Hetrenyi la lue atr ka trene gufa kowe la ketre trahmany; matre 500 lao drenari* la gufa i ketre, nge 50 i ketre.
42 Nge ame hë la kola thatreine të la gufa hnei nyidro, hnene lo lai trahmanyi hna nue la lue gufa i nyidro. Matre, drei e nyidro la ka troa hnime catrëne lai trahmany?”
43 Sa jë hi Simona ka hape: “Ma, kolo atr ka tru gufan.” Öni Iesu: “Ka meköti la mekuna i eö.”
44 Ame hnei Iesu hna ujë kowe la föe me hape koi Simona: “Öhne hi eö la föe celë? Hnenge hna lö kowe la hnalapa i eö, ngo tha hane kö eö traqa fë tim göne la lue cang. Ngo hnene pe la föe celë hna köle la lue cang hnene la itre trenge timidra i eahlo, me ipene he i eahlo.
45 Ketre, tha ase kö eö dremi ni, ngo ame la föe celë, qaane ju hi la hawa ne eni a lö, tha mano kö eahlo dreme la lue cang.
46 Ketre mina, tha hane fe kö eö nei oele kowe la heng, ngo hnene la föe celë hna nei oele ka pui lolo kowe la lue cang.
47 Qa ngöne lai, eni a qaja hnyawa koi eö laka, ngacama ka tru catre la itre ngazo i eahlo, ngo ase hë köletrij asë, ke atraqatre la ihnimi eahlo. Ngo maine tha tru kö la ngazo hna nu, kolo lai a hape, co hi la ihnim.”
48 Thupene lai, öni Iesu jë hi koi eahlo ka hape: “Pë hë ngazo i nyipo.”
49 Matre, hnene pë hë la itre ka lapa me ce xeni me nyidrëti hna isa hnyinge ka hape: “Drei la atre ce, ka atreine apatrene la itre ngazo?”
50 Ngo öni nyidrëti jë pe kowe la föe ka hape: “Hnene la lapaune i nyipo matre mele hë nyipo, ce tro jë memine la tingeting.”
Itre mekun ecahu fen
^ Maine, “ili ne wezipo.”
^ Maine, “nyipi iheetr?”
^ Maine, “la gojeny.”
^ Ger., “itre trutru nyine elo miuzik.”
^ Maine, “jelenyipicin.”
^ Maine, “saath aqeany.”
^ Maine, “baan.”
^ Wange ju la HQP.
