Luka 8:1-56
-
Föe ka xötrethenge Iesu (1-3)
-
Ceitun ne la atre tra feja (4-8)
-
Kepine la Iesu a hamë ceitun (9, 10)
-
Ceitun ne la atre tra feja hna qejepengön (11-15)
-
Tha nyine zaene kö la laam (16-18)
-
Thin me ha jini Iesu (19-21)
-
Iesu a aupune la enyi ka catr (22-25)
-
Iesu a helë dremoni me upe koi itre puaka (26-39)
-
Nekö i Iairo jajiny; föe ka ketre la pune iheetre i Iesu (40-56)
8 Thupene lai, Iesu a tro pi kowe la itre traon me itre hunahmi trootro, me cainöjëne la maca ka loi ne la Baselaia i Akötresie. Nge ce nyidrëti memine lo ala Truelof,
2 nge hetrenyi fe la itre xa föe hna amelene qa ngöne la itre dremoni, me itre sine mec: Maria, lo hna hëne ka hape, Magadalena, ene lo föe hna amelene qa ngöne la sevene lao dremoni;
3 me Ioana, ifënekö i Xuza, ene lo atre thupëne la hnalapa i Herodra; me Susana; me itre xa föe ju kö ka ixatua hnene la itre ewekë i angatr.
4 Nge kola ha icacaxenyi la ka ala nyimu me itre ka xötrethenge Iesu qa ngöne la itre traone trootro, ame hnei nyidrëti hna ithanata jë koi angatr jëne la itre ceitun, me hape:
5 “Ketre atre tra feja a tro pi troa jumi feja. Jume pi hi angeice la itre feja, nge mala pi hi itre xan e kuhu gojeny, ame hna waja ju, me sasa hnei itre waco.
6 Nge hetre itre xan ka mala ngöne la gaa tëtë, nge thupene la hna nango cia, fitre pi hi, ke pëkö tim.
7 Nge hetre itre xane pena ka mala nyipine la itre ka ithiny, ame hna ce cia lue ej, nge hna thahe la itre feja hnene la itre ka ithiny.
8 Nge hetre itre xa feja ka mala ngöne la gaa hmelek, matre thupene la hna pane cia, wa wene pi hi kösë 100 hmaca kö lo etrune lo itre feja hna jum.” Nge thupene la nyidrëti a qaja la itre ewekë cili, öni nyidrëti jë hi: “Ame la atr trene hnangenyë troa dreng, drenge ju.”
9 Matre hnene la itretre dreng hna hnyingë pengöne koi nyidrëti la aliene la ceitune celë.
10 Öni nyidrëti jë hi: “Ijiji nyipunie troa trotrohnine la ini ka hmitrötr nge hna juetrën göne la Baselaia i Akötresie, ngo ame koi itre xan, tro pe hi angatr a hmaca ngöne ceitun, matre ngacama angatre hi a goe, ngo tha öhne pe, nge ngacama angatre hi a dreng, ngo tha trotrohnine kö.
11 Matre, hane hi la aliene lai ceitun: Ame la feja, tre, Trengewekë i Akötresie.
12 Nge ame la itre ka mala e kuhu gojeny, tre itre ka drenge la trengewekë i Akötresie, ame hna traqa pi Diabolo me fejetrije la maca qa kuhu hni angatr, matre tha mejiune ju hi angatr, nge tha ijije hë troa amele angatr.
13 Nge ame la itre ka mala hune la gaa tëtë, tre itre ka drenge la maca me kapa madrin, ngazo pe, pë kö iwaane i angatr. Ame hnei angatr hna pane mejiun, ngo traqa pi hi la ijine itupath, ene pe, patre ju hi la lapaune i angatr.
14 Nge ame lo itre ka mala nyipine la itre ka ithiny, tre kolo itre ka drenge la maca, ngo hnene la ihuline la itre ewekë hna hnehengazon, me itre mo, me itre nyine iamadrinë ne la mele celë, matre hna thahe angatre hnyawa, ene pe, tha wa hnyawa kö angatr.
15 Ngo ame pë hë lo itre ka mala ngöne la gaa hmelek, tre kolo itre ka dreng la maca cememine la hni ka lolo, me lapa mekun ej, me catre wa wene pala hi.
16 “Pëkö atr ka troa amelene la laame cil, me amë fene itrengen, maine fene ili pena, ngo tro pe a atë hune ita ne laam, matre lualai kowe la atre lö.
17 Matre, pëkö ewekë ka sihngödr, ka tha tro kö a hane mama, nge pëkö ewekë hna juetrën, ke tro ha mama me atre.
18 Haawe, wange pala kö la aqane drenge nyipunie, ke ame la atr ka hetrenyi hë la trotrohnin, tro hmaca kö a nyixane la trotrohnine i angeic, matre mana pi la trotrohnine thei angeic. Ngo ame kowe la atre pë trotrohnin, tro ha xome la hnepe trotrohnin ka eje thei angeic.”
19 Ame hna traqa pi hnene la thine i nyidrë me ha jini nyidrë troa wai nyidrë, ngo pine la ka ala nyim, tha ijiji angatre ju hi troa easenyi Iesu.
20 Matre hna thuemacanyi nyidrëti jë ka hape: “Hanawange la thine i nyipë me ha jini nyipë e kuhu qëhnelö, angatr a ajane troa ithanata me nyipë.”
21 Ame hnei nyidrëti hna sa ka hape: “Ame la thineng me itre trejin me eni, tre, itre ka drenge me trongëne la trengewekë i Akötresie.”
22 Ngöne la ketre drai, hnei nyidrëti me itretre dreng hna elë hune la neköi he, nge öni nyidrëti jë hi koi angatr ka hape: “Tro së kowe la ketre ngönegejë.” Matre angatr a ce ea pi.
23 Nge angatre pala kö hune la tim, nge pi meköle ju hi Iesu. Ame hna xulu pi la ketre eny ka catr, matre tiqa ju hi la he hnei tim, ene pe, kola ha nyiqaane lö la he.
24 Angatr a tro ju me ahlë Iesu, me hape: “Atre Ini, Atre Ini fe, ka tro hë së la a mec!” Haawe, mejë jë hi nyidrë troa catrëne la enyi me tim, ame hna haodrai pi.
25 Öni nyidrëti jë hi koi angatr ka hape: “Ekaa ha lo lapaune i nyipunie?” Ngo angatre pe a hai me xou, me ihnyingënekeune ka hape: “A drei nyidrëti la matre kola drei nyidrë hnene la eny me tim?”
26 Angatr a xepe ju ngöne la ketre götran ne Gadara, ene lo götran ka iqëmekekeu me Galilaia.
27 Nge ame hë la Iesu a uti ngöne la nöje cili, traqa pi hi koi nyidrëti la ketre atr hna löth hnei dremoni. Nge ekö hë angeic tro pë iheetr, nge tha lapa kö angeic ngöne uma ngo nyipine la itre hua.*
28 Matre ame hë la angeic a öhnyi Iesu, sue jë hi angeic me sa iwatingöne ca, nge angeice pë hë a ithanata catre jë koi Iesu me hape: “Nyipëti a ue e celë, Iesu, Nekö ne la Akötresie Ka Draië Catr? Eni pe a sipo nyipë, the akötrë ni kö.”
29 (Hnei Iesu hna upe la dremoni troa nue lai atr. Ke anyimua* löthi angeic hnene lai dremoni, matre hna anyimua ceinë angeic me thupën, ngo hnei angeice pala hi hna utretr, nge hna troxomi angeice pala hi hnene lai dremoni kowe la itre götrane gaa pë atr.)
30 Hnyinge jë hi Iesu koi angeice ka hape: “Drei la ëje i eö?” Öni angeic: “Legeona,” ke nyimu dremoni ka löthi angeic.
31 Nge itre dremoni a sipone iele nyidrëti jë matre tha tro kö a upi angatr kowe la hnaop ka jui nge ka thatrehmekun.
32 Nge ame hune la wetr, kola xeni trootro la itro puaka, matre hnene la itre dremoni hna sipone iele nyidrë troa löthi nyudren, ame hna kapa ju hnei nyidrë.
33 Haawe, itre dremoni a tro ju qaathene lai atr me löthe la itro puaka, ame hnei nyudreni hna sesë pi qa hune la git kowe la hnagejë, me lö me mec.
34 Nge ame ju hi la kola öhne lai hnene la itretre axö öni, angatr a kötre pi me qaja trongëne lai ngöne la itre traon, me itre xa götran e trön.
35 Nge hnene pë hë la itre atr hna tro troa wange la ewekë ka traqa. Angatr a tro ju koi Iesu, nge traqa ju hi angatr a öhne lo trahmanyi hna löth hnei dremoni, a ka heetr nge loi hë la aqane waiewekë i angeic, nge angeice hi a nango lapa ezine la lue ca i Iesu. Ame hna xou ju hnei angatr.
36 Nge hnei angatre pë hë hna qaja kowe la itre ka traqa, la aqane aloine lo atr hna löth hnei dremoni.
37 Thupene lai, traqa pi hi la itre atr ka ala nyimu qa ngöne la itre götran ezine Gadara troa helë nyidrë qaa lai, ke tru catre la xou i angatr. Ame hnei Iesu hna elë jë hune he göi troa tro.
38 Ame pe, hnene lo trahmanyi hna löth hnei dremoni hna sipo Iesu troa ce tro me nyidrë, ngo hnei Iesu hna abëekë angeice hmaca me hape:
39 “Bëeke hmaca jë kowe la hnalapa i hmunë, nge the mano kö qaja la ewekë hnei Akötresieti hna kuca koi hmunë.” Ame hnei angeice hna bëeke hmaca ju, me cainöjëne ngöne la nöj asë la ewekë hnei Iesu hna kuca thatraqai angeic.
40 Nge ame hë la Iesu a bëeke hmaca Galilaia eë, hnene la ka ala nyimu hna kepe nyidrëti hnyawa, ke angatr a lapa treqe nyidrë.
41 Nge hanawang! Xulu pi hi la ketre trahmanyi, Iairo la ëjen; angeice hi lo tane la sunago. Nge angeic a kei ju ngöne la lue ca i Iesu, me sipon iele nyidrëti troa tro kowe la hnalapa i angeic,
42 ke ka tro ha meci la nekö* i angeic ka cas, nge 12 petre hi lao macatre i nyën.
Nge ame la kola tro hnei Iesu, kolo fe hi a ipepetrenyi me nyidrë hnene la ka ala nyim.
43 Nge hetre ketre föe fe ka neni hni a 12 hë lao macatre, nge pëkö atr ka atreine aloine la meci eahlo.
44 Matre eahlo a easenyi Iesu ju qa hutrö, me ketr la ipune iheetre i nyidrë, ene pe, tha neni ju hi la hni eahlo.
45 Öni Iesu jë hi: “Drei la ka ketr la pune iheetreng?” Nge angatr a isa hape: “Tha eni kö!” Matre öni Peteru jë hi: “Atre Ini fe, öhne hi nyipëti la ka ala nyim, angatr a ipepetrenyi me nyipë.”
46 Ngo öni Iesu: “Hna ketri ni hnene la ketre atr, ke drenge hi ni la kola tro qaathenge la men.”
47 Nge ame hë la föe a öhne laka, tha ka sihngödri kö la hnei eahlo hna kuca, eahlo a tro ju me hmengöhmengön, me sa iwatingöne ca qëmeke i nyidrë, me qaja amamane qëmekei nöjei atr la kepin matre eahlo a ketri nyidrë, memine la aqane canga loi la meci eahlo.
48 Ngo öni Iesu jë hi koi eahlo ka hape: “Neköng, mele hë hmunë hnene la lapaune i hmunë. Tro jë hë, nge the seseu kö.”
49 Nyidrëti pala kö a ithanata, nge xulu pi la ketre trahmanyi ne la lapa i Iairo, öni angeic: “Meci hë la nekö i nyipë jajiny! Matre nyine ue hmaca la troa ajolëne la Atre Ini?”
50 Ngo drenge hi Iesu la hna qaja, matre öni nyidrë: “The xou kö, ngo lapaune jë pe, nge tro ha amele nyën.”
51 Nge ame hë la Iesu a lö hnine la uma, tha hnei nyidrëti hmaca kö hna nue la itre xan troa xötrethenge nyidrë, ngo Peteru hi, me Iakobo, me Ioane, me keme me thine ne la nekö jajiny.
52 Nge itre atr e cili a itreijenyi me lepelepe imano pi nyën. Ngo öni Iesu jë hi: “The treije kö, ke tha meci kö nyën, ngo nyëne hi la a meköl.”
53 Ame hnei angatr asë hna hnyimasai nyidrë, ke atre hnyawa hi angatre laka, meci hë nyën.
54 Ngo Iesu a ea ju la ime i nyën, me qaja koi nyën ka hape: “Nekönatre fe, mejë jë!”
55 Ame hna mele hmaca* pi nyën, me mejë. Matre nyidrëti a iupi jë troa ithue a i nyën.
56 Ame hna elitrauje la madrine ne la keme me thin, ngo Iesu a wathebo nyidroti ju troa qaja trongëne lai ewekë ka traqa.
Itre mekun ecahu fen
^ Maine, “hua nyine amekunën.”
^ Maine jë, “nyimu ijine kola löthi angeic nge nango qea pi hë.”
^ Maine, “nekö jajiny.”
^ Maine, “mano (mano ne mel) hmaca ha nyën.”
