Luka 9:1-62
-
Truelof lao ini göi huliwa ne cainöj (1-6)
-
Herodra a hnying pi Iesu (7-9)
-
Iesu a thuane la ala 5 000 (10-17)
-
Peteru a wangatrehmekune la Keriso (18-20)
-
Kola canga thuemacanyine la meci Iesu (21, 22)
-
Nyipi atre dreng (23-27)
-
Iesu a ketrepengön (28-36)
-
Dremoni hna helën thene la nekö trahmany (37-43a)
-
Kola canga thuemacanyine la meci Iesu (43b-45)
-
Itretre dreng a isi pi ka tru (46-48)
-
E ka tha icilekeu, sine xöle së lai (49, 50)
-
Tha kepe Iesu kö e Samaria (51-56)
-
Aqane xötrethenge Iesu (57-62)
9 Thupene lai, nyidrëti a hëne jë lo ala Truelof, me aijijë angatre troa helëne la itre dremoni me aloine la itre mec.
2 Nge nyidrëti a upi angatre jë troa cainöjëne la Baselaia i Akötresie, me aloine la itre trene mec,
3 me hape: “Tha tro kö a xome trongë kemeje me itre xa ewekë thatraqane la tronge i nyipunie, nge the xome trongë falawa kö, me mani;* me lue iheetr.*
4 Nge ame hë la nyipunieti a lö kowe la ketre uma, lapa ju e cili, nge tro hmaca jë.
5 Ngo ame la nyipunieti a tro qa ngöne la ketre hnalapa maine traon ka tha kepe nyipunie, maine tha drei nyipunie, jumejume pi la dro ne la lue hnatrapaca i nyipunie nyine hatrene koi angatr.”
6 Ame hnei angatr hna tro ju kowe la itre hunahmi trootro troa cainöjëne la maca ka loi, me aloine la itre wezipo.
7 Nge ame hë la Herodra* joxu* a drei mejene la itre ewekë ka traqa, jole pi hi la mekuna i angeic, ke itre xan a mekune laka, mele hmaca ha Ioane qa hna mec,
8 nge öni itre xane fe, Elia lo ka iamamany, nge itre xane pena a mekune laka, hna amelene hmaca la ketre perofeta ekö.
9 Matre öni Herodra jë hi: “Hnenge hi lo hna thupa la nyinawa i Ioane. Nga drei ju kö la atr ka kuca la itre ewekë hnenge hna drei mejen?” Ame hnei angeice hna thele jëne troa iöhnyi me nyidrë.
10 Ame hë la kola bëeke hmaca hnene la itre aposetolo, angatre a qejepengön asë jë koi Iesu la itre ewekë hnei angatre hna kuca. Matre nyidrëti a xome juetrë angatre jë kowe la ketre traon hna hëne ka hape, Bethesaida.
11 Ngo atre ju hi hnene la ka ala nyim, ame hnei angatre hna xötrethenge nyidrë. Matre, nyidrëti a kepe angatre hnyawa ju, me qeje Baselaia i Akötresie koi angatr, me aloine la itre trene mec.
12 Nge kola ha traqa kowe la pune la drai, ame hna traqa pi koi Iesu lo ala Truelof, me hape: “Ka loi e troa pane upe la ka ala nyim, matre tro angatr a tro kowe la itre traon me hunahmi ka easeny, me thele hnë meköle i angatr me a i angatr, ke tha hna lapane kö la götrane celë.”
13 Ngo sa jë hi nyidrë ka hape: “Thue a i angatre jë pe.” Önine jë hi la angetre dreng: “Pëkö xeni la, ngo faifi hi lao falawa nge lue neköi ie, ngo ma tro pe huni a isa tro troa itö xeni koi angatr asë la.”
14 Ngo eje hi laka, ala 5 000 lao trahmany. Matre öni nyidrëti jë hi kowe la itretre dreng ka hape: “Thewe gurupe jë nge alapa angatre ju, nge troa isa ala 50 e ca gurup.”
15 Ame hnei angatre hna kuca tune lai, matre kola ilapanyi hnene la itre atr asë.
16 Nyidrëti a xome pi la faifi lao falawa memine lo lue ie, me gala draië me thith. Ame hnei nyidrëti hna thupathupa pi, me nyiqaane hamëne kowe la itretre dreng, nge itretre dreng kowe la ka ala nyim.
17 Ame hnei angatr asë hna isa xeni mej, nge goi hetre munëne fe, matre hna hleme la 12 lao trenge munën ka tiqa.
18 Thupene lai, ngöne la ijine nyidrëti a thithi cas, xulu pi hi koi nyidrëti la itretre dreng, matre nyidrëti a hnyinge jë koi angatr ka hape: “Ame kowe la ka ala nyim, ke drei ni?”
19 Sa jë hi angatre ka hape: “Ioane Bapataiso, ngo öni itre xan, Elia, nge itre xane pena a qaja ka hape, mele hmaca ha la ketre perofeta ekö.”
20 Matre öni nyidrëti jë hi koi angatr ka hape: “Ngo drei ni koi nyipunie?” Sa jë hi Peteru ka hape: “Nyipëti hi la Keriso i Akötresie.”
21 Thupene lai, nyidrëti a ewekë catre jë koi angatr, me wathebo angatre troa qaja trongëne lai.
22 Nge öni nyidrëti hmaca jë hi: “Tro ha nue la Nekö i Atr kowe la itre akötr, nge tro ha thipetriji angeic hnene la itre qatre ne la nöj, me itre tane i angetre huuj, me itretre cinyihan, nge tro fe a humuthi angeic. Ngo ame hë ngöne la hnaakönine drai, tro ha amele angeice hmaca.”
23 Ame hnei nyidrëti hna ithanata kowe la nöjei atr asë me hape: “Maine tro la ketre atr a pi xötrethenge ni, loi e tro angeic a pane xele angeice kö, me ajöne la sinöe ne iaxösisi* i angeic, me xötrethenge ni fë o drai pala hi.
24 Nge ame la atre thele troa amele angeice kö, tre tro ha luzi la mele* i angeic, ngo ame la atre nue la mele i angeic pi ni, haawe, tro hë angeic a mel.
25 Ke nemene la eloine kowe la atr e tro angeic a hetrenyi la fene hnengödrai asë, nge kola sipu akötrë angeice kö me aluzine la mel?
26 Nge maine tro la ketre a hmahma e eni me itre trengewekëng, tro fe hë la Nekö i Atr a hmahma e nyën, la angeic a traqa ngöne la men ne la Keme i angeic, ce me itre angela ka hmitrötr.
27 Ngo eni a qaja hnyawa koi nyipunie laka, tha tro kö la itre xa ka cil e celë a hane mec, e tha hna pane öhne kö la Nekö i Atr a kola traqa ngöne la Baselaia i Akötresie.”
28 Haawe, thupene la hnaeitrene drai ne qaja nyidrëti la itre trengewekë celë, nyidrëti a xomi Peteru jë me Ioane me Iakobo, me elëne la ketre wetr troa thith.
29 Nge ame hë la nyidrëti a thith, ketre saze pi hi la iqëmeke i nyidrë nge wië kaca pi hi la itre iheetre i nyidrë.
30 Nge hanawang! Lue atr a ce ithanata me nyidrë, ene Mose me Elia.
31 Angatr a mama jë cememine la lolo, me ce ithanatane la aqane tro nyidrëti a patr, ene la ewekë ka troa eatr e Ierusalema.
32 Nge ame Peteru me lue sinetronge i angeic, tre, thatreine hë angatr xomihnine la pi meköl, ngo ame ju hi la angatr a hlë hnyawa, öhne ju hi angatre la lolo i nyidrë, me lue atr ka ce cil me nyidrë.
33 Nge ame hë la kola patre hnei nyidro, öni Peteru jë hi koi Iesu ka hape: “Atre Ini fe, ka loi ke eahuni hi la, nue huni pi troa acil la köni itat, casi koi nyipë, casi koi Mose, nge casi fe koi Elia.” Ngo thatre kö angeice la hnei angeice hna qaja.
34 Nge angeice pala kö a ithanata, ame hna nyiqaane mama ju la ketre iaw me hakuthi angatr. Nge ame hë la angatr e hnine la iaw, traqa ju hi koi angatre la xou.
35 Ame hna ewekë ju qa hnine la iaw, me hape: “Hane hi la Nekönge hniminang, lo hna iën. Drei nyëne ju.”
36 Kolo pala kö a ewekë, nge Iesu casi ju pe hi. Nge angatr a lapa thaup, matre tha iqajakeune kö angatr la itre ewekë hnei angatre hna öhne ngöne la ijine cili.
37 Ame hë ngöne la drai thupen, lo angatr a uti qaa hune la wetr, traqa pi hi la ka ala nyimu troa itronyi me nyidrë.
38 Nge hanawang! Sue jë hi la ketre trahmanyi nyipine la ka ala nyim, me hape: “Atre Ini fe, pane wange ju la neköng, ke pë ju kö xa neköng, ngo nyëne hi.
39 Nge hanawang! Ame la kola löthi nyën hnei dremoni, nyëne hi lai a sue, nge hnene hmaca kö la dremoni hna kuca matre jipajipa jë nyën, me neni la iez. Nge goi xele fe angeice ma nue la neköng e tha hna pane aene la trenge catre i nyën.
40 Nge ase hë ni sipone la itretre drei nyipë troa helëne lai dremoni, ngo thatreine kö angatr.”
41 Öni Iesu jë hi: “Ekölö hi ni nyipunie, xötre ka pë lapaun nge ka thiina ka qali, tro ni a ce me nyipunie uti hë eu? Nge tro ni a xomihni nyipunie uti hë eu? Nga awe jë e kolem la nekö i nyipë.”
42 Matre ame la kola easenyi nyidrë hnene lai nekönatr, hnene la dremoni hna kuië nyëne hnadro eë, me aca tro ajipajipanyi nyën. Ngo Iesu a wesitrëne jë lai dremoni me amelene la nekönatr, me hamë nyëne hmaca koi kem.
43 Ame hnene la itre atr hna haine la etrune la mene i Akötresie.
Nge angatre pala kö a haine la itre ewekë hnei Iesu hna kuca, ame hnei nyidrëti hna qaja kowe la itretre dreng ka hape:
44 “Drenge hnyawa ju, nge lapa mekune ju la itre trengewekë celë, ke easenyi hë matre nue pi la Nekö i Atr kowe la ime ne la itre atr.”
45 Ngazo pe, tha trotrohnine kö angatr la hna qaja hnei nyidrë. Ngo tro kö lai a tun, ke hna juetrëne la itre ewekë cili koi angatr, matre tha tro kö angatr a trotrohnine la alien, nge ketre, xou i angatre fe ma hane hnyingë pengöne koi nyidrë.
46 Ame hnene la itretre dreng hna nyiqaane iwesitrë göi troa atre ka hape, drei la ka tru e angatr.
47 Ngo atre hnyawa hi Iesu la itre mekun hnei angatr hna lapa fë, ame hnei nyidrëti hna xome la ketre nekönatr, me ami nyën ezi nyidrë,
48 me hape koi angatr: “Ame la atre kapa la nekönatr ka tui nyëne la, pine la ëjeng, angeice fe hi lai a hane kepe ni. Nge ame la atre kepe ni, tre, kolo hi lai a kapa la Atre upi ni. Ke ame la atre ujë tune la ka co thei nyipunie, angeice hi la ka tru.”
49 Öni Ioane jë hi koi Iesu ka hape: “Atre Ini fe, hne huni hna öhne la ketre atr ka helëne la itre dremoni ngöne la ëje i nyipë, nge hne huni hna thele troa sewe angeic, ke tha ka ce xötrethenge nyipëti kö me eahun.”
50 Öni Iesu jë hi: “The sewe angeice kö, ke e tha ka icilekeu kö me nyipunie la atr, haawe, ce angeice hi lai me nyipunie.”
51 Nge pine laka, easenyi hë* matre xomi nyidrëti jë hnengödrai eë, haawe, xecie hnyawa ju hi koi nyidrë troa tro Ierusalema.
52 Ame hnei nyidrëti hna pane upe la itre xa atre dreng qëmeke i nyidrë. Matre angatr a tro ju, me lö hnine la ketre hunahmi ne Samaria troa hnëkëne la itre xa ewekë nyine kepe nyidrëti e cili.
53 Ngazo pe, tha hnene kö la itre atrene hna kepe nyidrë, ke atre hë angatre laka, xecie hnyawa* ha koi nyidrë troa tro Ierusalema.
54 Nge ame hë la kola öhne lai hnene la lue atre dreng, ene Iakobo me Ioane, öni nyidro: “Joxu, aja i nyipëti kö tro nyio a hëne la eë qaa hnengödrai matre apatrenyi angatr asë la?”
55 Iesu a thaujë ju me wesitrë nyidro.
56 Ame hnei angatr hna tro ju kowe la ketre traon.
57 Angatre pala kö e cahu gojeny, nge önine jë hi la ketre ka hape: “Tro fe ni a hane xötrethenge nyipë ngöne la nöjei jë i nyipë.”
58 öni Iesu jë hi koi angeic: “Hetre hnë meköle ne la itre kuli wael,* nge hetre itrengene meköle ne la itre waco e caha hnengödrai, ngo ame la Nekö i Atr, tre pë fe kö ita ne he i angeic.”
59 Öni nyidrëti hmaca jë hi kowe la ketre ka hape: “Xötrethenge ni jë.” Sa jë hi angeic ka hape: “Joxu, pane nue ni pi troa keleme la kemeng.”
60 Ngo öni nyidrë koi angeic: “Nue pi la itre ka meci troa keleme la itre ka mec, ngo ame eö, tro jë, nge cainöjëne jë la Baselaia i Akötresie.”
61 Nge önine fe la ketre ka hape: “Tro kö ni a xötrethenge nyipë, Joxu, ngo pane nue ni pi troa iahni memine la itre atrene la hnalapang.”
62 Matre Iesu a sa jë koi angeic ka hape: “Tha ijije kö la Baselaia i Akötresie kowe la atre amë la ime i angeic hune la nyine uja dro, me goeëne la itre ewekë hutrö i angeic.”
Itre mekun ecahu fen
^ Ger., “sileva.”
^ Maine, “iheetre ka qea.”
^ Ene Heroda Anetipa. Wange ju la HQP.
^ Ger., ‘atre mus.’ Joxu ka musi ngöne la ketre götrane nöj nge ka nyihatrene la musi Roma.
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Ger., “pexeje pi.”
^ Ger., “qëmeke kowe.”
^ Maine, “alope.”
