Mareko 1:1-45
-
Ioane Bapataiso a cainöj (1-8)
-
Iesu a Bapataiso (9-11)
-
Satana a tupathi Iesu (12, 13)
-
Iesu a nyiqaane cainöj e Galilaia (14, 15)
-
Itre pane atre dreng hna könën (16-20)
-
Itre dremoni hna helën (21-28)
-
Nyimutre hna aloin hnei Iesu e Kaperenauma (29-34)
-
Thithi ngöne la gaa pë atr (35-39)
-
Lepera hna aloin (40-45)
1 Celë hi aqane nyiqaane tro fë la maca ka loi hnei Iesu Keriso, Nekö i Akötresie:
2 Tune lo hna cinyihan hnei Isaia perofeta ka hape: “(Hanawang! Eni a upe la macang qëmeke i eö; troa hnëkëne la gojenyi qëmeke i eö.)
3 Nge kola mexeme la aqane ewekë ne la atre hë ngöne la hnapapa, kola hape: ‘Hnëkëne jë nyipunie la jë i Iehova!* Amekötine jë la jë i nyidrë.’ ”
4 Nge traqa pi hi Ioane Bapataiso ngöne la hnapapa a kola cainöjëne la bapataiso, hatrene ietra ne la itre ngazo nyine troa seng.
5 Hnene pë hë la angetre Iudra asë me itre atrene Ierusalema hna tro koi Ioane, nge hna bapataiso* angatr ngöne la Hneopegejë Ioridrano, nge angatr a isa qaja amamane la itre ngazo i angatr.
6 Nge Ioane a heetrë ipene kamela, me hnöthe la gö i angeic hnei beletr hna kuca hnei ikupeine öni. Nge ame la a i angeic tre, sipa me miel ne hnitr.
7 Nge angeic a cainöjëne ka hape: “Ame la atre traqa thupeng, tre, ka draië kö hung. Nge tha ijijinge kö troa thil, me senge la lue ibutre i nyidrë.
8 Eni a bapataiso nyipunie hnei tim, ngo tro nyidrëti a bapataiso nyipunie hnei uati hmitrötr.”
9 Ngöne la ijine cili, hna traqa hnei Iesu qaa Nazareta e Galilaia, ame hna bapataiso nyidrë hnei Ioane ngöne la Hneopegejë Ioridrano.
10 Nge thupene ju hi la nyidrëti a elë qa hnine la tim, öhne ju hi nyidrë la kola fe la hnengödrai, me uti koi nyidrë la uati hmitrötr kösë piny.
11 Nge kola mexeme la aqane ewekë qaa hnengödrai, kola hape: “Hmunë la Nekönge hniminang, eni a madri hmunë.”
12 Thupene ju hi lai, hnene la ua hna troxomi nyidrë kowe la hnapapa.
13 Nge 40 lao drai ne lapa nyidrë ngöne la hnapapa, ame hna tupathi nyidrëti jë hnei Satana. Nyidrëti e cili memine la itre öni wael, nge itre angela a nyihlue i nyidrë.
14 Thupene la hna othi Ioane, hnei Iesu hna tro Galilaia eë troa cainöjëne la maca ka loi göi Akötresie
15 me hape: “Traqa ha lo ijine hna sa, nge easenyi hë matre traqa pi la Baselaia i Akötresie. Ietra ju, nge lapaune ju kowe la maca ka loi.”
16 Ame la Iesu a trongëne la Hnagejë Ne Galilaia, öhnyi Simona ju hi nyidrë me Anederea lue trejin. Nyidroti a nue ifile e kuhu hnagejë, ke lue ka nyi ie nyidro.
17 Öni Iesu jë hi koi nyidro: “Xötrethenge ni jë, nge tro ni a amamai epon la aqane thele atr.”
18 Ame hnei nyidroti hna canga nuetrije la itre ifile i nyidro, me xötrethenge nyidrë.
19 Iesu a tro hmaca pi, nge öhnyi Iakobo ju hi nyidrë, lo nekö i Zebedaio, me Ioane trejin me angeic. Nyidroti a nyihnyawa ifile hune la neköi he.
20 Matre canga hë nyidroti jë hi hnei Iesu, ame hnei nyidroti hna nue Zebedaio keme i nyidro, me itre ka huliwa koi nyidro, me xötrethenge nyidrë.
21 Angatr a ce traqa ju e Kaperenauma.
Nge e Sabathi hë, nyidrëti a lö jë kowe la sunago me nyiqaane hamë ini.
22 Itre atr a haine la aqane hamë ini i nyidrë, ke qaathei Akötresie la itre ini hna hamën, nge tha ceitu kö me itretre cinyihan.
23 Nge hanawange la ketre atr ngöne la sunago, hna löthe hnei dremoni, matre angeic a sue me hape:
24 “Nyipëti a troa uë hun, Iesu atre Nazareta? Nyipëti a traqa troa apatrenyi hun? Atre hnyawa hi ni laka drei nyipë, nyipëti hi la atr Ka Hmitrötr hna upe hnei Akötresie!”
25 Ngo Iesu a wesitrëne jë lai dremoni me hape: “The ilu kö, nge nue angeice pi lai!”
26 Hnene la dremoni hna kuca matre jipajipa jë lai atr, me sue catre draië, nge thupene lai, ej a lö trije pi lai atr.
27 Itre atr a hai me ihnyingënekeune ka hape: “Nemene ewekë la? Itre ini ka hnyipixe! Atreine hi nyidrë musinëne la itre dremoni, nge itre ej a drei nyidrë.”
28 Ame hna haöthe la hne Galilaia asë hnene la mejene göi nyidrë.
29 Thupene lai, angatr a tro pi qa ngöne la sunago kowe la hnalapa i Simona me Anederea, nge ce angatr me Iakobo me Ioane.
30 Nge hanawange la thine ne la föi Simona a meköl, ke eahlo a idreuth. Matre angatr a canga qejepengöne ju koi nyidrë la meci eahlo.
31 Iesu a tro pi koi eahlo, me ea la ime i eahlo, me amejë eahlo, ene pe, patre ju hi la idreuth. Ame hnei eahlo hna nyiqaane huliwa koi angatr.
32 Nge e hejiheji hë, thupene kola lö la jö, hnene la itre atr hna traqa fë koi Iesu la itre hna tithe hnei mec, me löthe hnei dremoni,
33 nge itre atrene asë la traon a icilenyi qëmekene la qëhnelö.
34 Matre ala nyimu catre la itre hnei Iesu hna aloin, itre hna tithe hnei nöjei pengöne mec. Ketre, nyimutre fe la itre dremoni hna helën, nge nyidrëti a wathebone la itre dremoni troa ithanata, ke atre hi angatr laka, nyidrëti hi la Keriso.*
35 Nge e hmahmakanyi sine jidr, nyidrëti a mejë jë me tro kowe la ketre götrane matre pane lapa cas. E cili, nyidrëti a nyiqaane thithi ju.
36 Ame pe, xötrethenge nyidrëti jë hi hnei Simona me itre xan.
37 Nge ame hë la angatr a öhnyi nyidrë, öni angatr: “Kola thele nyipë hnene la itre atr.”
38 Sa jë hi Iesu ka hape: “Tro sa tro kowe la itre traon ezin matre tro fe ni a hane cainöj e cili, ke kepine hi lai matre upi ni jë.”
39 Matre nyidrëti a trongëne jë la nöje Galilaia asë, me cainöj hnine la itre sunago i angatr, me helëne la itre dremoni.
40 Nge traqa pi hi la ketre lepera koi nyidrë me sai watingöne ca, me hape: “Joxu, maine ajane nyipë, atreine hi nyipë aloinyi ni.”
41 Nyidrëti a utipi angeice ju, me li im me ketri angeic, me hape: “Ajange hi lai! Mele hë hmunë.”
42 Ame hna patre ju la lepera thei angeic, nge loi pi hi angeic.
43 Ase jë hi, qëmekene tro Iesu a upi angeic, hetre hnei nyidrëti hna wathebone koi angeic,
44 öni nyidrë koi angeic: “The qaja pi kö koi ketre, ngo tro jë pe troa amamai eö kowe la atre huuj, nge e cili, tro fë jë lo hna amekötin hnei Mose, matre ahmitrötrë eö me anyipicine koi angatr.”
45 Ngazo pe, tro pi hi lai trahmanyi a qaja trongëne kowe la nöjei atr la hna kuca, matre hlemu jë hi. Qa ngöne lai, ajolë Iesu jë hi troa tro amamany hnine la traon, matre nyidrëti a lapa ju e trön ngöne la götrane gaa pë atr. Ngo ame e cili, kolo pala hi a traqa koi nyidrë la itre atr qa ngöne la nöjei götran.
Itre mekun ecahu fen
^ Wange ju la HQP.
^ Maine, “kola hetin.”
^ Maine jë, “atre hi angatr ka hape, drei lae nyidrë.”
