Mareko 10:1-52
10 Nyidrëti a tro pi qa lai, me easeny kowe la ifego ne la nöje Iudra, ngöne la götrane ngönegejë ne Ioridrano. Ame hna traqa hmaca pi hnene la ka ala nyim, nge tune lo hnei nyidrëti hna majemin, nyidrëti a hamë ini jë koi angatr.
2 Nge traqa pi hi la itre Faresaio troa tupathi Iesu, me hnyinge ka hape, meköti kö tro la trahmanyi a sei hna cil me föe.
3 Öni Iesu koi angatr ka hape: “Nemene lo hnei Mose hna amekötine koi nyipunie?”
4 Öni angatre jë hi: “Hnei Mose lo hna aijijëne troa hetre tusi ne triji föe.”
5 Ngo sa jë hi Iesu ka hape: “Hnene laka, ka catre la itre hni nyipunie, matre amekötine jë Mose tune lai koi nyipunie.
6 Ngo ame ngöne lo qaan, hnene la atre xup hna isa xupi nyidro, trahmanyi me föe.
7 Celë hi matre, tro la trahmanyi a nue la keme me thine i angeic,
8 nge tro nyidroti a ca ngönetrei, matre tha ala lue hmaca kö, ngo ca ngönetrei hë.
9 Haawe, ame la hnei Akötresieti hna isilekeun, tha tro kö a senge hnei ketre.”
10 Ngo ame hë la angatr a lö kowe la hnalapa, hnene la itretre dreng hna nyiqaane hnyingë Iesu göne la pengöne cili.
11 Öni nyidrëti jë: “Ame la atr sei hna cil me föe hmunë, me xome hmaca la ketre föe, angeice hi lai a nyixetë triji eahlo.
12 Nge maine tro la ketre föe a sei hna cil me föi eahlo, me ikötresai pena me ketre, eahlo hi lai a nyixetë.”
13 Kola tro fë hnene la itre atr koi Iesu la itre nekönatr, matre tro nyidrëti a ketri nyudren, ngo itretre drenge pe a wesitrë angatre ju.
14 Ngo ame la kola öhne lai hnei Iesu, nyidrëti hi lai a elëhni jë koi angatr me hape: “Nue nyudreni pi, the sewe nyudreni kö troa tro koi ni, ke thatraqane la itre ka tui nyudreni la Baselaia i Akötresie.
15 Nyipici, eni a qaja hnyawa koi nyipunie, ame la atre tha kapa la Baselaia i Akötresie tune la ketre nekönatr, tha tro jë kö angeice lai a hane lö kow.”
16 Nyidrëti a xomi nyudreni jë me haluth, me amanathithin, me ati ime hui nyudren.
17 Iesu pala kö a tro, nge traqa pi hi la ketre thupëtresij a sa iwatingöne ca qëmeke i nyidrë me hnying ka hape: “Atre Ini fe ka nyipi lolo, nemene la nyine tro ni a kuca matre hetrenyi ni la mele ka pë pun?”
18 Sa jë hi Iesu ka hape: “Hnauëne la eö a hë ni atre ka nyipi lolo? Casi hi la ka lolo, a Akötresie hmekuje hi.
19 Atre hë eö lo itre wathebo: ‘The ihumuthi kö, the nyixetë kö, the atrekënö kö, the silitrengathoi ketre kö, the uku ketre kö troa thoi, nge metrötrëne ju la keme me thine i eö.’ ”
20 Önine jë hi lai thupëtresij koi Iesu ka hape: “Atre Ini fe, ka trongëne hë ni la nöjei ewekë cili, qaane lo eni a co.”
21 Iesu a goeë angeice jë me utipi angeic, me hape: “Ca ewekë pe hi matre pexeje pi eö, tro jë, nge salemëne pi la itre ewekë i eö, nge hamëne pi kowe la itre ka pë ewekë. Nge tro hë eö lai a hetre mo e hnengödrai, nge jë fe, xötrethenge ni jë.”
22 Ngo hace pi hi la hni angeic hnene lai aqane sa i Iesu, matre angeic a tro pi, ke tru catr hnei mo i angeic.
23 Thupene la hnei Iesu hna goeëne xötreithi nyidrë, öni nyidrëti jë hi kowe la itretre dreng ka hape: “Ka jole catre kowe la trenamo troa lö kowe la Baselaia i Akötresie!”
24 Kola sesëkötre hnene la itretre dreng pine la hna qaja hnei Iesu. Öni nyidrëti hmaca jë: “Itre nekönatr, ka jole catre e troa lö kowe la Baselaia i Akötresie!
25 Ke hmaloi ju kö kowe la kamela troa lö qa ngöne la gaa xulu ne nilan, hune la trenamo troa lö kowe la Baselaia i Akötresie.”
26 Matre, igoenyi ju hi la itretre dreng, me hape koi nyidrë:* “Nga drei hö la hna troa amelen?”
27 Iesu a goeë angatre hnyawa ju me sa ka hape: “Thatreine kö la atr troa iamele, ngo ame Akötresie, pëkö hnei nyidrëti hna thatrein.”
28 Haawe, Peteru a nyiqaane qaja ju koi nyidrë ka hape: “Hanawang! Ase hë huni nu asë troa xötrethenge nyipë.”
29 Öni Iesu jë hi ka hape: “Eni a qaja hnyawa koi nyipunie, pëkö atr nue uma, me trejin, me xa, me thin, me kem, me ha nekönatr, me hlapa pine la ëjeng, nge pine la maca ka loi,
30 ka tha tro kö a kapa ngöne la hneijine celë la 100 hmaca kö lao uma, me trejin, me xa, me thin, me ha nekönatr, me hlapa ce memine la akötr, nge ngöne la fen ka troa traqa,* la mele ka pë pun.
31 Ngo ame lo itre ka tro pa, tro pena ha a tro pi, nge ame ange ka tro pi, tro pena ha a tro pa.”
32 Iesu me itretre dreng a elë Ierusalema eë, nge nyidrëti la ka tro pa. Itretre dreng a sesëkötr nge itre ka xötrethenge angatr a nyiqaane xou. Matre Iesu a hën acone hmaca jë lo ala Truelof, me qaja la itre ewekë ka troa traqa koi nyidrë. Öni nyidrë:
33 “Hanawang, easë hë la a tro Ierusalema, nge e cili, tro ha nue la Nekö i Atr kowe la itre tane i angetre huuj, me itretre cinyihan. Nge tro hë angatre lai a amekötine troa humuthi angeic, me nue angeic kowe la itre atre ne fen.
34 Nge tro hë angatr a hnyimasai angeic, me hnyijuë angeic, me thaucë angeic, me humuthi angeic. Ngo ame hë ngöne la hnaakönine drai, tro hë angeic a mele hmaca.”
35 Kola easenyi Iesu hnei Iakobo me Ioane, lo lue nekö i Zebedaio, me hape: “Atre Ini fe, nyio a sipo nyipë troa kapa la sipo i nyio.”
36 Öni Iesu jë hi koi nyidro: “Nemene la aja i epon?”
37 Sa jë hi nyidro ka hape: “Nue nyio pi troa lapa ezi nyipë ngöne la Baselaia i nyipë, ketre ngöne la götrane maca, nge ketre ngöne la götrane mi.”
38 Öni Iesu jë hi: “Thatre kö epon la hnei epon hna sipon. Nge hapeu, ijiji epone fe kö troa hane ij ngöne la ver hnenge hna ijin, me bapataiso tune la aqane bapataiso ni enehila?”
39 Sa jë hi nyidro ka hape: “Ijiji nyio fe.” Qa ngöne lai, öni Iesu: “Maine nyipici laka, tro fe epon a hane ijine la vereng, me bapataiso ngöne la aqane bapataiso ni enehila,
40 ngo ame pë hë göi atre lapa ngöne götrane macang me ming, tre lue göhnë lai hna hnëkëne kö hnei Kakati thatraqane la itre hnei nyidrëti hna iën.”
41 Matre atre ju hi lai hnene lo ala treen, ame hnei angatr hna wesitre ju koi Iakobo me Ioane.
42 Iesu a hë angatre jë koi nyidrë, me hape: “Atre hnyawa hi nyipunie laka, itre joxu ne la itre nöj a musinëne la itre atren, nge itre ka draië ne la fen a qene joxu.
43 Ngo tha tro pi kö a hane tune thei nyipunie; ke ame la atre ajane troa draië, tre, tro angeic a hlue i nyipunie,
44 nge ame la atre ajane troa pa thei nyipunie, tro angeic a nyihlue i nyipunie asë.
45 Ketre tune fe kowe la Nekö i Atr, tha hnei angeice kö hna traqa troa hetre hlu, ngo troa nyihlu, me hamëne la mele* i angeic nyine nyi thupene mel kowe la ka ala nyim.”
46 Thupene lai, angatr a traqa ju e Ieriko. Nge nyidrë, me itretre dreng, memine la ka ala nyimu a tro pi qa lai, nge hetre timek ka sipo mani, Baratimaio la ëjen (nekö i Timaio), angeic a lapa ezine gojeny.
47 Matre ame la angeic a dreng ka hape, Iesu atre Nazareta hë e cili, angeic a sue catre ju me hape: “Iesu, Nekö i Dravita, epi utipi ni!”
48 Ame hna wesitrë angeic hnene la ka ala nyim, me qaja koi angeic troa lapa thaup, ngo kolo jë petre hi ka hape, sue catre jë angeic me hape: “Nekö i Dravita, epi utipi ni ju!”
49 Haawe, cile ju hi Iesu, nge öni nyidrë: “Hë angeice jë koi ni.” Angatr a hëne ju lai timek me hape: “Catre pi! Mejë jë, nyidrëti a hë eö.”
50 Angeic a nue pi la iheetre ka qea i angeic, me canga mejë, me tro koi Iesu.
51 Matre öni nyidrëti jë koi angeic ka hape: “Nemene la nyine tro ni a kuca koi hmunë?” Sa jë hi angeic ka hape: “Raboni,* kuca jë matre goe pi ni.”
52 Nge öni Iesu jë hi: “Tro jë hë, ke mele hë hmunë hnene la lapaune i hmunë.” Ame hnei angeic hna goe pi, me xötrethenge nyidrë.
Itre mekun ecahu fen
^ Maine jë, “kowe la ketre atr pena.”
^ Maine, “hneijine elany.” Wange ju la HQP.
^ Maine, “u.” Ger., psy·kheʹ. Wange ju la HQP.
^ Kola hape, “Atre Ini.”
