Mareko 11:1-33
11 Angatre hë ezine Ierusalema, me traqa e Bethefage me Bethania hune la Wetr Elaio,* ame hnei Iesu hna upe la lue atre drei nyidrë,
2 me hape: “Tro jë kowe la traone qëmeke i epon, nge e traqa ha epon, tro epon a öhn e cili la ketre neköi boliko hna hnöth, nge tha hna hane tithe petre kö hnei atr. Sei nyëne pi, nge traqa sai nyëne jë koi ni.
3 Nge e hetre ka qaja koi epon, ka hape: ‘Epon a u?’ Hape jë: ‘Joxu a aja nyën, nge e ase hë, tro hmaca kö nyidrë a upi nyën.’ ”
4 Ame hnei nyidroti hna tro ju, me öhne lai neköi boliko hna hnöth ngöne la qëhnelö, e tröne la hnalapa ezine gojeny. Ame hnei nyidroti hna sei nyëne pi.
5 Ngo önine jë hi la itre ka cile e cili ka hape: “Hnauëne la epon a senge la neköi boliko?”
6 Nyidroti a sa jë koi angatr thenge lo hnei Iesu hna qaja, ame hnei angatr hna nue nyidroti pi troa tro.
7 Nyidroti a traqa fë pi la neköi boliko koi Iesu, me atë la itre iheetre i nyidro hui nyën, ame hnei Iesu hna të jë.
8 Nge ala nyimu fe la itre ka seluthe la itre iheetre i angatr e kuhu gojeny, nge itre xan a hutra la itre picine sinöe ngöne la itre hlapa.
9 Nge ame la itre ka tro pa hui nyidrë me ka tro pi, angatre pala hi a sue ka hape: “Epi amele huni jë! Manathithi la atre traqa ngöne la ëje i Iehova!*
10 Manathithi la Baselaia ka troa traqa, Baselaia ne la keme së Dravita! Epi amele huni jë, nyipë atre lapa e hnengödrai.”
11 Nge nyidrëti a lö jë e Ierusalema hnine la uma ne hmi, me goeën xötreithi nyidrë. Ngacama hejiheji hë, ngo nyidrëti a tro ju Bethania eë memine lo ala Truelof.
12 Ame hë la drai thupen, angatr a tro pi qaa Bethania, nge mecijiine hë nyidrë.
13 Öhne ju hi Iesu qaa gaa nanyi la ketre iwacua ka cia hlöeë, matre nyidrëti a tro ju troa pane wang ka hape, hetre wene jë kö. Ame la nyidrëti a traqa, pëkö ca wen, ngo idröne hmekuje hi, ke tha ijin wa wene kö.
14 Matre öni nyidrëti jë kowe lai isinöe ka hape: “Tha tro hmaca kö eö a wa wen!” Nge drenge ju hi hnene la itretre dreng.
15 Enehila, traqa ha angatr e Ierusalema. Nge e cili, nyidrëti a lö jë kowe la uma ne hmi me helëne qa lai la itretre salem me angetre itö, nge nyidrëti a kapasaitrëne ju la itre laulau ne la itre ka saze mani, me itre ita ne la itre ka salemë piny.
16 Nge tha hnei nyidrëti kö hna nue la ketre atr troa xome trongëne la ketre ewekë nyipine la uma ne hmi.
17 Nyidrëti a hamë ini jë me hape: “Hapeu, tha hna cinyihane kö lo ka hape, ‘Tro ha hëne la umang, uma ne hmi thatraqane la nöjei nöj asë?’ Ngo nyipunieti pena a xome ej nyine uma i itre atrekënö.”
18 Ame la kola drenge lai hnene la itre tane i angetre huuj me itretre cinyihan, angatr a nyiqaane thele jëne jë troa humuthi nyidrë, ngo xou angatre e nyidrë pine la ka ala nyim, ke nyudreni a haine la aqane hamë ini i Iesu.
19 Nge e hejiheji hë, angatr a tro pi qa ngöne la traon.
20 Ngo ngöne la drai thupen, e hmakany, öhne ju hi angatr lo iwacua a meci hë qa ngöne la iwan.
21 Mekune hmaca jë hi Peteru lo ewekë ka traqa, matre öni angeice jë hi: “Rabi, goeën! kolo iwacua hnei nyipëti hna ejin, fitre hë.”
22 Sa jë hi Iesu ka hape: “Lapaune ju koi Akötresie.
23 Eni a qaja hnyawa koi nyipunie laka, ame la atre qaja kowe la wetr celë ka hape, ‘Kötre jë nge kei ju ngöne la hnagejë,’ nge pëkö luelu e kuhu hni angeic, nge lapaune angeic laka troa eatr la hnei angeic hna qaja, haawe, tro hë lai a eatr.
24 Celë hi matre eni a qaja koi nyipunie, ame la itre ewekë hnei nyipunie hna thithi fë, lapaune ju laka, tro kö nyipunieti a kapa, nge tro hë nyipunieti lai a kapa.
25 Nge ame la nyipunieti a thith, nue pi la ngazo hna kuca koi nyipunie, matre tro fe la Keme i nyipunie e hnengödrai a hane nue la itre ngazo i nyipunie.”
26 ——
27 Angatr a traqa hmaca pi e Ierusalema. Nge ame la nyidrëti a tro hnine la uma ne hmi, traqa ju hi la itre tane i angetre huuj, me itretre cinyihan, me itre qatre ne la nöj
28 a qaja koi nyidrë ka hape: “Qa kaa la atreine i eö troa kuca la itre ewekë celë? Nge drei la atre upi eö troa kuca lai?”
29 Iesu a sa jë koi angatr ka hape: “Ca ewekë fe tro ni a hnyingë nyipunie. Maine tro nyipunieti a sa, ketre tro fe ni a qaja koi nyipunie ka hape, ka xulu qa kaa la atreineng.
30 Ame la bapataiso i Ioane, tre ka qa hnengödrai, maine qaathei atr? Sa jë koi ni.”
31 Angatr a nyiqaane iqajakeune ka hape: “Maine tro sa hape, ‘Qa hnengödrai,’ tro hë angeice lai a sa ka hape, ‘Nga hnauëne laka, tha lapaune kö nyipunieti koi Ioane?’
32 Nge e tro sa qaja, ‘Qaathei atr’?” Angatr a xouene la ka ala nyim, ke ame Ioane koi nyudren, tre, perofeta.
33 Matre angatr a sa jë koi Iesu ka hape: “Thatre kö hun.” Ketre öni nyidrëti jë hi: “Nga tha tro kö ni a hane qaja koi nyipunie ka hape, ka qa kaa la atreineng.”
