Mareko 12:1-44
12 Matre, nyidrëti a nyiqaane ithanata jëne la itre ceitun, me hape: “Hnene la ketre atr hna eënyi vin, me ekö hage xötreith, me hnëkëne la hnë weje wene vin, me acile la ketre ita ne thup. Ase jë hi, angeic a nue pi kowe la itre xa atre eënyi troa thupën, nge angeic a tro ju kowe la ketre nöje gaa nany.
2 Nge traqa ha la ijine menu, ame hnei angeic hna upe jë la ketre hlue kowe lo itretre eëny, matre troa hane menuën la itre vin.
3 Ngo hnene pë hë la itretre eënyi hna xolouth lai hlu, me lepe angazo angeic, me upi angeice hmaca matre pë ju kö hna bëeke fë.
4 Hnene la maseta hna upe hmaca la ketre hlu, ngo hnei angatr hna lepe la he i angeic, me ahmahmanyi angeic.
5 Nyidrë a upe hmaca jë la ketre hlu, ngo hnei angatr hna humuthi angeic. Nge nyimutre fe la itre xan hna lepe me humuth.
6 Thupene lai, hnene la trene vin hna upe la nekö hnimina i nyidrë kowe la itre ka eëny, me hape: ‘Tro angatre lai a metrötrëne la neköng.’
7 Matre, hnene la itretre eëny hna iqajakeune ka hape, ‘Hane hi la nekön. Jë fe, matre tro sa humuthi nyën, matre ewekë i easë pë hë la edrö i nyën.’
8 Haawe, angatr a xolouthi nyëne ju, me humuthi nyën, me huli nyëne tröne la hlapa.
9 Nga nemene jë la hna troa kuca hnene la trene vin? Tro nyidrëti lai a humuthe la itre ka eëny, me ahnithe pë hë la hlapa koi itre xan.
10 Hapeu, tha hane kö nyipunieti e lo hna hape? ‘Ame lo etë hna nuetrije hnene lo itre ka xupi uma, tre eje hi lo etë ka sisitria catr.*
11 Nge qaathei Iehova* la ewekë cili, matre hapeu, tha ewekë kö lai nyine tro sa hain’?”
12 Ame hna thele troa xolouthi* Iesu hnene la itretre cinyihan, me itre tane i angetre huuj, ke trotrohnine hi angatr laka, angatre hi la hna qaja hnei Iesu ngöne la ceitun. Ngo angatr a xouene la ka ala nyim, matre, angatr a nue nyidrëti pi me tro.
13 Ame hë e thupen, angatr a upe jë la itre Faresaio me itre sine xöle i Herodra, troa nyizö i Iesu hnene la itre trengewekë i nyidrë.
14 Traqa pi hi angatr me hape: “Atre Ini fe, atre hi huni laka, ka nyipici nyipë, nge tha nyipëti kö a thele troa selë nyipë hnei atr, ke tha nyipëti kö a goeëne la pengöi atr. Ngo nyipëti pe a inine la itre mekuna i Akötresie ka ihmeku memine la nyipici. Matre ame koi nyipë, ka meköti kö troa kuiëne la mani hna athipe hnei Kaisara, maine waea?
15 Tro fe kö huni a hamën, maine waea?” Ngo wangatrehmekune hnyawa hi Iesu la trenge iaö i angatr, matre öni nyidrëti jë ka hape: “Hnauëne laka, nyipunieti a tupathi ni? Awe jë koi ni la ca drenari,* matre tro ni a pane goeën.”
16 Angatr a hamëne pi la casi koi Iesu, matre öni nyidrëti koi angatr ka hape: “Iqëmeke i drei la? Nge ëje i drei la?” Öni angatre jë hi: “Kaisara.”
17 Matre öni Iesu jë hi: “Haawe, nga hamëne pi koi Kaisara la ewekë i Kaisara, nge koi Akötresie la ewekë i Akötresie.” Ame hnei angatr hna hai nyidrë.
18 Thupene lai, traqa pi hi la itre Sadukaio, lo itre ka tha mejiune kowe la mele hmaca, troa pane hnyinge koi Iesu ka hape:
19 “Atre Ini fe, hnei Mose lo hna cinyihane laka, maine tro la ketre trahmanyi a mecitrije la föi angeic nge pëkö kuku, tro hë la trejin me angeic a xome lai föe, me nyi matrane lai ka mec.
20 Matre, the huni la sevene lao trejin. Hnene la haetra hna xomi föe, ngo meci pi hi angeic, nge pëkö kuku.
21 Hnene pë hë la hnaaluene hna xome lai föe, ame hnei angeic hna meci pi fe, nge pë pala hi kuku. Nge hna traqa tune fe kowe la hnaakönin.
22 Ame hna meci asë lo lai ala sevene lao trejin, nge pëkö matran. Nge thupe i angatr asë, ketre meci ju hi lai föe.
23 Nga ame hë ngöne la mele hmaca, tro pë hë eahlo a föi drei? Ke hnei angatr asë hi hna faipoipo me eahlo.”
24 Sa jë hi Iesu ka hape: “Ka tria hnyawa nyipunie, ke thatre kö nyipunie la hna qaja ngöne la Itre Hna Cinyihan, nge ketre, thatre kö nyipunie la aqane huliwa ne la mene i Akötresie.
25 Ke ame ngöne la ijine mele hmaca, pëkö trahmanyi ka troa faipoipo, nge pëkö ihamë föeë, ke tro hë angatr a ceitu me itre angela e hnengödrai.
26 Nge ame göne la mele hmaca, tha hane kö nyipunieti e hnine la itusi Mose, lo Akötresie a qaja koi angeic ngöne la sinöe ka ithinyi ka hape: ‘Eni la Akötresi Aberahama, me Akötresi Isaaka, me Akötresi Iakobo?’
27 Haawe, tha nyidrëti kö la Akötresi ne la itre ka mec, ngo itre ka mele pe. Matre ka tria hnyawa nyipunie.”
28 Nge hnene la ketre atre cinyihan hna drenge la ithanata i angatr, me drenge la aqane sa hnyawa i Iesu, matre angeic a hnyinge jë koi nyidrë ka hape: “Nemene la wathebo ka tru* ne la trenge wathebo?”
29 Öni Iesu jë hi: “Ame la ka sisitria, tre, ‘Isaraela fe, drenge ju! Iehova Akötresi së, la Iehova ka cas,
30 nge qa i eö troa hnimi Iehova Akötresi eö hnene la hni eö ka pexej, me mele* i eö ka pexej, me mekuna i eö ka pexej, me trenge catre i eö ka pexej.’
31 Ame la hnaaluen, tre ka ceitu hi, ‘Qa i eö troa hnime la atre lapa easenyi eö, tui eö hi.’ Nge pëkö xa wathebo ka sisitria hune lue ej.”
32 Önine la atre cinyihan koi nyidrëti ka hape: “Atre Ini fe, nyipici hi la hnei nyipëti hna qaja, ke ‘casi hi la Akötresie, nge pë hmaca ju kö ketre, ngo nyidrëti hmekuj.’
33 Nge troa hnimi nyidrë hnene la hni së ka pexej, me mekuna* së ka pexej, me trenge catre së ka pexej, me hnime la atre lapa easenyi së tu së hi, ke sisitria kö lai hune la itre huuje ne dreuth asë, me itre xa huuj.”
34 E cili, öhne hi Iesu laka, ka inamacane la aqane sa i angeic, matre öni nyidrë: “Tha iananyi kö eö memine la Baselaia i Akötresie.” Haawe, cile hnö asë ju hi angatr troa hnyinge hmaca koi nyidrë.
35 Ngo Iesu pala hi a hamë ini hnine la uma ne hmi, me hape: “Hnauëne laka, itretre cinyihan a hë Keriso ka hape, nekö i Dravita?
36 Jëne la uati hmitrötr, öni Dravita, ‘Iehova* a qaja kowe la Joxung: “Lapa ju ngöne la götrane macang, uti hë la tro ni a amë la itre ithupëjia me hmunë fene la lue ca i hmunë.” ’
37 Haawe, maine Dravita a hë Keriso ka hape, Joxu, nga tro nyidrëti a nekö i Dravita tune kaa?”
Ame hna madrine troa drei nyidrë hnene la ka ala nyim.
38 Nyidrëti pala kö a hamë ini, me hape: “Wange pala kö la itretre cinyihan, ke angatr a tro fë iheetre ka qea, nge aja i angatr tro la itre atr a ibozu me metrötrë angatr ngöne la itre hna maketr.
39 Nge aja i angatre fe troa lapane la itre pane* göhnë ngöne la itre sunago, me itre mekene ta* ngöne la kola ce xeni hej.
40 Ngo angatre hi la itre ka ulume la itre mo ne la itre sine föe, me thithi aqeanyi göi troa mama. Tro ha atraqatre la hnëjine i angatr.”
41 Nyidrëti a lapa ju qëmekene la hnë* kuië mani hnine la uma ne hmi, me goeëne la aqane ithingë ne la ka ala nyim. Ala nyimu la itre trenamo ka kuië pies atruny.
42 Nge traqa pi hi la ketre sine föe ka pë ewekë, me kuiëne la lue neköi pies ka co catr.*
43 Ame hnei Iesu hna hëne jë koi nyidrë la itretre dreng, me hape: “Eni a qaja hnyawa koi nyipunie laka, tru catre kö la hna kuiëne hnene la sine föe celë ka pë ewekë hnine la hnë kuië mani, hune la itre xan.
44 Ke hnei angatr asë hi hna kuiën qa ngöne la trengamo i angatr, ngo hnei eahlo pe hna hamëne la hnepe hnei eahlo hna hetreny,* nge nyine mele i eahlo.”
Itre mekun ecahu fen
^ Ger., “he ne kona.” Wange ju la HQP.
^ Wange ju la HQP.
^ Maine, “oth.”
^ Wange ju la HQP.
^ Maine, “pane wathebo.”
^ Maine, “u.” Ger., psy·kheʹ. Wange ju la HQP.
^ Ger., “inamacan.”
^ Wange ju la HQP.
^ Maine, “ka sisitria.”
^ Maine, “göhnë ka tru.”
^ Maine, “trengen.”
^ Ger., “lue lepton, maine ca kodran.”
^ Maine, “pë ewekë.”
