Mareko 13:1-37
13 Ame la Iesu a tro pi qa ngöne la uma ne hmi, hnene la ketre atre drei nyidrë hna qaja ka hape: “Atre Ini fe, goeën! Mingöminge catre la itre etë memine la iuma celë!”
2 Öni Iesu jë hi koi angeice ka hape: “Öhne hi eö la iuma atraqatre celë? Tha tro kö a të e celë la ketre etë hune la ketre etë, ke tro ha thëtrij asë.”
3 Ame la nyidrëti a lapa qëmekene la uma ne hmi hune la Wetr Elaio* me Peteru, me Iakobo, me Ioane, me Anederea, angatr a ithanata aconyi ju koi nyidrë me hape:
4 “Pane qaja jë koi huni ka hape, eu la troa traqa la itre ewekë cili, nge nemene fe la hatrene la pune la itre ewekë cili?”
5 Nge Iesu a nyiqaane qaja jë koi angatr ka hape: “Wange pala kö, wanga amenu nyipunieti jë.
6 Ke nyimutre la itre ka troa traqa ngöne la ëjeng, me hape, ‘Eni hi la Keriso,’ nge tro hë angatre lai a amenune la ka ala nyim.
7 Matre, e drenge hë nyipunie la itre isi, me itre mejene isi, the xou pi kö, ke tro kö a traqa la itre ewekë cili. Ame pe, tha pune pala kö lai.
8 “Ke tro ha isi la ketre nöj me ketre nöj, me ketre baselaia me ketre baselaia; tro fe a hetre sa ngöne la ketre götran me ketre götran; nge tro mina fe a hetre jiin. Ame la nöjei ewekë cili, tre itre qaane la akötr.
9 “Ngo hmeke ju nyipunie! Tro la itre atr a uti sai nyipunie kowe la hnakootr, me thaucë nyipunie ngöne la itre sunago, me xomi nyipunie kowe la itre gavena, me itre joxu, pi ni. Nge celë hi nyine anyipicin koi angatr.
10 Ketre, tro fe a pane cainöjëne la maca ka loi ngöne la nöjei nöj asë.
11 Nge e traqa ju kootrë nyipunie, the hnehengazone kö la nyine troa qaja, ngo qaja jë la hnei nyipunieti hna mekun ngöne la hawa cili, ke tha nyipunieti kö la ka ithanata, ngo uati hmitrötre pe.
12 Ketre, tro la haetra a tro fë la cipa kowe la mec, tune la keme kowe la kuku, nge tro la itre nekönatr a icilekeu me keme me thin, me tro sai nyidro koi mec.
13 Nge tro ha methinë nyipunie hnene la nöjei atr asë pine la ëjeng. Ngo ame la atre cile hut* uti hë la pun, tro hë angeic a mel.
14 “Haawe, e öhne jë nyipunie la ewekë ka sis ka xulu fë hnëjin a kola cil ngöne la göhnë laka, tha göhnë i angeice kö, (trotrohnine ju hnei atre e), tro la itre ka lapa e Iudra a kötre kowe la itre wetr,
15 nge tha tro kö la atr ka cil hune uma a uti me lö, me xome la ketre ewekë.
16 Nge the tro kö la atr ngöne la hlapa a bëeke kowe la itre ewekë hutrö, me xome la iheetre ka qea i angeic.
17 Ekölö hi ni la itre ka upune, me itre ka iji thi nekönatr ngöne la ijine cili!
18 The mano kö thith, matre tha tro kö lai a traqa ngöne la ijine hnötr;
19 ke tro la itre drai cili a itre drai ne akötr, laka, tha hna hane kö traqa tun qaane lo Akötresie a nyiqaane xupe la nöjei ewekë uti hë enehila, nge tha tro hmaca kö a hane tun.
20 Nge maine tha tro kö Iehova* a ahopatrene la itre drai cili, pëkö atr ka troa mele pe. Ngo pine la itre hna iën, lo itre hnei nyidrëti hna iën, tro ha ahopatrene la itre drai cili.
21 “Ketre, maine tro la ketre atr a qaja koi nyipunie ka hape, ‘Goeën, Keriso e celë’ maine, ‘Goeën, nyidrëti e cili,’ the kapa kö nyipunie!
22 Nge tro ha mejë la itre Keriso thoi me itre perofeta thoi, nge tro angatr a kuca la itre iamamanyikeu, me itre hatren nyine hain matre troa ajeane la itre xan, me ajeane la itre hna iën.
23 Qa ngöne lai, hmeke jë. Ase hë ni lai canga thuemacanyi nyipunie.
24 “Nge thupene la itre drai ne akötre cili, tro ha miti la jö, nge tha tro kö a hudrume la treu,
25 nge tro ha mala la itre wëtresij qa hnengödrai, nge tro ha jumejume la itre ewekë ka men e hnengödrai.
26 Nge tro hë angatr a öhne la Nekö i Atr a traqa hune la itre iaw ne hnengödrai, cememine la men atraqatr me lolo.
27 Nge tro hë angeic a upe la itre angela i angeic, nge tro angatr a acasine la itre hnei angeice hna iën, qa ngöne la foa lao götrane la fen, me qa ngöne la cane la fene hnengödrai, uti hë la ketre cane la hnengödrai.
28 “Haawe, pane xomi ini jë qa ngöne la ceitun ne la iwacua:* Ame hë la kola sajem,* atre hë nyipunie laka, easenyi hë la ijine hedredrei.
29 Ketre tune mina fe, ame hë la nyipunieti a öhne la kola eatre la itre ewekë cili, lapa atre ju ka hape, easenyi hë angeic, nge angeice hë e celë qe ne qëhnelö.
30 Nge eni a qaja hnyawa koi nyipunie laka, tha tro kö a patre la xötre celë, nge tha pane traqa kö la itre ewekë cili.
31 Nge maine troa patre la hnengödrai memine la fen, ngo tha tro kö a gufa la itre trengewekëng.
32 “Ngo ame göi drai me hawa, pëkö ka atre, thatre kö la itre angela ne hnengödrai, nge goi thatre fe la Nekön, ngo Keme hi.
33 Haawe, goe jë nge hmeke ju, ke thatre kö nyipunieti la ijine hna sa.
34 Ceitune lai memine la ketre trahmanyi ka tro gaa nany, me pane acile la itre hlue i nyidrë hune la hnalapa i nyidrë, me isa ahni huliwa i angatr. Nge nyidrëti a upe ju la atre thupë qëhnelö tro pala hi angeic a catre hmek.
35 Qa ngöne lai, hmeke jë, ke thatre kö nyipunie la drai ne traqa la atrekë hnalapan, maine e hej, maine e hnenyipajidr, maine qëmekene la kaqa ne lai, maine e hmahmakany.
36 Matre e traqa ju nyidrë, tha tro kö nyidrëti a öhnyi nyipunieti a meköl.
37 Ngo ame la hnenge hna qaja koi nyipunie, ketre eni fe a qaja koi nöjei atr asë: Catre jë hmek.”
Itre mekun ecahu fen
^ Maine, “Oliv.”
^ Maine, “xomihni.”
^ Wange ju la HQP.
^ Maine, “hmejieng.”
^ Maine, “xöle hmaca la itre drön.”
