Mareko 14:1-72
-
Itretre huuj a thele troa humuthi Iesu (1, 2)
-
Oel ka pui lolo hna nenge hui Iesu (3-9)
-
Iudra a salemë Iesu (10, 11)
-
Paseka tixenuë (12-21)
-
Kola xötrei acile la Xeni Heji Ne La Joxu (22-26)
-
Qaja koi Peteru laka, tro angeic a hmahmae Iesu (27-31)
-
Iesu a thith e Gethesemane (32-42)
-
Kola xolouthi Iesu (43-52)
-
Ikootrë qëmekene la Hnakootr Ka Tru i Angetre Iudra (53-65)
-
Peteru a hape, thatre Iesu kö angeic (66-72)
14 Enehila, lue drai pe hi matre feetëne jë la Paseka, me itre Falawa Ka Pë Levenen. Nge itre tane i angetre huuj, me itretre cinyihan a thele jëne troa xolouthi Iesu, me traa thethi* nyidrë, me humuthi nyidrë.
2 Ngo öni angatr: “Tha tro kö a kuca lai ngöne la ijine feet, wanga icilekeu pi la ka ala nyim.”
3 Nge ame hë la Iesu a xeni* e Bethania ngöne hnalapa i Simona, lo ka lepera, traqa pi hi la ketre föe memine la neköi butei oel ka pui lolo, nyipi narado* ka tru thupene catr. Eahlo a fe pi la neköi butei, me nyiqaane nei oelene la he i nyidrë.
4 Ngo hetre itre xan e cili ka tha madrine kö, matre angatr a nyiqaane ihnyingënekeune ka hape: “A hnauëne la kola aluzine la oel ka pui lolo?
5 Ke maine ju, troa salemëne lai koi 300 lao drenari,* matre thue maniene la itre ka pë ewekë!” Nge angatr a wesitre catr koi eahlo.*
6 Öni Iesu jë hi koi angatr: “Nue eahlo pi, nyipunieti a ajolë eahlo fë nemen? Ka lolo hi la hna kuca hnei eahlo koi ni.
7 Ke ce nyipunieti pala hi me itre ka pë ewekë, matre ijiji nyipunieti pala hi troa xatua angatr, ngo ame ni, ka tha tro kö ni a lapa palua me nyipunie.
8 Ase hë eahlo kuca la hnei eahlo hna atrein; nge ame la eahlo a köle la ngönetreing hnei oel ka pui loi, eahlo hi lai a hnëkën troa kelemi ni.
9 Matre eni la a qaja hnyawa koi nyipunie laka, ame asë hi la itre götran ne la fen hna troa cainöjëne la maca ka loi, tro fe a hane qaja la hnei eahlo hna kuca nyine amekunën.”
10 Ame hna tro pi hnei Iudra Isakariota, ketre ne lo ala Truelof, kowe la itre tane i angetre huuj matre troa salemë Iesu koi angatr.
11 Ame ju hi la angatr a drenge la hnei angeic hna qaja, madrine ju hi angatr, nge sisinyi jë hi angatr troa hamë angeic la itre mani sileva. Matre qaane ju hi lai, angeic a thele ijine jë troa nue Iesu koi angatr.
12 Ame ngöne la pane drai ne la itre Falawa Ka Pë Levenen, lo drai ne humuthe la öni göi Paseka, önine la itretre dreng koi nyidrë ka hape: “Nyipëti a ajane tro huni a hnëkën ekaa matre tro nyipëti a xeni la Paseka?”
13 Nyidrëti a upe pi la lue atre dreng me hape: “Tro jë kowe la traon, nge e cili, tro epon a öhne la ketre trahmanyi ka ajö trengene tim, xötrethenge angeice jë.
14 Nge e lö hë angeic kowe la ketre uma, hape jë kowe lai atrekë uman ka hape: ‘Önine la Atre Ini: “Ekaa la hnahag hnë tro ni me itretre dreng a xeni la Paseka?” ’
15 E cili, tro angeic a amamai epon la ketre hnahag ka tru e koho hun, ka hetre alien nge hna hnëkëne hë. Haawe, hnëkëne jë hë la Paseka.”
16 Ame hna tro ju hnene la lue atre dreng, me lö kowe la traon, me öhne asë thenge lo hnei nyidrëti hna qaja koi nyidro, matre nyidroti a hnëkëne jë la Paseka.
17 Nge e heji hë, nyidrëti a traqa pi memine lo ala Truelof.
18 Nge ame hë la angatr a ce elë troa xen, öni nyidrë: “Nyipici, eni a qaja hnyawa koi nyipunie laka, tro la ketre e nyipunie ka ce xeni me eni, a salemë ni.”
19 Ame hna akötrëne ju la itre hni angatr, matre angatr a isa hnyinge ju koi nyidrë me hape: “Tha eni kö, eje hi?”
20 Sa jë hi Iesu koi angatr ka hape: “Angeic la ketre ne la ala Truelof, atre ce li im me eni hnine la kape celë.
21 Nyipici, kola ha tro la Nekö i Atr, tune lo hna cinyihane göi angeic. Ngo ekölö hi ni pe lai atre salemëne la Nekö i Atr! Loi ju kö ekö e tha hna hnahone la atre cili.”
22 Nge angatre pala kö a xen, ame hnei nyidrëti hna xome la ketre falawa, me thith, me thupathupa, me hamëne koi angatr, me hape: “Xome jë, ke celë hi hatrene la ngönetreing.”
23 Nge nyidrëti a xome pi la ketre neköi ver me thith, me hamëne kowe la itretre dreng, ame hnei angatr asë hna isa ij.
24 Nge öni nyidrëti koi angatr ka hape: “Celë hi ‘madra ne isisinyikeu,’ madrang hna neng thatraqane la ka ala nyim.
25 Nge eni hi la a qaja koi nyipunie, tha tro hmaca kö ni a iji la waina celë, uti hë la tro ni a ce iji hmaca me nyipunie ngöne la Baselaia i Akötresie.”
26 Haawe, ase jë hi angatr nyima,* angatr a elë jë kowe la Wetr Elaio.*
27 Iesu a qaja jë koi angatre ka hape: “Tro asë hi nyipunieti a kei, ke ase hë cinyihane ka hape: ‘Tro ni a lepe la atre thup, nge tro ha isa ije la hnënge mamoe.’
28 Ngo e mele hmaca ha ni, tro ni a tro pa hui nyipunie Galilaia eë.”
29 Ngo öni Peteru jë hi ka hape: “Maine tro asë hi angatre la a nue triji nyipë, ngo tha eni fe kö.”
30 Öni Iesu: “Nyipici, eni a qaja hnyawa koi eö, ngöne la jidri celë, qëmekene troa alua kukahleke la trotro, tro eö a akönia qaja ka hape, thatre ni kö hnei eö.”
31 Ngo pi hune kö angeic, me hape: “Maine tro ju hë ni a ce meci me nyipë, ngo tha tro jë pi kö ni a qaja tune lai göi nyipë.” Ame hnene la itre xan hna qaja tune mina fe.
32 Angatr a traqa pi kowe la ketre götran hna hën ka hape, Gethesemane. Matre, öni nyidrëti jë hi kowe la itretre dreng ka hape: “Lapa ju e celë, matre tro ni a pane thith.”
33 Nge nyidrëti a xomi Peteru jë, me Iakobo, me Ioane. Ame hnei nyidrëti hna hnehengazo me xou.
34 Matre öni nyidrëti jë hi koi angatre ka hape: “Hace catre la hning,* nge kösë eni ha troa mec. Pane lapa ju nyipunieti e ce, nge catre jë hmek.”
35 Nge nyidrëti a pane ananyi angatre ju, me sa iwatingöne ca, me thith, me sipon maine ijije tro la hawa celë a nanyi qaathei nyidrë.
36 Matre öni nyidrë: “Abba* Kaka, pëkö ewekë hna thatreine kuca hnei nyipë; epi ananyine qaatheng la vere celë. Ngo tha thenge kö la ajang, ngo aja i nyipëti pe.”
37 Ame hë la nyidrëti a bëek, traqa ju hi nyidrëti a öhnyi angatr a meköl, matre öni nyidrëti jë hi koi Peteru ka hape: “Simona, eö a meköl? Thatreine kö eö troa ce hlë me eni koi ca hawa hi?
38 Hmeke jë nyipunie, nge catre jë thith, matre tha tro kö a hane tupathi nyipunie, ke canga ajane* hi la hni, ngo kucakuca pe la ngönetrei.”
39 Nyidrëti a tro hmaca pi me thith, nge casi pala hi la sipo i nyidrë.
40 Nge traqa hmaca pi nyidrë a öhnyi angatr a meköl, ke pi meköle catr angatr, matre pëkö nyine tro angatr a sa koi nyidrë.
41 Nyidrëti a akönia tro hmaca pi koi angatr me hape: “Nyipunieti pala kö a mano me meköl ngöne la hawa celë, loi ju hë! Easenyi hë matre nue pi la Nekö i Atr kowe la ime ne la itre ka ngazo.
42 Mejë jë, nge tro. Ke hanawang! Calemi hë la atre salemë ni.”
43 Nyidrëti pala kö a ithanata nge xulu pi hi Iudra, lo ketre ne lo ala Truelof, a kola ce traqa memine la ka ala nyim fë la itre hele me göjia. Hna upi angatr hnene la itre tane i angetre huuj, me itretre cinyihan, me itre qatre ne la nöj.
44 Hnene la atre isalemë hna hamëne la ketre hatrene koi angatr, me hape: “Ame la atr hnenge hna troa idrem memin, angeice hi lai. Xolouthi angeice ju, nge thupëne hnyawa kö matre tha tro kö angeic a kötr.”
45 Iudra a tro meköti jë koi Iesu me hape, “Rabi!” Ame hnei angeic hna dremi nyidrëti jë.
46 Angatr a xolouthi nyidrëti ju, me othi nyidrë.
47 Nge hnene la ketre ka cil ezin, hna hule la taua i angeic, me lepe la hlue ne la atre huuj ka sisitria, me thupa la ihnangenyë i angeic.
48 Iesu a qaja jë koi angatr ka hape: “Atrekënö ni matre nyipunieti a traqa fë taua me jia troa xolouthi ni?
49 E nöjei drai, ce eni pala hi lo me nyipunie, nge eni a hamë ini ngöne la uma ne hmi, ngo tha xolouthi ni hi hnei nyipunie. Ngo kolo hi lai matre, eatre jë lo Itre Hna Cinyihan.”
50 Ame hnene la itretre dreng asë hna isa kötr, me nuaxöji nyidrë.
51 Ngo hnene la ketre nekö trahmanyi ka heetrëne hi la ketre sine mano lino hna xötrethenge nyidrë, nge itre atr a thele jëne troa xolouthi angeic,
52 matre angeic a nue pi la sine mano lino hutrö i angeic, me nyinyape xöe.*
53 Nge hnene la ka ala nyimu hna tro sai Iesu kowe la atre huuje ka sisitria, nge itre tane i angetre huuj, me itre qatre ne la nöj, me itretre cinyihan a icasikeu.
54 Hnei Peteru hna xötrethenge angatr qa gaa nany, uti hë ngöne la götran gaa pë ihakun hnine la hnalapa ne la atre huuje ka sisitria; matre Peteru a nango lapa ju memine la itre hlu, me hleng ezine eë.
55 Nge hnene la itre tane i angetre huuj memine la itre atrene la Hnakootre Ka Tru i Angetre Iudra, hna thele troa atë la thoi hui Iesu, göi troa humuthi nyidrë. Ngo pëkö hnei angatre hna öhn.
56 Ngacama ala nyimu la itretre atë la thoi ngo isazikeu kö la hnei angatr hna qaja.
57 Nge hetre itre xan ka cil me silitrengathoi nyidrë, me hape:
58 “Drenge hi eahuni lo angeic a qaja ka hape, ‘Tro ni a thë trije la uma ne hmi hna xup hnei wanakoim, me acil hmaca ngöne la köni drai la ketre, ngo tha hna kuca kö hnei wanakoim.’ ”
59 Ngo e cili fe, isazikeu pala hi la hnei angatr hna qaja.
60 Ame hnene la atre huuje ka sisitria hna mejë nyipi angatr me hape: “A pëkö nyine tro eö a sa? Nemene la hnei nyidroti la hna qaja göi eö?”
61 Ngo tha ewekë pi kö Iesu, matre önine la atre huuje ka sisitria koi nyidrë ka hape: “Eö hi la Keriso, lo Nekön ne la Akötresie Ka Hmitrötr?”
62 Sa jë hi Iesu ka hape: “Eni hi; nge tro hë nyipunieti a öhne la Nekö i Atr a lapa ngöne la götrane maca ne la Akötresie ka men, me traqa hune la itre iaw ne hnengödrai.”
63 Ame hnene la atre huuje ka sisitria hna kuie zezenyi la iheetre i angeic, me hape: “Nyine ue hmaca la troa hetre atre anyipicin?
64 Nyipunieti hi lai a drei angeic e qaja angazo Akötresie. Nemene fe la mekuna i nyipunie?” Ame hnei angatr asë hna amekötine ka hape, meci la pune koi nyidrë.
65 Nge itre xan a hnyijuëne jë la iqëmeke i nyidrë, me thunge la luemeke i nyidrë, me faitrë nyidrë, me hape: “Öi perofetane jë!” Nge thupene la hna xe nyidrë, hnene la itretre thup hna xomi nyidrë.
66 Nge Peteru pala hi ngöne la götran e hnin gaa pë ihakun, ame hna traqa pi la ketre hlu ne la atre huuj ka sisitria, ketre nekö jajiny.
67 Ame la kola öhnyi Peteru e hleng ezine eë, angeic a goeë Peteru hnyawa ju me hape: “Ce eö hi lo me Iesu, lo atre Nazareta.”
68 Ngo thoi ju hi Peteru me hape: “Thatre angeice kö ni, nge ketre tha trotrohnine kö ni la hnei eö hna qaja.” Ame hnei angeic hna tro pi kowe la hnë lö.
69 Nge e cili, hnene hmaca lo lai hlu hna öhnyi angeic, me qaja kowe la itre ka cil e cili, ka hape: “Angeice hi la ketre e angatr.”
70 Ngo thoi hmaca ju hi Peteru. Nge thupene la ketre hnepe ijin, hnene la itre ka cil e cili hna qaja koi angeic ka hape: “Nyipici, eö hi la ketre e angatr, ke mama hi ka hape, atre Galilaia fe eö.”
71 Ame hnei angeice hna sisinyi jë me ieji, me hape: “Thatre kö ni lai atr hnei epuni hna ithanatan!”
72 E cili, alua kukahleke jë hi la trotro, matre mekune hmaca jë hi Peteru lo hnei Iesu hna qaja koi angeic ka hape: “Qëmekene troa alua kukahleke la trotro, tro eö a akönia qaja ka hape, thatre ni kö hnei eö.” Ame hnei angeic hna treije hleuhleu.
Itre mekun ecahu fen
^ Maine, “nyinyithiina.”
^ Maine, “elë troa xen.”
^ Ame la narado, tre, ketre iengen. Nge ka pui lolo la itre waan ej me ngön ej.
^ Wange ju la HQP.
^ Maine, “angatr a ithanata catr koi eahlo; maine ithanata akökötreny.”
^ Maine, “nyima ne hmi, salamo.”
^ Maine, “Oliv.”
^ Maine, “u.” Ger., psy·kheʹ. Wange ju la HQP.
^ Hnëewekë qene Heberu maine Arama, kola hape, “Kakati fe.”
^ Maine, “hmala la hni.”
^ Maine, “sine iheetre he fen.”
