Mareko 15:1-47
15 E hmahmakany, hna icasikeu hnene la itre tane i angetre huuj, me itre qatre ne la nöj, me itretre cinyihan, ene la Hnakootr Ka Tru i Angetre Iudra asë, me othi Iesu, me tro sai nyidrë koi Pilato.
2 Ame hnei Pilato hna hnyinge koi nyidrë me hape: “Eö la Joxu i angetre Iudra?” Sa jë hi Iesu ka hape: “Nyipëti kö la ka qaja.”
3 Ngo itre tane i angetre huuj a nyizö nyidrëti göne la nöjei ewekë asë.
4 Ame hnei Pilato hna nyiqaane hnyinge hmaca jë koi Iesu ka hape: “A pëkö nyine tro eö a sa? Goeëne la nöjei ewekë hnei angatr hna qaja göi eö.”
5 Ngo tha sa pi kö Iesu, matre kola sesëkötre hnei Pilato.
6 Nge e nöjei feet, hnei Pilato hna majemine nue la ketre atr hna akalabusine kowe la ka ala nyim, ene la atr hnei angatr hna ajan.
7 Nge ngöne la ijine cili, hna akalabusi Barabasa. Ce angeice lo me itre ka ihumuth ngöne lo kola icilekeu me mus.
8 Ame hnene la ka ala nyimu hna tro koi Pilato, me sipo angeic tune lo hnei angatr hna majemine kuca.
9 Sa jë hi angeic ka hape: “Aja i nyipunieti kö tro ni a nue la Joxu i angetre Iudra?”
10 Ke atre hi Pilato laka, hnei zalu, matre itre tane i angetre huuj a othi Iesu.
11 Ame hnene la itre tane i angetre huuj hna ukune la ka ala nyimu troa sipo Pilato matre tro pe a nue Barabasa.
12 Sa jë hi Pilato ka hape: “Nga tro pë hë ni a uëne lo hnei nyipunieti hna hëne ka hape, Joxu i angetre Iudra?”
13 Sa hmaca jë hi angatr ka hape: “Athipi angeice* ju hune la sinöe!”
14 Ngo öni Pilato hmaca jë: “Ke hnauën? Nemene la ngazo i angeic?” Ngo kolo jë pe ka hape, sue catre hmaca jë angatr, me hape: “Athipi angeice ju hune la sinöe!”
15 Qa ngöne lai, Pilato a thele jë troa amadrinëne la ka ala nyim, me nue Barabasa koi angatr; nge thupene la hna thaucë Iesu, angeic a amekötine jë troa jei faonyi nyidrë hune la sinöe ne iaxösisi.
16 Nge hnene pë hë la itre sooc hna xomi Iesu kowe la götran e hnine la hnalapa i gavena gaa pë ihakun. Nge angatr a acasine ju la itre sooc asë.
17 Nge angatr a heetrë nyidrëti jë la ketre imano ka madra palulu, me ele la ketre korona hna kuca memine la itre ka ithiny, me atë hune la he i nyidrë.
18 Nge angatr a nyiqaane ibozu me nyidrë me hape: “Bozu së, Joxu i angetre Iudra!”
19 Angatr a hna jë la ketre hainy* kowe la he i nyidrë, me hnyijuë nyidrë, me sa iwatingöne ca me thili* koi nyidrë.
20 Thupene la hnei angatr hna pane hnyimasai nyidrë, angatr a unatrije pi la imaano ka madra palulu, me heetrë nyidrëti hmaca lo iheetr ka qea i nyidrë. Ame hnei angatre hna tro sai nyidrë matre troa jei faonyi nyidrë hune la sinöe.
21 Angatr a upe pi la ketre atr ka traqa qa ngöne la itre hlapa, Simona la ëjen, atre Kurene nge keme i Alesanedro me Rufo, troa ajöne la sinöe ne iaxösisi* i Iesu.
22 Ame hnei angatr hna tro sai nyidrëti jë kowe la ketre götran hna hëne ka hape, Gol′go·tha, nge e tro sa ujën, kola hape, “Götrane Ne La Itre Inenatr.”
23 Nge angatr a thele jë troa hamë nyidrëti la waina hna nyi nyikön hnei dröne muro, ngo xele kö nyidrë ma ij.
24 Angatr a jei faonyi nyidrëti jë hune la sinöe, me uthi trikitr* göi troa isa thawa la itre iheetre ka qea i nyidrë.
25 Nge ame hë ngöne la hnaakönine hawa,* angatr a jei faonyi nyidrëti ju.
26 Nge hune la he i nyidrë, hna athipe la ketre hna cinyihan, ene lo kepin matre jele ngazo nyidrëti jë. Kola hape: “Joxu i angetre Iudra.”
27 Nge ezi nyidrëti fe la lue atrekënö, casi ngöne la götrane maca, nge ketre ngöne la götrane mi.
28 ——
29 Nge ame la itre ka tro, angatr a qaja angazo nyidrë, me nangenang, me hape: “Öni eö lo ka hape, tro eö a thëtrije la uma ne hmi me acile hmaca ej ngöne la köni drai,
30 pane amele eö jë, nge uti pi qa ngöne la sinöe ne iaxösisi.”
31 Nge tune mina fe, hnene la itre tane i angetre huuj, me itretre cinyihan hna nyiqaane hnyimasai Iesu, me hape: “Hnei angeic hna amele itre xan, ngo thatreine pe sipu amele angeic!
32 Höö, Keriso, Joxu i Isaraela, ketre uti pi nyipë qa hune la sinöe ne iaxösisi, matre hane jë fe huni öhne me mejiun.” Nge hnene mina fe la lue atrekënö ezi Iesu hna hane qaja angazo nyidrë.
33 Nge qaane la hnaasikisine hawa,* jidri ju hi la nöj asë, uti hë la hnaanaenene hawa.*
34 Nge ngöne la hnaanaenene hawa, sue jë hi Iesu ka hape: “E′li, E′li, la′ma sa·bach·tha′ni?” Nge e tro sa ujën kolo lai a hape, “Akötresie, Akötresinge fe, hnauëne la nyipëti a nue ni?”
35 Ame la kola drenge lai hnene la itre xa ka cil e cili, öni angatr: “Goeën! Angeic a hë Elia.”
36 Ame hnene la ketre e angatr hna nyinyape xome la ketre wene koto, me trapin ngöne waina hna nyinyikön hnei dröne sinöe ka haitr, me amë hune sine sinöe me thue ime i nyidrë. Ngo canga önine jë la itre xane ka hape: “Ke nue pi! Matre wange jë së ka hape, tro kö Elia a hane traqa troa amele angeic.”
37 E cili, Iesu a sue catre hmaca jë, me mec.*
38 Ame hna aca tro kuie zezene pi hi la imaano ne thewe hnahag ne la uma ne hmi, qaane ju hi e koho uti hë e kuhu.
39 Matre ame ju hi la kola öhne la itre ewekë ka traqa ngöne la Iesu a mec, hnene la tane isi ka cil ezin hna qaja ka hape: “Nyipici, Nekö i Akötresieti hi la atre celë.”
40 Nge hetre itre föe ka goeëne lai qa gaa nany, ce angatr me Maria Magadalena, me Maria thine i Iakobo ka Co me Iose, me Salome,
41 itre ka majemine xötrethenge Iesu qaa Galilaia troa xatua nyidrë. Nge ala nyimu fe la itre xa föe, ka ce elë me nyidrë Ierusalema eë.
42 Nge pine laka hnaipajö heji hë, nge drai ne Hnëkë hë, ene la drai qëmekene la Sabath,
43 hna traqa hnei Iosefa atre Arimathea, ketre atr ka hlemu hnine la Hnakootre Ka Tru i Angetre Iudra, nge ka lapa treqene fe la Baselaia i Akötresie. Angeic a tro ju koi Pilato troa sipone la ngönetrei i Iesu.
44 E cili, sesëkötre ju hi Pilato laka, meci fe hë Iesu. Ame hnei angeic hna hëne la tane isi, me hnyingë pengö i Iesu.
45 Haawe, thupene la hna pane hnyinge kowe la tane isi, angeic a nue pi la ngönetrei i Iesu koi Iosefa.
46 Matre Iosefa a pane itöne jë la ketre imaano lino, me autine la ngönetrei Iesu. Angeic a atuthe jë la ngönetrei i nyidrë, me amë hnine la ketre hua hna sin ngöne la git. Thupene lai, angeic pë hë a ukune jë la ketre etë atraqatr kowe la hnë lö.
47 Ngo lapa ju pe hi Maria Magadalena, me Maria thine i Iose troa pane goeëne la hna ami Iesu ngön.
Itre mekun ecahu fen
^ Maine, “jei faonyi angeice pi hune la sinöe.”
^ Maine, “ulë.”
^ Maine, “atrun.”
^ Wange ju la HQP.
^ Maine, “uthi dröne göti.”
^ Kola easenyi koi 9:00 e hmakany.
^ Kola easenyi koi 12:00 e hmakany.
^ Kola easenyi koi 3:00 e hnaipajö.
^ Maine, “kola patre la hna mano.”
