Mareko 2:1-28
2 Itre hnepe drai thupen, nyidrëti a lö jë e Kaperenauma, nge kola iqajakeune ka hape, nyidrëti hë e hnine la hnalapa.
2 Nge ala nyimu catre la itre ka traqa e cili, angatr a ipepetreny, matre goi pë fe göhnë ezine la qëhnelö, nge Iesu a ithanata koi angatr.
3 Hnene la foa lao trahmanyi hna traqa fë koi nyidrë la ketre atr ka thatreine tro.
4 Ngo pine laka, tha ijiji angatre kö troa lö sai angeic meköti koi Iesu ke tru hnei atr, angatr a fe pi la hune uma hmeku i Iesu, me autinyi angeic hune ili.
5 Matre ame hë la Iesu a öhne la lapaun i angatr, öni nyidrëti jë hi kowe la ka wezipo: “Neköng, ase hë nue la itre ngazo i hmunë.”
6 Nge hetre itretre cinyihan ka lapa e cili, angatr a isa mekune ka hape:
7 “Hnauëne la angeic a ithanata tune la? Angeic a pi tru koi Akötresie! Ke drei la ka atreine sei ngazo, ngo Akötresieti casi hi?”
8 Canga atre ju hi Iesu la itre mekun hnei angatre hna lapa fë, matre öni nyidrëti jë hi: “A hnauëne laka, ngazo la itre mekuna i nyipunie?
9 Nemene la ka hmaloi troa qaja kowe la wezipo, ‘Ase hë nue la itre ngazo i eö,’ maine ‘Cile jë, xome jë la ili eö nge tro jë?’
10 Ngo matre tro nyipunie a atre laka, hna aijijëne la Nekö i Atr troa senge la itre ngazo e celë fen—” Nyidrëti a qaja jë kowe lai ka thatreine tro ka hape:
11 “Eni a qaja koi hmunë, cile jë, xome jë la ili hmunë, nge tro jë hë kowe la hnalapa i hmunë.”
12 E cili, angeic a mejë jë, me ajöne trongëne la ili i angeic, me tro qëmekei angatr asë. Ame hna hain hnene la ka ala nyimu me atrunyi Akötresie, me hape: “Eahuni petre hi la a öhn la ewekë ka tun!”
13 Nge ame ngöne la ketre ijine nyidrëti a tro ezine la hnagejë, hnene la ka ala nyimu hna tro koi nyidrë, ame hnei nyidrëti hna nyiqaane ini angatr.
14 Nyidrëti a tro ju, nge öhnyi Levi ju hi nyidrë, lo nekö i Alefaio, kola lapa ngöne la uma ne hle mani. Öni nyidrëti jë hi koi angeic ka hape: “Xötrethenge ni jë.” Haawe, mejë jë hi angeic troa xötrethenge nyidrë.
15 Thupene lai, nyidrëti a xeni* ju ngöne la hnalapa i Levi. Nge ala nyimu la itre ka hle mani, me itre ka kuca la ngazo, ka ce xeni me Iesu me itretre dreng, ke ala nyimu thei angatr ka xötrethenge nyidrë.
16 Ngo ame hë la kola öhne hnene la itretre cinyihan ne la itre Faresaio laka, Iesu a ce xeni me itre ka hle mani, me itre ka kuca la ngazo, hnyinge jë hi angatre kowe la itretre drenge ka hape: “Angeice la a ce xeni me itre ka hle mani me itre ka kuca la ngazo?”
17 Drenge ju hi Iesu, ame hnei nyidrëti hna sa ka hape: “Tha nyipi ewekë kö la droketre kowe la itre ka egöcatr, ngo koi itre wezipo. Nge celë hi matre eni a hëne la itre ka ngazo, ngo tha itre ka meköti kö.”
18 Itretre drei Ioane me itre Faresaio mina a tha xen, matre angatr a traqa pi troa hnyinge koi Iesu me hape: “Hnauëne laka, itretre drei Ioane me itre Faresaio a tha xen, nge tha hane kö kuca tun hnei itretre drei nyipë?”
19 Nge Iesu a sa koi angatr ka hape: “Hapeu, tro kö la itre sinee ne la atre faipoipo a hleuhleu, nge ce angatre pala kö memine la atre faipoipo? Ame la ijine angatre pala kö memine la atre faipoipo, tha ijine tro kö lai a tha xen.
20 Ngo tro kö a traqa la drai ne troa xomi angeic qaathei angatr, nge e cili hi la ijine tro angatr a tha xen.
21 Pëkö atr ka cane la sine imaano ka hnyipixe hune la iheetre hnapan, ke e traqa ju kuca tun, tro lai ka hnyipixe a tha zezen la hnapan, nge troa tru catre la hna azezenyin.
22 Ketre tune mina fe kowe la waina ka hnyipixe, pëkö atr ka troa amë ej hnine la trengene* hnapan, ke e troa tun, tro la waina a akaqane lai trengen, nge troa ce luzi la waina me trengen. Ngo hna amë la waina ka hnyipixe hnine la trengene ka hnyipixe.”
23 Ame ngöne la nyidrëti a tro nyipine la ketre hlapa ngöne la drai Sabath, hnene la itretre drei nyidrë hna nyiqaane ukekëthe la itre wene qitr, me xeni trootro.
24 Matre önine la itre Faresaio koi nyidrë ka hape: “Hanawang! Itretre drei eö a kuca la ewekë hna wathebon e Sabath.”
25 Sa jë hi nyidrë ka hape: “Tha hane kö nyipunieti e lo hna kuca hnei Dravita, lo angeic a aja ixatua, ngöne lo angeic me itre sinetronge i angeic a mecijiin?
26 Memine lo hna qaja hnei Abiathara, tan i angetre huuj laka, hnei Dravita hna lö hnine la uma i Akötresie, me xeni la itre areto* nyine amaman koi Akötresie, me hamëne kowe la itre atr i angeic, ngo ewekë hna wathebone koi nöjei atr, ke thatraqai itretre huuj hmekuj?”
27 Nge öni Iesu hmaca jë koi angatre ka hape: “Hna kuca la Sabath thatraqane la atr, ngo tha hna kuca kö la atr thatraqane la Sabath.
28 Ke Nekö i Atre fe la Joxu ne la Sabath.”
Itre mekun ecahu fen
^ Maine, “saath aqeany.”
^ Ger., “hna kuca hnei kupeine öni.”
^ Maine, “falawa ka lapa kötr.”
