Mareko 3:1-35
3 Nge lö hmaca jë hi Iesu kowe la sunago, nge e cili fe la ketre atr ka fitre* im.
2 Nge itre Faresaio a goeë tili Iesu, me thupën ka hape, tro jë kö nyidrëti a aloine lai atr ngöne la drai Sabath, matre troa nyizö nyidrë.
3 Nyidrëti a qaja jë kowe la atr ka fitre im ka hape: “Mejë jë, nge cile pi e cahu nyipin.”
4 Nge öni nyidrëti koi angatr: “Hapeu, meköti kö troa kuca la loi maine ngazo ngöne la drai Sabath, nge meköti kö troa amelen* maine humuthe pena?” Pëkö ca ka sa.
5 Matre, thupene la hnei nyidrëti hna pane goeën xötreithi angatr, hace ju hi la hni i nyidrë pine laka, ka xeti la itre hni i angatr. Öni nyidrëti jë hi kowe lai atr: “Sathe pi la ime i hmunë.” Angeic a sathe pi, ame hna loi pi.
6 E cili, hnene la itre Faresaio me itre sine xöle i Herodra hna canga lö pi qa lai, me ce ithanatan troa humuthi nyidrë.
7 Nge Iesu me itretre drei nyidrë a tro jë kowe la hnagejë, nge hanawang, kola xötrethenge angatr hnene la ka ala nyimu, angetre Galilaia me Iudra.
8 Nge hetre angetre Ierusalema, me Idumea, me angetre Ioridrano götrane koië, me angetre easenyin e Turo me Sidona. Ala nyimu catre la itre ka traqa, ke drei mejene hë angatr la itre ewekë hnei nyidrëti hna kuca.
9 Nge Iesu a upe jë la itretre dreng tro pala hi a hnëkën amë la ca neköi he, matre tha tro kö la itre atr me nyidrë a ipepetreny.
10 Nge pine laka, hnei nyidrëti hë hna aloine la ka ala nyim, hnene la itre atr ka tru mecine hna icacaxenyi me ipepetrenyi xötreithi nyidrë, göi troa ketri nyidrë.
11 Nge ame fe lo itre hna löthe hnei dremoni, ame la angatr a öhnyi Iesu, angatr a sa iwatingöne ca ju qëmeke i nyidrë, me qaja catrëne ka hape: “Nyipëti hi la Nekö i Akötresie.”
12 Ngo hnei Iesu hna anyimua wathebone kowe la itre dremoni troa qaja amamane ka hape, drei nyidrë.
13 Nyidrëti a elëne jë la ketre wetr, me hëne la itre xa atre drei nyidrë, nge angatr a tro ju koi nyidrë.
14 Nge nyidrëti a iëne ju la ala 12, me hë angatr, itre aposetolo. Itre ka xötrethenge nyidrë, nge hna upe troa cainöje trootro
15 me helëne la itre dremoni.
16 Nge ame la ala 12 hnei nyidrëti hna iën tre, Simona, lo hnei nyidrëti hna ati ëjen, Peteru,
17 me Iakobo lo nekö i Zebedaio me Ioane trejine me angeic (hnei Iesu fe hna ati ëje i nyidro ka hape, Boanerege, kola hape, “Nekö Ne La Hedreng”),
18 me Anederea, me Filipo, me Batolomaio, me Mataio, me Toma, me Iakobo nekö i Alefaio, me Thadaio, me Simona atre Kanana,*
19 me Iudra Isakariota, lo atre troa salemë Iesu.
Ame hnei Iesu hna lö kowe la ketre uma,
20 nge hnene hmaca kö la ka ala nyimu hna itronyi e cili, matre tha xeni ju kö Iesu me itretre dreng.
21 Ame hë la kola drenge lai hnene la itre atrene la hnepe lapa i nyidrë, angatre hi lai a tro ju troa xomi nyidrë, ke öni angatr: “Hmo hë angeic.”
22 Nge önine la itretre cinyihan ka traqa qaa Ierusalema ka hape: “Hna löthi angeic hnei Belezebuba,* nge angeic a helëne la itre dremoni jëne la tan ne la itre dremoni.”
23 Nyidrëti a hë angatre jë, me ithanata koi angatr jëne la itre ceitun, me hape: “Tro Satana a helë Satana tune kaa?
24 Maine tro la ketre baselaia a icilekeu me angeice kö, tro hë eje lai a patr;
25 nge maine tro la ketre hnalapa a aisan eje kö, tha tro hë eje lai a cile hut.
26 Nge maine tro Satana a icilekeu me angeice kö, tha tro hë angeice lai a cil, ke pune hë lai koi angeic.
27 Eje hi, pëkö atre ka atreine troa lö kowe la uma ne la atre catr, me atrekënö la itre mo i angeic, e tha pane othe kö la atre cili. Nge e ase hë, ijije hë troa eöth asë la aliene lai uma.
28 Nge eni a qaja hnyawa koi nyipunie laka, troa köletrij la nöjei ngazo ne la itre nekö i atr, ngacama kuca ju hë angatr la nöjei ngazo, nge qaja ju hë angatre la nöjei ithanata ka ngazo.
29 Ngo ame la atre qaja angazone la uati hmitrötr, tha nyine tro kö a köletrije la ngazo i angeic, nge uti hë epine palua la zö i angeic.”
30 Iesu a qaja lai ke öni angatre lo: “Hna löthi angeic hnei u ka ngazo.”
31 Ame hna traqa pi la thine i nyidrë me itre trejin me nyidrë, nge angatr a cile ju e kuhu trön. Angatr a upe jë la ketre troa lö, me hë Iesu.
32 Nge kola ilapanyi la ka ala nyimu xötreithi nyidrë, nge öni angatr: “Hanawange la thine i nyipë me ha jini nyipë e kuhu qëhnelö, angatr a ajane troa ithanata me nyipë.”
33 Ngo sa jë hi Iesu ka hape: “Ke drei la thineng me itre trejin me eni?”
34 Nyidrëti a goeëne jë xötreithi nyidrë me hape: “Hane hi la thineng, me itre trejin me eni!
35 Ame la atre kuca la aja i Akötresie, angeice hi la trejin me eni, me xang, me thineng.”
Itre mekun ecahu fen
^ Maine, “ka genyi im.”
^ Maine, “u.” Ger., psy·kheʹ. Wange ju la HQP.
^ Maine, “ka polepol.”
^ Ketre aqane hë Satana.
