Mareko 4:1-41
4 Iesu pena a hamë ini ngöne la ngönegejë. Nge traqa pi hi la ka ala nyimu koi nyidrë, matre nyidrëti a elë jë me lapa hune la neköi he me ananyine la ngönegejë, nge cile ju pe hi itre atr e cili.
2 Nyidrëti a nyiqaane ini angatr jëne la itre ceitun, nge ame la nyidrëti a hamë ini, öni nyidrë:
3 “Drenge ju, hanawange la ketre atre tra feja, angeic a tro pi troa jumi feja.
4 Nyiqaane jume pi hi angeic la itre feja, nge mala pi hi itre xan e kuhu gojeny, ame hna sasa hnei itre waco.
5 Itre xan a mala hune la dro ka tëtë, ame hna canga cia pi itre ej, ke tha hmeköni kö la dro.
6 Ngo mejë jë hi la jö a dreuth, ame hna fitre pi, ke pëkö iwaan.
7 Nge hetre itre xane ka mala nyipine la itre ka ithiny, ame hna cia thahe la itre feja hnene la itre ka ithiny, ene pe, tha wa wene ju kö.
8 Nge hetre itre xa feja ka mala ngöne la gaa hmelek, ame hna cia jë me wa wen, kösë a 30 hmaca la etrune lo itre feja hna jum, nge 60 la ketre, nge 100 la ketre.
9 Haawe, ame la atr trene hnangenyë troa dreng, drenge ju.”
10 Ame hë la Iesu a lapa cas, hnene lo ala truelof hna easenyi nyidrë me hnyingë pengöne lo itre ceitun.
11 Öni nyidrë: “Hnei Akötresie hna aijijë nyipunie troa trotrohnine la ini ka hmitrötr nge hna juetrën göne la Baselaia i Akötresie, ngo koi angatr, eni a ithanata jëne ceitun.
12 Ke ngacama goeëne ju hë angatr, ngo tha öhne kö, nge drenge ju hë angatr, ngo tha drenge hnyawa kö me trotrohnine la alien; nge goi tha ujë fe, matre tro Akötresieti a nue la ngazo i angatr.”
13 Nge öni Iesu hmaca jë hi: “Tha trotrohnine kö nyipunieti la ceitune celë, haawe tro nyipunieti a trotrohnine tune kaa la itre xan?
14 “Hnene la atre jumi feja hna jume la trengewekë i Akötresie.
15 Ngazo pe, hetre itre atr ka ceitu memine lo itre feja hna jum e kuhu gojeny, laka, ame ju hi la angatr a drenge la maca, traqa pi hi Satana a fejetrij lai maca hna jum.
16 Nge ceitu itre xan me itre ka mala ngöne la gaa tëtë: Ame ju hi la angatr a drenge la maca, saqe hi angatr kapa madrin.
17 Ngo, pëkö iwaan e kuhu hni angatr, matre tha cile huti ju kö ngöne la kola traqa la itupath me iaxösisi pine la maca, ame hna canga kei pi angatr.
18 Nge hetre itre xan ka mala nyipine la itre ka ithiny. Angatre hi lo itre ka drenge la maca,
19 ngo hna thahe la maca hnene la itre ewekë hna hnehengazone ngöne la fene celë,* memine la trenge iaö ne la mani, me nöjei pengöne aja, ene pe, tha wa wene pi.
20 Nge ame pë hë lo feja ka mala ngöne la gaa hmelek, tre kolo itre ka drenge me kapa madrin la maca, ame hna wa wene pi, kösë a 30, me 60, me 100 hmaca kö la etrune hune lo itre feja hna jum.”
21 Öni Iesu hmaca jë hi: “Tha hna traqa fë kö la laame cil matre amë fene itrengen,* maine fene ili pena, eje kö? Ngo hapeu, tha hna traqa fë kö nyine atë hune la ita ne laam?
22 Matre, pëkö ewekë ka sihngödr ka tha tro kö a hane mama, nge pëkö ewekë hna juetrën ka tha tro kö a mama.
23 Haawe, ame la atr trene hnangenyë troa dreng, drenge ju.”
24 Öni Iesu hmaca jë hi: “Wange pala kö la itre hnei nyipunieti hna dreng. Ke ame la tulu hnei nyipunieti hna tuluth, tre tro pena ha a tuluthe tun koi nyipunie, nge eje hi, tro fe a hane nyixane koi nyipunie.
25 Matre ame la atr ka hetrenyi hë la trotrohnin, tro hmaca kö a nyixane la trotrohnine i angeic, matre mana pi la trotrohnine thei angeic. Ngo ame kowe la atre pë trotrohnin, tre tro ha xome la hnepe trotrohnin ka eje thei angeic.”
26 Öni nyidrëti hmaca jë: “Ceitune la Baselaia i Akötresie memine la ketre atr ka traane la itre feja ngöne la hlapa i angeic.
27 Angeic a meköl e jidr, me hlë e lai, nge kola fetra me tru trootro la itre qitr, nge thatre pe angeice la aqane trongen.
28 Nge hnadro a aciane xanëne la xen, pa i zin, thupene lai, kola eng, ame hna macaje pi la qitr.
29 Nge e hmedre hnyawa ha, angeic a thupa la qitr, ke ijine menu hë.”
30 Öni Iesu fe: “Troa aceitunëne me nemene la Baselaia i Akötresie, maine nemene la ceitun hna troa xom nyine qejepengön ej?
31 Ceitu memine la itine sinapi* laka, ame lo kola jum ej hune ihnadro, eje hi la ka co ne la nöjei itin asë.
32 Ngo e cia ha, tru hmaca ju kö ej hune la itre xa feja, nge draië la itre wapicin, ame hna traqa pi la itre waco ne hnengödrai troa lapan la gaa xapo ne ej.”
33 Haawe, nyimutre pi hë la itre ceitun ka tune lai hnei nyidrëti hna hamëne koi angatr, thenge la hnei angatr hna isa atreine trotrohnin.
34 Eje hi laka, hnei nyidrëti pala hi hna ithanata koi angatr jëne la itre ceitun, ngo hnei nyidrëti pë hë hna qejepengön acon kowe la itretre drei nyidrë.
35 Nge e hejiheji hë, öni Iesu koi angatr: “Tro së kowe la ketre ngönegejë.”
36 Nge thupene la hnei nyidrëti hna upe la ka ala nyim, itretre dreng a canga xomi nyidrëti jë kowe la neköi he, nyipine la itre xa neköi he.
37 Ngo aca tro hnahna ju hi la janacas, ame hna kaca trane pi la neköi he, matre kola ha troa lö.
38 Nge Iesu a meköle fë itanehe ngöne la pune la he. Matre angatr a ahlë nyidrëti jë me hape: “Atre Ini fe, tha hnehengazone fe kö nyipë laka, ka tro hë së la a mec?”
39 E cili, canga mejë jë hi nyidrë me catrëne la enyi me hnagejë, öni nyidrë: “Humu ju! The ilu kö!” Ame hna lapa kötre pi la eny, nge haodrai pi hi.
40 Öni nyidrëti jë hi koi angatr ka hape: “Hnauëne la nyipunieti a xou? Tha lapaune pala kö nyipunie?”
41 E cili, angatr a xou catre jë, me ihnyingënekeune ka hape: “A drei nyidrëti la matre kola drei nyidrë hnene la hnagejë me eny?”
Itre mekun ecahu fen
^ Maine, “hneijin.”
^ Maine, “nyine tulu.”
^ Ger., siʼna·pi, maine moutarde qene wiwi, tre ketre feja.
