Mareko 5:1-43
5 Thupene lai, xepe jë hi angatr ngöne la ketre götrane la hnagejë hna hape, Gadara.
2 Nge ame ju hi la Iesu a uti qa hune la neköi he, xulu pi hi qa ngöne la itre hua* la ketre atr hna löth hnei dremoni troa ixelë me nyidrë.
3 Angeic a lapa ngöne la hnë kele wezipo, nge uti pala hi enehila, ngacama ceinë angeice ju hë, ngo pëkö ka atreine troa othe huti angeic.
4 Ke anyimua othe la lue ca me lue ime i angeic hnei cein, ngo hnei angeice pala hi hna ce hutra, ene la otrene lue ca me lue im. Nge pëkö ka atreine xolouthi angeic.
5 Nge e lai me jidr, angeice pala hi a sue draië nyipine la itre hua, me hune la itre wetr, me sipu thupathupa la ngönetrei angeice hnei etë.
6 Ngo ame ju hi la angeic a öhnyi Iesu qa gaa nany, nyinyape pi hi angeic, me sa iwatingöne ca qëmeke i nyidrë.
7 Angeic a sue catre jë me hape: “Nyipëti a ue e celë, Iesu, Nekö Ne La Akötresie Ka Draië Catr? Sisinyi jë qëmeke i Akötresie ka hape, tha tro kö nyipëti a akötrë ni.”
8 Matre hnei Iesu hna qaja koi angeic ka hape: “He dremoni, lö pi qa lai!”
9 Nge hnyinge jë hi Iesu ka hape: “Drei la ëje i eö?” Öni angeic: “Legeona, ke ala nyimu hun.”
10 Nge angeic a sipo iele jë koi Iesu matre, tha tro kö a helëne la itre dremoni qa ngöne la nöj.
11 Nge ame ngöne la wetr, kola xeni trootro la itro puaka.
12 Matre, sipo jë hi la itre dremoni koi Iesu ka hape: “Upi huni jë kowe la itro puaka, matre tro huni a löthi nyudren.”
13 Iesu a nue angatre pi, ame hnei angatr hna tro ju, me löthe la itro puaka. Nge e cili, nyudreni a sesë pi qa hune la giti kowe la hnagejë, matre traqa koi 2 000 lao puaka ka lö a mec.
14 Nge hnene la itre ka axö öni hna kötr, me qaja trongën la itre ewekë ka traqa ngöne la traon, me itre götran e trön. Ame hna traqa pi la itre atr troa hane wang.
15 Angatr a traqa pi koi Iesu me öhne lo lai trahmanyi hna löth hnei Legeona, angeic hi a nango lapa a ka heetr, nge loi hë la aqane waiewekë i angeic. Ame hna xou ju hnei angatr.
16 Nge hnene lo itre ka öhne la ewekë ka traqa, hna qaja koi angatr la hna kuca kowe lo atr hna löth hnei dremoni, me kowe lo itro puaka.
17 Ame hnei angatre hna upe iele Iesu jë qa lai.
18 Ame hë la Iesu a elë hune la neköi he, hnene lo atr hna löth hna sipo nyidrëti troa ce tro me nyidrë.
19 Ngo tha ajane kö Iesu, ke öni nyidrë: “Tro jë pe kowe la hnalapa i hmunë, me lapa i hmunë, nge qaja ju koi angatr la nöjei ewekë hnei Iehova* hna kuca koi hmunë, memine la aqane utipi hmunë hnei nyidrë.”
20 Haawe, hnene pë hë la atr cili hna nyiqaane cainöjën ngöne la Dekapoli* la nöjei ewekë hnei Iesu hna kuca koi angeic, ame hna hai hnene la itre atr.
21 Ame hmaca ju hi la Iesu a ea kowe la ketre ngönegejë, hnene la ka ala nyimu hna icacaxenyi thei nyidrë, nge nyidrëti pala kö ezine la hnagejë.
22 Nge traqa pi la ketre tane la sunago, Iairo la ëjen, nge ame hë la angeic a öhnyi Iesu, hnei angeic hna kei qëmekene la lue ca i nyidrë.
23 Matre angeic a anyimua sipo nyidrëti jë ka hape: “Wezipo catre hë* la nekönge jajiny. Trohemi troa pane atë la lue ime i nyipë hui nyën, matre egöcatre hmaca jë nyën me mel.”
24 Ame hnei Iesu hna xötrethenge angeic, nge kolo fe a xötrethenge Iesu hnene la ka ala nyimu me pene trongë nyidrë.
25 Nge e cili, traqa pi hi la ketre föe ka neni hni, a 12 hë lao macatre.
26 Tru la akötre i eahlo, ke nyimutre la itre droketre hnei eahlo hna wang, nge tro asë hë la itre mo i eahlo, nge pëkö thangan, ngo kolo jë pe ka hape, jole catre jë.
27 Matre ame hë la eahlo a drenge la hna qaja göi Iesu, eahlo a easenyi nyidrëti ju qa hutrö, nyipine la ka ala nyim, me ketr la iheetre i nyidrë,
28 ke öni eahlo: “Maine tro hi ni a nango ketr la iheetre i nyidrë, tro hë ni lai a mel.”
29 Matre tha neni ju hi la hni eahlo ngöne la ijine cili, nge drenge ju hi eahlo ka hape, mele hë eahlo qa ngöne lai meci ka akötrëne la mele i eahlo.
30 Canga drenge ju hi Iesu la kola tro la mene qaathei nyidrë, matre nyidrëti a goeëne jë la ka ala nyimu xötreithi nyidrë, me hape: “Drei la atre ketr la pune iheetreng?”
31 Ngo sa jë hi la itretre drenge ka hape: “Öhne hi nyipëti la ka ala nyim, angatr a pene trongë nyipë, nge nyipëti a hnying ka hape, ‘Drei la ka ketri ni?’ ”
32 Ngo nyidrëti pala kö a goe xötreith göi troa atre la atre kuca lai.
33 Ame hna xou ju me hmengöhmengön lai föe, ke atre hi eahlo la hna kuca koi eahlo. Matre eahlo a tro ju me sa iwatingöne ca qëmeke i nyidrë, me qaja asë la nyipici koi nyidrë.
34 Öni Iesu jë hi koi eahlo ka hape: “Neköng, mele hë hmunë hnene la lapaune i hmunë. Tro jë, nge the seseu kö, mele hnyawa ha hmunë qa ngöne la meci ka akötrë hmunë.”
35 Iesu pala kö a ithanata, nge xulu pi hi lo itre atr ne la lapa ne lo tane la sunago, me hape kowe lai tan: “Meci hë la nekö i nyipë jajiny! Matre nyine ue hmaca troa ajolëne la Atre Ini?”
36 Nge drenge hi Iesu la hna qaja kowe lo tane la sunago, matre öni nyidrëti koi angeic: “The xoue kö,* ngo lapaune ju.”
37 E cili, tha hnei Iesu hmaca kö hna nue la itre xan troa xötrethenge nyidrë, ngo Peteru hmekuje hi, me Iakobo, me Ioane trejin me Iakobo.
38 Haawe, ame hë la angatr a traqa kowe la hnalapa ne la tane la sunago, öhne jë hi nyidrë la itre atr ka nyi mejen, me itre ka treij me latresi.
39 Nge thupene la hnei nyidrëti hna lö, öni nyidrëti jë hi koi angatr ka hape: “Hnauëne la nyipunieti a treij me nyi mejen? Tha meci kö la nekönatr, nyëne hi la a meköl.”
40 Ame hnei angatre hna hnyimasai Iesu. Ngo ase jë hi nyidrëti upi angatre qaa lai, ce lö jë hi nyidrë memine la keme me thin, me itre sine tronge i nyidrë kowe la hnahage hna amë lai nekönatre ngön.
41 Ame hnei nyidrëti hna ea la ime ne la nekö jajiny, me hape: “Tal′i·tha cu′mi,” kola hape, “Nekö jajiny, mejë jë!”
42 Ame hna canga mejë hnei nyën me tro. (12 lao macatre i nyën.) Nge e cili, angatr a isa hai.
43 Ngo anyimua wathebo* angatr hnei Iesu troa qaja trongëne lai, nge nyidrëti a iupi jë troa ithue a i nyën.
Itre mekun ecahu fen
^ Maine, “hua nyine amekunën.”
^ Wange ju la HQP.
^ Maine, “Treene Lao Traon.”
^ Maine, “easenyi hë matre meci pi.”
^ Maine, “The xoue hmaca kö.”
^ Maine, “qaja catrëne koi angatr.”
