Mareko 6:1-56
6 Nyidrëti a tro pi qa cili me traqa kowe la zi i nyidrë, nge itretre dreng a xötrethenge nyidrë.
2 Ame hë e Sabath, hnei nyidrëti hna nyiqaane hamë ini ngöne la sunago i angatr. Nge ala nyimu thene la itre ka drei nyidrë ka hai me hape: “Qa kaa la itre ewekë cili hnei angeice hna inin? Nge hnauëne laka, hamëne jë koi angeic la inamacane celë, me aijijëne jë la lue ime i angeic troa kuca la itre iamamanyikeu ka tru?
3 Angeice hi lo ka tratrau sinöe, lo nekö i Maria, nge mama i Iakobo, me Iosefa, me Iudra, me Simona, eje hi? Nge tha ce easë kö lo memine la itre xa i angeic?” Ame hnei angatr hna xele ma lapaune koi nyidrë.
4 Nge öni Iesu jë hi ka hape: “Hna atrune pala hi la perofeta ngöne la nöjei jë i angeic, ngo tha hna kepe angeice kö ngöne la zi angeic, me thene la itre sinee i angeic, me ngöne la sipu hnalapa i angeic.”
5 Celë hi matre, tha tru menu kö hnei iamamanyikeu hnei nyidrëti hna kuca e cili, ngo hna ati ime hi, hune la itre xa ka wezipo me aloinyi angatr.
6 Nge Iesu e cili a pane haine la aqane pë lapaune i angatr. Ame hnei nyidrëti hna tro kowe la itre hunahmi ezin troa hamë ini.
7 Nyidrëti a hëne jë lo ala Truelof me upi angatr troa tro isa ala lu, me hamë men koi angatr troa mus hune la itre dremoni.
8 Ame hnei nyidrëti hna wathebo angatr troa xome la ketre ewekë, ngo sine tö hmekuje hi. Tha tro kö a xome trongë falawa, me kemej, me trengene mani,*
9 me lue iheetr,* ngo tro pe a otrë ibutr.
10 Thupene lai, öni nyidrëti hmaca jë koi angatr ka hape: “Nge ame hë la nyipunie a lö kowe la ketre uma, pane lapa ju e cili, uti hë la tro nyipunieti a tro qa lai.
11 Nge ame la nyipunieti a tro qa ngöne la ketre hnalapa maine traon ka tha kepe nyipunie, maine tha drei nyipunie, jumejume pi la dro ne la lue hnatrapaca i nyipunie nyine hatrene koi angatr.”
12 Ame hnei angatr hna tro pi troa cainöj, me ielene la itre atr troa ietra.
13 Angatre fe a helëne la itre dremoni, me köle oelene la itre ka wezipo, me aloinyi angatr.
14 Ame ngöne la ijine cili, hnei Herodra Joxu hna drei mejene lai, ke hlemu catre hë la ëje i Iesu. Nge itre atr a qaja ka hape: “Ma mele hmaca ha Ioane Bapataiso qa hna mec, celë hi matre angeic a atreine kuca la itre iamamanyikeu.”
15 Ngo öni itre xan: “Elia lai.” Nge öni itre xane hmaca kö: “Ketre perofeta hi tune lo itre xa perofeta ekö.”
16 Ngo ame hë la Herodra a drenge lai, öni angeic: “Mele hmaca ha lo Ioane hnenge hna thupa nyinawan.”
17 Hnei Herodra lo hna ikötresai me Herodia, ifënekö i Filipo, trejine me angeic. Matre pi eahlo, hnei angeic hna othi Ioane me akalabusin.
18 Ke hnei Ioane lo hna qaja koi angeic ka hape: “Hnei eö hna eni wathebo la eö a xome la ifënekö ne la trejine me eö!”
19 Ame hnei Herodia hna dreng akötrën, me lapa fë trenge hni, matre eahlo a ajane troa humuthi Ioane, ngo tha ijije pe.
20 Ngo Herodra a xoue Ioane, ke atre hi angeic ka hape, atre ka meköt nge ka hmitrötr, matre angeic a hmekëne matre tro kö a mel hnei Ioane. Nge ame la nöjei ijin angeic a drei Ioane, thatre kö angeic la nyine tro angeic a kuca, ngo pi tro pala hi angeic a drei Ioane.
21 Ngo traqa pi hi la ijin tro Herodia a eatrën lo mekuna i eahlo, kolo ijine fetëne la drai ne hnaho Herodra. Hna traqa itrony la itre atr ka huliwa koi mus, me itre tane sooc, me itre atr ka tru ne Galilaia.
22 Nge hnene la nekö i Herodia jajinyi hna fia me amadrinë Herodra joxu, me itre ka ce xeni* me angeic. Matre önine la joxu kowe la jajiny ka hape: “Qaja jë koi ni la nöjei ewekë hnei hmunë hna ajan, nge tro ni a hamë hmunë.”
23 Eje hi, hnei angeic hna sisinyi koi nyën ka hape: “Ame asë hi la hnei hmunë hna sipone koi ni, tro ni a hamë hmunë, nge uti fe hë la sine la baselaiang.”
24 Ame hnei nyën hna tro ju, me hnyinge kowe la thine i nyën ka hape: “Nemene la nyine tro ni a sipon?” Öni eahlo jë hi: “He i Ioane Bapataiso.”
25 Nyën a canga lö hmaca ju, me tro kowe la joxu, me qaja la sipo i nyën. Öni nyën: “Eni a ajane tro nyipëti a hamë ni, enehila hi, la he i Ioane Bapataiso hune la ketre ipala.”
26 Ame hna hleuhleu hnene la joxu, ngo thatreine hë troa thipetrije la sipo i nyën, ke ase hë angeice lo sisinyi qëmekene la itre hna könën.*
27 Ame hnene la joxu hna canga upe pi la ketre atre thup, me amekötine koi angeic troa traqa fë la he i Ioane ngöne ipala. Matre tro pi la atre thup, me thupa la nyinawa i Ioane ngöne kalabus,
28 me traqa fë kowe lai jajiny, nge nyën koi thine i nyën.
29 Ame hë la kola drenge lai hnene la itretre drei Ioane, angatr a traqa pi troa xome la ngönetrei angeic, me amë hnine hua.*
30 Hnene la itre aposetolo hna traqa itronyi me Iesu, me qaja asë koi nyidrë la itre ewekë hnei angatr hna kuca me qaja.
31 Nge kolo pala hi a traqa me tro hnene la ka ala nyim, matre pëkö ijine kowe la itre aposetolo troa pane xen. Öni Iesu jë hi koi angatr ka hape: “Jë fe nyipunie, nge ce tro jë së kowe la ketre götrane gaa pë atr, matre tro sa pane mano.”
32 Haawe, angatr a ce elë jë hune he, me tro kowe la götrane gaa pë atr.
33 Ngo itre atr a goeë angatr e tro, nge itre xan a drei mejene lai, ame hnene la ka ala nyimu hna tro qaa ngöne la isa traone i angatr, me xötrë ngönegejë matre troa traqa pa kowe la götrane cili.
34 Haawe, ame hë la Iesu a lö qa hnine la he, öhne ju hi nyidrëti la ka ala nyim, ame hnei nyidrë hna utipi angatr, ke ceitu i angatr me itre mamoe ka pë atre thupën. Matre nyidrëti a qaane ju troa ini angatr la itre ewekë ka nyimutre.
35 Ngo e hejiheji hë, hnene la itretre dreng hna easenyi Iesu me hape: “Tha hna lapane kö la götrane celë, nge kola tro nyimenyime la traem,
36 loi e troa upi angatre la kowe la itre traon me hunahmi ka easeny, matre itö a i angatr.”
37 Ame hnei Iesu hna sa ka hape: “Thue a i angatre jë.” Matre öni angatre hmaca: “Nga tro kö huni a xome la 200 drenari* troa itö falawa kowe la itre atr me hamë angatr?”
38 Sa jë hi Iesu ka hape: “Pane wange ju ka hape ije falawa i nyipunie?” Matre, ame ju hi la angatr a öhn, öni angatr: “Faif, nge lue ie fe.”
39 Thupene lai, Iesu a upe jë la ka ala nyimu troa thewe gurup, me lapa hune ihaö.
40 Ame hnei angatr hna thewe gurup, 100 itre xan, nge 50 itre xan.
41 Iesu a xome pi la faifi lao falawa memine la lue ie, me gala draië me thith. Ase jë hi, nyidrëti a thupathupa pi la falawa, me nyiqaane hamëne kowe la itretre dreng, nge angatr a amë ju qëmekene la ka ala nyim. Thupene lai, Iesu a thawa pi la lue ie koi angatr.
42 Ame hnei angatr asë hna isa xeni mej.
43 Nge hna hleme la 12 lao treng munën ka tiqa, nge hetre munëne ie fe.
44 Nge ala 5 000 lao trahmany ka xeni falawa.
45 Thupene jë hi, Iesu a upe panëne jë la itretre dreng troa të hune he, me tro Bethesaida, nge tro pë hë nyidrëti a pane upe la ka ala nyimu kowe la isa hnalapa i angatr.
46 Nge ame hë la Iesu a ase iahni me angatr, nyidrëti a elë jë kowe la ketre wetr troa pane thith.
47 Thupene la kola lö la jö, mama pi hi la he nyipine la hnagejë, nge Iesu pala kö e cili a lapa cas.
48 Nge ame hë la nyidrëti a öhne laka, jole hë kowe la itretre dreng troa galu, ke hnahna catre la eny, nyidrëti a tro ju koi angatr hune tim e hmahmakanyi sine jidr.* Matre kösë nyidrëti hë a troa thipatrë angatr.
49 Öhnyi Iesu jë hi hnene la itretre dreng a kola tro hune tim, ame hnei angatr hna xou atraqatr, me sue ka hape: “E kaka i ni hetre ka iamamanyi koi së!”
50 Nge angatr a isa goeë nyidrë me xou, matre canga öni nyidrëti jë hi: “Catre pi! The xou kö, ke eni hi!”
51 Nyidrëti a elë jë hune la he, ame hna aca tro upu ju la eny. Qa ngöne lai, angatr a isa hai,
52 ke tha trotrohnine kö angatr la aliene lo iamamanyikeu ne la itre falawa, nge jole pala kö kowe la hni angatr troa trotrohnin.
53 Ame hë la angatr a ase nyinyapëne la hnagejë, traqa pi hi angatr e Genesareta, me xep ngöne la ketre götran ka tha nanyi kö qa lai.
54 Ngo ame la angatr a uti qa ngöne la he, wangatrehmekunyi Iesu jë hi hnene la itre atr.
55 Matre itre atr a nyinyapëne jë la nöj, me qaane troa xututhe la itre wezipo hune ili, me tro sai angatr kowe la götran hna dreng ka hape, Iesu ngön.
56 Nge ame ngöne la nöjei hunahmi, me traon, me hne hlapa, itre atr a amë la itre ka wezipo ngöne la hna maketr. Nge itre ka wezipo a sipo Iesu maine ijije tro hi angatr a nango ketre la ipune iheetre i nyidrë. Matre ame la nöjei atr ka ketri nyidrë, loi asë jë hi.
Itre mekun ecahu fen
^ Maine, “kopa.” Ame la qene Wiwi ne “kopa”, tre, “cuivre.”
^ Maine, “itre xa iheetr.”
^ Maine, “saath aqean.”
^ Maine, “kolo itre ka saath aqeany.”
^ Maine, “hua nyine amekunën.”
^ Ame la ca drenari, tre kolo thupen ne la atr ka huliwa koi ca drai ka pexej. Wange ju la HQP.
^ Kolo hi a qaja la hnepe ijin qaane 3:00 e hmakany, uti hë fetra la jö e 6:00 e hmakany.
