Mareko 7:1-37
7 Ame hna traqa qa Ierusalema hnene la itre Faresaio me itretre cinyihan troa cile xötreithi Iesu.
2 E cili, öhne ju hi angatr la itretre dreng a kola xeni fë la ime ka dro,* ke tha hna pane wasine kö.
3 (Ke ame itre Faresaio me itretre Iudra asë, tha tro jë kö angatre lai a xen, e tha hna pane wasine kö la iwanakoime uti hë ngöne iwatingöne im, angatr a xötrethenge hnyawa la qenenöj ne la itre qaaqaa i angatr.
4 Nge ame la angatr a bëeke qa hna maketr, tha tro kö angatre lai a xen, nge tha hna pane ahmitrötrë angatre kö hnei tim. Nge nyimutre catre hmaca kö la itre xa aqane kuca hnei angatr hna kapa me trongën, tune la troa trapine la itre kap, me trengene tim, me itre xa ewekë ju kö hna kuca hnei kopa.)*
5 Matre hnyinge jë hi la itre Faresaio me itretre cinyihan koi Iesu ka hape: “A hnauëne laka, tha metrötrëne kö la itretre drei nyipë la qenenöj hna acile hnene la itre qaaqaa së, ngo angatre pe a xeni fë la ime ka dro?”
6 Matre sa jë hi Iesu ka hape: “Itretre thoi! Nyipici hi lo hnei Isaia hna perofetane göi nyipunie, lo öni angeic: ‘Göi qaja hi la kola atrunyi ni hnene la nöje celë, ngo ame la hni angatr, tre ka iananyi pe me eni.
7 Matre ka gufa la angatr a hmi koi ni, ke angatr a inine la itre wathebo i atr.’
8 Ase hë nyipunie nue trije la itre wathebo i Akötresie, matre fedre catre kowe la qenenöje i atr.”
9 Öni Iesu hmaca jë hi: “Nyipunieti a nyinyithiina göi troa thahe la wathebo i Akötresie, matre troa trongëne pe la qenenöje i nyipunie.”
10 Ke hanawang, öni Mose lo ka hape: ‘Metrötrëne ju la keme me thine i eö,’ nge ‘Ame la atre ewekë akökötrenyi* koi nyidro, tre tro ha humuthi angeic.’
11 Ngo öni nyipunieti pe, ‘Maine tro la ketre atr a qaja kowe la keme me thine i angeic ka hape: “Ame asë hi la hnenge hna hetreny, nge nyine loi thatraqai epon, tre, Koreba (kola hape, ahnahna koi Akötresie),” ’
12 nyipunieti hi lai a uku angeic troa tha huliwa koi keme me thin.
13 Nge e cili, nyipunieti a apatrene la trengewekë i Akötresie hnene la qenenöje hnei nyipunieti hna ahnith. Nge nyimutre catre pala kö la itre xa ewekë ka tun hnei nyipunieti hna kuca.
14 Ame hnei Iesu hna hëne hmaca jë koi nyidrë la ka ala nyim, me hape: “Drenge ju nyipunieti asë, nge trotrohnine jë la aliene la:
15 Tha hna adrone kö la atr hnene la ewekë ka lö kowe la që i angeic, ngo hnene pe la ewekë ka tro qaa lai.”
16 ——
17 Ame enehila, Iesu a lö trije pi la ka ala nyimu kowe la uma, ame hnene la itretre dreng hna nyiqaane hnyingë pengöne lai ceitune koi nyidrë.
18 Haawe, sa jë hi Iesu ka hape: “Ke hapeu, ketre tha trotrohnine fe kö nyipunie? Thatre kö nyipunie laka, tha hna adrone kö la atr hnene la itre ewekë ka lö kowe la që i angeic,
19 ke e lö hë, tha eje kö a tro kowe la wenethëhmi, ngo kowe la trengen an, ame hna trongëne hmaca pi?” Haawe, öni nyidrëti jë hi ka hape, ka pë engazone la nöjei xen.
20 Ketre, öni nyidrë: “Ame la ewekë ka tro pi qa ngöne la atr, tre celë hi ka adronyi angeic.
21 Ke kola tro qa kuhu hni la itre mekune ka ngazo: itre huliwa ka sis,* me atrekënö, me ihumuth,
22 me nyixetë, me meciun, me ngazo thiina, me iaö, me itre huliwa nyine hmahman,* me piin, me ithanata akökötreny, me pi tru, me nyi ka meköt.
23 Matre ame asë hi la itre ewekë cili, tre ka xulu qa kuhu hni nge ka adrone la atr.”
24 Thupene lai, Iesu a tro jë kowe la traon ne Turo me Sidona. E cili, nyidrëti a lö jë kowe la ketre uma, ke xele kö nyidrëti e troa atre ka hape, nyidrëti e cili. Ngazo pe, hetre ka wange atrehmekunyi nyidrë.
25 Nge canga drenge jë hi lai hnene la thine ne la ketre nekö jajiny hna löthe hnei dremoni. Ame hnei eahlo hna canga tro ju koi nyidrë, me kei kowe la lue ca i nyidrë.
26 Ketre atre Geres lai föe, nge ka mel e Foinike e Suria; nge eahlo a traqa troa sipone lapane koi Iesu troa helëne la dremoni qaathene la nekö i eahlo.
27 Ngo öni nyidrë: “Nue pi la itre nekönatr troa pane xeni mej, ke tha meköti kö troa xome la falawa ne la itre nekönatr, me kuiëne koi itre neköi kuli.”
28 Ngo öni eahlo hmaca jë hi ka hape: “Nyipici nyipëti hi Joxu, ngo ame pe, itre neköi kuli lo a xeni la ka malamala qa ngöne la laulau ne la itre nekönatr.”
29 Matre öni Iesu jë hi ka hape: “Pine la trenge ithanata i nyipo, tro jë, patre hë la dremoni thene la nekö i nyipo.”
30 Haawe, eahlo a bëeke hmaca jë koi hnalapa, nge traqa ha eahlo a öhne la nekönatr kola meköl hune ili, nge patre hë lo dremoni.
31 Ame hë la nyidrëti a tro qaa Turo, nyidrëti a Sidona thenge, me tro nyipine la Dekapoli,* matre troa bëeke kowe la Hnagejë Ne Galilaia.
32 E cili, hna traqa fë koi Iesu la ketre simi hnangenyë, nge ka thatreine ithanata hnyawa. Ame hnene la itre atr hna sipo Iesu troa atë la lue ime i nyidrë hui angeic.
33 Nyidrëti a pane xom ananyi angeic pi qaathene la ka ala nyim, me line la lue hene wanakoime i nyidrë hnine la lue hnangenyë i angeic, me hnyiju, me ketr la thineme i angeic.
34 Nyidrëti a gala jë draië, me simano me hape: “Eph′pha·tha,” kola hape, “Fe pi.”
35 E cili, lai ju hi la lue hnangenyë i angeic, nge nunue pi hi la thineme i angeic, ame hnei angeic hna nyiqaane ithanata hnyawa.
36 Iesu a wathebo angatre ju troa qaja trongëne lai, ngo ngacama wathebone ju hë nyidrë, ngo kolo jë pe ka hape, iqajakeune catrëne jë angatr.
37 Nge tha nyine qaja kö la aqane hai angatr, matre öni angatr: “Lolo catre la nöjei ewekë hnei nyidrëti hna kuca. Nge goi atreine fe nyidrëti aloine la itre ka simi hnangenyë, me itre ka hum.”
Itre mekun ecahu fen
^ Kola hape, tha hna kuca thenge kö la aqane ahmitrötrë ewekë hnei angetre Iudra.
^ Qene Wiwi, “cuivre.”
^ Maine, “qaqan.”
^ Ger., por·neiʹa, kola qaja la nöjei pengöne aqane kuci ngazo. Wange ju la HQP.
^ Ger., a·sel′gei·a. Wange ju la HQP.
^ Maine, “Treene Lao Traon.”
