Mareko 8:1-38
8 Ame ngöne la itre drai cili, traqa hmaca pi la ka ala nyim, nge pëkö a i angatr. Matre Iesu a hëne jë koi nyidrë la itretre dreng, me hape:
2 “Eni a utipine la ka ala nyim, ke köni drai hë ne angatr a ce me eni, nge pëkö a i angatr.*
3 Nge maine tro ni a upi angatr nge ka mecijiin, tro hë angatr a kei e cahu gojeny, nge hetre itre xane pena ka traqa qaa gaa nany.”
4 Ngo önine jë hi la itretre dreng ka hape: “A tro së lai a öhne ekaa la itre falawa nyine troa thue a i angatr asë la, nge tha hna lapane kö la götrane celë?”
5 Hnyinge jë hi Iesu koi angatr ka hape: “Ije falawa i nyipunie?” Öni angatr: “Seven.”
6 Ame hnei nyidrëti hna upe pi la ka ala nyimu troa ilapany hune ihnadro. Nyidrëti a xome pi la sevene lao falawa, me thith, me thupathupa, me hamëne kowe la itretre dreng, nge itretre dreng kowe la ka ala nyim.
7 Nge hetre itre neköi ie mina fe, matre Iesu a thithi jë me hamëne pi kowe la itretre dreng, nge angatre kowe la ka ala nyim.
8 Ame hnei angatr asë hna isa xeni mej, nge hna hleme hmaca ju kö la sevene lao trenge munën ka tiqa.
9 Ngöne la ijine cili, ala 4 000 lao trahmanyi ka xen, nge ase jë hi, Iesu a isa upi angatre jë.
10 Thupene ju hi lai, Iesu a canga elë jë hune he memine la itretre dreng, nge angatr a traqa pi kowe la ketre götran ne Dalemanutha.
11 E cili, traqa pi hi la itre Faresaio me nyiqaane isi ithanata me nyidrë. Angatr a ajane troa tupathi nyidrë, matre angatr a sipone jë koi Iesu la ketre hatrene qaa hnengödrai.
12 Ame hna hace pi la hni Iesu, matre öni nyidrë: “Hnauëne la kola treqene la ketre hatren hnene la xötre celë? Nyipici, eni a qaja hnyawa koi nyipunie, pëkö hatren hna troa hamëne kowe la xötre celë.”
13 Thupene lai, nyidrëti a tro triji angatre pi, me elë hune he, me ea kowe la ketre ngönegejë.
14 Pëkö ketre ewekë hnei angatr hna xome trongën, ngo ca falawa hi, ke thëthëhmine pë hë la itretre dreng troa xomi itre xa falawa.
15 Iesu a hmekë angatre jë ka hape: “Wange pala kö nyipunie, hmekëne kö la levene ne la itre Faresaio memine la levene i Herodra.”
16 Matre angatr a iqajakeune ka hape, pëkö falawa i angatr.
17 Ngo drenge ju hi Iesu, matre öni nyidrë: “Hnauëne laka nyipunie a itö iqajakeune ka hape, pëkö falawa? Hapeu, tha trotrohnine pala kö nyipunie? Hmitre la hni nyipunie troa trotrohnin?
18 ‘Hetre alameke i nyipunie ngo hapeu, tha öhne kö nyipunie, nge hetre hnangenyë i nyipunie ngo hapeu, tha drenge kö nyipunie?’ Nge tha mekune hë nyipunie
19 lo eni a thupathupa lo faifi lao falawa kowe la ala 5 000 lao trahmany, nge ije trenge munën lo hnei nyipunieti hna hlem?” Sa jë hi angatr ka hape: “Truelof.”
20 “Nge hapeu, thëthëhmine fe hë nyipunie lo eni a thupathupa lo sevene lao falawa kowe lo ala 4 000 lao trahmany, nge ije trenge munën ka tru lo hnei nyipunieti hna hlem?” Sa hmaca jë hi angatr ka hape: “Seven.”
21 Haawe, öni nyidrëti jë koi angatr ka hape: “Hapeu, tha trotrohnine pala kö nyipunie?”
22 Angatre hë e Bethesaida, nge itre atr a traqa fë pi koi Iesu la ketre trahmanyi ka timek, matre angatr a sipone catrëne jë koi nyidrë troa ketri angeic.
23 Iesu a eatrongë angeic jë tröne la traon, me hnyijuën la luemeke i angeic, me atë la lue ime i nyidrë hui angeic, me hape: “Hetre ewekë kö hnei hmunë hna öhn?”
24 Öni angeic: “Eni a öhne la itre atr, kösë itre sinöe a tro.”
25 Thupene lai, Iesu a ketr hmaca ju la luemeke i angeic, ame hna loi pi angeic, ke öhne hnyawa ha angeic koilo.
26 Haawe, Iesu a upi angeice jë koi hnalapa, me hape: “The lö pi kö kowe la traon.”
27 Iesu me itretre dreng a tro pi kowe la itre hunahmi e Kaisaria Filipi, nge e kuhu gojeny, nyidrëti a hnyinge jë koi angatr ka hape: “Ame kowe la itre atr, ke drei ni?”
28 Öni angatre jë: “Hnei itre xan hna qaja ka hape, Ioane Bapataiso, öni itre xan, Elia, nge itre xan, ketre perofeta hi.”
29 Matre nyidrëti a hnyinge jë koi angatr ka hape: “Ngo drei ni koi nyipunie?” Sa jë hi Peteru ka hape: “Nyipëti hi la Keriso.”
30 Ame hnei Iesu hna wathebo angatre troa qaja trongëne lai.
31 Ketre, nyidrëti a nyiqaane qejepengöne jë koi angatr ka hape, tro ha nue la Nekö i Atr kowe la itre akötr, nge tro ha thipetriji angeic hnene la itre qatre ne la nöj, me itre tane i angetre huuj, me itretre cinyihan, nge tro fe a humuthi angeic. Ngo ame hë ngöne la hnaakönine drai, troa amele angeice hmaca.
32 Nyipici, e cili, pëkö hnei Iesu hna juetrëne koi angatr. Ngo hnei Peteru pe hna nango hën aconyi nyidrë me pi ameköti nyidrë.
33 Ame hnei Iesu hna thinge trö Peteru, me goeëne la itretre dreng, me haji angeic me hape: “Eö e hutröng Satana! Eö a pi sewe ni, ke tha eö kö a mekune la itre mekuna i Akötresie, ngo mekuna i atre pe.”
34 Iesu a hëne jë la ka ala nyimu koi nyidrë me itretre dreng me hape: “Maine tro la ketre atr a pi xötrethenge ni, loi e tro angeic a pane xele angeice kö, me ajöne la sinöe* ne iaxösisi i angeic, me xötrethenge ni fë o drai pala hi.”
35 Nge ame la atre thele troa amele angeice kö, tre tro ha luzi la mele* i angeic, ngo ame la atr nue la mele i angeic pi ni, me pine la maca ka loi, tro hë angeic a mel.
36 Ke nemene la eloine kowe la atr e tro angeic a hetrenyi la fene hnengödrai asë, nge luzi pë hë la mele i angeic?
37 Nge nemene la nyine tro la atr a hamën nyine nyihnane la mele i angeic?
38 Ngo maine tro la ketre a hmahma e eni me itre trengewekëng ngöne la xötre ka tha nyipici* celë nge ka ngazo, tro fe hë la Nekö i Atr a hmahma e nyën la angeic a traqa ngöne la men ne la Keme i angeic, ce me itre angela ka hmitrötr.”
Itre mekun ecahu fen
^ Maine, “ka mecijiin.”
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Maine, “ka nyixetë.”
