Mareko 9:1-50
-
Iesu a ketrepengön (1-13)
-
Nekönatre trahmanyi hna adremonin (14-29)
-
Pëkö hna thatreine kuca hnei atre lapaun (23)
-
-
Meci Iesu hna canga thuemacanyin (30-32)
-
Itretre dreng a isi pi ka tru (33-37)
-
Itre ka tha icilekeu a nyixöle së (38-41)
-
Ewekë ka iakeiny (42-48)
-
“Sotrëne jë la mele i nyipunie” (49, 50)
9 Iesu mina fe a qaja ju koi angatr ka hape: “Eni a qaja hnyawa koi nyipunie laka, tha tro kö la itre xa ka cil e celë a hane mec, e tha hna pane öhne kö la kola traqa la Baselaia i Akötresie cememine la men.”
2 Thupene la sikisi lao drai, hnei Iesu hna hën aconyi Peteru, me Iakobo me Ioane troa ce elë me nyidrë hune la ketre wetr ka draië catr. E cili, ketre pengöne pi hi nyidrë qëmeke i angatr.
3 Matre melemele pi hi la iheetre i nyidrë, a kola wië kaca, nge pëkö ca atre wasi mano e cailo fen asë ka atreine troa awië iheetre tun.
4 E cili, mama pi hi Mose me Elia, nge nyidroti a ithanata me Iesu.
5 Matre öni Peteru koi Iesu ka hape: “Rabi, ka loi ke eahuni hi la, nue huni pi troa acil la köni itat, casi koi nyipë, casi koi Mose, nge casi fe koi Elia.”
6 Nge thatre kö Peteru la ketre nyine troa kuca, ke meci hë angatr hnei xou.
7 Ame hna mama pi la ketre iaw, me hakuthi angatr hnene la iahnu ne ej. Nge kola ewekë qa hnine la iaw, me hape: “Hane hi la Nekönge hniminang. Drei nyëne ju!”
8 Angatr a canga goe jë xötreith, ngo pëkö xa atr me angatr, nge Iesu casi pe hi.
9 Ame hë la angatr a ce uti qa hune la wetr, Iesu a wathebo angatre ju troa qaja koi ketre la hnei angatr hna öhn, uti hë la troa amelene hmaca la Nekö i Atr.
10 Matre, angatr a amë hutine ju la trengewekë celë e kuhu itre hni* angatr, me ihnyingënekeune la aliene la mele hmaca celë.
11 Angatr a nyiqaane hnyingëne jë koi Iesu ka hape: “Nga hnauëne laka, itretre cinyihan a inine ka hape, tro Elia a traqa pa?”
12 Sa jë hi Iesu ka hape: “Nyipici hi, troa traqa pa hnei Elia, nge tro angeic a wenë amekötine la nöjei ewekë asë. Ngo hnauëne kö laka, hna cinyihan göne la Nekö i Atr ka hape, tro angeic a melëne la itre akötr ka nyimutre, nge troa thipe triji angeic?
13 Ngo eni a qaja hnyawa koi nyipunie laka, qa i Elia ha la, ngo hnei angatre hna kuca koi angeice la aja i angatr, tune lo hna cinyihan göi angeic.”
14 Ame hë la angatr a itronyi memine la itre xa atre dreng, öhne ju hi angatr la ka ala nyim, kola cile xötreithi angatr, nge hetre itretre cinyihan ka ithanata me angatr.
15 Ngo ame ju hi la kola öhnyi Iesu hnene la ka ala nyim, angatr a sesëkötre ju, me nyenyape koi nyidrë.
16 Öni Iesu jë hi koi angatr ka hape: “Nemene la hnei nyipunieti hna ithanatane me nyudren?”
17 Nge hnene la ketre e nyipine la ka ala nyimu hna sa ka hape: “Atre Ini fe, eni a traqa fë koi nyipë la neköng, ke hna löthi nyën hnene la ketre dremoni ka sewe nyën troa ithanata.
18 Nge ame la kola xolouthi nyën hnene la dremoni, ej a kuië nyëne pi e kuhu hnadro, matre nyëne a iëz me kiki inyö, nge pë ju hi trenge catre i nyën. Matre, hnenge hna sipone la itretre drei nyipë troa helëne lai dremoni, ngo thatreine kö angatr.”
19 Öni Iesu jë hi: “Ekölö hi ni nyipunie, xötre ka pë lapaun, tro ni a ce me nyipunie uti hë eu? Nge tro ni a xomihni nyipunie uti hë eu? Nga awi nyëne jë koi ni.”
20 Angatr a tro sai nyëne pi koi nyidrë, ngo ame hë la kola öhnyi nyidrë hnene lai dremoni, angeice a ajipajipane ju lai nekönatr. Ame hnei nyëne hna kei pi e kuhu hnadro, me jipajipa me iëz.
21 Thupene lai, Iesu a hnyinge jë kowe la kem ka hape: “Ije macatre ne traqa ha la ewekë celë koi nyën?” Öni angeic: “Qaane lo nyën a co.
22 Ame itre xa ijin, dremoni a kuië nyën koi eë me koi tim matre humuthi nyën. Ngo maine ijiji nyipë, wai nyiho nge epi xatua nyio.”
23 Öni Iesu jë hi: “Eö lai a qaja ka hape, ‘maine ijiji nyipë’?” Ame la atre lapaun, tro angeic a hetrenyi la nöjei ewekë.
24 Ase jë hi, suene jë hi kem ka hape: “Eni a lapaun! Xatua ni jë troa acatrene la lapauneng!”
25 Öhne hë Iesu la ka ala nyimu a nyinyape koi angatr, nyidrëti hi lai a wesitrëne pi la dremoni, me hape: “Dremoni, eö la ka sawa la nekönatr troa ithanata me dreng, tro pi nge the löthi nyëne hmaca kö.”
26 Thupene la hnei nyën hna sue catre me jipajipa, tro pi hi lai dremoni, nge kösë meci hë la nekönatr. Matre önine jë hi la itre atr ka hape: “Meci hë la nekönatr!”
27 Ngo Iesu a ea ju la wanakoime i nyën, me amejë nyën, ame hnei nyën hna cile jë.
28 Ame hë la Iesu a lö kowe la ketre uma, hnene la itretre dreng hna ithanata aconyi koi nyidrë me hape: “Hnauëne laka, thatreine kö huni helëne lai dremoni?”
29 Sa jë hi Iesu ka hape: “Ame lai dremoni cili, tro hmekuje hi a helëne hnei thith.”
30 Angatr a tro pi qa lai, me tro Galilaia eë, ngo tha ajane kö Iesu troa atre lai hnei ketre.
31 Nge nyidrëti a inine la itretre dreng me qaja ka hape: “Tro ha nue la Nekö i Atr kowe la ime ne la itre atr, nge tro angatr a humuthi angeic. Nge humuthi angeice ju hë, ngo tro ha amele angeice hmaca thupene köni drai.”
32 Ngazo pe, tha trotrohnine kö angatr la hna qaja, nge xou i angatr troa hnying koi nyidrë.
33 Ame hnei angatr hna tro ju Kaperenauma eë. Nge ame hë la angatr e hnine la hnalapa, hnyinge jë hi Iesu ka hape: “Nemene lo hnei nyipunieti hna ithanatan e cahu gojeny?”
34 Pëkö trene mej e angatr, ke angatre lo a ithepe ka tru.
35 Lapa ju hi nyidrë, me hëne la ala Truelof, me hape: “Ame la atre ajane troa draië, tre, tro angeic a ipië me hlue i nyipunie.”
36 Nyidrëti a xome pi la ketre nekönatr, me acili nyëne nyipi angatr; nge nyidrëti a nango haluthi nyëne ju me hape:
37 “Ame la atre kapa la nekönatr ka tui nyëne la, pine la ëjeng, angeice fe hi lai a hane kepe ni. Nge ame la atre kepe ni, tre, kolo hi lai a kapa la Atre upi ni.”
38 Öni Ioane jë hi koi Iesu ka hape: “Atre Ini fe, hne huni hna öhne la ketre atr ka helëne la itre dremoni ngöne la ëje i nyipë, nge hne huni hna thele troa sewe angeic, ke tha ka xötrethenge huni kö.”
39 Öni Iesu jë hi: “The sewe angeice kö, ke pëkö atr ka atreine kuca la itre huliwa ka hetre menen ngöne la ëjeng, nge ase jë hi, kola ha qaja angazo ni.
40 Ke e tha ka icilekeu kö me easë la atr, ce angeice lai me easë.
41 Nge ame la atr thue ime nyipunie tim pine laka, ce nyipunie me Keriso, eni a qaja hnyawa koi nyipunie laka, tha tro kö a thapa qaathei angeic la thupen.
42 Ngo ame la atre akeine la ketre ka co nge ka lapaune koi ni, loi e troa athipe ngöne la nyinawa i angeic la ketre ietë ka tru nyine amudron hna hule hnei boliko, nge troa kuië angeice fë e kuhu hnagejë.
43 Ketre, maine eö a kei pine la ime i eö, thupatrije pi. Ke loi ju kö koi eö troa mel nge patre pë hë la ketre götrane la ngönetrei eö, hune la troa ce kuië eö memine la lue ime i eö kowe la Gena,* ene lo eë ka tha pi kö.
44 ——
45 Ketre, maine eö a kei pine la waca i eö, thupatrije pi. Ke, loi ju kö koi eö troa mel nge patre pë hë la ketre götrane la ngönetrei eö, hune la troa ce kuië eö kowe la Gena memine la lue ca i eö.
46 ——
47 Maine eö a kei pine la alameke i eö, seatrije pi. Ke, ka loi e tro eö a lö me ca alamek kowe la Baselaia i Akötresie, hune la troa ce kuië eö memine la lue alameke i eö kowe la Gena,
48 ene la götrane hnë mele palua hnei itre wanak me eë ka tha pi kö.
49 Ke ame la itre atr ka tune lai, tro ha sootrë angatr hnei eë.
50 Lolo la sootr, ngo maine troa patre la mene ne ej, tro lai a pui loi tune kaa? Haawe, sootrëne pi la mele i nyipunie, nge catre pi mele tingetinge me itre xan.”
