Mataio 10:1-42
10 Nyidrëti a hëne jë lo ala 12, me aijijë angatr troa helëne la itre u ka ngazo, me aloine la nöjei pengöne mec.
2 Ame la ëjene lo ala 12, tre, Simona, hna hëne ka hape, Peteru, me Anederea trejin me angeic; me Iakobo me Ioane, lue nekö i Zebedaio;
3 me Filipo, me Batolomaio, me Toma, me Mataio, lo atre hle mani, me Iakobo nekö i Alefaio, me Thadaio,
4 me Simona, atre Kanana,* me Iudra Isakariota, lo atre troa salemë* Iesu.
5 Ame hnei Iesu hna upe pi la ala 12 me amekötine ka hape: “The tro kö kowe la itre xa nöj, nge the lö kö kowe la itre traon ne la angetre Samaria,
6 ngo tro jë, nge catre jë nyipunie thele la itre mamoe ne Isaraela ka paatr.
7 Nge ame ngöne la nöjei jë i nyipunie, cainöjëne jë ka hape: ‘Calemi hë la Baselaia ne hnengödrai.’
8 Aloine jë la itre wezipo, amelene jë la itre ka mec, aloine jë la itre lepera, nge helëne pi la itre dremoni. Ase hë nyipunie kapa gufan, hamëne gufane pi fe.
9 Ketre, the thele goole kö, maine sileva, maine kopa* nyine aliene la itre trengene manie i nyipunie.
10 Nge the hnëkë kemeje kö kowe la tronge i nyipunie, me iheetr,* me ibutr, me sine tö, ke tro kö la atre huliwa a kapa la thupe i angeic.
11 Nge ame hë la nyipunie a lö kowe la ketre traon, maine ketre hunahmi, thele jë e cili la itre atr ka ijije troa kapa la maca, nge lapa ju me angatr uti hë la nyipunie a tro qa lai.
12 Nge ame la nyipunie a lö kowe la ketre hnalapa, pane ibozu* jë memine la itre atren.
13 Maine angatr a kepe nyipunie, thei angatre hë la manathith.* Ngo e tha kepe nyipunieti kö, thei nyipunie hmaca kö la manathith.”
14 Nge ame la nyipunieti a tro qa ngöne la ketre hnalapa maine traon, nge tha kepe nyipunie maine drei nyipunie, haawe, jumejume pi la dro ne lue hnatrapaca i nyipunie.
15 Ke eni hi a qaja hnyawa koi nyipunie laka, loi ju kö lo ewekë ka traqa koi Sodroma me Gomora, hune la ka troa traqa kowe la traone cili ngöne la Drai Ne Iameköti.*
16 Hanawang! Eni a upi nyipunie ceitu me itre mamoe nyipine la itre luko.* Haawe, hmeke jë tune la itre un, nge lapa pë ethane* pi tune la itre piny.
17 Hmeke ju! Ke tro la itre atr a uti sai nyipunie kowe la hnakootr, me thaucë nyipunie ngöne la itre sunago.
18 Nge tro ha xomi nyipunie kowe la itre gavena me itre joxu, pi ni. Nge celë hi nyine anyipicin koi angatr me kowe la itre nöj.
19 Nge ame hë la kola kootrë nyipunie, the hnehengazone kö la nyine troa qaja, me aqane troa qaja, ke tro kö lai a traqa ngöne la ijin.
20 Nge tha nyipunie casi kö la ka ithanata, ke uati ne la Keme i nyipunie la ka ithanata jëne nyipunie.
21 Ketre, tro la haetra a nue la cipa kowe la mec, tune la keme memine la kuku, nge tro la itre nekönatr a icilekeu me keme me thin, me nue nyidro troa mec.
22 Nge tro ha methinë nyipunie hnene la nöjei atr asë pine la ëjeng. Ngo ame la atre cile hut uti hë la pun, tro hë angeic a mel.
23 Ketre, e traqa ju akötrë nyipunie ngöne la ketre traon, kötre jë pena kowe la ketre traon. Ke, eni a qaja hnyawa koi nyipunie ka hape, tro ha traqa la Nekö i Atr nge tha umuthe pala kö nyipunie la huliwa ne cainöj ngöne la nöjei traon me hunahmi asë.
24 “Tha sisitria kö la atr hna inine hune la atre hamë ini, ketre, tha sisitria kö la hlue hune la maseta.
25 Ke, tro hi la atr hna inine a tune la atre hamë ini, nge ame la hlu, tune la maseta i angeic. Maine hnene la itre atr hna hëne la maseta ne la uma, Belezebuba,* tro fe hi lai a hane hëne tune lai la itre atrene la hnalapa i angeic.
26 Matre, the xoue angatre pi kö, ke pëkö ewekë ka sihngödr, ka tha tro kö a hane mama, nge pëkö ewekë hna juetrën, hna tha tro kö a atre.
27 Ame la hnenge hna qaja ngöne la ga sinhgödr, qaja jë ngöne la gaa lai. Nge ame la hnenge hna qaja acon, cainöjëne jë koi nöjei atr qa ngöne la itre hune uma.
28 Ketre, the xouene kö la ka troa humuthe la ngönetrei, ngo thatreine pe apatrene la mel.* Ngo xouene jë pe la ka atreine troa apatrene la mel me ngönetrei ngöne la Gena.*
29 Hapeu, tha hna salemëne kö la lue neköi sisi koi lue neköi manie* ka co catr? Ngo ame pe, tha kei kö e kuhu hnadro la ala casi e nyidro, nge tha hna öhne kö hnei Keme i nyipunie e koho hnengödrai.
30 Nge ame nyipunie, goi hna e fe la itre pene he i nyipunie.
31 Matre the xou kö; ke nyipiewekë catre kö nyipunie hune la itre sisi ka nyimutre.
32 “Maine tro la ketre atr a nyixölë ni qëmekene la nöjei atr, ketre, tro fe ni a nyixölë angeic qëmeke i Kaka e hnengödrai.
33 Ngo maine ketre atr a xele ni qëmekene la nöjei atr, tro fe ni a xele angeic qëmeke i Kaka e hnengödrai.
34 The mekune pi kö ka hape, eni a traqa fë tingeting e celë fen. Tha eni kö a traqa fë tingeting, ngo taua pe.
35 Ke, eni a traqa troa aisane la kem memine la kuku, me thine me nekö jajiny, me ifëtresi hmunë me tresi hmunë.
36 Eje hi, ame la ithupëjia memine la atr, tre, cili kö ngöne la hnepe lapa i angeic.
37 Ame la atre hnime catrëne la kem me thine i angeic hung, tre, tha ijiji angeice kö troa ketre atre drei ni, nge ame la atre hnime catrëne la neköi angeic trahmany maine jajiny hung, tre, tha ijiji angeice kö troa atre drei ni.
38 Nge ame la atre xele ma ajöne la sinöe* ne iaxösisi angeic, me xele ma xötrethenge ni, tre, tha ijiji angeice kö troa ketre atre drei ni.
39 Ame la atre thele troa amele angeice kö, tro ha luzi la mele i angeic, ngo ame la atre nue la mele* i angeice pi ni, tro hë angeic a mel.
40 “Ame la atr ka kepe nyipunie, tre, kolo fe hi a hane kepe ni, nge ame la atre kepe ni, tre, kolo fe hi lai a hane kapa la Atre upi ni.
41 Ame la atr ka kapa la ketre perofeta, pine laka perofeta lai atr, tro hë angeice lai a kapa la thupen ne la perofeta. Nge ame la atre kapa la atr ka meköt pine laka, ka meköti lai atr, tro hë angeice lai a kapa la thupen ne la atr ka meköt.
42 Nge eni a qaja hnyawa koi nyipunie ka hape, e tro la ketre atr a hamë hnepe tim ka lepany kowe la ketre atr ka co celë, pine laka atre dreng, tha tro kö a pë thupe i angeic.”
Itre mekun ecahu fen
^ Maine, “ka huliwa catr.”
^ Maine, “ihnihni.”
^ Qene Wiwi, “cuivre.”
^ Maine, “iheetre ka qea.”
^ “Ame la angetre Iudra a ibozu, tre angatr a qaja ka hape: ‘Epi tro la tingeting a ce me eö.’ ”
^ Maine, “tingeting.”
^ Wange ju la HQP.
^ Kösë kuli wael ngo ka pi öni.
^ Maine, “pë engazon.”
^ Ketre aqane hë Satana, tixe i itre dremoni.
^ Maine, “u.” Ger., psy·kheʹ. Wange ju la HQP.
^ Wange ju la HQP.
^ Ger., “asari.”
^ Wange ju la HQP.
^ Maine, “u.” Ger., psy·kheʹ. Wange ju la HQP.
