Mataio 11:1-30
11 Ase jë hi Iesu ameköti huliwa kowe lo ala 12 lao atre drei nyidrë, nyidrëti pë hë a tro jë kowe la itre traon ezin troa cainöje trootro, me inine la itre atr.
2 Ngo drenge hë Ioane e hnine la kalabus la itre huliwa hna kuca hnene la Keriso, ame hnei angeic hna upe la lue atre drei angeic
3 troa hnyingë nyidrë ka hape: “Nyipëti hi lo Atr Ka Traqa, maine tro pala kö huni a treqene la ketre?”
4 Matre Iesu a sa jë koi nyidro ka hape: “Bëeke jë koi Ioane, nge qaja ju koi angeic la itre ewekë hnei epone hna drenge me öhn, laka,
5 goe hë itre timek, nge tro hë itre ka genyi ca, nge loi hmaca ha itre lepera, nge drenge hë itre ka sim, nge mele hmaca ha itre ka mec, nge itre ka pë ewekë fe a hane kapa la maca ka loi.
6 Manathithi la atre ka tha nue kö la lapaune i angeice pi ni.”
7 Haawe, ame hë la nyidroti a tro, Iesu ha nyiqaane qeje Ioane kowe la ka ala nyimu me hape: “Nyipunie a tro troa goeë nemene ngöne la hnapapa? Ketre hainy* hna enienijëne hnei eny?
8 Nemene la hnei nyipunie hna goeën? Ketre thupëtresij ka heetrë iheetre ka tru thupene catr?* Waea, ke ame la itre ka heetre tune lai, tre, kolo itre ka lapane la itre uma ne la itre joxu.
9 Matre hnauëne kö laka, nyipunie a tro kowe lai? Hetre perofeta hnei nyipunieti hna thel? Eje hi, eni a qaja hnyawa koi nyipunie, ka sisitria kö angeic hune la perofeta.
10 Angeice hi lo hna qaja ngöne lo hna cinyihane ka hape: ‘Hanawang! Eni a upe la macang qëmeke i eö; troa hnëkëne la gojenyi qëmeke i eö!’
11 Eje hi, eni a qaja hnyawa koi nyipunie ka hape, pëkö atr hna hnahon hnei föe ka draië hui Ioane Bapataiso, ngo ame la ka co ne la Baselaia ne hnengödrai tre, ka sisitria kö hui angeic.
12 Qaane la hneijine i Ioane Bapataiso uti hë enehila, itre atr a nyinyape thele la Baselaia ne hnengödrai, nge tro kö a kapa hnei itre ka thele catrën.
13 Ke ame la itre perofeta memine la wathebo, tre hna perofetan uti hë la hneijine i Ioane.
14 Matre, kapa ju hë nyipunie maine xele pena, ngo angeice hi lo lai Elia ka troa traqa.’
15 Haawe, ame la atr trene hnangenyë, drenge ju.
16 “Tro ni a aceitunëne me drei la xötre atr celë? Ceitu i angatr me itre nekönatr ka lapa ngöne la hna maketr, angatr a sue kowe la itre sine ce elo
17 me hape: ‘Hne huni hna elo miuzik* koi epun, ngo tha fia kö; hne huni hna treij ngo tha hace kö epun.’
18 Ketre tun, tha hnei Ioane kö hna xeni me ij, ngo önine la itre atr ka hape: ‘Ka trene dremoni angeic.’
19 Nge traqa pi hi la Nekö i Atr a xeni me ij, ngo önine la itre atr: ‘Hanawang! Kolo tru hna xen, me tru hna iji waina, me sinee ne la itre ka hle mani me itre ka kuca la ngazo.’ Haawe, kola mama la inamacan hnei huliwa.”
20 Ame hnei Iesu hna qaane amekötine la itre traon, ke ngacama hnei nyidrëti hna kuca la itre iamamanyikeu ka tru e cili, ngo tha ietra kö la itre atren. Matre öni nyidrë:
21 “Ekölö hi ni eö Korazin! nge ekölö eö Bethesaida! Ke maine traqa ju la itre huliwa ka men hna kuca koi eö e Turo me Sidona, tro hë angatre lai a ietra, me heetrë ibëek ka tru thenyin,* me lapa hune la hnatresij.
22 Nge eni a qaja hnyawa koi nyipunie laka, loi ju kö Turo me Sidona hui nyipunie elany, ngöne la Drai Ne Iameköti.
23 Nge ame eö Kaperenauma, eö lo a hane pi draië kowe la hnengödrai? Tro ha thaipië eö kowe la Hua,* ke maine hna kuca ju fe e Sodroma la itre iamamanyikeu hna kuca koi eö, tro pala kö ej a cil enehila.
24 Matre, eni a qaja hnyawa koi nyipunie laka, loi ju kö la nöje Sodroma hui nyipunie elany ngöne la Drai Ne Iameköti.”
25 Nge Iesu a thithi ju me hape: “Eni a ujë koi nyipë nyipine la ka ala nyimu, Kakati fe, Atre Xupe la hnengödrai memine la fen, ke hnei nyipëti hna juetrëne la itre ewekë cili kowe la itre ka inamacan, ngo hna amamane pe kowe la itre nekönatr.
26 Nge eje kö lai Kaka, ke aja i nyipëti kö lai.
27 Ketre, ase hë Kaka nue koi ni la nöjei ewekë asë. Nge Kem hmekuje hi la ka atre la Nekön, ke pëkö atr ka atrepengöne hnyawa la Kem, ngo Neköne hi, me itre atr hna inin hnene la Nekön.
28 Trohemi koi ni ange ka kucakuca me hace, nge tro ni a aegöcatrenyi nyipunie.
29 Ce huliwa jë me eni, nge inine jë theng, ke meköti ni me ipië. Nge e tro nyipunieti a tun, tro hë nyipunie a catr, ke tha hace kö troa ce huliwa me eni, nge tro hë nyipunie a eatrëne lo hnenge hna ahnithe koi nyipunie.
30 Ke eje hi, tha hace kö la hnenge hna ahnith, nge hmaloi e troa thu.”
Itre mekun ecahu fen
^ Maine, “ulë.”
^ Maine, “nyipi iheetr.”
^ Ger., “Itre trutru nyine elo miuzik.”
^ Wange ju la HQP.
^ Wange ju la HQP.
