Mataio 12:1-50
-
Iesu, “Joxu ne la Sabath” (1-8)
-
Trahmanyi ka fitre im hna aloin (9-14)
-
Hlue hnimina i Akötresie (15-21)
-
Dremoni hna helën hnei uati hmitrötr (22-30)
-
Ngazo hna thatreine köletrij (31, 32)
-
Sinöe hna wangatrehmekun hnei wen (33-37)
-
Hatrene i Iona (38-42)
-
Dremoni ka bëeke hmaca (43-45)
-
Thine i Iesu me ha jini nyidrë (46-50)
12 Ame ngöne la ijine cili, ngöne la drai Sabath, hnei Iesu hna tro nyipine la ketre hlapa. Mecijiine hë la itretre drei nyidrë, ame hnei angatre hna nyiqaane ukekëthe la itre wene qitr me xen.
2 Öhne jë hi lai hnene la itre Faresaio, ame hnei angatr hna qaja koi Iesu ka hape: “Hanawang! Itretre drei eö a kuca la ewekë hna wathebone e Sabath.”
3 Sa jë hi nyidrë ka hape: “Tha hane kö nyipunieti e lo hna kuca hnei Dravita ngöne lo angeic me itre sinetronge i angeic a mecijiin?
4 Lo angeic a lö hnine la uma i Akötresie me xeni la itre areto* nyine amamane koi Akötresie, ngo ewekë hna wathebone koi angatr, ke thatraqai itretre huuj hmekuj?
5 Nge hapeu, tha hnei nyipunieti kö hna e ngöne la Trenge Wathebo ka hape, ame ngöne la drai Sabath, itretre huuj a huliwa hnine la uma ne hmi nge tha hna jelengazo angatre kö?
6 Ngo eni a qaja hnyawa koi nyipunie, hetre atr ka sisitria catre kö hune la uma ne hmi.
7 Nge maine trotrohnine hnyawa ju nyipunie lo hna hape, ‘Ka tru koi ni la utipin hune la huuj,’ tha tro kö nyipunie a jelengazone la ka pë engazon.
8 Ke Nekö i Atr la Joxu ne la Sabath.”
9 Ame hë la Iesu a tro pi qaa lai, nyidrëti a tro ju kowe la sunago i angatr.
10 Nge hanawang! E cili la ketre atr ka fitre im! Matre, itre Faresaio a hnyinge koi Iesu ka hape: “Hapeu, meköti kö troa aloine la trene mec ngöne la drai Sabath?” Angatr a thele troa nyizö nyidrë.
11 Öni nyidrë: “Maine tro la ketre e nyipunie a hetre ketre mamoe, nge tro lai si i angeic a mala hnine la hnaop la drai Sabath, hapeu, tha tro kö angeic a thepe nyëne qaa lai?
12 Ngo nyipici, sisitria kö la atr hune la mamoe! Haawe, meköt e troa kuca la loi ngöne la drai Sabath.”
13 Iesu a qaja ju kowe la fitre im ka hape: “Sathe pi la ime i hmunë.” Angeice a sathe pi, ame hna loi pi tune la ketre im.
14 Nge itre Faresaio a lö pi qaa lai, me ce mekune troa humuthi nyidrë.
15 Ngo atre jë hi Iesu, ame hnei nyidrëti hna canga ananyi angatr. Nge ala nyimu la itre ka xötrethenge nyidrë, matre hnei nyidrëti hna aloinyi angatr asë.
16 Ngo hnei nyidrëti hna wathebo angatre troa qaja amamane ka hape, drei nyidrë.
17 Nge kolo hi lai a eatr lo hna qaja jëne Isaia perofeta ka hape:
18 “Hanawang! Kolo hlueng hnenge hna iën, me hniminang hnenge* hna madrine kow! Tro ni a atë hui nyëne la uati hmitrötr,* nge tro nyën a amamane la meköting kowe la itre nöj.
19 Tha atre thele iwesitrë kö nyën, nge tha ka sue kö, nge tha tro kö a drenge la nine ithanata i nyën e cahu gojeny.
20 Tha tro kö nyën a waja fica la hainy ka pej, nge tha tro kö nyën a apin la wik ka so nge ka ae trootro, uti hë la tro nyën a huune fë la meköt.
21 Matre, tro ha mejiune la nöjei nöj ngöne la ëje i nyën.”
22 Thupene lai, hna tro fë koi Iesu la ketre atr ka hum nge ka timek, ke hna löth hnei dremoni. Ame hnei Iesu hna aloinyi angeic, matre goe pi angeic me ithanata.
23 Hnene la ka ala nyimu hna haine me hape: “Hö, tha kolo kö lo Nekö i Dravita la?”
24 Drenge ju hi lai hnene la itre Faresaio, matre öni angatre jë hi: “Angeice lai a helëne la itre dremoni jëne lo tan ne la itre dremoni, Belezebuba.”*
25 Atre hi Iesu la mekuna i angatr, matre öni nyidrëti jë: “Maine tro la itre baselaia a aisa angatre kö, tro hë itre eje lai a patr, ketre tune mina fe kowe la itre traone me hnalapa ka aisa angatre kö, tha tro hë itre eje lai a cile hut.
26 Nge maine tro Satana a helë angeice kö, angeice hi lai a sipu cil koi angeice kö; nga troa cile tune kaa la musi angeic?
27 Ngo maine eni a helëne la itre dremoni jëne Belezebuba, hnei drei kö matre atreine jë la itre atre i nyipunie helëne la itre dremoni? Haawe, angatre hi la itre ka troa ameköti* nyipunie.
28 Ngo maine eni a helëne la itre dremoni hnene la uati Akötresie, kolo hi lai a hape, ase hë sasaithi nyipunie hnene la Baselaia i Akötresie.
29 Nge maine tro la ketre atr a thele troa lö hnine la uma troa atrekënö la itre mo ne la atr ka catr, hapeu, tha tro kö angeice lai a pane othe lai atre ka catr? Nge e ase hë, ijiji angeice hë troa eöth asë la aliene lai uma.
30 Haawe, ame la atr ka tha ce xöle me eni, tre ka icilekeu me eni, nge ame la atre ka tha ce xawane me eni, tre atre ijen angeic.
31 “Celë hi matre eni a qaja koi nyipunie ka hape, ame la nöjei ngazo hna qaja me kuca kowe la atr, tre tro ha köletrij, ngo ame la troa qaja angazone la ua, tre thatreine kö troa köletrije la ngazo cili.
32 Haawe, maine tro la ketre atr a qaja angazone la ketre, tro ha nue la ngazo i angeic, ngo ame la atre qaja angazone la uati hmitrötr, thatreine kö troa nue la ngazo i angeic ngöne la fene celë,* me ngöne la ka troa traqa.
33 “Maine kola cia hlöeë la isinöe i nyipunie, tro fe la itre wen a lolo, ngo maine ka si meci la isinöe, troa ngazo la itre wen. Matre kola wangatrehmekune la isinöe hnei itre wen.
34 Matra ne vaipa,* tro nyipunieti a qaja tune kaa la itre trengewekë ka loi, ngo ka ngazo pe nyipunie? Eje hi, kola ewekë la që qa kuhu hni.
35 Matre, ame la atre ka loi, tro angeic a axulune la loi, qa ngöne la trengamo i angeice ka loi, ngo ame la atre ka ngazo, tro angeic a axulune la ngazo, qa ngöne la trengamo i angeic ka ngazo.
36 Eni hi a qaja koi nyipunie laka, tro la itre ka qaja la itre trenge ithanata ka menu a isa qeje thiinan koi Akötresie ngöne la Drai Ne Iameköti.
37 Matre, hnene la itre trengewekë i nyipunie, tro ha jele meköti nyipunie, nge thenge la itre trengewekë i nyipunie, tro ha jele ngazo nyipunie.”
38 Ame hnene la itre xa atre cinyihan me itre Faresaio hna sa koi nyidrë ka hape: “Atre Ini fe, eahuni a ajane tro nyipëti a amamai huni la ketre hatren.”
39 Öni Iesu jë hi: “Xötre ka ngazo nge ka tha nyipici* koi Akötresie a treqene la ketre hatren, ngo casi hi la hatrene koi nyipunie a kolo hatrene i Iona perofeta.
40 Hnei angeic hna lapa e kuhu hni ne la ketre ie ka tru, a traqa koi köni drai me köni jidr. Ketre tune fe kowe la Nekö i Atr, tro angeic a lapa hnine la ihnadro, köni drai me köni jidr.
41 Tro ha amelene hmaca la xötre celë memine la angetre Nineve ngöne la Drai Ne Iameköti. Nge tro hë la angetre Nineve a amamane la engazone la xötre celë, ke hnei angatre hna ietra pine la maca hna tro fë hnei Iona. Ngo hanawang! hetre atr ka tru catre kö hui Iona e celë.
42 Tro fe a ce amelene hmaca la xötre celë memine la joxu föe ne kolojë ngöne la Drai Ne Iameköti. Nge tro eahlo a amamane la engazone la xötre celë, ke hnei eahlo hna traqa qa gaa nanyi troa drenge la inamacane i Solomona. Ngo hanawang! hetre atr ka tru catre kö hui Solomona e celë.
43 “Thupene la kola trotrije la ketre atr hnene la ketre dremoni, angeic a nyinyape thele ju ngöne la hnapapa la ketre hnë mano koi angeic, ngo tha öhne kö.
44 Matre, öni angeice ju, ‘Ma tro hmaca ni a bëeke kowe la hnalapang, lo hnenge hna trotrij,’ haawe, traqa ju hi angeic a öhne la hnalapa hna nyidrawane hnyawa me thaipin, nge pë pala kö atren.
45 Matre hnei angeic hna hëne hmaca la sevene lao dremoni ka iaxösisi catre kö hui angeic, ame hnei angatr hna ca lapa e cili. Matre, ame kowe lo atr hna löth, loi ju kö lo tro hnapan. Nge celë hi ka troa traqa kowe la xötre celë.”
46 Nyidrëti pala kö a ithanata kowe la ka ala nyim, nge hanawange la thine i nyidrë me ha jini nyidrë, kola cil e kuhu qëhnelö. Angatr a pi ithanata me nyidrë.
47 Matre, önine jë hi la ketre atr koi Iesu: “Hanawange la thine i nyipë me ha jini nyipë e kuhu qëhnelö, angatr a ajane troa ithanata me nyipë.”
48 Öni Iesu jë hi kowe lai atr ka hape: “Ke drei la thineng? Nge drei la itre trejine me eni?”
49 Ame hnei nyidrëti hna sathe la ime nyidrë hmekune la itretre dreng, me hape: “Hane hi la thineng me itre trejine me eni!
50 Ke, ame la atre kuca la aja ne la Kemeng e koho hnengödrai, angeice hi la trejine me eni, me xang, me thineng.”
Itre mekun ecahu fen
^ Maine, “falawa ka lapa kötr.”
^ Maine, “u.” Ger., psy·kheʹ. Wange ju la HQP.
^ Maine, “mene i Akötresie.”
^ Ketre aqane hë Satana.
^ Maine, “qajaqaja la tria i nyipunie.”
^ Maine, “hneijin.” Wange ju la HQP.
^ Ketre un hna mecin.
^ Ger., “ka nyixetë.”
