Mataio 13:1-58
-
CEITUN GÖI BASELAIA (1-52)
-
Atre tra feja (1-9)
-
Kepine Iesu a hamë ceitun (10-17)
-
Ceitun ne la atre tra feja hna qejepengön (18-23)
-
Qitr me zizania (24-30)
-
Itine sinapi me leven (31-33)
-
Ceitun hna hamën a eatrëne lo itre hna perofetan (34, 35)
-
Ceitun ne la qitr me zizania hna qejepengön (36-43)
-
Trengamo hna kelem me penina (44-46)
-
Ifile (47-50)
-
Trengamo hnapan nge ka hnyipixe (51, 52)
-
-
Xele ma wai Iesu ngöne la nöje i nyidrë (53-58)
13 Ame lai drai cili, hnei Iesu hna tro qa ngöne lai hnalapa, me lapa ngöne la ngönegejë.
2 Ame hna traqa koi nyidrë la ka ala nyim, matre canga elë jë hi Iesu me lapa hune la neköi he, nge cile ju pe hi la ka ala nyimu ngöne la ngönegejë.
3 E cili, nyidrëti a nyiqaane ithanata jë kowe la ka ala nyimu me hamëne la itre ceitun. Öni nyidrë: “Hanawang! ketre atre tra feja a tro pi troa jumi feja.
4 Nyiqaane jume pi hi angeic la itre feja, nge mala pi hi itre xan e kuhu gojeny, ame hna sasa hnei itre waco.
5 Itre xan a mala hune la dro ka tëtë, ame hna canga cia pi itre ej ke tha hmeköni kö la dro.
6 Ngo mejë jë hi la jö a dreuth, ame hna fitre pi, ke pëkö iwaan.
7 Nge hetre itre xane pena ka mala nyipine la itre ka ithiny, ame hna cia thahe la itre feja hnene la itre ka ithiny.
8 Nge hetre itre xa feja ka mala ngöne la gaa hmelek, ame hna wa wene pi, kösë 100 hmaca kö la etrune lo itre feja hna jum, nge 60 la ketre nge 30 la ketre.
9 Haawe, ame la atr trene hnangenyë, drenge ju.”
10 Ame hna hnying hnene la itretre dreng koi Iesu ka hape: “Hnauëne la nyipëti a ithanata koi angatr jëne la itre ceitun?”
11 Sa jë hi Iesu ka hape: “Ijiji nyipunie troa trotrohnine la ini ka hmitrötr nge hna juetrën göne la Baselaia ne hnengödrai, ngo tha ijiji angatre kö.
12 Matre ame la atr ka hetrenyi hë la trotrohnin, tro hmaca kö a nyixane la trotrohnine i angeic, matre mana pi la trotrohnine thei angeic. Ngo ame kowe la atre pë trotrohnin, tre tro ha xome la hnepe trotrohnin ka eje thei angeic.
13 Celë hi kepin matre eni a hamë ceitune koi angatr; ke angatr a goe, ngo tha öhne pe, angatr a dreng, ngo tha nyipiewekëne kö, nge pëkö ca hna trotrohnin.
14 Angatre hi lai a eatrëne hnyawa lo hna perofetan hnei Isaia, lo kola hape: ‘Tro nyipunieti a dreng, ngo tha trotrohnine pe nyipunie la alien, nge tro nyipunieti a goe, ngo tha öhne kö nyipunie.
15 Ke troa xeti la hni ne la nöje ce, matre tro hë angatr a drenge hnene la lue hnangenyë i angatr, ngo pëkö thangan. Nge tro angatre a thinge la luemeke i angatr matre tha tro pi kö angatr a öhne hnei luemek, me dreng hnei lue hnangenyë, me trotrohnin qaa kuhu hni, me ujë matre tro ni a aloinyi angatr.’
16 “Ngo manathithi la itre lue meke i nyipunie, ke kola öhn, memine la lue hnangenyë i nyipunie ke kola dreng.
17 Eni a qaja hnyawa koi nyipunie laka, ala nyimu la itre perofeta me itre ka mele nyipici ekö, ka hane pi goeëne la itre ewekë hnei nyipunieti hna goeën, ngo tha öhne kö angatr, me hane pi drenge la itre ewekë hnei nyipunieti hna dreng, ngo tha drenge ju kö angatr.
18 “Haawe, pane drenge ju la aliene la ceitune celë.
19 Ame lo itre feja ka mala e kuhu gojeny, tre, kolo atr ka drenge la maca göne la Baselaia, ngo ka tha trotrohnine pe la alien, nge traqa pi hi la atre iangazo, me fejetrije la itine hna jum e kuhu hni angeic.
20 Nge ame lo itre ka mala hune la dro ka tëtë, tre, kolo atr ka drenge la maca me kapa madrin ej.
21 Kolo hi a nango cia, ngo hnene laka, pëkö iwaan, matre ame ju hi la kola traqa la itupath me iaxösisi pine la maca, saqe hi angeice kei.
22 Nge ame pena lo feja ka mala nyipine la itre ka ithiny, tre, kolo atr ka drenge la maca, ngo hna thahe hnene la itre ewekë hna hnehengazone ngöne la fene celë,* memine la trenge iaö ne la mani, ene pe, tha wa wene pi.
23 Nge ame pë hë lo feja ka mala ngöne la gaa hmelek, tre kolo atr ka drenge me trotrohnine la maca, ame hna wa wene pi, kösë 100 hmaca kö la etrune hune lo itre feja hna jum, nge 60 la ketre, nge 30 la ketre.”
24 Hnei Iesu hmaca hna qaja koi angatre la ketre ceitun. Öni nyidrë: “Ceitune la Baselaia ne hnengödrai memine la ketre atr ka traane la itre nyipi feja ngöne la hlapa i angeic.
25 Ngo ame hë la kola imekölenyi la itre atr, traqa pi hi la ithupëjia troa jume la itre itine zizania* nyipine la qitr, nge tro hmaca pi hi angeic.
26 Haawe, cia pi hi la qitr, nge ame hë la kola wa wen, mama pi hi la zizania.
27 Matre önine jë hi la itre hlu kowe la maseta ne la hnalapa ka hape: ‘Joxu, tha itre nyipi feja kö lo hnei nyipëti hna jum ngöne la hlapa i nyipë? Ngo hnauëne kö la kola hetre zizania?’
28 Nyidrëti a sa jë ka hape: ‘Hna kuca lai hnene la ketre atr, ketre ithupëjia.’ Matre önine jë hi la itre hlu ka hape: ‘Aja i nyipëti kö tro huni a fejetrije la itre zizania?’
29 Öni nyidrëti jë: ‘Waea, wanga ce feje pi epuni la qitr me zizania.
30 Nue pi lue eje troa ce cia uti hë la ijine menu, nge e traqa ha la ijine cili, tro ni a upe la itre ka troa menu me hape: Pane feje pi la zizania nge ukëne jë matre dreuthetrij, nge xawane jë la qitr me amë acone ngöne la umatëng.’ ”
31 Iesu a qaja hmaca jë la ketre ceitune koi angatr, öni nyidrë: “Ceitune la Baselaia ne hnengödrai memine la ketre itine sinapi* hna traane hnene la ketre trahmanyi ngöne la hlapa i angeic.
32 Ketre itine ka co catre lai hune la nöjei itin asë, ngo e cia ha, tru hmaca ju kö ej hune la itre xa feja, nge tro eje a ketre isinöe, ame hna traqa pi la itre waco ne hnengödrai troa lapan la itre wapicin.”
33 Öni Iesu hmaca jë: “Ceitune la Baselaia ne hnengödrai memine la ketre föe ka ce lepe la leven memine la farin ka köni tulu,* ame hna ce ngöne cipa pi la falawa.”
34 Ame göne la nöjei ewekë cili, hnei Iesu hna hamëne la itre ceitun kowe la ka ala nyimu. Eje hi laka, hnei nyidrëti pala hi hna ithanata koi angatr jëne la itre ceitun.
35 Celë hi matre, eatre jë lo hna perofetan ka hape: “Tro ni a fe la qeng hnene la itre ceitun, nge tro ni a qaja amamane la itre ewekë hna juetrëne qaane lo qaan.”*
36 Ase jë hi Iesu upe la ka ala nyim, lö hmaca jë hi nyidrë hnine la uma. Nge traqa pi hi la itretre dreng troa qaja ka hape: “Pane qeje pengöne jë koi huni la ceitun ne la zizania ngöne la hlapa.”
37 Öni nyidrë: “Ame lo atre traane la nyipi feja, tre Nekö i Atr;
38 nge ame la hlapa, tre fen. Nge ame lo nyipi feja, tre itre neköne la Baselaia, nge ame lai zizania, tre itre neköne la atre ka ngazo.
39 Nge Diabolo la ithupëjia ka jumi zizania. Nge ame la ijine menu, tre kola nyihatrene la hneijin* ne la pune la fene celë. Nge ame la itre ka troa menu, tre itre angela.
40 Haawe, tune la zizania hna xawane me dreuthe trij, tro fe a hane tune lai ngöne la hneijine* la pun.
41 Tro la Nekö i Atr a upe la itre angela troa xawane me trije qa ngöne la Baselaia i nyidrë, la itre atr ka kuca la ngazo,
42 me kuië angatr kowe la ihu eë ka palulu. Nge e cili, tro angatr a treije me latresi.
43 Ngo ame la itre ka meköt, tro angatr a hudrume tune la jö ngöne la Baselaia ne la Keme i angatr. Haawe, ame la atre trene hnangenyë, drenge ju.
44 “Ame la Baselaia ne hnengödrai, tre tune la trengamo hna kelem ngöne la ketre hlapa, nge hna öhn hnene la ketre atr, me juetrëne hmaca. Atraqatre la trenge madrine i angeic, ame hnei angeic hna salemën asë la itre ewekë i angeic, matre itöne la hlapa cili.
45 “Nge ceitune fe la Baselaia ne hnengödrai, memine la atre saleme trootro ka thele la itre penina ka lolo.
46 Öhne jë hi angeic la penina ka tru alameken, ame hnei angeic hna canga nyimenyime salemëne asë la itre ewekë i angeic, me itöne la penina cili.
47 Nge ceitune mina fe la Baselaia ne hnengödrai memine la ketre ifile hna nue ngöne la hnagejë, nge ka jele la nöjei pengöne ie.
48 Matre, ame hë la kola tiqa hnei ie, itre atr a hule pi la ifile kowe la hnangöni me ilapany. Nge e cili, kola ha xome hnyawa la itre ie ka lolo kowe la itre trengen, me trije pë hë la itre ka ngazo.
49 Tro hi a traqa tune lai ngöne la hneijine* la pune la fen. Tro la itre angela a isa amë la itre atr ka lolo me ka ngazo,
50 nge troa kuiëne la itre ka ngazo kowe la ihu eë ka palulu. Nge e cili, tro angatr a treije me latresi.
51 “Hapeu, trotrohnine kö epuni la aliene la itre trengewekë celë?” Öni angatre jë hi: “Öo.”
52 Matre öni nyidrë: “Haawe, ame la atre hamë ini göne la Baselaia ne hnengödrai, tre ceitu i angeic me ketre trene hnalapa. Angeic a xome qa ngöne la trengamo i angeic la itre ewekë hnapan, me ka hnyipixe.”
53 Ase jë hi Iesu hamëne la itre ceitune cili, nyidrëti a tro pi qa lai.
54 Matre traqa ha nyidrë kowe la zi i nyidrë, ame hnei nyidrëti hna inine la itre atr ngöne la sunago i angatr. Nge kola hai hnei itre xan me hape: “Qa kaa la inamacane ne la trahmanyi celë? Nge drei jë la ka aijijë angeic troa kuca la itre iamamanyikeu ka tru?
55 Tha neköne kö lo atre tratrau sinöe la? Nge tha Maria kö la ëje ne la thine i angeic? Nge tha itre jini angeic kö lo Iakobo me Iosefa me Simona me Iudra?
56 Nge tha ce easë kö lo memine la itre xa i angeic? Nga hnei angeic hna atreine kuca tune kaa la itre ewekë cili?”
57 Ame hnei angatr hna xele ma lapaune koi nyidrë. Nge öni Iesu jë hi ka hape: “Hna atrune pala hi la perofeta ngöne la nöjei jë i angeic, ngo tha hna kepe angeice kö ngöne la zi angeic, me ngöne la sipu hnalapa i angeic.”
58 Celë hi matre, tha tru menu kö hnei iamamanyikeu hnei nyidrëti hna kuca e cili, hnene la pë lapaune i angatr.
Itre mekun ecahu fen
^ Maine, “hneijin.” Wange ju la HQP.
^ Ka tune hi la qitr ngo poizine pe.
^ Ger., siʼna·pi, maine moutarde qene wiwi, ketre feja.
^ Ame la ‘köni tulu,’ kola nango easenyine la 10 kilo.
^ Maine jë, “kola qaja lo kola xupe la fen.”
^ Maine, “ijin.” Wange ju la HQP.
^ Maine, “ijin.” Wange ju la HQP.
^ Maine, “ijin.” Wange ju la HQP.
