Mataio 14:1-36
14 Ame ngöne la ijine cili, hnei Herodra Joxu hna drei mejene la itre ewekë hna kuca hnei Iesu.
2 Matre öni angeice jë kowe la itre hlue i angeic ka hape: “Ioane Bapataiso lai. Ma mele hmaca ha angeic qa hna mec, celë hi matre atreine jë angeic kuca la itre iamamanyikeu.”
3 Eje hi laka, hnei Herodra* lo hna othi Ioane me akalabusin pi Herodia, ifënekö i Filipo, trejine me angeic.
4 Ke hnei Ioane lo hna qaja koi angeic ka hape: “Hnei eö hna eni wathebo la eö a xomi eahlo!”
5 Matre, Herodra a pi humuthi Ioane, ngo xou i angeic la ka ala nyim, ke ame Ioane koi angatr, tre ceitu me perofeta.
6 Ngo ame hë la kola feetëne la drai ne hnaho* Herodra, hnene la neköi Herodia jajinyi hna fia koi angeic, matre madrine catre jë hi angeic,
7 ene pe, sisinyi jë hi angeic troa kapa la nöjei sipo i nyën.
8 Ame hnene la thine i nyën hna iele nyëne troa qaja ka hape: “Hamë ni pi la he i Ioane Bapataiso hune la ketre ipala.”
9 Ngacama tha aja i Herodra kö, ngo pine laka ase hë angeice lo sisinyi qëmekene la itre ka ce xeni* me angeic, ene pe, amekötine jë angeic troa kapa la sipo i nyën.
10 Haawe, angeic a upe ju la itre sooce i angeic troa thupa la nyinawa i Ioane e hnine la kalabus.
11 Ame hna traqa fë pi koi nyën la he i Ioane hune pala, nge nyën a hamëne ju kowe la thine i nyën.
12 Thupene lai, traqa pi hi la itretre drei Ioane troa xome la ngönetrei angeic me kelem. Nge angatr a canga tro jë troa thuemacanyi Iesu.
13 Ase jë hi, nyidrëti a tro pi qa ngöne la neköi he troa pane lapa cas. Ngo drei mejene jë hi hnene la ka ala nyim, ame hnei angatr hna tro qaa ngöne la isa traone i angatr, me xötrë ngönegejë troa xötrethenge Iesu.
14 Nge ame hë la Iesu a uti qa hune la neköi he, öhne ju hi nyidrëti la ka ala nyim, ame hnei nyidrë hna utipi angatr, me aloine la itre ka wezipo thei angatr.
15 Ngo ame hë la kola hejihej, itretre dreng a nango easenyi nyidrë me hape: “Tha hna lapane kö la götrane celë, nge kola tro nyimenyime la traem, loi e troa pane upi angatre la kowe la itre traon ka easeny, matre itö a i angatr.”
16 Ame hnei Iesu hna sa ka hape: “Tha tro kö a upi angatr, ngo thue a i angatre jë pe.”
17 Matre angatr a qaja ju koi nyidrëti ka hape: “Pëkö xeni la, ngo lue neköi ie hmekuje hi, me faifi lao falawa.”
18 Öni nyidrë: “Nga awe jë hö koi ni.”
19 Iesu hi lai a upe ju la ka ala nyimu troa ilapany hune ihaö. Thupene lai, xome jë hi nyidrëti lo lue ie memine lo faifi lao falawa, ame hnei nyidrë hna gala jë draië me thith. Ase jë hi, nyidrë a thupathupa pi la falawa me hamëne kowe la itretre dreng, nge itretre dreng kowe la ka ala nyim.
20 Ame hnei angatr asë hna isa xeni mej, nge hna hleme la 12 lao trenge munën ka tiqa.
21 Nge ame la itre ka xen tre, ala 5 000 lao trahmany ngo tha hna e kö la itre föe me itre nekönatr.
22 Thupene jë hi, nyidrëti a upe panëne jë la itretre dreng troa të hune he, me tro kowe la ketre götrane la hneopegejë. Nge tro pë hë nyidrëti a pane upe la ka ala nyim.
23 Thupene lai, nyidrëti a elë jë hune la wetr troa pane lapa casi me thith, nge hnei nyidrëti hna lapa e cili uti hë e heji lapa.
24 Matre, nanyi catre hë lai he,* nge hnahna catre jë hi la eny, nge kolo hi lai a jume ej hnene la itre hoke ne gejë.
25 Nge ame hë ngöne la hnaafoane hawa* ne la hej, xulu jë hi Iesu, kola tro koi angatr hune la hnagejë.
26 Öhnyi Iesu jë hi hnene la itretre dreng a kola tro hune hnagejë, ame hnei angatr hna xou atraqatr me sue ka hape: “E kaka i ni hetre ka iamamanyi koi së!” Ene pe, sue catre hmaca jë hi angatr ke tru la xou.
27 Ame hnei Iesu hna canga ithanata ju koi angatr me hape: “Catre pi! The xou kö, ke eni hi!”
28 E cili, canga sa jë hi Peteru ka hape: “Joxu, maine nyipëti hi, hë ni jë, matre tro ni a tro hune la tim koi nyipë.”
29 Öni Iesu jë hi: “Nga trohemi hö!” Ame hnei Peteru hna uti pi, me tro koi Iesu hune la tim.
30 Ngo goeëne ju hi angeic la ecatrene la eny, ame hnei angeice hna xou ju me nyiqaane lö, me sue me hape: “Joxu, wai ni!”
31 Haawe, canga li ime pi Iesu me xolouthe catrë angeic, nge öni nyidrëti jë hi: “Atre lapaun acon, a hnauëne la eö a luelu?”
32 Matre, ame hë la nyidroti a elë hune la neköi he, upu ju fe hi la eny.
33 Ame hnei angatr asë hna atrunyi* nyidrë me hape: “Eje hi, nyipëti hi la Nekö i Akötresie.”
34 Ame hnei angatr hna ce ea pi kowe la nöje Genesareta.
35 E cili, kola wangatrehmekunyi Iesu hnene la itre atrene la nöj, nge angatr a thuemacane jë la itre nöje xötreith, ene pe, tro fë pi koi nyidrë la itre atr hna tithi hnei mec.
36 Nge angatr a sipone iele nyidrë matre tro hi angatr a nango ketr la ipune iheetre i nyidrë. Matre ame la nöjei atr ka ketri nyidrë, loi jë hi angatr.
Itre mekun ecahu fen
^ Ene Heroda Anetipa. Wange ju la HQP.
^ Maine, “aniverser.”
^ Maine, “saath aqeany.”
^ Ger., “nyimu stad.” E ca stad, tre 185 m.
^ kolo hmekune 3:00 e hmakany sine jidr, uti hë 6:00 e hmakany.
^ Maine, “thil.”
