Mataio 15:1-39
15 Ame hna tro koi Iesu hnene la itre Faresaio me itretre cinyihane ka traqa qa Ierusalema. Nge öni angatr:
2 “A hnauëne laka, tha metrötrëne kö la itretre drei nyipë la qenenöj hna acile hnene la itre qaaqaa së? Ke goeën, tha hane fe kö angatr wasi* wanakoim qëmekene troa xen.”
3 Matre sa jë hi Iesu ka hape: “Ngo hnauëne kö laka, ka tru koi nyipunie la qenenöj hune la wathebo i Akötresie?
4 Ke hanawang, öni Akötresie: ‘Metrötrëne ju la itre keme me thine i eö,’ nge ‘Ame la atre ewekë akökötrenyi * koi nyidro, tre tro ha humuthi angeic.’
5 Ngo öni nyipunieti pe, ‘Maine tro la ketre atr a qaja kowe la keme me thine i angeic ka hape: “Ame asë hi la hnenge hna hetrenyi nge nyine loi thatraqai epon, tre, ahnahna koi Akötresieti pë hë,”
6 matre öni nyipunieti jë, tha nyipiewekë hë koi angeic troa metrötrë kem.’ Ngo hanawang, nyipunieti lai a apatrene la trengewekë i Akötresie hnene la qenenöje i nyipunie.
7 Itretre thoi! Nyipici hi lo hnei Isaia hna perofetane göi nyipunie ka hape:
8 ‘Göi qaja hi la kola atrunyi ni hnene la nöje celë, ngo ame la hni angatr, tre ka iananyi pe me eni.
9 Matre ka gufa la angatr a hmi koi ni, ke angatr a inine la itre wathebo i atr.’ ”
10 Ame hnei Iesu hna hëne la ka ala nyimu me hape: “Drenge ju, nge trotrohnine jë la aliene la:
11 Tha ene kö la ewekë ka lö hnine la që ne la atr la ka adronyi angeic, ngo ene pe la ewekë ka tro qa lai.”
12 Ame hna easenyi Iesu hnene la itretre dreng me hape: “Atre fe hi nyipë laka, hna dreng akötrëne hnene la itre Faresaio lo trengewekë i nyipë?”
13 Öni Iesu jë: “Ame la nöjei feja hna tha traane hnei Kemeng e hnengödrai, tre tro ha feje trij.
14 Nue angatre pi, ke itre tane ka timeke lai! Nge maine tro la timek a amamai gojenyi kowe la ketre timek, tro hë nyidroti lai a ce kei kowe la hnaop.”
15 Matre öni Peteru jë hi ka hape: “Pane qejepengöne jë koi huni la ceitune celë.”
16 Haawe, sa jë hi Iesu ka hape: “Ke hapeu, ketre tha trotrohnine fe kö nyipunie?
17 Nge hapeu, thatre kö nyipunie laka, ame la nöjei ewekë ka lö koi që, tre tro lai a uti kowe la trenge xel, ame hna trongëne hmaca pi?
18 Ngo ame pe la ewekë ka tro qa ngöne la që, tre ka qaa kuhu hni lai, nge ewekë hi lai ka adrone la atr.
19 Ke kola tro qa kuhu hni la itre mekune ka ngazo, me ihumuth, me nyixetë, me kuci ngazo,* me atrekënö, me thoi, me silitrengathoi ketre.
20 Celë hi itre ewekë lai ka adrone la atr; ngo ame la troa xeni nge tha pane wasi wanakoim, tre, tha ewekë kö lai ka troa adrone la atr.”
21 Thupene lai, Iesu a tro jë kowe la traon ne Turo me Sidona.
22 Nge hanawang! Xulu pi hi la ketre föe ne Kanana ka mel e cili, troa treije koi nyidrë me hape: “Ekölö hi ni Joxu, Nekö i Dravita, epi utipi ni ju. Hna löthe la neköng hnei dremoni.”
23 Ngo pë pi kö ca ewekë hna qaja hnei Iesu. Ame hna traqa pi la itretre drenge troa iele nyidrë, me hape: “Upi eahlo pi, ke eahlo pala hi la a hëne trongë së.”
24 Haawe, öni nyidrëti jë hi koi eahlo ka hape: “Tha hna upi ni kö kowe la nöjei atr asë, ngo hna upe meköti ni kowe la itre mamoe ka paatr ne Isaraela.”
25 Ngo hnene lai föe hna thili koi nyidrë me hape: “Joxu, xatua ni jë!”
26 Öni Iesu hmaca jë: “Tha meköti kö troa xome la falawa ne la itre nekönatr, me kuiëne koi itre neköi kuli.”
27 Ngo öni eahlo hmaca jë ka hape: “Nyipici nyipëti hi Joxu, ngo ame pe, itre neköi kuli lo a xeni la ka malamala qa ngöne la laulau ne la itre maseta i nyudren.”
28 Matre öni Iesu jë hi ka hape: “Eje hi, atraqatre la lapaune i nyipo; tro ha eatr la aja i nyipo.” Haawe, ame ju fe kö lai hawa cili, loi hmaca pi hi la neköi eahlo.
29 Iesu a tro pi hi qaa lai, me easenyine la Hnagejë Ne Galilaia, ame hnei nyidrëti hna elë hune la ketre wetr me pane lapa e cili.
30 Nge kola ha traqa koi nyidrë hnene la ka ala nyim. Angatr a tro fë koi Iesu la itre ka peje ca, me itre timek, me itre hum, me itre xa atre ju kö hna tith hnene la nöjei pengöne mec. Kola tro sai angatr, me ami angatr fene la lue ca i Iesu, ame hnei nyidrëti hna aloinyi angatre asë.
31 E cili, hna hai hnene la ka ala nyimu la kola goeëne la itre hum a ithanata, me itre ka peje ca a kola tro hmaca, me itre timek a goe hë. Ame hnei angatr hna atrune la Akötresi angetre Isaraela.
32 Nge Iesu a hëne jë koi nyidrë la itretre dreng me hape: “Eni a utipine la ka ala nyim, ke köni drai hë ne angatr a ce me eni, nge pëkö a i angatr. Tha ajane kö ni troa upi angatr nge ka mecijiine pe, wanga kei pi angatr e cahu gojeny.”
33 Ngo önine jë hi la itretre dreng ka hape: “A tro së lai a öhne ekaa la itre falawa nyine troa thue a i angatr asë la, nge tha hna lapane kö la götrane celë?”
34 Matre Iesu a sa jë koi angatr ka hape: “Ije falawa i nyipunie?” Öni angatre jë hi: “Seven, nge hetre itre neköi ie fe.”
35 Ame hnei nyidrë hna upe la ka ala nyimu troa ilapany hune ihnadro,
36 nyidrëti a xome pi la sevene lao falawa me itre nekö ie, me thith, me thupathupa, me hamëne kowe la itretre dreng, nge itretre dreng kowe la ka ala nyim.
37 Ame hnei angatr asë hna isa xeni mej, nge hna hleme hmaca ju kö la sevene lao trenge munën ka tiqa.
38 Hna e la 4 000 lao trahmanyi ka xen, nge tha e ju kö la itre föe me nekönatr.
39 Matre, thupene la hnei nyidrëti hna upe la ka ala nyim, nyidrëti a elë jë hune la sine he me ea kowe la nöje Magadala.
Itre mekun ecahu fen
^ Kola qaja la ketre hna majemine kuca matre troa hmitrötr, me porop.
^ Maine, “methinën.”
^ Kola qaja la nyimu aqane kuci ngazo thenge lo qene Geres, por·neiʹa. Wange ju la HQP.
