Mataio 16:1-28
16 E cili, traqa pi hi la itre Faresaio me itre Sadukaio troa pane tupathi Iesu, me sipone la ketre hatrene qa hnengödrai.
2 Öni Iesu koi angatr ka hape: “E hejiheji hë, epuni a qaja ka hape, ‘Goeëne caha hnengödrai kola madra palulu,* tro ha loi drai elany.
3 Ngo e hmakanyi hë, epuni a hape, ka troa ngazo la drai, ke goeëne la hnengödrai kola madra palulu nge hetre iaw.’ Atreine hi nyipunie wangatrehmekune la pengöne la hnengödrai, ngo thatreine pe nyipunie wangatrehmekune la itre hatrene la hneijine celë.
4 Xötre ka ngazo nge ka tha nyipici* koi Akötresie a treqene la ketre hatren, ngo casi hi la hatrene koi nyipunie a kolo hatrene i Iona.” Thupene lai, Iesu a tro pi me hutrö koi angatr.
5 E cili, hnene la itretre dreng hna ea pi kowe la ketre götrane la hneopegejë, ngo thëthëhmine pë hë angatre xomi falawa.
6 Nge Iesu a qaja jë koi angatre ka hape: “Wange pala kö nyipunie la levene ne la itre Faresaio me Sadukaio.”
7 Matre hnei angatre hna itö iqajakeune ka hape: “Tha hne së kö hna hane xomi falawa.”
8 Atre hnyawa hi lai hnei Iesu, matre öni nyidrë: “Hnauëne laka nyipunie a itö iqajakeune ka hape, pëkö falawa? Itretre lapaun acon!
9 Hapeu, tha trotrohnine pala kö nyipunie? Thëthëhmine hë nyipunieti lo ala 5 000 lao atr hna ithuan hnene hi lo faifi lao falawa? Memine lo etrune la itre neköi treng hnei nyipunieti hna hleme hmaca?
10 Nge tune kaa fe lo ala 4 000 hna ithuan hnene hi la sevene lao falawa, memine lo itre trenge ka tru* hnei nyipunieti hna hleme hmaca?
11 A hnauëne laka, tha trotrohnine kö nyipunie ka hape, tha eni kö a qeje falawa? Ngo wange pala kö la leven ne la itre Faresaio me Sadukaio.”
12 Ame hnei angatre hna trotrohnine laka, tha Iesu kö a hmekë angatr göi levene ne falawa, ngo göi itre ini hna hamën hnene la itre Faresaio me itre Sadukaio.
13 Ame hë la angatr a traqa e Kaisaria Filipi, hnyinge jë hi Iesu kowe la itretre dreng ka hape: “Ame kowe la itre atr, ke, drei la Nekö i Atr?”
14 Öni angatr: “Hnei itre xan hna qaja ka hape, Ioane Bapataiso, öni itre xan, Elia, nge itre xan, Ieremia, maine ketre perofeta hi.”
15 Nge öni nyidrëti koi angatr: “Ngo drei ni koi nyipunie?”
16 Öni Simona Peteru ka hape: “Nyipëti hi la Keriso, Neköne la Akötresie ka ej.”
17 Matre öni Iesu jë hi: “Manathithi hë eö, Simona nekö i Iona, ke tha atr* kö la ka amamai eö, ngo Kakati pe e hnengödrai.
18 Eni hi a qaja hnyawa koi eö ka hape, eö la Peteru, nge hune la etë ka catre celë, tro ni a acile la ekalesiang, nge tha tro kö a mene la hua* hune ej.
19 Tro ni a hamë eö la itre kii ne la Baselaia ne hnengödrai, nge ame la itre hnei eö hna acatren* e celë fen, tre hna acatrene fe hë lai e hnengödrai. Nge ame la itre hnei eö hna seng e celë fen, tre hna senge fe hë lai e hnengödrai.”
20 Ame hnei Iesu hna wathebone koi angatre troa qaja trongëne ka hape, nyidrëti hi la Keriso.
21 Qaane ju hi lai, Iesu a qeje pengöne koi angatre ka hape, tro nyidrëti a pane tro Ierusalema, nge e cili, tro ha axösisi nyidrë hnene la itre qatre ne la nöj, me itre tane i angetre huuj, me itretre cinyihan, nge tro angatr a humuthi nyidrë, nge ame ngöne la hnaakönine drai, troa amele nyidrëti hmaca.
22 Ame hnei Peteru hna nango hën aconyi Iesu, me pi ameköti nyidrë me hape: “Waea Joxu, the nue nyipëti kö troa akötr. Tha tro kö a traqa lai koi nyipë!”
23 Ame hnei Iesu hna thinge trö Peteru me hape: “Eö e hutröng Satana! Eö a pi sewe ni, ke tha eö kö a mekune la itre mekuna i Akötresie, ngo mekuna i atre pe.”
24 Matre öni Iesu jë hi kowe la itretre drei nyidrë ka hape: “Maine tro la ketre atr a pi xötrethenge ni, loi e tro angeic a pane xele angeice kö, me ajöne la sinöe ne iaxösisi* i angeic, me xötrethenge ni fë o drai pala hi.
25 Nge ame la atre thele troa amele angeice kö, tre tro ha luzi la mele* i angeic, ngo ame la atre nue la mele i angeice pi ni, tro hë angeic a mel.
26 Ke nemene la eloine kowe la atr e tro angeic a hetrenyi la fene hnengödrai asë, nge luzi pë hë la mele* i angeic? Nge nemene la nyine tro la atr a hamën nyine nyihnane la mele i angeic?
27 Tro la Nekö i Atr me itre angela i angeic a ce traqa, memine la men ne la Keme i angeic. Nge e cili, tro angeic a nyithupen kowe la itre atr, thenge la isa thiina i angatr.
28 Ngo eni a qaja hnyawa koi nyipunie laka, tha tro kö la itre xa ka cil e celë a hane mec, e tha hna pane öhne kö la Nekö i Atr a kola traqa ngöne la Baselaia i angeic.”
Itre mekun ecahu fen
^ Maine, “tho.”
^ Maine, “ka nyixetë.”
^ Maine, “trenge kemej.”
^ Maine, “ijöne me madra.”
^ Ger., “Hedris.” Wange ju la HQP.
^ Maine, “hna sil.”
^ Wange ju la HQP.
^ Maine, “u.” Ger., psy·kheʹ. Wange ju la HQP.
^ Maine, “u.” Ger., psy·kheʹ. Wange ju la HQP.
