Mataio 17:1-27
17 Thupene la sikisi lao drai, hnei Iesu hna hën aconyi Peteru, me Iakobo me Ioane, trejine me angeic. Nge angatr a ce elë jë hune la ketre wetr ka draië catr.
2 E cili, ketre pengöne pi hi nyidrë qëmeke i angatr, me hudrume la qëmeke i nyidrë tune la jö, nge ame la itre iheetre i nyidrë, tre kola hudrum* tune la lai.
3 Nge hanawang! mama pi hi Mose me Elia, nge nyidroti a ithanata me Iesu.
4 Matre öni Peteru koi Iesu ka hape: “Joxu, ka loi ke eahuni hi la, nge maine aja i nyipë, tro ni a acil e celë la köni itat,* casi koi nyipë, casi koi Mose, nge casi fe koi Elia.”
5 Angeice pala kö a ithanata nge hanawang! uti pi qa hnengödrai la iaw ka mel, me hakuthi angatr hnene la iahnue ne ej. Nge hanawang! Kola ewekë qa hnine la iaw, me hape: “Hane hi la Nekönge hniminang, eni a madri nyën. Drei nyëne ju!”
6 Ame la kola drenge lai hnene la itretre dreng, angatr a thili ju, ke atraqatre la xou i angatr.
7 Matre hnei Iesu hna easenyi angatr, me ketri angatr me hape: “Cile jë, the xou kö.”
8 Nge ame hë la angatr a gala draië, pëhë atr, ngo Iesu pe hi.
9 Thupene lai, angatr a ce uti pi qa hune la wetr, nge Iesu a wathebo angatr ka hape: “The qaja pi kö koi ketre la hnei nyipunie hna öhn, uti hë la troa amelene hmaca la Nekö i Atr.”
10 Ngo hnyinge jë hi angatr koi Iesu ka hape: “Nga hnauëne laka, itretre cinyihan a inine ka hape, tro Elia a traqa pa?”
11 Sa jë hi Iesu ka hape: “Nyipici hi, tro kö a traqa hnei Elia, nge tro angeic a wenë amekötine la nöjei ewekë asë.
12 Ngo eni a qaja hnyawa koi nyipunie laka, qa i Elia ha la, ngo tha hna wangatrehmekunyi angeice kö, matre angatre pë hë a kuca jë koi angeice la aja i angatr. Nge ketre tune mina fe, tro angatr a akötrëne tune lai la Nekö i Atr.”
13 Haawe, trotrohnine ju hi la itretre dreng ka hape, nyidrëti hi a qeje Ioane Bapataiso.
14 Ame hë la angatr a easenyine la ka ala nyimu, traqa pi hi la ketre trahmanyi a thili me hape:
15 “Ekölö hi ni Joxu, pane wange ju la neköng* ka ön. Ame itre xa ijin, nyën a kei xan kowe la eë me kowe la tim.
16 Nge hnenge hë hna tro sai nyën kowe la itretre drei nyipë, ngo thatreine kö angatr aloinyi nyën.”
17 Öni Iesu jë hi ka hape: “Ekölö hi ni nyipunie, xötre ka pë lapaun nge ka thiina ka qali, tro ni a ce me nyipunie uti hë eu? Nge tro ni a xomihni nyipunie uti hë eu? Nga awi nyëne jë koi ni.”
18 Ame hnei Iesu hna helëne pi qaathei nyëne la dremoni, nge loi hmaca pi hi la nekönatr ngöne lai hawa cili.
19 Hnene pë hë la itretre dreng hna tro troa ithanata casi me Iesu, me hnyinge ka hape: “Hnauëne laka, thatreine kö huni helëne lo lai dremoni?”
20 Sa jë hi Iesu ka hape: “Hnene laka, co hi la lapaune i nyipunie. Ngo eni a qaja hnyawa koi nyipunie laka, maine tro la lapaune i nyipunie a tune la itine sinapi, tro nyipunie a qaja kowe la wetre celë ka hape, ‘Kötre jë qa lai kowe la,’ nge tro eje lai a kötre pi. Nge eje hi, pëkö ca ewekë hna troa thatreine kuca hnei nyipunie.”
21 ——
22 Nge ce angatre pala kö e Galilaia la Iesu a qaja koi angatre ka hape: “Tro ha nue la Nekö i Atr kowe la ime ne la itre atr,
23 nge tro angatr a humuthi angeic, nge ame ngöne la hnaakönine drai, tro ha amele angeice hmaca.” Ame hnene la itretre dreng hna hleuhleu atraqatr.
24 Ame hë la angatr a traqa e Kaperenauma, hnene la atre hle mani* thatraqane la uma ne hmi hna easenyi Peteru me hnyinge ka hape: “Tro fe kö la atre ini nyipunie a hane hamë mani thatraqane la uma ne hmi?”
25 Öni angeice jë hi: “Öö.” Ngo ame hë la angeic a lö kowe la uma, Iesu a canga hnyinge jë koi angeic me hape: “Hapeu Simona, itre joxu a kapa qaathei drei la mani hna athip memine la hna kuiën qa ngöne la hna salem? Qaathene la itre nekö i angatr maine qaathei itre trenyiwa?”
26 Matre, ame la Peteru a sa ka hape: “Qaathene la trenyiwa,” öni Iesu hmaca jë hi ka hape: “Haawe, nga pëkö hna athipi kowe la itre nekön.
27 Ngo wanga troa hetre iwesitrë me angatr, tro jë kowe la hnagejë, nge ea ju la pane ie. Thupene lai, fe pi la që ne ej, nge tro eö a öhne e cili la ketre mani.* Haawe, tro fë jë la mani cili koi angatr göne lo hna athipe koi nyiso.”
Itre mekun ecahu fen
^ Maine, “wië kaca.”
^ Maine, “uma maano.”
^ Maine, “nekönatr trahmany.”
^ Ger., lue drakeri. Kola easenyi kowe la thupen ne la atr ka huliwa koi lue drai.
^ Ger., Tétradrachme, kola easenyi kowe la thupen ne la atr ka huliwa koi foa lao drai.
